《神奇女俠》影評
「改變世界 始於足下」
—談建立個人價值及審美觀的重要
（含劇透慎讀，女神好靚）
—
—
—
我睇戲，會特別留意戲的第一句對白，好似今次《神奇女俠》，姬嘉鐸的一句「我一直想拯救世界」，幾近已奠定電影的基調—好似劉華話齋，世界並唔係你想救就救，要個天批准先得。即使你有超能力，即使你係宙斯個女，即使你係真正嘅女「神」，要改變世界，並唔係你想像中咁容易。
—
超脫出塵的女神要進入污濁的亂世，由天真到成熟，就係《神奇女俠》的最重要命題。而成熟不等於要世故，不等於要隨波逐流，反而就是要更加堅定於自己的「信仰」。黛安娜一直相信，只要滅神，只要打敗戰爭之神「阿里斯」，天下就可太平，世界從此就會變得不一樣。佢好興奮咁拎走把滅神之劍，一意孤行離開天堂島新米西亞，墮入凡間只為取一人首級，與代表人類的英國間諜機師截然不同。
—
係電影的最後，亞馬遜女王之女憑著愛爆甲開無雙，手刃哥哥，而世界真的變成天下太平了嗎？這是電影沒提及卻是很重要的重點。一戰過後，有二戰亦有冷戰，然後今時今日不同地方如敘利亞仍內戰連連，亦有恐怖組織如阿爾蓋達、伊斯蘭國等向世界張牙舞爪，究竟怎麼了？
—
阿里斯與黛安娜，就是分別看到了人性光明與黑暗的兩面。我不會騙你世界有多美好，壞人的確有，每天算計著如何傷害及剝削其他人以求快感及榮譽，犧牲他人就是家常便飯，當食生菜。但好人也確實存在，像黛安娜、像英國靚仔機師、像果班奇奇怪怪卻一齊出生入死嘅伙伴，雖然佢地都會殺人，但大多唔見血（唔知大家有無留意）。
—
咁既然人有好亦有唔好，就算本身係好嘅，可能都會因為比社會同環境磨蝕而變得腐朽，完成唔到任務就吞山埃自殺，咁我地又應該點自處？個情況就好似當我地初初讀完書畢業投身社會果陣，會像神奇女俠咁樣，往往都會有股雄心壯志，認為警察唔應該打人，認為老師應該教好學生，醫生係應該救急扶危。
—
但日子過得耐左，個社會會同你講，古惑仔係唔打唔得嘅，做老師擦上司鞋重要過教好學生，做醫生寧願休息多陣都唔需要同病人傾多陣計，咁樣先係正路。就好似戲入面打仗嘅人，打仗要贏梗係重要過一切一切，要犧牲幾多人命都在所不計，社會上個個人都同你咁講，都係好正路。
—
但咁樣又可以點拆呢？「橫眉冷對千夫指，我自橫刀向天笑」，好嘅價值，就算幾多人反對都好，一定要去堅持，堅拒被俗流價值同化，相信自己的可能同潛力。就好似黛安娜深深清楚自己嘅能力，以一人之力穿過其他人話「不可能」的槍林彈雨，帶領其他軍人營救村民，有d野如果你有能力就唔好等人，由自己做起。
—
我係呢度並唔係要去鼓勵大家為左一腔熱血而白白無謂犧牲，你普通人咁玩法，一定死架，所以更重要嘅就係要先睇清楚真實嘅自己，優點要保留同強化，弱點就要逐個去改良。就算你好似森美咁，請你番黎做狙擊手，但竟然唔識射槍，都唔緊要架，咁咪去唱歌囉，能力愈大，責任愈大，盡己所能，人人起點唔同，「為自己而戰」先係最重要。
—
再推深多步，咁點先知自己係追隨緊「好」嘅價值？其實所有人都覺得自己係「好」架，就算係殺人如麻嘅魯登道夫將軍，佢都覺得自己為國家效力緊架。唯不斷努力學習囉，我唔係講緊係香港一般人果種讀書為左搵份工果種「學習」喎，唯學習，見得多d，你先會知道世界無奇不有，先會學識包容體諒，先會變得真正嘅「成熟」，建立起一套唔隨波逐流，經得起時間考驗嘅價值同審美觀，然後真真正正成為一個頂天立地嘅「人」。
—
而建立左呢套價值觀又有乜用？好似黛安娜咁囉，好多野以身作則，挺身而出，唔比你地蝦女人，你係將軍都無面比，尊重每個生命，連對動物都心生憐憫。感動萬民就唔得架喇，人地又唔知你係乜水，但最少可以影響身邊遇到嘅人和事，用真心真意嘅愛同其他人建立連結，馴養生命中重要嘅人，”only love can truly save the world”，再推而廣之，建立光明嘅力量，同阿里斯陰暗面嘅力量抗衡，係正義必勝嘅「信仰」底下，睇你信乜架姐，可以係黑暗侵蝕光明，亦可以係正義戰勝邪惡，慢慢就可以改變世界，而你又會唔會好似GAL GADOT咁，講番句” I BELIEVE IN LOVE”?
—
《神奇女俠》
Warner Bros. Pictures
黛安娜玩法 在 LOL英雄聯盟【黛安娜Diana教學】S12皎月新版玩法、符文 的推薦與評價
LOL英雄聯盟【 黛安娜 Diana教學】S12皎月新版 玩法 、符文、出裝、技巧、連技攻略！先行篇. 25,743 views25K views. Jan 7, 2022. ... <看更多>