請即行動！
同一招式，係唔可以用喺黃金聖鬥士身上兩次！
今天有人行街食飯，點知又被黑社會查手機，又係聲稱懷疑你部手機偷番嚟，要你解鎖。你唔解鎖，就老屈你。當事人最終力保不失，但大家應該要喺手機裡做好防範。
有兩個方法：
一，設定鎖機畫面嘅圖片用自己個樣，又或者喺鎖機畫面有自己嘅名字等資料。
我曾經都係用呢個方法，但有時出街，個電話掛喺心口，見到自己個樣條條揈，輕度尷尬，所以我改咗用另一個方法。
二，設定醫療記錄
用 iPhone 嘅話，打開「設定」->「健康」->「健康個人檔案」->寫上自己個姓氏同名字。其他資料按需要去寫，唔寫都得。
之後去醫療檔案，呢點極為重要，喺「敏感及過敏反應」呢一欄，寫低：「請向本人的家人查詢」。
之後在鎖機的情況下，不同型號的 iPhone 有不同的方法。iPhone X 之類，可以同時按著「大聲按鈕」及「開關按鈕」，會出現「醫療檔案」選項，往右掃一下，即可以看到自己的記錄。iPhone 7 之類，則是連續五次按下「開關按鈕」，再選「醫療檔案」。熟習相關操作，若然下次有黑社會想老屈你撻手機，你就唔需要解鎖，直接可以喺手機度開出你嘅資料。
至於 Android 手機，方法簡單，我估㗎咋，因為我無。自己搵搵點 set。
另外，點解「敏感及過敏反應」要問屋企人？
點講好呢，因為過敏情況真係好複雜，你記唔到嘅話係真係一啲都唔出奇㗎，萬一入咗醫院，咁醫生同護士唔一定可以打電話話畀你屋企人知你入咗院，但係如果要打針或消毒，都要問下你有冇過敏，你唔記得，咁就只好打去問你屋企人囉。
過敏真係可大可小㗎，唔打電話幫你問清問楚有冇過敏，咁點用針，點用藥先啊？係咪要講到咁明白呀？
就係咁，快手做好，做好先瞓覺，各位早抖！
後加：
大地上的資訊保安 提及：
「Android 嘅方法可能視乎 version 會有唔同（太多 version 🤦♂️）
Android 10 的話應該喺 Settings 設定 > About Phone 關於手機 > Emergency Information 緊急資料 > Medical Information 醫療資訊
記得揀埋 Show when device is locked 在裝置上鎖時顯示」
大地重有其他建議，傳送門 👉： https://www.facebook.com/InfoSecOnGround/posts/1242439769269028
* * *
Pazu 薯伯伯開通了 Patreon 頻道，謝持認同我的態度及觀點：http://patreon.com/pazu
