【龔成問答信箱】(Q19441-Q19460)
Q19441:
老師,我時常記着「當別人恐懼時我貪婪,當別人貪婪時要恐懼」,我明白這個道理。市場高位時,旁人不停賺錢時更加要克制;反之,耐心待跌市時別人恐懼時就是開始入貨的好機會。
我深深明白亦非常同意應該要長線持有優質股。但是如果明知道熱潮後有回落,那是不是需要在高位先放出然後待回落再買??
這一點有時真的想不通⋯⋯⋯⋯⋯
謝謝解答!
龔成老師:
我地原則上,是長線持有股票,同時集中持有優質股,這點是不變的。
當然,有時當佢處於貴的時候,我地都有可能賣出,但我不建議全部賣,只建議賣出部分,因為當你賣出優質股後有機會買唔翻的!
所以,我建議點都要有優質股在手,就算貴,都只賣部分,盡量不要賣全部。
你這一句:「我深深明白亦非常同意應該要長線持有優質股。但是如果明知道熱潮後有回落,那是不是需要在高位先放出然後待回落再買」。
最大最大的問題,就是「明知」。
真的是明知嗎?
好多人會估大市將會升或跌,但最後都估錯,記住,唔好有「明知會跌」這總想法,好危險。
就算這刻真的貴,股市可以再貴,如果企業價值不斷上升,之前的貴過2年就可能合理。
港交所由幾蚊上市,不斷創新高,好多人在當中都認為「明知佢會跌,要盡快賣出」,佢地錯過了賺100倍的機會。
有D香港人,在過往樓市不斷上升時,因為「明知」樓市會跌,所以賣出自住樓,到最後永遠買唔翻。
------------------------------------------------
Q19442:
你好龔sir,我為左自己定下了個人目標為三年後有50萬資產
現有10萬元資產包括:
領展 300股
盈富 1500股
中國生物製藥 2000股
眾安 400股
$10000 現金
每月可儲$5000-$7000
1. 我點做先可以三年後完成目標,係米無咩可能做到?
2. 而家有既股票係米太散? 洗唔洗集中一點?
3. 我想問新手應該睇股票勝經先定80後百萬富翁先?
多謝龔Sir
龔成老師︰
1) 以恆指平均年回報10%計,月儲$7000 + 本金10萬,大約可增值至40萬。
但由於3年唔算長時間,會有機會出現波動,令你最終回報的不確定性增加,你要知這個風險。
2) 唔算散,你每月儲$7000可先用一半做月供。餘下一半和1萬現金,就等大跌市。
你可考慮用$2000供盈富(2800),再加一隻潛力股$1500,好似安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)都可以。
3) 其實初學者,我建議2本都要睇。
另外想提你,眾安(6060)這類股,好難玩的,因為多年都在燒銀紙,就算近年才初見盈利。但都仍未能確定長線情況,這類股要估值好難。
因此,股價一定好波動,所以組合中不宜有太多。
------------------------------------------------
Q19443:
HI 龔成
我有一個比較複雜既證券戶口問題。
我本身持有以下股票
1177 2手
788 6手
2018 10手
883 6手
1398 13手
5 6手
3 5手
405 5手
全部都捱價中,一直想溝貨,但係現用的倉有存倉費及最低佣金費。雖然這些費用不算多,但長遠就以存倉費一年己被收300,我覺得不合理,假設長期持有,同時每年又被扣300,這些也是成本。同時,溝貨的話又被收最低佣金費。
我見有別間收費是不設最低收款額及存倉費,我打算在新的戶口溝貨,一心以現金儲有資產這信念。
以下我遇到的情況,應該怎樣好?
1)全部股票轉倉。蝕轉倉的手續費。
2)舊倉KEEP住,新倉溝貨。慢慢減持舊倉。
龔成老師︰
1) 其實存倉費佔整體成本好少,我唔會特別理。而我自己每年買賣次數係好少,優質股我買完就長放係度,所以佣金費高低影響唔大。
如果是我,就無必會做轉倉這個動作。
2) 你分開2個戶口,反而令整體成本多左。如果你真係想轉,最好一次過處理,選定以後用邊個。
另外,我想清楚"溝貨"與"分注"的分別。溝貨指是愈跌愈入,同時不理企業質素,不理自己的設定金額,盲目去入。
分注則是「一早定好買入策略,一早定好本金總數,並以有策略的模式進行」。
如果你係"分注"的話,你可因應平貴和質素,去進行。但若果係"溝貨",就不是再入貨,因為再平,都只會令你增加風險。
------------------------------------------------
Q19444:
想與你分享一個好消息,剛完成月結,剛好衝破一百萬關口,而且比30歲的目標還提早了半年達成,多謝你所教的方法,亦都有幸成為你第N+1個達成這個目標的學生。
為了第二個一百萬,思考了下列的問題,希望可以指引一下我
1.第二個一百萬的目標設定為三年至三年半是否合理?第一個一百萬要5年,用乘的方法的話,第二個所要的時間假定為第一個的60-70%。
人工17K+3-4K pt(將來半年會上堂,預計減半)每月可儲10K。
2.資產分配方面,現金有30萬,股票70萬,其中包括一些之前買落的蟹貨(現值都有約4萬),理智上明知清左佢地應該好些,總是不肯下定決心,甚至[陪]到我上到100萬...。
雖然黎緊會清左佢地,可是不夠理智這一點將會是接下來要改善的地方。要如何才能好像你這樣呢?
3.購置物業方面,因人工不高,按揭不會有太多的成數,也暫沒有購買的必要,所以暫不考慮。
不過,只要人工不高,便等於要動用大部分現金作首期才能置業,但樓價會同時上升,這便變了死胡同或者要起碼到150-200萬才能考慮?
多謝你。
龔成老師:
恭喜你!我記得當年我月結計到自己身家超過$100萬,都好開心的!第一個$100萬是最開心!
因為第一個是最難,之後反而錢滾錢的力量較大,會更加順利。
1)合理,但當然無絕對的答案,你只要保持進行之前所做的事。同時,由於你現時資金大左,每1%的回報差都會大左,因此,你應該投入更多時間去研究股票,提高回報率。
2)你要理性,這是成功投資者好重要的因素。
我會以更長遠的角度分析,例如5年、10年,現有資產怎樣幫我建立更多財富,如果該股的增長力不強,即是無作用,那就應該盡快賣出,轉其他。
唔好比過往的所謂買入價,影響左你,最重要分析佢將來會增值多少。
3)可以到近$200萬先考慮,因為股票的增長力較高,你利用股票增長去追物業,比起太急投資物業,會較好。
------------------------------------------------
Q19445:
早晨龔sir, 我就黎睇完你既股票勝經, 有個問題想請教你。
你話當股市越熾熱,個個都買股票貪婪既時候就係我地要遠離股市既時候。你覺得而家美股係咪呢個情況?我睇左好多間公司都係2020年3月後直線上升咁,身邊好多朋友都開始炒美股。
我暫時仲係增加投資知識既階段,未敢入場住,但見隻隻都升到飛天. 你覺得我應該點做
龔成老師:
2020年3月,當時是恐慌期,正正是《股票勝經》所講的買入時機,你可以睇翻書中的要點,因此,當時不少股都處平的狀態。所以,你會見到股價不斷向上,這是不少市場都有這情況。
你最重要是分析平貴,優質。現時的市況,有少少貴,部分股過熱,因此你應該投資一些無咁熱的股。
同時,如果你完全無貨,一直等,又不建議,所以,最簡單是投資一些指數基金,如果你睇好美股,可投資VOO,追蹤標普500指數,你分注入就得。
點解我成日叫人分注入或月供,就是平均買入價風險,同時可以避免一直等待。
------------------------------------------------
Q19446:
龔成老師,你好!~依幾個月開始follow你facebook,之後買左80後百萬富翁黎睇,發現自己起步得太遲~
我30幾歲,已婚有一子,家庭月收入約80k,有一自住物業,月供18k,仲有約400萬先供完~
另外係XX買左每月派息基金,每月約派息3-4000,打算用依4000蚊黎月供股票,依個做法可行嗎?
1. 如果供2000盈富,1000領展,1000雅生活,依個組合ok ma?
2. 我地儲多二年錢,應該可以買第二層樓細價樓收租,用D租黎供樓,會大風險嗎?
3. 我自己每月儲到10k,應儲起黎作第二樓層首期,定點樣運用好呢?
4. 我地本身已買保險,現金儲備應該有幾多先叫穩健呢?
謝謝老師,希望可以得到你解答
龔成老師:
雖然方法不是不可,但未必是最好的做法,但如果你認為這總買派息基金,然後月供股票的方法,較適合你的風險度,都可以進行的。
其實,當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
1)可以,都是有質素的,可長線。
2)其實唔需要太急買第二層,這動作會令你財富太集中在物業類,因此可等你有較多財富才進行這動作。希望做各類資產都有,而不是只集中在物業。
3)可以投資股票,令財富有更好的增長。
4)最少3-6個月的基本開支。同時要留部分資金等投資機會。
------------------------------------------------
Q19447:
老師,想問下 中電 算係收息股定平穩增長股 同埋 我月供計劃 有冇好太問題
4000元2800
1500元0823
1500元0002
求老師指點
龔成老師:
中電(0002)是收息股,加少少增長力。
你上述月供的,都是有質素的,可以長線保持進行,是平穩增長模式,當然增長力就不算好強。
另外,建音你同時留有某部分現金,等機會投資。這樣並行的策略較好。
------------------------------------------------
Q19448:
龔成老師我今年33歲,自从睇左你FB先知道,長線的重要性同埋我依家睇緊年報勝經。我手上有3隻股
中國鐵塔(788)5手@1.45
中興通訊(763)1手@18.9
中國移動(941)1手@47.7
手上有現金3萬,想買其他股,同埋月供$2000的話,應該買晒盈富基金嗎?我目標在1年儲多20萬,謝謝
龔成老師:
先講你上述股票,太過集中在同一類別,你會出現集中風險。上述股不是無質素,你可以持有,但之後最好增加其他類別的股票。
手上的資金$3萬,暫時唔好心急動用,等大市回翻D先用。
另外,當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你投資盈富(2800),可以,但應該同時投資其他潛力股。你33歲,仍是增長的時期。
------------------------------------------------
Q19449:
龔成老師,我看完你的「80後百萬富翁」和「股票勝經」,其他作品也準備看,想問1928受新冠肺炎影響
賭收咁差都30幾蚊,現價算貴嗎?想下個月開始做月供,還是再等佢跌下?
龔成老師:
金沙(1928)現價合理。當我地投資及計算企業價值時,會著重長期的因素。
因此,金沙中短期雖然不利,但疫情總會過去,因此你現時開始月供,無問題。當然,你不能用盡資金,要同時留有現金。
------------------------------------------------
Q19450:
老師你好 今年26歲由3年前開始睇你既書 搵到覺得識合自己既方向 備戰半年到就開始入市
當中經歷中美貿易戰同COVID-19 賬面一度出現虧損 但是有緊守到價值投資既準則 現在賬面總值已經升值一倍有多 突破人生第一個一百萬
目標係一直享受複利既好處直到財務自由 題外話係比起巴菲特 我更中意彼得林區既書
龔成老師:
太好了!我記得我當年有第一個$100萬都好開心!
你保持進步就得,之後的錢會以更高速成長。
我地投資,唔好太著重短期回報,一定要睇長。
其實巴菲特的書都是其他作者寫的。佢兩個都是高手,都值得學習,可以配合運用的。
------------------------------------------------
Q19451:
老師,想同你分享好消息,按照進度,我同女朋友將會在兩個月內(市況好的話一個月)達成100萬淨資產的目標!
如你所講,知識同回報成正比,你嘅12本大作我都有睇晒,獲益良多!
我運用書上嘅投資心法,嚴選幾隻優質潛力股作長線投資。另外我和媽媽建立的退休組合亦因為比亞迪爆升而賺了不少,一年半已累積了23萬股票資產。
我已經當你係半個師父
雖然我仲未抽到時間上你堂
龔成老師:
太好了!
我相信你地都付出了一定的努力,無論是儲錢,還是增加知識,這是你地應得的。男女朋友能有共同目標,往往效果會更好,你地可以再定出不同的共同目標。
總之,保持知識增長,財富都會不斷增加!
------------------------------------------------
Q19452:
老師~我依家睇緊你既一本年報勝經,學緊如何睇主席報告分析股票,但佢有時一d文字藝術都要分析下。
我有個關於溝貨既問題想問下,我有個朋友之前有買3662奧園健康,好似9月嗰陣物管股炒到好勁,佢已經開始入從7蚊開始
之後應該每跌一成佢都會入,依家應該買左10萬元以上3662,之前我有提過佢唔好再買物管股,之後會再跌短時間都唔會升上去。你是否不建議不停地溝貨?
佢諗住如果一升就可以賺得最多,這樣的想法。我自己之前都買左2168,蟹左。我估應該要等一段長時間先會升番,龔sir你建唔建議放左一部分?
之前講到我買左831,佢賣左ok店之後想發展網上平台,依家香港疫情問題會不會對佢有d有利既因素?
龔成老師:
其實溝貨最大的問題是「超出預期的買入金額」,我平時叫人同「分注買入」,原理是先定出一筆資金,這是入貨的上限,然後就分注入,這是整個策略。
而溝貨則是無預算無策略,將買入的資金不斷增加,這當然會提高風險。
同埋,「諗住如果一升就可以賺得最多」,這是有問題的想法。
我經常講,我地要「先想風險,後想回報」,我地要建立一個平衡的組合,同時在資金方法要控制適當,之後先穩中求勝。
佳兆業美好(2168)由佳兆業集團(1638)分拆上市,整體都有質素的,有長線投資的價值。不過規模不大,母公司不算強,因此估值不會太高。
睇翻佢的財務數據,正面,生意與盈利有不差的增長,現金流強,有長線投資。
現價合理,不過行業股價上落較大,要注意風險,同時這股規模唔算大,因此唔值得太大注。
你唔應該以中短期股價去衡量佢的價值,應該以質素,以及這股在你組合的角色,去衡量應該持有多少。
利亞零售(0831)出售香港「OK便利店」業務,作價27﹒9億元現金,交易完成後,擬向股東派發特
別現金股息每股3﹒85元。利亞零售預期出售收益約29億元。
利亞零售表示,便利店業務主要以密集運營模式服務香港市場,並且由於其覆蓋之產品種類繁多,因此涉及相對龐大的物流營運設置以及供應鏈基礎設施。
另一方面,剩餘集團的品牌(聖安娜、Mon cher和Zoff),其實都適合利用互聯網及線上平台,對中等收入客戶群更具吸引力,並且更少依賴物流設置以及供應鏈基礎設施。
但始終賣左資產後,發展只是一般,同埋之後好睇佢資金的運用情況,現價合理區中上部,投資價值只是中等。
要留意,唔好只貪佢特別息,派息後股價會除淨,自然下跌翻,而特別息只有一次,之後唔會有的。
------------------------------------------------
Q19453:
你好,我試問你請教,因我們聾人們用手語溝通或用筆談,我們是新手,所以很開心看到fb多人問你,我找你請教。
不幸被拉我們入群組認識股票,喊叫我們試下,第一次買1376可賺3百幾元,第二次買1953可賺2百幾元,在今年8月25日第三次買1894買入5.43第四天很快下跌
現在0.19,我們傷心了,未沽出,我們心想等升上可拿回。請問有沒有機會等一年?兩年?令1894升上嗎?
買了三股共8萬幾元,也有買了一股27300元
龔成老師:
我建議你們增加投資知識,《股票勝經》適合你們的,同時不要再相信這些投資群組,要有自己的獨立分析能力。
往後投資,要買一些大型的優質企業,長線持有,如不懂,就投資盈富(2800)。
恒益控股(1894)每年的營業額很少,盈利不多,加上中期業績盈利大跌,因此投資價值不高。
這股要升到$1以上,不容易。因為企業本身的增長力不強,無獨特優勢。
------------------------------------------------
Q19454:
你好,想請教:
1)希望你可以簡單講下係用乜嘢方法令自己由百萬富翁變成千萬富翁呢?當中過程用左幾多年時間?
2)請問你現時的現金流,在股息、收租物業/鋪位/車位等,比重係點?因為想知道點取得平衡
3. 2021年,老師覺得邊幾隻有機會成為倍升股呢?
龔成老師:
1)大約用了6-8年時間。主要是投資,股票增值,同時其他收入增加左,我開發了打工以外的收入,過往只靠打工,之後不斷開發其他收入,例如出書、做生意、教班等,當其他收入增加,就亂去銀行工,全力發展其他事業。
2)你預我大部分是股票,之後到物業,餘下是現金。
3)由於2020年新經濟股已有少少熱,所以2021年反而唔好太過進取,加上疫情減去令新經濟股的動力減左,因此應該建立平衡組合。同時留意翻D舊經濟類。
------------------------------------------------
Q19455:
成哥,睇完你本身書,你點睇樓齡?有一些大型屋苑,樓齡快超過40年,你認為我們應該選擇這些樓齡大,但是是大型屋苑還是比較新的半新樓?
龔成老師:
最好的樓齡在30年以下,除了考慮本身維修因素外,你都要考慮若果日後賣出,下一手的買家會怎樣買,如果下一個買家認為質素唔好,自然會影響你物業的價值。
當然,本身的維修質素有好大影響,大型屋苑如果各方做得好,其實市場價值仍會好高。所以,觀察維修保養,有無做大維修,都是要考慮的因素。
------------------------------------------------
Q19456:
老師你好。 我今年32歲
請問我的強積金投資組合,有一半在保證基金,好嗎?
龔成老師:
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你32歲,可以進取少少。你保證基金的比例50%,太高。你可以減少至20%以下,甚至0%。
將資金轉去均衡基金、亞太股票、中國股票。你年輕,可承受風險,可以進取少少,加上複息原理,你年輕增長力高,長遠有著數。
------------------------------------------------
Q19457:
老師,領展,我用 2012-2019年 市賬率 去估值,睇到 1.23-1.316 係 合理價
但 衣家 領展 68.9 (股價)除 77.609 (每股賬面淨值)= 0.89 (市賬率)
但於合理市賬率,甘係咪 代表 係平位?
龔威老師:
如果你記得我上堂講過,領展(0823)比起其他房託較為進取,佢唔單計持有物業,同時會買賣。如果你睇翻第4堂筆記,地產發展商的市賬率,都出現一個持續下跌的情況,不過我地擔心佢谷大左賬面值,而領展都有少少這種情況。
當我地見到有可能出現這情況,市賬率運用時就要小心,可能用的年份只能較近期,或作出一些調整。
而我見你用1.23-1.316,其實有少少高估,最好調低翻15%。
至於你計算方面,用佢股價,除以每股賬面淨值,正確。之後再比較翻合理範圍。所以你方向正確。
------------------------------------------------
Q19458:
龔sir,不好意思,我數學邏輯不太好,在閱讀中遇到問題,盼賜教
第6版 財務自由行/第249頁
不明解以下2點:
1)每月的供款就會為$19700
不應是($270萬 x 1.03利率)/ 14年 / 12月 = $16553?
2)樓價由$300萬跌至$150萬,但資本上卻是由$30萬增值至$150萬?感謝
龔成老師:
1)因為「供款」是包左每月要還的本金,以及要比的利息,即是你每月供樓,其實都是包左這兩個數。你可以上一些銀行的網站有按揭計算機,能計到這數的。
2)因為每月都會還本金,而書的例子是14年就能還清本金,即是完全擁有物業,因此,最後就是完全擁有該樓,而該樓價值$150萬,所以擁有$150萬財富。
------------------------------------------------
Q19459:
成哥,我想問1d關於買樓既問題。
我宜加26歲,儲到31萬,人工$24000,目標下年每月儲大概$15000,如果想2023年置業,仲有3年時間畀自己。
假設人工每年加4%,到2023年應該有$26.x K。如果想買400萬的樓,我預計股票固報(15%/year)連儲到既錢2023年年頭會有80幾萬。加上家人可以借50萬畀我,共130萬。
上網做過壓力測試,如果到時2023年人工有$26.x K,其實我係咪首期要儲到150萬先穩陣買樓?(130萬首期,再借7成按揭(人工要求$26.5k),20萬作後備之用)。
其實我想借足8成,除左擔保人外仲有冇其他方法,因為父母都係做兼職,銀行應該唔接納。
希望成哥可以指點下,等我目標更加清晰。
唔知條數計得岩唔岩?
龔成老師:
大約計算正確,不過到時買入前要再計清楚。
其實最好都是用擔保人,但具體銀行接受擔保人收入的定義,你可以再問清楚,只要有收入證明或有交稅,都會接受的。
另一方法就是提高你的收入,你現時26歲,好年輕,思維可以闊少少,唔好只打算永遠做一份工,可能改變有突破。同埋思維上,唔好比一層樓永遠困死你的青春。
------------------------------------------------
Q19460:
老師想請教
BTC是否最好唔好touch?
龔成老師:
虛擬貨幣,是人為創造出來的,絕對不是「資產」,有沒有真正的價值,如何定義真正的價值,我有相當的疑問。
這些人為創造的貨幣,因為關注度由很少變得大,價格會大升,但這背後是否有真正的支持,我不知道。只能說,投資這些貨幣,投機味好重,可能大賺,亦可能蝕到一文不值,因為,當中有沒有價格,我不知道。
但這不代表佢無價值,佢可能好勁,只是我自己不知佢好勁定好差。
佢長遠的價值,取決於「有多少人用」,即是說,雖然無真實價值,但可以有「交易價值」,如果長遠好多人用,的確可能有高價值。
因此,這些虛擬貨幣,由於我無法作出專業分析,所以,我不會投資。
但如果你分析到佢長遠的交易大,大家都持續關注,就有價值,就值得你投資。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
黎彼得 身家 在 龔成 Facebook 的最讚貼文
【龔成問答信箱】(Q19361-Q19380)
Q19361:
老師,我係你學生,想問小小入市問題:
1. 你上堂教用中銀選股入既P/E係大約5
想問下其實如果係20倍以下,其實係咪已經好難搵?需唔需要改改佢調高一下?費雪教既P/S ratio都有同樣既情況,而家好多市銷率都好高,好似參考價值都已經唔大。
2. 同問題一有小小似,想問下巴菲特以前都好著重用便宜價買入,但近呢十幾年資金咁多加上成個社會經濟發展慢慢轉型做科技主導,好多股票即使好似舊年3月熔斷都係打番去合理價/合理中下部份,但真係去到便宜其實好少。
例如2382我自己估值係70~130蚊(順便問下大約岩唔岩),但3月都係90蚊左右即上番100蚊以上合理區中上部份。
700都係早排低見520即上番580,一直都係合理中上/昂貴區,其實而家係咪合理區/合理區中上部都可以開始草小小貨先?因為我怕錯失機會,特別科網股。
3. 彼得林佢係一本教理財既書果度有提過,一生人搵8~12間公司做Research,然後揀3~5間高增長企業已經非常非常足夠,令到你好富裕,巴菲特都有類似既講法話揀三幾間公司超長線持有就OK。
我見老師都係得1211/1177/1810,好似冇其他,其實係咪咁樣真係足夠,你以過來人身份覺得係咪股票以一生長線持有角度而言,真係唔洗買好多隻?
4. 我小米12.56買入,升一倍放左一半(好後悔並明白點解要繼續再長線投資唔洗理個股價),但我而家想加注不過高得不合理,老師你建議咩位買好?
龔成老師:
1)這只是其中一種選股方法,如果你記得我上堂所講,這個選股的第一步,我地要入5個指標,其中PE指標,如果你是有實力投資者,可以不輸入。
因為PE指標,只不過是集中選股範圍,希望選到的股票不會太貴,但這只是表面指標,同質素無關,如果你已有實力,你可以不用這指標,只用4個指標。
另外,潛力股進行估值時,會用較多「將來」的數據去計算。
2)其實佢都是用價值投資法,不過方向有少少改變,過往只要平,就有機會買了質素一般的企業,現時就著重質素,只要有質素有增長力,就算不平,只是合理價,都會買入。
因此,你先翻睇第2堂的筆記,當中個人組合的比例%,水桶123的配置,如果你現時的組合與你年齡不配,就要調整。
若你應投資更多水桶1而這刻無貨,你就要適度買入,當然這刻不會太大力,但不能完全無貨,以慢慢分注入的模式。我地要講求平衡。
3)我多年來,都只是有5-10隻股,不會太多,現時主力比亞迪(1211)。
如果你投資實力不強,就要適當分散風險,這就是我叫人買盈富(2800)的原因,但如果你有實力,就可以集中少少,例如4隻同類股,你集中選最強實力的一隻,這樣會有最好的回報。
4)投資是一個長期戰,只要你明白長線就得,現時餘下的貨就唔好理,長線持有,如果想加注,最好去翻$24先,又或月供。
------------------------------------------------
Q19362:
龔成老師,你好呀。我睇左你兩本書,好勵志。亦都有睇左Facebook page 差不多一年,一直想報班,但工作關係,就唔到報班時間。
睇完你既書令到住公屋既我,覺得靠工作和投資真系可以改變生活。
我今年30歲,有同男友結婚的打算。男友系保守型,會買9988、港交所。因為男友家庭系中產,不心急賺錢。
而我就好心急想滾大本金,因為我想同男友靠我地兩個將來置業。之前都有買福壽園、金沙賺過小小。
但都系忍唔住手,賺小小就放。但由11月中開始、個人可以更心急,分段入左1789愛康醫療,因為由9月時,
間唔中買賣都有賺1蚊差價數次。
但11月中開始買入左9手愛康醫療,平均價系17-18左右,而家跌到去12左右,真系全副身家都系入面。我個我衰心急,但我仲應該揸定系走好
唔好意思,咁夜打擾你
龔成老師︰
你投資上,有2個較大問題。
第一,我地做財富增值,就係透過買入優質資產(如優質股、物業等),長線持有佢地,讓它自行慢慢升值。
而唔係坊間個種短炒,賺差價架模式。你應該係合理,甚至係平架水平買入一些優質股,並長線持有,先係最有效方法。
第二,任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
相同行業不可佔組合多於3成,而單一企業不要高過15%。現在你明顯係過高,要作出調節。
至於愛康醫療(1789),此股算是不差,從財務數據睇,佢的賺錢能力不錯,生意有理想增長,盈利增長快速,股本回報率高。
但上市年期不算太長久,這點令過往的數據,未知能否反映佢的真實情況。
此股唔係無投資價值,但你持股太多,建議慢慢沽出部份,換碼至其他優質股會較穏當。
以下這些股票都係優質,而且適合你,你可從中選擇。但由於現時大市只在合理區,唔好資金盡用,要保留部份等大跌市。
平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
增長力較強的,可選安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)。但佢地波動性和風險會較高,你要自己平衡。
------------------------------------------------
Q19363:
其實投資同賭博有乜分別?
龔成老師:
投資是經過仔細分析,確保該項目有合理回報,同時在可承受風險下,「將資金投入在該項目」,這動作叫投資。
------------------------------------------------
Q19364:
老師,我有個問題想問,我諗緊買唔買危疾保險
因為佢都係用我供的錢作為最後的保額,如果早出事按理係著數,但我計緊如果d錢我自己做投資,回報會唔會比佢高
因為如果買都要每個月比2000佢,即如果我用供佢嘅錢而自己做投資,而增長又比佢高,用比較快的時間有個保額,某程度上我唔使買佢。因為危疾最終都係攞自己的供本額
龔成老師:
其實買保險最大的作用,是「將你不想承受的風險,轉嫁比保險公司」,因此,回報並不是重點。
因為保險是一個防守性產品,而投資股票是進攻。
我地理財,攻守都要考慮,但守方面,不用太多,「足夠」就得。
所以,你分析的關鍵,就是自己想唔想將危疾風險,轉比保險公司。
------------------------------------------------
Q19365:
龔成大師,我係新股手,衣加有5萬資金 ,月薪1萬6, 26歲。有咩選擇?
龔成老師:
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
所以,你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。做月供股票,或自己分注投資股票,每月$5000。
你可以考慮盈富(2800)$2000。
另外再加1、2隻(每隻$1500):銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:安碩恆生科技ETF(3067)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。部分要等回少少先入。
如果你不懂股,就集中供盈富$5000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
同時,你應該在這段時間,增加投資知識,之後就可投資其他股票。
------------------------------------------------
Q19366:
老師,我想問問,朋友叫我買XXX的一些基金產品,是美元計,有8 厘息,供五年,請問有什麼要注意,請幫助我這個就來退休人士,謝謝
龔成老師:
你要問清楚,該基金有咩風險。
近年我收到不少網友反映,佢地投資左收息基金(不少都是債券基金),利息回報高,但價格不斷跌,賺息蝕價,根本無意思。
所以要問清楚價格風險。
------------------------------------------------
Q19367:
你好龔sir,本人36歲本身是一名時裝設計師,薪金22000剛被裁,本身可以儲10000。
1月1日便會轉兼職4000左右。感到迷茫。
老公程式設計概40000, 有一名1歲小朋友。我們需要供樓,每月17000。本人有250000現金,200000股票。
北控 3.16 2000
中電 76 1000
港燈 7.97 2000
領展房產基金 70.3 200
陽光 4.67 3000
深圳國際 13.37 2000
中石化 5.53 6000
金隅集團 1.62 6000
北京北辰實業股份 1.63 400
北京汽車 3.15 1500
SOHO中國 2.65 3000
碧桂園 10.68 1000
宏泰 3.18 1000
中電信 2.43 2000
鐵塔 1.73 8000
綱龍 27 1000
國藥 19.55 800
長江生物 1.01 4000
天任集團 0.27 8000
藥明巨諾 31.1 500
先聲 13.8 1000
平安高息 25 300
應該如何安排計劃較好?期待你的回覆。
龔成老師:
由於你有家庭負擔,加上收入現時有不確定性,因此,暫時建議你現金,不要動用,除非見到大跌市。
至於現時持有部分有質素的,但部分則增長力一般,就不過有點散,你之後應該集中翻少少在較優質的股。
另外,你36歲,財富仍有增長力,你可以之後集中投資平穩增值股。
金隅集團(2009)、北京北辰實業股份(0588)、北京汽車(0588)、中國宏泰發展6166、質素只是一般般,長遠增長力不強,最好在反彈後賣出。
天任集團(1429)無投資價值,要賣出。
------------------------------------------------
Q19368:
成哥,我想問點睇6618同3690呀?
龔成老師:
京東健康(6618)由京東(9618)分折出來京東健康,將會來港上市。這股可長線。
其業務主要提供線上線下的醫藥出售和健康管理服務,業務布局包括醫藥電商、互聯網醫療、智慧醫療解決方案、健康服務等4個大板塊。
京東健康旗下京東大藥房,更是內地線上線下收入規模最大的零售藥房。其互聯網醫院,日接診量超過10萬次。
質素上,京東健康是有的。但由於估值難,不確定性大,同時暫時略貴,所以如投資,最好回翻D,$100以下較有值博率,如現價,真的小小注好了。
這股如本身有貨,可長線。
美團點評(3690)有潛力的,佢之前出左業績,見到開始有正現金流,這是一個實質的利好因素,因為之前一直在燒銀紙,現時初步見到成效,市場對佢重新估值。
當然,現時仍有不確定性,估值唔易。
只可以話,潛力是有的,現價唔算平,但不是完全無投資價值,不過,一定不能大注。等回少少先開始小注,是較好的做法。
------------------------------------------------
Q19369:
老師你好,我想問,雲計算明源雲
同: usa : Snowflakes..?? Buffet 買咗?
都是雲計算
龔成老師:
明源雲(0909)有潛力。
佢主要係中國房地產開發商及房地產鏈參與者,提供企業級ERP解決方案及SaaS產品。
睇翻佢之前的資料,佢係中國房地產開發商的第一大軟件解決方案供應商,市佔率有約2成。係呢個市場裡面,按收入計,亦為ERP解決方案及SaaS產品的最大提供商。
其實,佢的角色可以話中國房地產行業的數字化轉型,為房地產開發商及其他參與者,開發了一套行業垂直的ERP解決方案及SaaS產品,以助其管理廣泛的業務運營。
包括銷售及營銷、採購、成本管理、項目管理、預算以及房地產資產管理,佢的SaaS產品包括雲客、雲鏈、雲採購及雲空間。
業務雖然有增長力,但股價都唔平,如果初步分析,處貴水平,值博率未算強,始終市場現時對這類股有好大期望。只可以話,如投資,小注可以,長線可以。
至於Snowflake,佢主要提供企業可在雲端上儲存,以及一些管理資料的數據倉庫服務。
佢的強勁之處是增長快速,客戶增長快速(佢主要做公司客,如Sony),相信有一定的潛力。
不過我無特別研究這公司,但相信巴菲特睇好雲端的長遠發展。
------------------------------------------------
Q19370:
老師,請問你會否建議打工的年輕人選擇延期年金,或自願性mpf供款?如果會的話,你會建議那一種?謝謝。
龔成老師:
延期年金較適合在職人士,等你係年輕時以分期儲蓄方式累積資金,並係退休時把資金轉化為穩定年金收入,以供退休生活之用,而合資格的延期年金產品保費更可享稅務扣除。
我地理財,應該攻守兼備,你可以視乎你的風險度,決定買唔買。我建議如果你理財較差,就應該買。但如果你懂理財,懂投資,月供股票可以更幫到你財富增值。
不過,如果你不想被這項目鎖死資金多年,而希望有一定的資金靈活性,就不要買了。
至於自願性強積金供款,同樣會鎖死資金多年,所以你要睇下你自己本身的投資能力,才決定是否進行。
------------------------------------------------
Q19371:
成哥,你好,有關配股問題,請問
1)企業果刻一講要配股,個企業短期個價是否會跌
2)上述問題,如近期小米甘,佢一講配股,個價仲升既?正常一聽到甘應該大跌架。
成哥,唔該你
龔成老師:
1)通常都是,因為企業配股,反映佢自己都認為這刻是配股的時機,即是佢都認為貴。因為好少企業會在平的時候配股的。
2)其實最初的市場反應,都是跌。
但之後市場消化了消息後,就會從長遠因素去分析,佢得到資金後,會將資金投資發展,如果企業增長力因此增強,之後的發展反而更好,因此,當市場有這種預期的分析時,就會認為股票正面。
------------------------------------------------
Q19372:
龔sir早,最近諗緊置業草錢的問題,假如我用股票幫手草錢,即係令筆錢一路增值,但當真係升到咁上下我可以用佢黎幫手買樓既時候,咁咪要賣返哂出去?
咁我咪失去哂d優質股又未必可以係便宜位買返? 呢樣係咪無可避免嫁呢?謝謝
龔成老師:
這是方向,但要睇到時的情況。
如果可以的話,優質股一直持有會較好,但如果你到時有資金需要,都要賣出。
所以,如果資金可以,當要買樓的時候,只賣部分股票,最好留翻部分股票,長期持有,可令你一直持有部分優質股外,亦令整個財富組合會較平衡。
------------------------------------------------
Q19373:
龔老師你好!
(1) 當一隻收息股(A)有5%息,而另一隻平穩增值股(B)都有5%息,假設質素差唔多,咁可唔可以推斷(B)既值博率高於(A) ?
(2)788現價跌到$1.1x ,值博率高唔高?
(3)1212同178零售股既投資價值仲大唔大?
龔成老師:
1)都可以咁講。
但我地最重要,是投資「適合自己的股票」,要建立一個組合自己的組合,正如退休人士我會建議佢買收息股,但我自己就唔會買收息股。
2)合理區中下部。中國鐵塔(0788)不是無質素的。始終中國的3大電訊巨頭,都是佢的主要客戶,以及大股東,當5G發展,佢一定會受惠,因此前景仍然正面。
佢現時的收入都增長,盈利都保持向上,但增長比之前略減,加上股本回報率不高,是這股較弱的地方。若分析佢市盈率,會見到現時仍然處較高水平,反映佢雖然股價回落左唔少,但仍然未到平。
這股長遠仍算有發展力,可長線。不過,潛力度比過往略減。
但如這刻買入,分注入可以的。
3)長遠仍有,不過中短期一定弱,現價合理區中下部,但就唔建議太大注投資。同時要耐心等經濟好轉。
------------------------------------------------
Q19374:
1. 老師,你提過將現金3-5成留起來等機會大市跌可以買平貨,我有30萬現金放銀行,如果用15萬來買優質股(分注入)安碩恒生科技(3067)好嗎
我自己心思思比較想買賭業股,如現價入手 銀娛0027 或 金沙1928 好嗎?
現時未有太多投資知識,我又唔想D錢一直放住銀行好蝕通漲! 可否先買住一隻優質股先?起碼草股票好過草住D現金吖嘛..
2. 其實最多買幾多隻股票好,8隻-10隻嗎? 太多既話怕自己管理不善,要適時分析資料,現時未有太多投資知識,我又唔想D錢一直放住銀行好蝕通漲!
3. 你話過'相同行業不可佔投資組合3成',我現時持有緊: 一手9988(阿里巴巴)買入價271,兩手1833(平安好醫生)買入價93
同埋抽中左一手6618(京東健康)招股價$70.XX,但後兩者已經係同一行業,會否集中左風險?照長線持有先嗎?
如果我繼續想買潛力股,唔知點用我果30萬現金儲蓄較好 (即係問題1)..
4. 另外'單一企業不可高過15%' 呢一句同'相同行業不可佔投資組合3成' 應該點樣理解分別?
謝謝你~~
龔成老師:
1)只要你仍有3成以上的現金,你就可以投資安碩恒生科技(3067),但佢現價唔平,所以你買入時,要慢慢分注。
賭業股現價合理,你可分注。
2)你要從長遠的角度去設計組合,要優質,要平衡,8-10隻可以。
3)平安好醫生(1833)及京東健康(6618)是同一行業,因此唔好太過集中。至於阿里(9988)都與佢地有相關性。所以,你要控制好注碼。你要考慮長期組合中,這些股所佔的比例多少,如果比例太多就要調整。
4)如果你股票組合市值(同長遠計)為$100萬,單一行業就唔好多過$30萬,一隻股就唔應該佔多過$15萬。
------------------------------------------------
Q19375:
龔成老師,你好~
本人有(0390)中國中鐵,同(01508)中國再保險,呢兩隻我都係從招股價買入,現在兩隻資產合共兩萬一蚊,請問呢兩隻股票前景如何?我可以繼續當佢長線投資咁嘛?如果唔可以,應該如何部署?謝謝你
龔成老師:
中國中鐵(0390),本質算是不過不失,但近年略有轉弱。
預佢的增長力在之後,都唔算好強。睇翻佢的業務同財務數據,生意同盈利都處於穩定狀態,但增長力唔算強。
所以長線睇,算有有投資價值,但增長只是平穩。佢過往股價曾在2015年大升大跌,這只是炒一帶一路,但之後回復原狀,因為這因素只能為佢帶來平穩增長,而不是高速增長。之後同樣只是上上落落,近年股價再次轉弱。
這類股又唔值得佔組合比例太多,如果小注持有可以,但你預佢增長力不強,如果想有較高增長,就宜轉其他。
中國再保險(1508)主要經營以下四個業務分部:
(1)財產再保險
(2)人身再保險
(3)財產險直保
(4)資產管理
其實佢不是無生意的,見佢生意保持增長,但賺錢能力就唔算強,盈利有點波動,反映成本等因素對佢影響,整體的質素有下跌情況。
由於獨特性並非好強,相信之後的發展都只是一般,預佢增長力不強。現價合理的,主力是收息。如果你想組合增長,相信轉其他轉好。
------------------------------------------------
Q19376:
你好龔成老師,你覺得柏傲莊樓盤324呎實用面積,一房,800萬,算貴嗎?
我今年22歲,正職大概4萬一個月,副業現在有20萬一個月。草左筆錢,俾左3成首期買左柏傲莊一房,打算2年後收樓自住,雖然自住,但都希望幾年後樓換樓換大d,或者買多層製造被動收入,但買入價好似都算高。
不過我真係好喜歡呢個樓盤,所以我都想聽聽你意見
龔成老師:
呎價24600,有少少貴,除非樓層景觀等好優質。
柏傲莊位置理想,我自己都睇好大圍,這盤地點及配套好好,可以加分,不過24600一呎就有少少貴。
你自住都可以的。
------------------------------------------------
Q19377:
hi 龔sir, 近日依照你的方法去計算ROE 及PE 等數據,想請教一下在計算人民幣的股票時需要轉換成港幣計算嗎? 不轉換會否影響計算的準確度?
龔成老師:
要懂一貨幣,即是你全部化做人民幣,或全部化做港幣去計。
------------------------------------------------
Q19378:
Hi 龔sir,在Facebook follow你有2年多,看了你的月供股票後,一直都月供緊中電和領展,現在再想買一些股票,不是用來for月供的,看了1772 贛鋒鋰業 一段時間,請問呢只股如何? 將來有冇機會好似比亞迪咁?
龔成老師:
你應該建立一個平衡的財富組合,不同類別的股票都要有。你在組合加入潛力股是可以的,但就要控制注碼。
贛鋒鋰業(1772)是潛力股,但估值較難,分析時的確資料較少。由於上市年份少,我地較難有長期數據分析。
佢為鋰化合物、金屬鋰及鋰電池等鋰資源生產商,業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。
其實佢的產品應用都廣泛,包括電池相關產品、化學品、藥品及新材料等,而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。
我相信佢長遠有潛力,有長線投資價值,問題只是平貴度的問題。現價略貴,小小注好了,之後等佢回落先正或入,始終行業有一定的變化。
長期同供,其實可考慮安碩恒生科技(3067),不過現價唔平,所以金額要小心控制。
------------------------------------------------
Q19379 :
老師,我1398 8.3入同7.5入左
我亦記得你影片有講823係平穩增值既優質股,所以我都有興趣入,請問你覺得大概咩價位會適合入手又或者咩價位係平。
除左823之外, 2318,388,27價格都對我目前黎講算貴,所以想問有咩價格around 1萬上下既優質增值股
1928又係咩價位先叫做可以考慮買入又或者咩價位係平呢
非常明白您所講既分注入既用意,通常我睇價位都係睇天線,都係只係作為參考,所以想知
大概咩價位平又或者企業價值值幾多一股
另外,請問點睇2400既未來發展
龔成老師:
工行(1398)不是無質素的,你可以守住先,但你預佢增長力不強,只是收息股。相信要耐心少少去守。
可於領展(0823),現價合理,其實可以分注買入,如果去到$65,就大約係平。
其實銀娛(0027)同金沙(1928)仍在合理區,你都可以考慮,分注買入就得。
你睇線圖,是技術分析,其實正確的做法是計企業價值,唔好睇圖或天線。要以買企業的角度去進行投資。
心動公司(2400)集團主要於中國、亞洲、北美洲、南美洲及澳大利亞開發和營運網上遊戲,網絡遊戲都為免費,收入主要來自銷售遊戲內的虛擬物品所產生。
集團同時也開發及營運付費遊戲,以及與第三方遊戲開發商合作發行及營運授權遊戲。
業務上,有吸引地方。不過,我一向都新股半新股都無興趣,因為真實面要過一段時間先見到真章。所以新股估值困難,只建議你小注,同時你要明白當中的風險。
------------------------------------------------
Q19380:
龔成老師,你好,想請教一個問題
我現在有綠表可以買居二市場的居屋,budget500萬左右,但我應該買私人樓較好定居屋較好?
其實對投資毫無概念,所以想問問你意見應該如何選擇?謝謝解答
龔成老師:
如果從投資價值,私樓會較好,如果講自住,居屋會較好,因為同一筆資金可以得到的面積會較大。
所以,要睇你自己這兩方面的考慮如何。
如果自己負擔能力不算好強,你買居屋較好。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
黎彼得 身家 在 龔成 Facebook 的最讚貼文
【龔成問答信箱】(Q15181-Q15200)
Q15181:
老師你好,我由你第一本著作開始已經開始follow專頁到依家,由用part time錢買你既書去到依家用股息黎買你既書
雖然未曾親身上過你堂,但啱啱見到新版書有提到必瘦站/平安好醫生等等我都有持有既股票,係身家縮水既時候都有返啲安慰
希望他日工作自由啲既時候可以黎上你既堂,向財務自由努力!
龔成老師:
你可以由part time錢買書,去到依家用股息黎買你既書,相信你明白累積財富之道。
相信你明白,投資不是炒賣,而是長期累積有質素的股票,而我相信你累積股票方面做得不錯。我相信你所行的方向正確,保持理念就得。
股市一定有中短期的上落,如果短期的身家縮水,可以令我地買到平貨,長遠財富更多,我寧願身家縮水,所以,這亦是我近期興奮的原因。
保持知識的增長,相信自己,財務自由只是時間問題!
希望遲D課堂上見到你,保證你知識會更進一步!
------------------------------------------------
Q15182:
請問968,信義光能。我食左層水,但個價佢又唔跌番,睇住佢一路慢升,開始後悔。計左佢用市盈率計合理價範圍,都係至上。現價$6.xx
1)成哥,你會咩價會入
2)成哥,有啲股你想買,佢一路升,你係未都係等佢大跌先買,隻股,佢一路慢升又唔跌你計出的價或個價屬於貴,隻股優質的,你最后都係繼續等佢跌?
唔該,成哥
龔成老師︰
你要明白最能令財富增值的方法好簡單,只要長線持有優質股就可以。反而你去估走勢,諗住而家高位放左,等回番再入貨,賺佢一轉錢,這種估大市和賺差價架想法好錯。
因為無人知佢會唔會回番去你心想位置,佢可以係你賣出後一直升,無人會知。
1) 信義光能(0968)有質素的,雖然股價較為波動,但多年來都保持向上,不過近一年的生意就出現了下跌,市場的增長必然不及以前。你預此股中短期盈利波動一定有,長期質素無問題。現價已經偏貴,如果你無貨,可以考慮$5以下入首注。
2) 出現你所講架情況時,最簡單可以用月供方法去入貨,以平衡價格風險。如果無得月供,我會等佢到達合理區較頂部就已經入首注。好似港鐵(0066)、煤氣(0003)這些優質股,佢長時期處於高位,因為佢真係優質,所以無辦法。
但如果當這個優質股不理性地貴,我就會唔買住,因為用過高價買入,縱使是優質股也會影響到你長線回報,你要記住這點。
------------------------------------------------
Q15183:
老師,778 and 823以收息及長遠投資 那種較穩定?
龔成老師︰
置富(0778)持有多個屋苑商場,主要是「居民生活所需」,這會令佢處於較穩定的狀態,受經濟影響的情況,相對較少。
領展(0823)則規模較大,坐擁不少優質商場。現時商場組合,有提升價值潛力。再加上早前斥資36.7億元收購悉尼一幢甲級商廈,集團開始在海外尋找有潛力物業,預期由本地化進一步國際化,這都是潛力所在。
如果你目標係長遠投資增值,會領展較好。
------------------------------------------------
Q15184:
你好,老師!我29歲, 月儲 $10k, 現金$200k, 手持1手電能實業
之前每月洗費好大, 又不學投資, 現在開始接觸及努力節儉, 希望可以40歲財務自由
1) 現打算開始月供股票: $2500 盈富, $2000港鐡, $2000 比亞迪 (咁分佈,會不會太散?)
因為見老師的post都說可以先留現金等機會吸納, 所以考慮把月儲$10000當中$3500留下來。還是用埋來月供會比較好, 如果係, 我打算都只係提升月供金額, 不會再加不同股。
2) 另外的現金, 就如之前咁講, 打算等機會吸納, 有啲疑問及睇法, 希望得到老師意見:
目標到以下價就購入一手: 交易所 ($240), 維他奶 ($22). 福壽園 ($5.5), 金沙 ($30), 港鐡($40), 以上的價位會唔會到唔到/不合理?
如果已經有月供的股票, 係咪唔適合另外一手手咁買, 反而放錢係其他股會比較好? 例如: 已月供港鐵,就算遇到低位,係咪唔需要再一手一手買?
利福國際都聽過幾好, 好靠香港零售業影響。不過, 自從2011年$26好高之後, 一直下滑, 以2018都算零售業好景, 都只係一個好短既高峰去到$18.
係咪表示利福國際的長期增長好有難度, 只係靠經濟好景時推一推, 但都不能持續高位。(本有諗過等2020中再跌低啲, 到2021-2022好景時放, 不過佢的高位只會係好短時間, 似乎太危險)
似乎最近的環境會令中國經濟進一步下滑,應該再下創幾多就係時機入市?
龔成老師:
1)由於你本身已有一定的現金,因此,你這刻的月供數目無問題,不用減少金額留更多現金。你上述的幾隻股票,都是可月供,長線投資,金額與分配無問題。
2)至於現金方面,你上述鎖定的股票與目標價,都可以的。
月供的股票,與一手手入的股票,最好不同,以有效分配。但在某些情況,例如真的到了平宜區,就算你月供,同時再用一手手模式把握當刻的買入機會,可以的,但在平時的合理區,就唔需要再以一手手模式去入。
至於利福(1212)本質不差的,但零售業的賺錢能力,的確比過往弱左,預期佢長遠有增長力,但不是高增長。另外,香港零售市道,相信在一年內會好弱,但這股反而有投資值博率,不過一定要睇長線,以及不能大注。
另外唔建議短線投資。
------------------------------------------------
Q15185:
老師,澳門月供手續費一年760。我考慮緊仲月唔月供好。另外。如果我盈富基金一手一手入,咁咩價位入係合適? 希望資金早日轉動,謝謝老師解答
龔成老師:
你可以計下手續費佔你資金的比例,一般是0.5%以下,如果成本去到1%以上,就開始貴,所以,如果你投資金額較多,成本就會相對較少。
如果去到1%以上,就不建議做月供,你可以考慮一手手模式。如果你現時唔多貨,現價可以分注入,同時留現金,如果現時已有貨,可等回多8%分注。
真正的平宜區要去到$24,但無人知能否見到,因此,現時分注,同時留現金等機會,是最平衡的做法。
------------------------------------------------
Q15186:
龔sir早,想請教你,如果在大市跌時,如果想炒短綫股買邊隻優質股。
如果想買長期股收息高又買邊隻優質股
龔成老師:
我唔建議短炒。
至於長遠有增長,而股息又唔差,你可以考慮:金沙(1928)、長建(1038)、中銀(2388)、港鐵(0066)、恆基(0012)。
------------------------------------------------
Q15187:
成哥,雖然小弟還未有機會報堂,但由去年10月開始關注你到現在,時間不長亦未能在股市賺錢,但覺得我自己思維好唔同。
感謝你無私奉獻,多謝你經常提醒我們不要在意股價波動,而是「基本因素」,亦叫我們實地考察。我自己是澳門人,亦經常到銀河消遣,所以對27情有獨鍾。自己前天52蚊入左第一注,平啲再買
預3-4注錢入,其餘還52蚊入了914。都系想睇市場跌到25000再溝貨然後長線持有
最後祝願老師身體健康 長賺長有
龔成老師:
你的方向正確,上述都是有質素的股票,可長線持有。
現時大市在合理區,最好的方法就是一邊分注投資,一邊同時持有現金。因為無人知能否見到25000,所以唔能夠將所有資金去等,要取一個平衡點。
另外,你要建立一個平衡的組合,唔好只集中有少數股票。
------------------------------------------------
Q15188:
龔sir,
1)請問港交所咩價位先到便宜區,現時投資策略應該點做?
2)你認為中國平安現時值得買,該股有潛力嗎?
3)請問買中國銀行及工商銀行做收息好嗎?或是有更好的其他收息股推介呢?
謝謝!
龔成老師:
1)現時在合理區的頂部,如果要講「平宜」,就要大跌先得,去到$180以下先算。
2)中國平安(2318)有質素,有平穩增長的能力。但現價在合理區中上部,就算現價投資,都只能分注入。
3)可以,這兩隻都是不差的收息股。
不過,我會建議建立一個收息股組合,而唔好只集中在兩隻銀行股。你可以考慮,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、匯豐(0005)、置富(0778)、陽光(0435)都可以。
------------------------------------------------
Q15189:
你好成哥,如果月供4000港鐵 再月供4000長建可以嗎?另外我留意到長建呢排下跌,可以買一手作收息用途嗎
龔成老師:
如果你這刻現金足夠,你加多一隻長建(1038)去月供,是可以的。這企業有質素,長遠有平穩增長能力,派息不差,現價合理,月供無問題。
現時整體大市在合理區,你最好一邊月供,同時留有一定的現金作等機會。
如果你這刻現金較多,直接買入一手後,仍有現金剩,就可以直接買入一手。
------------------------------------------------
Q15190:
Hi sir, 想問下而家中國係市場上面臨遺債同被杯既風險, 人民幣而家報緊1.1, 請問係咪一個熊市2期既標記?
我情感上有點淆底,但理智上想入貨, 請問應該嘗試?
龔成老師︰
你的概念有地方出了錯,我地決定買入股票時機,唔應該用股市週期論來做決定。
股市波動受好多因素會影響,會令一個股票市場出現大幅上落。我地唔應該用「預期」的方法,去估股市和股價點發展。
我只會用「測量狀態」這方法,分析現時處甚麼位置,從而作出策略,但就不會預測。
現在恆指PE處於11倍,過去恆指PE波幅大約在8-22倍,現時算是合理區偏低位置。
如果你無任何貨旳話,可以用"分注形式"將一半資金買入優質股。之後,等待時機,到再平宜區時加大力度入貨。
------------------------------------------------
Q15191:
老師你好。 自從上完你的堂一年,現在先第一次認真做企業估值,但遇到了一些問題想向你賜教。
我所選擇的企業公司是光大綠色環保(1257)。
1) 光大綠色環保(1257)係一間環保公司,從事生身物質綜合利用,危廢及固廢處置,環保修復,光能發電及風電業務。我想問就算同一個行業,不同公司都可以經營不同業務,而且經營業務比重亦不一樣,如何比較不同的環保公司?
2) 我從任何途徑都找不到這間公司的全年最高及低市盈率(資料顯示N/A),我想問原因何在及如果沒有全年最高及低市盈率如何推算合理市盈率?
3) 我從年報中看到每年都有盈利,但經營現金流係負數。我見應收賬個數有點兒大,我想問經營現金流負數是不是應收賬問題?如果是,這間公司會不會像你課堂上所講XX那間公司的問題?
4) 你課堂上所推介的inxxx這個網頁已經停用,我想問會不會有其他網頁推介?
5) 請問這次企業估值有什麼可以改善地方?
隨inbox附上評估表。
謝謝老師百忙中抽空回覆及賜教!
龔成老師:
1)這的確有難度,因為我地進行行業比較時,會希望企業間的業務模式、發展、賺錢能力都是近似的,這才有較大的比較性,如果大家業務比較上有較大不同,比較時會難左。
如果好難在市場上,找到較類似的情況,我地都要進行比較,但參考價值會減。我地會考慮,佢都都有類似的業務,長遠的發展模式都是近似,這都可以參考。
2)由於這企業上市年期不算耐,因此,有可能會找不到相關數據,而上市前更是沒有數據。你可以用上市後的數據自行計算,例如市盈率,就是將股價除以每股盈利,這都是可以找到的資訊。
3)我睇過中國光大綠色(1257)的現金流量表,經營活動現金流量的確出現負數,但報表所顯示的原因,並不同我上堂所講的XX公司,因為XX公司,令到佢負現金流的原因,是應收貿易賬類的問題,而這正正是造數的高風險部分。
至於光大綠色,原因並不是這個,只是一個合約類的入賬模式,令佢出現這情況,因此不同太擔心,但都會有少少扣分。
4)出面d網站,都只是提供5年的財務數據,所以真的有d難搵。
其實最近我同一個新網站傾緊d合作,不過,佢未正式出街,我希望佢可以提供到某d財務數據。
5)你分析得不錯,但行業分析方面資料不多,我相信你可能找不到相關資料。你可以找翻光大綠色,幾年前上市的招股書,當中都有行業分析的,你可以參考到一些有用的資料。
至於估值方面,這股的確是較難的,因此你掌握唔到都是正常,你可以盡力找同行,甚至是一些類似的公用事業作參考。簡單來說,現價在合理區,這股有長線投資價值。
------------------------------------------------
Q15192:
龔SIR, 你好, 我睇到你的專欄及呢個page大約數個月, 想請你指教一下, 點樣可以再加增值更多, 謝謝。
我今年35歲,與父母同住私樓, 樓宇是父母的, 我一直想擁有自己的物業, 先是租出, 到退休或需要時就自用, 所以想增值財富才能有首期進行下一步。
我的職業都比較穩定, 月入$31,000, 呢幾年月供#66($3,000)及#3($3,000), 稍後在考慮好無再月供#2800($3,000), #6886有兩手(IPO)持有到而家, #2有一手(約$82.90)。
暫時手上有現金$50,000(想考慮買入#9988), 另外再預少少現金作普通儲蓄作應急等。
請問你可以俾啲意見我, 可以如何再作更好的分配或改善我的儲蓄模式以加快增值財富呢? 謝謝!!!
龔成老師:
以你的年齡情況,財富仍有增長力,但就不是高增長,因此,投資高質,有平穩增長力的股票,是適合的。
至於現時月供的兩隻股,都是有質素的,另外,建議你加入盈富(2800)去供,你可考慮供$4000,長期進行。
HTSC(6886)質素可以,但賺錢能力不強,如不多貨,都可持有住先。至於中電(0002),可持有。
由於你手頭的現金不算多,建議等跌多少少先動用,唔好心急用左去。
當我地進行人生財富累積,會運用「先增值,後現金流」作方法,初期應投資較多增值類資產,而較年長的,則應投資較多保守類項目,因為初期的財富系統未成形,同時負擔較少,可承受的風險度較高,所以會著重增值為先。
如果你長遠想買樓,這刻可以加大儲蓄,利用月供股票,儲蓄等投資機會,並行進行,在幾年裡滾大財富,只要資金足夠,樓市在適當時機,就可以買樓收租先。
另外,以你的情況,財富仍有一定的增值力,建議你多增加投資知識,在選股、企業估值、投資時機上落功夫,對你長遠財富有好大影響。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q15193:
老師,幾個月前買左阿里健康,買入價8.40,想問下宜家適唔適合再買入,定賺少少放左算
龔成老師:
阿里健康(0241)這是潛力股,但都幾難分析。
業務上,有好大的潛力,不過,本質波動,股價上落大,消息多,市場炒作多,這類股風險都不少。
這類股只建議小注持有,唔好加注,原有貨,如果你本身目標是長線,繼續持有無問題,但你預佢股價上落大。
------------------------------------------------
Q15194:
龔sir, 你好, 我bb上年出世, 我想幫佢供股, 點既組合會比較適合呢?每月可供$2000, 謝謝!
龔成老師:
這是一個較長線的投資,因此,宜選一些有增長力的股票。另一方面,由於這是小朋友的「基金」,因此,又唔建議太進取。
所以,你選盈富(2800)是最好的做法,本身有平衡風險作用,加上平穩增值,是最適合的。每月保持供$2000,長期進行就得。
------------------------------------------------
Q15195:
老師,有冇好書推介?
龔成老師:
以下是我認為適合初學者睇的書,部分要到圖書館找的:
《我十一歲,就很有錢》
《經濟蕭條中,七年賺$1500萬》
《富爸爸,窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪?》
《人性的弱點》
另外,以下是我寫的11本書:
《80後百萬富翁》(第7版)
《80後2百萬富翁》(第3版)
《80後3百萬富翁》(第2版)
《財務自由行》(第5版)
《大富翁致富藍圖》(第4版)
《50優質潛力股》(第3版)
《50穩健收息股》(第3版)
《50值博倍升股》(初版)
《股票勝經》(第3版)
《選股勝經》(第2版)
《年報勝經》(初版)
我的書在三聯、商務、大眾、誠品都有得賣。由於部分書在一些書店已斷,所以若你見唔到,問下職員就得(又或向職員訂都可以)。
------------------------------------------------
Q15196:
老師你好,如果我想問有30萬資金想購入股票 可以購入哪類型的潛力股?
今年26歲 已持有15000股1177
龔成老師:
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股佔比暫時要較少。
平穩增長股可以以盈富(2800)作核心,至於潛力股,你可以考慮比亞迪(1211)、中生製(1177)、福壽園(1448)、小米(1810)等,但就要控制好注碼。
中生製你有貨不持有,因此不要再加貨。
------------------------------------------------
Q15197:
成哥可否講下,最近的 還息不還本 謝謝
龔成老師:
如果有需要,這都是一個不差的方法,因為可以在中短期內,唔需要還本,只要還息,這如同延長借這筆資金一段時間,而現時低息環境,只要投資爭取到高於這利率的回報,有可以產生正回報。
但講到尾,要睇你有無實際需要,有需要可以,但如果無特別需要,又見唔到有明顯的投資機會,就不用做。
------------------------------------------------
Q15198:
Hi 龔成老師你好,我現在想月供4000蚊, 分別共四隻股票 每隻1000蚊
我今年48歲65歲退休仲有17年供款時間, 之前你答過我相關問題,話我可以用到我頭十年時間供啲
平穩 增值 嘅股票, 例如騰訊(0700), 港鐵(0066) ,盈富(2800), 之後時間再慢慢轉為供啲收息股 ,但我又想供 領展(823),中銀香港(2388)
但係我只係可以月供四隻, 希望龔成老師可以畀啲意見我以上咁多隻,揀四邊四隻好呢?謝謝老師解答。
另外我有1.6萬美元,20萬港元流動資金,請問 可以怎樣部署 ? 我想用少量美元學習買美股, 希望老師可以俾啲意見,謝謝。
其實我嘅投資目標係希望月供股票,如果可以有收息又有增長,目標係可以做到退休前財務自由或者有被動收入。
龔成老師:
如果考慮到增長力,企業的質素,以及平衡組合方面,你這刻可以供盈富(2800)、港鐵(0066)、騰訊(0700)、中銀香港(2388)。因為港鐵都有部分地產業,同領展(0823)部分重覆左。
你這刻保持這組合,唔好轉來轉去,長線就得。到一定的年齡,才轉收息股。
如果想投資美股,最好就是買一些美股相關的指數基金,例如追蹤標普500指數的。
至於$20萬現金,你可以在這刻,動用$5萬-$8萬,分注投資盈富或其他優質股,餘下現金等機會。
另外,建議你多增加投資知識,在選股、企業估值、投資時機上落功夫,對你長遠財富有好大影響。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q15199:
老師,我今日去左HSBC, 我原先叫佢教我點買,同埋收費,買入冇手續費,無論買幾多隻都是$25/存倉費,賣出先計佣金。
我可以上online banking 自己做,因為最快下月先可以買到,我打算用多1星期去看看你建議的股票,睇吓邊隻現在比較抵買!
今日銀行見我有$5萬美金定期(上星期做左3個月得1.5%息),佢建議我轉做另一類,每年供US$15000, 供3年,等第6年先可以拎錢,或者放20年先拎都可以,每年有3.7% 息,你覺得如何?
HSBC 月供股票冇3140,0270 ,咁點供3140?
龔成老師:
銀行的產品,有好有壞,要小心分析。初步睇上述的類別,是較低風險較低回報的,你可以在組合中,放少少資金在這類項目上,作用是組合的防守部分,不過,太多防守並無意思,因為投資要求你進攻。
至於銀行無提供3140月供,你可以自行分注,佢每一手的入場費都只是$2500左右,要分注並不難,就算你每兩個月入一手,已經做到平均買入價的效果。
------------------------------------------------
Q15200:
龔成老師,聽說在澳門能買到你的書。我想問問你發行的書在澳門哪間書店有出售呢?
仲有係,我剛接觸股市,可否推薦閱順序?本人都三十幾歲了,但存儲不多,希望現在還能靠投資讓生活好一點,謝謝你。
龔成老師:
你可以去水坑尾宏達買到。若你見唔到,問下職員就得(又或向職員訂都可以)。
以下是我的11本書:
《80後百萬富翁》(第7版)
《80後2百萬富翁》(第3版)
《80後3百萬富翁》(第2版)
《財務自由行》(第5版)
《大富翁致富藍圖》(第4版)
《50優質潛力股》(第3版)
《50穩健收息股》(第3版)
《50值博倍升股》(初版)
《股票勝經》(第3版)
《選股勝經》(第2版)
《年報勝經》(初版)
對初階者來說,你可以先睇《80後百萬富翁》《股票勝經》。
你的年齡仍是財富有增長力的時期,好好把握。盡快開始儲蓄、投資的計劃!
----------------------------------------------
多謝各位提問,若然你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。
另外,由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。