（超長文，慎入）
永年，是你嗎？
聽說你進駐新城市，我有點愕然，畢竟那不是你的風格。
還記得那一年，我在元朗與你相遇，你就似一個充滿幹勁的小伙子，穿着一條殘舊的灰色西褲，上搭一件白背心，騎在鳳凰牌單車上，出現在我眼前。當然你是一間車仔麵店，但你留給我的就是如此這般的一個勤懇形象。
由一間鋪變成兩間，第二間鋪同第一間舖一樣，都係完全冇裝修，簡陋中顯出你嘅實力，因為你既美味而價廉，大家都唔介意坐摺櫈，亦都習慣一個人排隊買食物，另一個去等位。因為買車仔麵嘅人龍實在太長，所以通常買完麵之後，上一個客人都食完就可以坐低。那年頭你是如何的瘋魔了整個元朗！當然區外人如我，也會長途驅車前來；最迷信的香港人，也不介意你附近就是一間棺材鋪。就是為了那一口，吃得大汗淋漓、淋漓盡致由外濕到內，再由內濕返出外嘅又熱又辣嘅車仔麵！
雖然2016年嘅時候，你已經開始着恤衫，執得齊整咗。 但係當時三餸加個油麵都係$33 ，可樂都只係$8。我仲記得嗰個好骨子嘅黑色托盤，上面印有永年士多兩個字！
今次再見你，竟然在新城市。你穿上了不太稱身的西裝，涎著臉，似在努力地告訴周圍你有多長多久的歷史！然而你幾時賣過蛋撻、你幾時賣過麵包，記憶中你更冇賣過鐵板牛扒，但係點解餐牌上通通入晒你數！你唔係叫做永年士多咩，點解而家變咗做香港永年車仔麵茶冰廳！
香港人都知道，茶餐廳係冇豬皮蘿蔔嘅，而車仔麵亦都唔會賣蛋撻麵包嘅！茶餐廳聽過，冰室都聽過，就係未聽過茶冰廳！咁，一切所謂嘅歷史悠久，就一目了然嘞！
豬手係好味嘅，雞翼都好味，蘿蔔唔錯，但係點解魷魚冇鬚，而豬紅切到咁細粒！個湯，我真係笨，竟然叫咗蕃茄湯，唔係介意加嗰$3 ，而係咁樣我就唔知你個湯有冇走樣，不過你最殺食嘅辣汁，記憶中係啡色嘅，點解變咗紅色！
埋單百幾蚊，仲加一添！我真係想問，連落單都係我自己做，你俾過啲乜嘢服務我，點解要收服務費！
永年，這些年，錢應該賺到了，但，永年，你還是永年嗎！
真係，貪求思慕只因痴，一切眼淚追憶都只係徒然！
#何嘉麗callmegaga #何嘉麗
#為食路上 #永年士多 #香港永年車仔麵茶冰廳 #車仔麵 #茶餐廳 #冰室
鳳凰牌單車 香港 在 香港平價二手各種單車買賣、租借- 全新，上海牌鳳凰牌單通 的推薦與評價
全新，上海牌鳳凰牌單通，26 吋震撼價: $880. ... 香港平價二手各種單車買賣、租借. 2016年7月8日. 全新，上海牌鳳凰牌單通，26 吋 震撼價: $880. ... <看更多>