Search
【有關機場巴士路線重組事宜】
7月初同龍運、運輸署就機場巴士路線重組事宜召開咗特別會議，經委員與部門交流後，現運輸署作出咗以下嘅回復：
因E36路線重組後，比原有嘅乘車時間較長，因此建議開辦特別班次（E36S)途經大欖隧道及青嶼幹線往返元朗與機場。
E36S-由元朗(媽橫路)開出：星期一至六(公眾假期除外) 上午05:30, 05:55, 06:15, 06:35, 06:55, 07:10, 07:25, 07:40, 07:55, 08:15及08:40 共11班車
E36S-由機場(地面運輸中心)開出: 星期一至六(公眾假期除外) 下午5:00, 5:20, 5:40, 6:00, 6:30及7:00 (共6班)
原有的E36會就開出時間作出調整，而E36P嘅服務維持不變。
大家對今次嘅調動有任何意見都可以係下面提出，我哋會再次收集大家意見同運輸署反映。
註：E36S係今次特別會議後建議嘅特別班次,暫時仍未有確實落實時間
今日一班元朗區議會同事、運輸署代表、龍運代表開左會交流機場巴士嘅意見。基本上，大家同意機場巴士嘅改組方向，唯一擔心係朗屏、東頭嘅街坊搭改線後嘅A37線會比而家搭A36線為耐，我喺會上已要求龍運交數據，以及諗諗點樣可以提供一啲方案補償朗屏街坊。期望農曆新年前可以就改組方案有共識，農曆新年後就可以盡快執行。
至於我係傾向支持目前改組方案，原因如下：
1. 繁忙時間嘅需要車程同現時差唔多，非繁忙時間更有機會快左，尤其是因為避開左博愛交匯處，車程更穩定
2. 如果屯赤、屯公有嚴重擠塞，龍運會安排所有返元朗嘅巴士線改行大欖，有助釋除塞車疑慮
3. A36可以由27.7減到18.9
4. E36A（新路線）經Yoho到東涌新發展區，擴大路線網絡
5. 唯一最大改動係上車位同落車位互換（以後街坊就可以喺Yohomall一期、青山公路往大馬路方向嘅巴士站上車）
6. 整體嚟講對Yoho、雞地一帶街坊係利大大於弊
7. 另外，A43/A43P繼續行大欖似乎都係相當大機會，相對地會令元朗機巴有選擇，可以揀大欖轉
改組後經Yoho嘅路線如下：
A36 錦上路站—機場 （經港珠澳口岸）車費27.7->18.9
E36（改自E34A）八鄉路—機場（經機場後勤區）
星期一至五 0515-0815會有特別班次由Yohomall開往機場 車費13.9
E36A（新路線）元朗德業街 —東涌逸東邨（經天水圍南、屯門市中心、東涌新發展區、東涌市中心） 車費 13.9
NA36 （通宵線）錦上路站—國泰城（經機場、港珠澳口岸） 車費40 -> 33
N30 元朗站—東涌/機場（經天水圍、屯門、機場後勤區、東涌市中心）車費 28
喺會上，我亦提出因為龍運嘅路線定位已有改變，建議E車增設來回雙向分段收費，同時喺航空業未回復正常之前，喺A車增加有期限嘅雙向分段收費，提供更多大西北嘅交通選擇，同時以此補助龍運嘅巨額虧損。
