【我冇諗過我最後都會「入坑」睇《#大叔的愛》】
#長文慎入
真心我唔知幾多年冇睇過港劇，對上一次應該係《天與地》，又咁啱都係有黃德斌。有時唔係唔睇港劇，而係作為影迷，你一星期五晚分分鐘夜晚都喺戲院，或者一套或者兩套直落，散場返到屋企都點幾。唔理你viutv又好，（你仲係會睇時期嘅）CCTVB又好，你都唔會喺屋企，所以點都追唔到，極其量食飯屋企人睇我又望兩眼，真係「追」就冇。到我開始追劇，已經變咗睇HBO同Netflix。
坦白講，事前身邊人係咁叫我追《大叔的愛》，我知好有話題性好好睇但都的唔起心肝睇，而且我同期係睇緊《Loki》、《American Horror Stories》、《全裸監督》、《恐懼大街》（我當佢係劇），再加埋正場嘅戲，我根本唔會有時間插多一套，本身我唔係好有興趣必睇嘅劇。最後我因為個好癡線私人原因走去睇，初頭都冇乜認真睇，陪太子讀書心態，一路開住一路做自己嘢，點知睇睇吓都投入埋，將我全部追緊嘢放埋一邊，仲睇到半夜三更，當年一日睇一季《紙房子》都冇咁癲。
冇睇過日劇做唔到對比，但就咁用港劇嚟睇，我諗Viu係成功在一個好大膽嘅嘗試同肯去創新。唔止係香港首套BL劇集咁簡單，拍法都將傳統肥皂劇婆婆媽媽三角戀（當然呢套唔止三角戀咁簡單）拍得咁輕鬆可喜，有搞笑有感人位你仲會想去追看佢點樣發展、代入到角色內心世界，用半幽默半浪漫方式包裝，唔係好老套單純典型鬥氣冤家最後一定一齊套路；將日劇嘅七集篇幅撐到十五集，都融入到好多local元素，最少你唔會覺得佢係撐緊，亦唔會有地域文化差異「水土不服」情況。
大量實景如大澳紅橋（大澳居民往後幾星期辛苦了）、赤柱海濱、尖東天橋、9號碼頭等等，完全俾你感受到係一個香港實景發生故事，都可以融情入景。兩位主角嘅屋企唔係CCTVB式「全香港都係有錢人式大宅」，典型年輕couple式style都會令你睇得好舒服，你或者身邊朋友間屋都係咁，唔係個個有天台有露台有花園，「貼地」係一樣有共鳴要素。
或者呢一點可能要歸功於日劇原作，但後天改篇都成功在冇去妖魔化同性戀。喺CCTVB劇集入面，同性戀唔係搞到乸型，就九成九係幕後變態兇手（仲要一出場你就知道佢係「奸」果種），然後句句對白都會出現「死基佬」之類形容。套劇嘅同性戀角色可以拍到好純愛，亦唔會刻意去物化男性或女性，都係同你同我一樣咁樣生活，甚至令你唔係同性戀都可以代入到個角色。作為一套同性戀題材，香港電影入面唔係冇，但大部份都拍得好壓抑好悲情（其實一如西方作品），呢套極其量會令觀眾感到虐心，絕未去到要生要死地步，我諗唔止係劇集，連香港電影都可以借鏡。
網上有人對比田田同金城安，我諗都係套劇抵讚一環。要設計略帶傻氣嘅搞笑角色，係要誇張嘅，但唔駛太過火，適時誇張適時都可以俾返少少貼地、人性化感覺佢。當你睇金城安會睇到覺得呢個人係智障，田田你極其量會覺得佢係傻吓傻吓，亦有好嘅一面，絕對唔會覺得佢係智障。
要宣傳一套劇集，唔係一味靠洗腦式東張西望或者係咁上綜藝節目，再整個自嘲式See See 乜乜乜就得。今時今日要make noise唔係自己圍圍喂，要喺網路上爆紅，先可以做到「現象級」盛況。君不見Disney+每套星戰同Marvel劇集可以做到「全球現象」，集集一上架冇幾個鐘就全球自自然然有人討論，當然你可以話佢係Marvel係星戰點同，但前期後期宣傳功夫，點樣善用各種social media、做live、做訪問、微量劇透，率先帶動到話題同期待度（當然都有盡天時地利人和夾到最當紅組合），一切自己慢慢推出嚟，適時做倒數，再搵劇中演員打破四面牆同大家做唔同交流。今時今日宣傳係要咁樣玩，好嘢自會有口碑帶動，唔駛洗腦、唔駛要幕後諗爆頭都諗唔到爆點，然後同一篇宣傳稿同一堆問題問幾廿次：「阿邊個同邊個幕後有咩趣聞先？」喂冇人想知囉。唔係話Viu已經去到Disney+級數，但真心同一星期香港social media上討論度，《大叔的愛》結局篇絕對拍得住《Loki》大結局，甚至有大量改圖cap圖，市場推廣絕對係成功一環。
演技方面我唔刻意讚好讚差，應該點講都會俾人圍到我要執page，真心最鍾意係黃德斌嘅演出。喺CCTVB嘅佢，你就覺得佢係一個「男一」，冇乜特別，但估唔到佢可以咁可愛、都可以放下身段去演呢啲角色（初頭只係覺得佢一出場有笑位，最後呢幕堅心痛），睇到我驚佢會唔會從此定咗型，做唔返一貫硬朗形象😂
當然仲有簡慕華個角色，男人窮一生遇到一個咁好女人，應該係幾生修道積福。
前日我係癲到搭咗程短的士返屋企睇《Loki》大結局，今日喺車上面已經睇緊。
當然，《大叔的愛》絕對未去到完美地步，有好多沙石、進步空間都唔少，但作為一套肯創新、肯扭轉傳統價值觀嘅題材，確係值得支持，個人覺得點都好過隔離台晚晚嗌交仲講大男人大女人嘅《寶寶大過天》。#利申屋企人晚晚睇唔係我睇 #啲對白聽到都覺煩
《大叔的愛》觀後感全文可看留言連結。
#我原本諗住寫幾句點知愈寫愈多
‼️電影網店全新貨品已上架，低至$5起，快啲嚟搶購啦：https://bit.ly/3qLPkpk
【Patreon加強版】尊享優惠、更多深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei
【IG請follow】www.instagram.com/travelerwithmovie
【MeWe請Follow】mewe.com/p/travelerwithmovie
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
黃viu日劇 在 Viu Hong Kong - Home | Facebook 的推薦與評價
雖然小編都覺得「鑽石與黃金唔及我一片真誠與真心」， 但送呢種「補藥」畀媽媽能夠令佢笑得咁開心，不妨參考一下 《我獨自生活》逢周五深夜上線即上黃Viu免費 ... ... <看更多>