<<倒數23天，最大的失敗就是放棄>>
今年年尾原本參加三個Show. Toysoul, 之後冬季購物展，之後維園年宵，當我提出之後都聽到公司一些意見，太多，太忙，太不可行等。。。之後先是維園乾貨無了，再是Toysoul也取消了，只餘冬季購物展，公司內都好多意見都認為這個展唔啱擺，無他，有試過2015年擺，最經典畫面有兩幕，第一幕有位媽媽帶住兩位小朋友同我地同事講可唔可以幫下手，因為錢只夠買一架，但兩位小朋友太細唔識分享，所以問可唔可以買一架送一架，足足講左十分鐘。第二幕我們有用九宮格展示左九款 Roadshow回力巴士，架頂貼左$69價錢牌，有位婆婆行過來話要買給家中的孫仔，一指話要$69，去到收銀她好勞氣話我地執少左，問唔係九架$69咩？我地解釋完$69係一架既價，之後佢再問：咁貴, $30得唔得。。係既冬季購物展可能充滿左好多可以講價既攤位，又有好多入場準備講價既朋友，所以同事有陰影我明白既。
之後我地無參加三年，但這三年劃左一個玩具區，直至今年我地參加返，個玩具區又取消左，係唔係玩野我唔知，但當中一位一直四年都問我地既展會 Sales, Philip兄都好有耐性，好有記性，今年我們唔理有無玩具區，我地決定Say Yes, 由2014年尾, 2015, 2016, 2017, 2018, 今年第6年，年尾在展會以車會友已經成為Tiny同大家分享一年成果既一年一會，如果無左，聖誕總是覺得若有所失咁，所以即使Toysoul, 年宵取消，即使冬季購物展取消了玩具區，但我地今年就一如以往，以大家最估唔到，最顛既思維去創造一個香港玩具區出來，繼續談天說地，以車會友。
圖中既人仔套裝其實今星期或下星期到貨，但展會應該有得賣，近來1/64人仔品牌好多，因互相尊重所以不評論其他品牌，我地一如以往，真人 scan, 平平地，起模做，100層樓扔下街都唔爛，同埋開發等好耐。。。
今天有獎遊戲問題，各 Tiny討論區成日有Fans用Tiny"陳生" 去拍照出post. 第一位朋友
1. 用有"陳生"一張相貼回應
2. 估中真人身份係邊個
3. 第一次出現在 Tiny什麼系列
就可以送你一套五 set的新款人仔
