想知道謎之電影A係邊部嘅鬼友，請留comment，鬼哥逐個PM覆。但係請自行判斷，因為如果你睇過電影A，即係等如無雙全劇透。呢個亦都係點解我放電影A幅腳圖嘅心思。認得對腳，一定記得電影A條大橋同情節。唔認得，咁即係你對電影A冇乜印像，咁就不妨入場睇無雙。
https://www.facebook.com/…/a.384573185310…/546038592497235/…
可能係本頁開頁以來最重要嘅一篇影評:
假貨都比真貨好?無雙倒模神作劇本
喺無雙入面，發哥有型，城城入戲，周家怡突破自己演出搶鏡。另外槍戰場面夠爽快...er....就...
就...我..我寫唔落去了。
本文圖中對腳究竟咩料? 鬼哥只係想大家聽一個故事，一個真心鍾意睇荷里活電影嘅影迷由心而發嘅故事。
每個影迷都有幾部「啟蒙」作品，令人開始迷上電影。而且多數係睇於中學大學時代，因為當時觀影視野比較狹窄，好戲一打入腦，先入為主，喺戲迷心目中嘅地位就穩如泰山，要動搖其實係極難(if not impossible)。
90年代出現咗多部無論喺類型或者風格上，都夠膽破格創新之餘，而效果極work嘅好作品。對於70後嘅鬼哥嚟講，呢啲作品，部部都可謂大開眼界，睇完出嚟大多久久不能平伏，往往成為自己心目中該類型嘅「代表」。
Pulp Fiction係好玩有戲味類型嘅代表；
Heat係型佬打劫嘅代表；
Trainspotting係迷幻尋找自我嘅代表；
另外兩個較個人嘅選擇:
Strange Days係末世類型嘅代表；
Murder in the First就係法庭翻案戲嘅代表。
而喺1995年夏天，出現咗一部肯定係鬼哥Top 3嘅超強作品，我地先叫佢做「電影A」。
最熟鬼哥嘅老友一定知，我奉電影A為神明。喺我心目中，佢正面挑戰當時嘅電影語言，而且贏得非常漂亮。劇本結構同推進極之精密，心思細節鬼斧神功。最勁嘅係，佢將in plain sight呢個概念喺我腦中重新定義。當年睇完出嚟，下顎跌到落肚臍，同一班同好即時興奮不停口傾咗幾粒鐘!
電影A冇嘗試宣揚甚麼社會歷史政治大道理，亦都冇史詩式家族愛情仇殺。但係作為娛樂警匪片，佢當年嘅成就、獎項、同樹立嘅里程碑，都可算史無前例。之後好多電影，都有見到電影A嘅影子。
但係留意，係影子，唔係全條橋照搬呀大佬。
無雙嘅劇本，首先條大橋同電影A係完全一樣，雖然exactly係乜呢度唔穿得，但係就算連敘事嘅方法，都係同樣以插敘嘅形式推進故事。人物設定方面，沉鬱怕事嘅「鼠輩」，官仔骨骨嘅操盤手，仲有自以為是懶醒嘅警官，簡直影印一樣!主線結局Flash back墊住對白，插入黑白拼圖，警官驚惶失措，太離譜了吧!無雙嘅主題係偽鈔，「假貨都可以比真貨好」，成件事係核彈級嘅諷刺!
係，無雙係加咗條愛情線入去，但係呢份愛嘅擺位龍門常搬，位置糢糊，就好似電影嘅僭建物一樣，格格不入。
好喇講到呢度，估到電影A係邊部戲，或者認得本文圖中對腳嘅鬼友，冇錯，其實變相橋已穿。而正正因為呢個原因，我勸你千祈唔好入戲院睇無雙!唔!好!睇!因為如果你鍾意電影A嘅話，你會想睇一齣一模一樣嘅港產版本嗎?。買飛入場睇無雙，結果只有同我一樣，俾兩者嘅雷同激親。
係唔係抄，遲啲自有公論。但係，莊文強，你搞還搞，點解要搞我部神作!?點解!? 鬼哥睇完無雙都係久久不能平伏，不過今次係條氣頂住嗰種不能平伏。你明唔明，鬼哥愛電影A之心係好pure好true的。當神作俾香港一線導演「高度致敬」，我除咗戥電影A不值同痛心之餘，亦同時慨歎，就連金獎導演都可以咁做得咁赤裸。愛之深恨之切，呢份雙重打擊真係刻骨銘心。電影A嘅編劇同導演肯定識發哥，佢地都好大機會會睇到無雙。老老實實，莊文強你真係可以堂堂正正面對佢地咩?
Mean啲講句，史高西斯當年買下你部無間道嘅劇本重拍，仲橫掃頒獎禮，就真係堂堂正正喇!唉如果無雙提名最佳劇本同導演，你話幾咁尷尬呢。今次真係考驗班評審嘅判斷力喇。
話雖如此，我仍然希望大家唔好喺comment穿橋。我地就俾未睇過電影A嘅人，感受一下超強劇本，帶嚟嗰種大開眼界，久久不能平伏嘅感覺。講真，無雙仲算拍番嗰種震撼出嚟嘅。不過，我估此文一出，電影A嘅戲名應該會喺comment極速出現。
而我係唔會刪的。
至於俾幾多分?鬼哥已經唔識俾了。
完。
#非必要真係唔好睇
#常識話我知唔止高度致敬
#嫌棄長文請過主
#疑似抄襲自己判斷
#犯錯唔緊要下一部證明自己
