【龔成問答信箱】(Q14861-Q14880)
Q14861:
龔成老師你好,其實睇完你d片都有啟發。
其實我今年大學gra,係上星期同一位認識多年既好朋友食飯,佢讀唔成書,而且已投身社會,草左D錢。我地平時就係用你教既價值投資法去搵D股買左佢放係度一排等佢倍升或者升5成以上放。而我地係一星期前當食飯有個idea,就係想搞XXXXXX。
我好記得你係好多既片到話成功同失敗既人,問題不在大家既能力上,兩者分別係前者係唔怕難只會做不斷試,而且後者就只想不做,得個諗字怕呢樣果樣。
我同我朋友都好記得呢段說話,我地果晚食完飯番到屋企即時開始準備。希望可以係6月開始試業,等疫情過左就即刻開波。
本金唔算好多,而且我地都傾好,今次既XXXXXX希望可以run到3年,什至5年。我地目標只求回本唔求賺錢,亦什至最少會蝕錢。
當然你可能會有個問號,但其實我地真正想既係希望而家20出頭,大家未有家庭負擔,亦唔洗交家用既時候。希望可以用小小錢,去換一次搞生意既經驗。呢盤生意一定唔會做一世,亦唔會話可能係5~10年。
想問下你既意見,如果比著係你好似我呢個年紀咁既情況,你建唔建議我咁做。個金額其實唔係好大,如果比著係你,你覺得用黎買一次做生意既經驗,學下野?定係用黎繼續投資係D股票到呢?
我今次做生意既本金,其實係上年係中生製藥倍升所賺到既錢黎。我已經放曬啦,你認為繼續投資股票定係試一次年輕既「賭博」會比較好?謝謝!
龔成老師:
我好鼓勵你地去試,你地的年齡,正正係大膽去做的好時機,因為你有膽,同埋「輸得起」,另外,創業一定會經歷好多困難,呢個係一個好好的學習。
好多人就係唔敢試、唔敢輸,所以一世都做一D唔想做的野。你可能會輸,但輸完再起身,試多幾次,總會贏!
講翻你果度,你地首先要做資料搜集,同區的對手有多少,收費幾多,你要從顧客的身份不斷「參考」別人,那個是較成功的,點解會成功。
即是說,你一定要了解當區,一個區可以有多少間,顧客是甚麼年齡,點樣引佢地來,點樣能要佢地再光顧。
比起市場的對手,你的強項是咩?點解要去你度唔去對手度?你地的財力唔多,要同人鬥強無得鬥,但你地可以鬥「與別不同」,在定位上找到你地的特點。
另外,點樣做宣傳,點樣有客,客戶唔會自己上來,點樣識到你地?具體的方法係點?
同時,除了初期的投資外,每月的成本點?各方都要計清楚,你地而家唔係玩玩下,而係同市場鬥,只要唔小心,就會輸,唔會有人同情,所以一定要做足功課。要做,就要認真做!
另外,你地年輕有優勢,想想有D咩係比人強,有無D咩有創意的方法。我無D咩你地會識而人地唔識,至於學生先有的網絡等等。
記住,成功者失敗者最大的分別,係夠唔夠膽做,你其實已行緊成功者果度路,但當中一定有困難。順境時,個個都做到,但面對困難時,就係真正分辨成功人士同一般人的時候,加油!
------------------------------------------------
Q14862:
龔成老師我想問, 我前排13.18戈陣買左一手吉利,之後都一路升, 我諗住等佢跌返13左右先再買多D, 但前幾日我見佢升到16.26
我諗住其實反正都係要等佢跌返,咁不如宜家放左佢賺返少少先, 咁第時買戈陣咪可以擺多少少錢落去..所以我係16.26戈陣放左佢賺左二千幾左右.
請問咁樣既操作有冇問題? 我記得你成日強調買左股票,公司如果係優質既話其實可以唔洗點理佢
但好似我呢個情況反正都要等佢跌, 咁襯佢升戈陣放左佢黎賺多少少成本係咪合理? 謝謝你
龔成老師︰
你犯上一個很多投資者都會犯的錯誤,就是去"估走勢"。
好多人都會話"隻股票近期升唔少,先放左獲利,等回調再重新吸納。",但這股一定會再回調? 在你放了之後,佢會不會再創新高,永遠唔會重返$13? 這些都無人知道。
你要明白投資股票就如買入一間企業,就算佢多優質都要時間去成長。中短期波動好難掌握,所以長線持有會對你最有利。
其實吉利(0175)本身的質素不差,擁有一定的銷售網絡及品牌,不錯的市場策略及定位,而又能把握中國汽車市場增長的機遇。
但中國車市放緩、外來競爭、行業競爭加劇,都成為不利的因素,相信中短期仍會對佢不利。
股價由高位回落不少,除了反映過往處貴水平,現在回落至合理水平外,同時反映市場預期中國車市的不利情況。相信這股中短期股價仍會不利,但長遠前景仍在的,所以你最好保持持貨狀態,長遠回報一定比你用炒差價形式操作好。
------------------------------------------------
Q14863:
你好老師,本人31歲,最近開始學習投資,想為將來退休鋪路,有2個投資問題想請教老師的。
1.本人上年10月開始月供股票$6000,盈富(2800)$2000、恆基(0012)$2000、港鐵(0066)$2000。
今年1月開始加碼至$10000,盈富(2800)$4000、恆基(0012)$2000、港鐵(0066)$2000 及加入中銀香港(2388)$2000。我希望係50-55歲時退休,到時股票資產可以提供每月不少於$20000被動收入。
請問以上方法正確可行嗎?
2.本人父母剛年過65歲已退休。佢地大約有80-90萬現金及保本保險,我覺得保險的回報率太低,想將保險既資金用來投資收息股。
本人心水有 中行(3988)、工行(1398)、建行(0939)、置富(0778)、港燈(2638)、香港電訊(6823),想從以上選3-4隻建立一個收息股組合。
請問應該選那隻股票較好? 我見老師比較少推介中行(3988),請問係有什麼原因嗎? 另外應該動用全部資金既幾多成用來投資收息股比較合適?
謝謝!
龔成老師︰
1) 如果你希望50-55歲時每月有2萬蚊現金流,以股息率5%計,你需要本金480萬。
以恆指過去年平均回報10%計(連股息再投資),你每月投資$10000,20年後大約會增值至逾680萬。由於時間充裕有20年之多,相信你可以達成目標機很大。
你現時投資組合無問題,你照著現在月供方法去進行就可以了。
2) 資金分配方面,你可以將退休資金分為3份。第一份是現金($20萬)、第二份是銀行或保險公司的產品(約$20萬-$30萬),你可以到銀行問問,目標是一些保本,低風險,但有持續現金流的產品。第三份是收息股,佔約$50萬。
其實你所講的6隻收息股都有質素,但考慮到配置方面,我會建議你在3隻銀行股中抽一隻 (避免過於集中內銀股),再加上另外3隻收息股,組成一個4隻收息股旳退休組合。
至於中行(3988),作為收息股都可以。只係整體而言,工行和建行會優勝少少,但投資中行也可以。
------------------------------------------------
Q14864:
你好呀,我岩岩睇左你月供股票的片,你話月供最好是長期,供2年,持有5年,持有係咩意思?定係意思是供5年?
月供股票係咪唔洗睇價位 幾時入都得?
如果我想選定一隻股月供 1928 388 27 12 2800 邊隻好?
龔成老師:
意思是最少最少都要供2年,如果可以的話,供5年或以上會更好。至於持有持有,則是由最初供款開始,起碼5年,這會較好。
其實,月供股票的原理就是儲錢,只是所儲的不是現金,而是優質股,現金永遠貶值,優質企業會升值,持有愈耐當然愈好。
月供股票,唔洗點睇價位,保持長供就得,當然,我會建議你一邊月供,一邊同時儲下現金,即是只將每月一部分用作月供,而這部分就不理價不斷入。
上述都是有質素的股票,都適合長期進行月供,你可以以盈富(2800)作核心,再配上金沙(1928)、恆基(0012),長期進行。
------------------------------------------------
Q14865:
老師,2019年尾我個投資組合是包括了不少熱炒版塊(內房/體育用品/物管)及不少新經濟股,可唔可以幫我評論當中股票優素及是否值得長揸,還是只是短炒熱潮?
由於是算是低位時買貨,暫時每隻股價升幅大約有3-25%左右,我想知道你對新經濟股的看法,可否分享一下,謝謝!
我所持貨的組合,當中包括
阿里巴巴(9988)
美團點評(3690)
眾安在線(6060)
平安好醫生(1833)
中國海外發展(0688)
龍光地產(3380)
雅生活服務(3319)
奧園健康(3662)
李寧(2331)
蒙牛乳業(2319)
瑞聲科技 (2018)
另一部分是月供$6000股票,選股質素又可以嗎?
$2500 中國平安(2318)
$2000 友邦保險 (1299)
$1500 華潤置地(1109)
龔成老師:
你上述持有的股票,大致都是不差的,如果是一些新經濟股,潛力會比較大,但同時不確定性會較高。這類股不是不可持有,但在組合中的比例,你要控制,例如:
阿里巴巴(9988)
美團點評(3690)
眾安在線(6060)
平安好醫生(1833)
而這4股當中,眾安(6060)是相對質素相對較一般的。
至於其他的股票,都不差的,但中國地產相關類,不要佔組合比例太多,你要自己平衡翻。物管股我睇好的,業務正面,有發展,現金流強,但就要小心已有少少貴。雅生活服務(3319)正面。
另外,月供部分都是有質素的,可長線,但如果想組合更加平衡,宜加上盈富(2800)去供。
------------------------------------------------
Q14866:
老師你好,想請敎,本人28歲,未婚。過去因享受自由,工作收入唔穩定,現金儲蓄只有35萬。目前月入約43K澳門幣
另手上持有4手工商銀行 (6.5購入) 2手農業銀行 (3.7購入)
儲蓄保每年5000美元,共五年到2024年
危疾保每年25000港幣,共18年到2036年
對股票唔熟悉,曾短炒下股票,亦曾經亂買老千股蝕過幾萬
係朋友介紹下買左儲蓄保險
無首期,所以短期內無買樓打算
家人們都係放定期
本人對投資唔熟悉,想請教老師有咩適合嘅資產增值建議
目前沒有什麼目標,淨係提醒自己要草錢,求老師理財規劃建議
感謝
龔成老師:
我地理財,要做到攻守兼備,如果你已有保險相關產品,即是已做好了防守的部分,以你28歲,應該集中進攻,好好善用餘下的資金,因此,唔應該買太多儲蓄保險,又或做定期。
建議你增加投資知識,然後逐步增加投資金額,現時先小注去投資先。
記住,投資不是炒賣,是長期持有有質素的股票,你現時持有的,都是有質素的,可長線,但唔應該只投資內銀股,應該建立一個平衡的組合。
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先。做月供股票,每月$5000
。
你可以考慮盈富(2800)$2000。
另外再加1、2隻(每隻$1500):銀娛(0027)、恆基(0012)、中銀(2388)、港鐵(0066)、煤氣(0003)、粵海(0270)、領展(0823)、港交所(0388)等,你可以了解下這些股票,然後從中選股。
如果你不懂股,就集中供盈富$5000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q14867:
龔成老師你好阿,有一個小小問題關於自由現金流既計算方法,我在阿思達克的財經網站看某公司現金流量表。
有經營活動,投資回報,投資活動,融資活動,還有其他現金及等,稅收,利息那些,想請問問一下,有哪些才是用於計算自由現金流?
龔成老師:
自由現金流的計法有點複雜,你除了睇財經網站外,要主動睇年報加減而得出相關的數目,因為財經網站唔會咁樣提供的。
最簡單的公式,就是將經營活動現金流量,減去資本開支,就會得出相關的數目,而數目要在年報的現金流量表自己尋找的。
------------------------------------------------
Q14868:
龔成老師,你好!最近計劃轉換工作, 拜讀了您的作品後, 得知建立財富系統的方法。
我對於投資股票的知識幾乎為零, 故希望找一份可以幫助我學習更多財務知識的工作。但我也不清楚什麼工作才有機會接觸股票相關知識。所以想請教一下老師, 是要找銀行或證券行的工作嗎?
龔成老師:
銀行工、證券行相關的工作,都可以學到股票知識,但具體要睇你的職位,因為不少職位,其實所學有限。
雖然我過往做了多年銀行,不過,我9成以上的股票知識,都是自己睇書、不斷睇年報,去增加的。
因此,如果這方面不是你最想的事業,你不用特登去入行,你只要做一些你有興趣、以及發展的工作,同時,每星期同少少時間,睇書、上堂、睇年報,一年後,你已經比9成股票散戶,有更強的投資實力!
------------------------------------------------
Q14869:
hi 我剛剛睇完《股神的秘密》並對價值投資產生興趣.
想問下老師有無學習分析公司淨值/annual report(p&l, cash flow, financial statement) ge 影片/網/書介紹? 從而學習如何選股thx
龔成老師:
你可以睇《股票勝經》《年報勝經》,又或上我的股票班,都可以學到財務財表、企業估值、選股等技巧的。
另外,巴菲特相關的書有好多,強烈建議你不斷去睇。
------------------------------------------------
Q14870:
老師你好,本人25歲,工作2年多,銀行有50萬港元存款,其中包括約等於20萬港元的美金。最近希望開始學習投資,長遠目標是財務自由。短期目標希望有每月2萬元被動收入。
知道老師推介過一些平穏增值股及潛力股,想問問:
1. 一手手買還是月供比較合適?
2. 如果想用美金存款買一些美股,除了科技股,老師會否建議其他股票?
3. 除了投資股票,老師建議開拓那些收入來源?
非常感謝
龔成老師:
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
因此,以你的年齡與這刻的情況,最好是先做好「增值」。
1)對於投資知識未算好強的投資者,月供是最好的,因為買入價得以平均,風險有效減少。我會建議部分資金月供,部分則留現金,等機會投資。
2)一些大品牌、有好強產品、客戶群的股票,都可以。如果未有或不想選股,可以好簡單,買入指數基金,例如在香港上市的領航標普五百(3140),這基金之投資目標為追蹤標普500指數之表現,是一個好簡單,追美股的方法。
3)做生意。
你後生,可以大膽去試好多野,做生意是一個好好的突破,會改變你一生的事業。我建議你試左先,不斷試,不斷學就有機會。
------------------------------------------------
Q14871:
龔成老師,多謝得你指點,早年開始月供股票,總算平穩增值。本人今年40歲,希望10年內退休。現有約420萬股票, 分佈如下:
5% 盈富基金
21%公用服務(煤氣,北京水務)
27% 民生類(領展,國際家居零售)
20% 金融類 (恆生,平保)
26% 科技(騰訊,藥股) - 主要是因為近期升勢較急,至佔比頗高
2% 其他
現時亦有繼續月供上述股票,每月約8萬。
請問:
1. 上述組合需要作出調整嗎?
2. 現剛好有100萬港幣和100萬人民幣定期存款到期,請問我應按兵不動持有現金,還是繼續做定期,還是投資收息股?
3. 另100萬人民幣做定期還是投資滙賢產業信託(87001)會更合適?謝謝你。
龔成老師:
1)以你40歲的年齡,是平穩增值佔較多,潛力股佔部分。上述的分配,沒有一粳別過多的情況,如果去到3成以上,先要開始考慮調整。
由於你現時仍是財富增長的年齡,因此,就算組合中,佔比最多是科技及藥物類,也無問題的,但當你去到5年後,就要開始有少少調整。
2)以現時的大市平貴情況,以及你的組合分配,現金不要動用住,若出現較大的下跌先動用作入市。
3)暫時做定期先。如果這筆錢投入到股票,你現時的比例會去到2成以下,有點少。
------------------------------------------------
Q14872:
36.5入了500股 6919,請問前景點樣?
謝謝!
龔成老師:
人瑞人才(6919)係一間O2O招聘平台,專注新經濟、新興行業及中國獨角獸企業。佢提供專業招聘服務,以及其他人力資源解決方案(包括業務流程外包服務、企業培訓服務、勞務派遣服務及其他雜項服務)。
業務雖然增長快,但這刻仍在燒銀紙的狀態,要分析與估值其實好難。只可以話有危有機,前景不差,如果你只是小注,可持有,不過要提翻,佢之後的股價可以好大上落。
------------------------------------------------
Q14873:
請問(1) 我在197.2 入了阿里巴巴, 前景會似騰信嗎?
(2) 160.5 入恒生銀請問以上可上望幾多錢?可持有還是食糊呢?謝謝!
龔成老師:
1)阿里(9988)的長遠增長會比騰訊(0700)好,你可以繼續持有。
2)恆生(0011)是有質素的股票,可以長線持有,不過,佢增長力不算強,是收息型股息,同時有基本的增長力。
------------------------------------------------
Q14874:
Hi! 龔成兄你好,我睇咗你唔少文章, 令我獲益良多 , 有啲問題想請教,希望解答
1) 我本人現年48歲65歲退休, 想每個月用四千蚊月供兩隻股票 想買收息股收息, 3號中華煤氣每年十送一,雖然股息率只有2.00%
但係因為有十送一送红股, 如果計埋十送一红股,我有17年嘅供款期, 咁樣自己月供買的股數加上每年十送一红股,股數就會有所增加而令到嘅收息亦都會增加, 咁樣買 中華煤氣 係咪一個好嘅選擇?
2) 我睇 匯豐現在都仲有6.6厘息率,但係股價而家已經低了好多, 仲值唔值得買呢 ? 請問有冇第二隻收息股可以推介畀我?例如2800 盈富基金 ,823領展或者地產股邊隻好呢?
希望得到龔成兄嘅回覆。謝謝
龔成老師:
1)煤氣(0003)可以是其中一個選擇。
當我地進行人生財富累積,會運用「先增值,後現金流」。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
因此,你可以投資煤氣(這刻股息不多,但有增長),到退休前,才慢慢將股票轉成現金流較強的股票。
不過要提翻,煤氣10送1不是必然的,同時佢10送1後,股價會除淨,自然地跌1成。
我會建議你供盈富(2800)$2000、煤氣$2000,會是較平衡的作法。
2)如果你這刻好想即刻收息,匯豐(0005)是不錯的選擇,不過,這股增長力不強,只是收息股。
而你這年齡,離退休仍有一段時間,其實會著重增值,收息方面,這刻佔較少比例就得。
------------------------------------------------
Q14875:
老師你好,本人現在39歲,想月供股票,大概3-4千一個月,請問5同2800邊隻好?
龔成老師:
盈富(2800)會比較好,因為這是一個50股的組合,有較好的風險分散能力,在平衡角度較好。
另外,匯豐(0005)只是收息股,而盈富仍有基本的增長力,就你的年齡來說,盈富會較為適合。
因為,當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
相信每月集中月供盈富,是最適合你的選擇。
------------------------------------------------
Q14876:
老師,想問一問,一直以來都是學習選股買入價。但從來比較少聽到賣既知識,甚至自己都未賣過,應該幾時放呢?
應該定個目標價還是睇情況?最近肺炎,令我好想先放一部分賺緊錢的股票(小米 9.77買入 6000股)。謝謝你!
龔成老師:
首先你要明白財富系統,現金無限量發行,永遠貶值,而我地進行財富累積,其實是一個「現金轉為真財富的過程」,不斷將現金,轉為優質股等真資產。
當持有優質股,就是擁有真財富,長遠不斷升值,點解要賣出,變為貶值的現金?放棄了財富繼續增值?
因此,只要我地持有優質股,就會以長線為大前題,可以只入不出。
當然,不是永遠都唔賣出的,一般在3個情況:
1)該股的質素改變,由原本優質股變成非優質股。
2)這股到了明顯貴的水平,都可以賣出部分或全部。
3)有其他回報更好的投資項目(要十分明顯地高回報),就可以考慮資產轉換。
而你所講的肺炎,只是中短期情況,如果無對企業造成核心性的影響,就不用賣出。
------------------------------------------------
Q14877:
龔成老師,你好。我今年40歲,女,單身,月入3萬,工作很多年了,沒物業,沒投資亦不懂。
如果本金有 120萬,每月可儲 1萬,可以如何財富增值盡快可以有財務自由和有能力供物業呢?謝謝您。
龔成老師:
你現時持有太多現金,要做好配置。
記住,我地理財投資,不是炒賣,是一個財富配置的過程,要做好持有「都是有質素的項目」,作長期分配,在可承受風險的情況下,為你爭取合理的回報。
如果你未有投資經驗,我會先建議你每月做月供股票,利用月供股票去增加股票資產,同時增加你的投資經驗,另外你亦要在這段時間,好好學投資。
你這個年齡情況,財富仍是增長期,不過,就不是進取,而是平穩增值。你可以集中在平穩增值股先。做月供股票,每月$15000。
你可以考慮盈富(2800)$7500。
另外再加3隻(每隻$2500):銀娛(0027)、恆基(0012)、中銀(2388)、港鐵(0066)、煤氣(0003)、粵海(0270)、領展(0823)、港交所(0388)等,你可以了解下這些股票,然後從中選股。
如果你不懂股,就集中供盈富$15000。
到你半年後,如果已掌握了基本的投資知識,就可以加大金額,又或開始以一手手模式投資資金。但要記住,現金部分,不能用盡,要取平衡。
你經過一段時間,利用股票將財富增長後,就可以再留意物業市場,到時視乎情況決定是否投資物業,但這一步不用急。我希望就算你日,當投資物業時,不會用盡現金,同時能做到股樓平衡持有。
------------------------------------------------
Q14878:
Hello 成哥,我今年26歲,自從上年睇到你的專欄之後開始理財同月供股票,好多謝你既啟蒙。
現在大概有7萬蚊股票,分佈如下:
電能實業 197股
長江基建 207股
長實 144股
香港電訊 1,677股
越秀房託 579股
港鐵 96股
南方A50 293股
中國平安保險 10股
比亞迪 25股
置富產業信託 1,000股
現在月儲一萬蚊,當中5千用來月供股票。預計年中會升職,到時可以月儲萬八蚊,當中萬二蚊可以用來月供股票。
2021年6月打算辭職去英國讀master,請問到時有冇機會儲蓄+月供股票投資滾存到40萬?月供股票方面以下配置可以嗎?請賜教。
5千蚊月供股票:
長江基建 $1000
長實 $1000
中國平安保險 $1000
比亞迪 $1000
南方A50 $1000
萬二蚊月供股票
長江基建 $2000
長實 $2000
中國平安保險 $2000
比亞迪 $2000
南方A50 $2000
盈富基金 $2000
感激不盡
龔成老師:
以現時的情況,如果你要在2021年中前有$40萬,仍要加大少少儲蓄力度。
不過,如果你打算到時動用現金,而現時距離這日期,只有一年半時間,這是一個中線的時期,而我地投資,應該長線。
因為中期的大市情況,可以較波動,就算優質股股價,都無人知到時的情況,但如果是長期,優質股就會向上。
你上述持有的,都是有質素的股票,但如果你一年半後就要資金,反而這刻要增加翻現金,始終你到時先賣出,股價存有不確定性,你要在這裡取平衡。
另外,你持有的股票隻數開始有點多(現時仍可接受),但唔建增加太多,因為這會造成管理困難,你可以增加盈富(2800)佔比,而質素較一般,又或業務類似的,可以小心分析後,集中選較高質的。
------------------------------------------------
Q14879:
你好!我37歲有5000匯豐,沒有蝕,我是否要走?還有10萬流動資金,我該怎分配?
龔成老師:
我地繼續持有一隻股票與否,最重要是企業的質素、前景,買入價、賺蝕數,只是一個心理因素。
匯豐(0005)本質有質素,但賺錢能力比過往減左,增長力減左。現時佢只是一隻收息股,增長力有限,因此,你要視乎自己的投資目標,分析翻,長期持有一隻收息股,是否適合,當中的比例多少較好?
以你的年齡,我會建議你轉一半以上的匯豐,去其他較有增長力的股票,例如盈富(2800),這會對你長遠財富增長較好。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
另外,以你的年齡,財富仍有一定的增值力,建議你多增加投資知識,在選股、企業估值、投資時機上落功夫,對你長遠財富有好大影響。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q14880:
hi 老師,我今年22歲,每月收入19k 。 計劃5年之後買樓,打算用月供股票投資,請問有冇咩建議呢?
龔成老師:
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先。
建議你做月供股票,要自己每月供$5000-$8000。最起碼供$5000。
你可以考慮盈富(2800)$2000。
另外再加2隻(每隻$1500):銀娛(0027)、恆基(0012)、中銀(2388)、港鐵(0066)、煤氣(0003)、粵海(0270)、領展(0823)、港交所(0388)等,你可以了解下這些股票,然後從中選股。
如果你不懂股,就集中供盈富$5000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
----------------------------------------------
多謝各位提問,若然你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。
另外,由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
10000人民幣等於多少美金 在 龔成 Facebook 的精選貼文
【龔成問答信箱】(Q12181-Q12200)
Q12181:
老師,我依家好謹慎,只持有現金,係因為2015信錯大時代會來臨,跟人入市最終蝕左幾萬,更係因為2016年被電話騙案呃左超過100萬。
之後係2017-2019上半年,我做一份正職加4份兼職,用3年賺返/儲返100幾萬,填返我所失去,真係有血有淚。
我雖然明白你所言價值投資,不過我仲有個心結心,就係好怕再蝕錢。
龔成老師:
你怕,是因為你未了解投資,只要你明白真正的投資後,就知道風險的概念。
你以為持有現金安心,這是由於你「不知道財富系統的真相」,長期反而會對你不利,所以,你這刻不用急於投資,但就需要急於學知識。
這幾十年的現金貶值10倍以上,我地不是炒賣,而是「將貶值的現金,轉為真正的財富」,其實,只是持有「財富」。
其實,你簡單地做月供股票,盈富(2800),已經是一個基本的保值方法。
------------------------------------------------
Q12182:
龔成你好我最近看中了一隻地產收租股,希慎興業(14),但有些少問題想問
1. 加息既話會推高借貸成本,樓價會下跌,但如何影響到收租股(如希慎、新地)
2. 除左加息既因素之外,仲有咩因素會導致租金 升/跌?
3. 希慎的物業集中銅鑼灣地段,有利園、希慎廣場等,都是租金昂貴和人流旺既地段。
但我不是太明白加息減息對佢的影響,我只知道加息不利地產股,減息則利,但背後原因可否講解一下
謝謝
龔成老師:
1)地產企業本身有借貸,加息會對佢成本影響,這就會影響盈利。同時,大部分人、企業,買樓時都會用借貸,當加息時,成本增加,同時所需的首期都有可能增加,這就會令樓市的需求減少,有機會令樓價受壓,最終間接影響地產股。
2)最基本就是本身的供求問題,另外就是經濟、零售市道。
3)佢的原理是長期收租,如果加息令整個地產業轉弱,佢都會間接受影響,同時,加息會令經濟活動減慢,即是影響零售,最終影響佢的租戶。
------------------------------------------------
Q12183:
老師,想問下銀行月供股票計劃所不包括的股票(例如中生製藥、褔壽園),是否就沒有方法對該些股票進行月供?
龔成老師:
每間銀行提供的月供股票,都不同,你可以去不同的銀行問問。
如果該股無得月供,你可以自己作出分注,例如每3個月入一手,其實都有類似月供的作用。其實月供的目的,就是將買入價平均,減少一次過高位買入的風險,只要你做到這點,其實已可以。
------------------------------------------------
Q12184:
之前樓價短時間跌過一次, 你認為樓價有機會再跌嗎?
正考慮自己搬出來住, 但唔SURE係咪好的時機
龔成老師:
樓市現時略貴,但要佢大跌,好難。
這是由於香港樓的供求問題,需求仍然好大,就算有供應都無用,我見身邊仍有不少朋友(適婚年齡),都等機會買,即是當樓價跌少少時,就會有一批潛在的需求走出來,在這前提下,樓價跌極有限。
所以,香港樓長期會偏向上,但中短期波動就無人知。
------------------------------------------------
Q12185:
老師,我今年我三十一歲,想問現時的士可以投資嗎? 因為我老豆有一部已經供完的士, 但係我想投資多一部作為資產, 我想問而家合理嗎?
定係將現金放係股票身上?thanks
龔成老師:
的士牌現時在合理區,這都是一個投資工具,但你就唔好預期佢有好大的增長力,已經不及過往的年代,因為佢面對市場環境已有不少,叫車程式會對佢不利,雖然未必會影響到要減租,但都會影響長遠增長。
你可以視為收息的工具。
但如果你31歲,想財富有較大的增長先,你應該先投資股票,到一定的財富後,才考慮將部分投資的士牌。
------------------------------------------------
Q12186:
龔sir ,想問下你點睇 吉利的前景
畀大行唱淡佢前景
但係我本人又好睇好佢新能源汽車係大陸 銷售將大有作為
龔成老師:
如果你有留意大行報告,都會明白佢地的分析點,會集中在中短期,無可否認,中短期的中國汽車市場仍然較弱,競爭亦會加大,加上中國經濟有不利情況,對吉利(0175)來說,中短期都處於不利環境。
但長遠來說,這企業正面,無論是品牌或新能源車,其實都不差,這股現價合理,分注投資無問題,但就要長線持有。
------------------------------------------------
Q12187:
龔成sir,想問下你呢隻1762呢隻服,呢隻有無潛力呀,而且我之前買落都多,但最近係咁跌,想問下咩情況,謝謝
龔成老師:
萬咖壹聯(1762)上市年期唔長,因為新股上市一定會「整靚盤數」,所以要慢慢先會見真章。
佢2018年有一些優先股同認購證的虧損,合共有$4億,令佢2018年度最後有賺變蝕。
從業務上,都算增長的,但現時佢的經調整淨溢利約$1億,以現時市值$30億計,點都有少少貴,反映佢上市價已經唔平,其實股價炒起,之後大跌,但下跌至現時水平,仍然唔平宜。
佢回落的原因,主要是市場之前預期高,同時有炒作,現時回落至較正常水平,但計估值仍然唔平。
------------------------------------------------
Q12188:
想買入3手968信義光能,博佢倍升,想問下老師意見,對e隻股點睇
龔成老師:
信義光能(0968)有質素的,雖然股價較為波動,但多年來都保持向上,不過近一年的生意就出現了下跌,市場的增長必然及以前。
投資價值仍在,但業務的增長力有可能比從前慢,可以穩中求勝,但相信倍升要時間。
------------------------------------------------
Q12189:
關於秘密本書...我睇左好一段時間
但都覺得好難掌握....
老師會唔會有D 具體技巧可以分享?
龔成老師:
先定下一些明確的目標,無明確目標就乜都做唔到,下一步就是相信自己做到,同時要設定合理可行的計劃,你要「做」先得。
最好將目標寫出,貼在家中,同時將完成目標的物品,具體化,例如你想要一輛車,那將這車的相片貼在家中。
同時,你可以每晚大聲讀出自己相完成的目標,同時對鏡自我激勵,同自己野一定做得到!
------------------------------------------------
Q12190:
老師你好,想請問00003 香港中華煤氣 目前是否還是合理價位?
如果打算用$20k月供股票,想把這個加入月供組合,以下比例是否合適?
02800 盈富基金 $5k
02388 中銀香港 $4k
01928 金沙中國有限公司 $4k
00003 香港中華煤氣 $3k
01211 比亞迪 $2k
01177 中國生物制藥 $2k
龔成老師:
煤氣(0003)之前略貴,但這股有質素,同時增長力不錯,市場認為佢「貴得有道理」,而近期算是合理區中上。其實,最好就是月供,這可以減少買入價的風險。
至於月供$2萬,上述的組合可以,這都是有質素的股,同時有長遠增長的能力,以月供模式去不斷累積,是很好的方法,上述的分配亦無問題,基本上已經可以開始進行。
另外,建議你多增加投資知識,在選股、企業估值、投資時機上落功夫,對你長遠財富有好大影響。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q12191:
龔成老師 小弟27歲
今年初剛剛學習投資
1)10手- 788中國鐵塔 每月分注買入 平均價$1.75
並打算有多餘錢便會趁低位繼續分注買入 長線
2)2手-486俄侶 $3.18
3)6手-1810小米 平均價$10.8 渣左半年都冇乜上落
4)2手-1765希望教育 $1.26買入
5)3手-2660禪遊科技 剛上市時高位$1.5入 現價$0.85(-45%)
想請教您我現手持的股票應如何部署?
老師對2019年5G發展相關股有咩睇法?謝!
龔成老師:
1)這股有質素,可以長期持有,你分注買入的策略正確,但不能太集中在單一股票,否則有風險。
2)這股風險較高,要平衡當中的風險。
3)這股中短期仍會較一般,如果你打算1年內有野睇,就選錯股了,這股要更長期先野睇。
4)其實這股不差的,但上市時的股價貴,慢慢回至合理區,因此投資新股、半新股都是危險的。只可以話投資這類股不能大注。
5)新股出現這現象是正常的,如果我是上市公司,都會盡力「整靚盤數」,以貴的價上市。因此,上市後1、2年先會慢慢見真章。只可以話投資這類股不能大注。
5G當然正面,但都要小心市場過份的炒作,盡量在市場發現這股前投資,而不是發現後才投資,因此要有自行選股的能力。
------------------------------------------------
Q12192:
老師,點計一間公司的長遠股價增長,當中的回報率點推算?
龔成老師:
我地買股票,就是投資企業,企業的長期增長,就會帶動股價向上。
當考慮這企業的增長力時,會參考過往的生意與盈利增長,同時會了解往後的經營環境,分析這企業之後的增長如何。
若果業務仍處增長期,一般能產生12%-15%的增長,如果是平穩增長類的業務,就有約8%-10%增長。如果是增長不強,業務已成熟的企業,可能只有5%的增長力。
------------------------------------------------
Q12193:
你好老師, 我今年30歲 月入2.5萬 每月要還3600學生貸款 因父母已退休要給10000家用 ,有供醫療保險 $1100/月
我是對股票零知識,是在今年才開始買你的書學習儲蓄投資,有四萬存款可作流動資金
想請教二個問題:
1.大概每月有$6000可用作投資,如果月供股票購買盈富$3000比亞迪$3000?
2.我想問問怎樣計算利息,想知道月供盈富$3000比亞迪$3000,十年大慨可以有幾多錢?
3.有四萬流動資金值得一手股票嗎?
謝謝
龔成老師:
1)比較平衡的投資,是盈富(2800)$4000、比亞迪(1211)$2000,餘下儲現金,長期進行,餘下的現金目的是等投資機會。
2)如果你每月供$6000,假設回報率為10%,10年會滾存到$114萬。
3)因為現金唔多,反而建議你留翻先,等機會仲好。
------------------------------------------------
Q12194:
龔成老師你好,我23歲,月入時多時少平均17k,與母親租樓住,我租樓的支出加水電等約$6000,買左股票勝經開始睇,儲蓄只有約十萬,打算開始月供股票,現儲蓄就等大跌市
選股方面,我想起步先月供$3000-4000,請問我應該
1)2000盈富+1000港鐵+1000中銀香港
2)3000盈富+1000港鐵
3)3000盈富
最後,想請問我留意大灣區的樓盤剛發展,有些首期十幾萬已可入場,請問有投資/老左自住空間嗎?因為香港樓真係好貴,老師點睇屯門新龍床盤百幾萬買百幾尺?
如果買黎自住係咪好過我現時咁租樓?但我諗終有一日有家庭都無法繼續住,收租同放出都覺得無太大升值空間。
龔成老師:
你可以月供盈富(2800)、港鐵(0066)、中銀香港(2388),這個組合適合你的,記往,月供股票唔好理中短期股價,保持長期進行就得。
我地比較平貴,唔單止睇呎價,同時要睇租金回報率,大灣區雖然有發展,但有些地方的回報率比香港更低,反映其實都處貴的水平。
因此,你可以投資大灣區,但就要小心選擇,要選有發展,同時配套較好,而租金回報率唔能太低的物業。
------------------------------------------------
Q12195:
你好龔成老師! 感謝你抽時間解答投資問題!
本人33歲,月入扣除MPF後約25000(另加OT/Bonus 約2500), 目前扣除開支每月平均可儲14000~15000。
有一所自住公屋,一個人住,未補地價,市值約250萬。
因幾年前才增加收入, 固三年儲蓄只有約50萬多。一直明白儲蓄投資是致富途徑,但認識的人投資都輸錢為多,所以一直不敢接觸股市,不希望辛苦儲下的錢化為烏有,因此早前經保險經紀介紹買了-派息基金
雖然過去派息達9厘,但管理費卻是3.2%, 貿易戰加上本金和派息不斷下跌的情況下決定放出基金, 兩年扣除所有費月等於沒賺。
除了這次外本人已沒任何投資經驗,直到看到閣下的書和心得後,就像明燈一樣解除以往的憂慮,決心認真學習價值投資。目前已看了<80後3百萬富翁><致富籃圖>和<50優質潛力股>
為了不讓自已衝動入場, 目前做了45萬定期, 半年後到期。另外已報了閣下的倍升股課程。希望半年內提升了投資知識後才進場。
看過閣下的文章都介紹初學者月供盈富, 領展, 金沙, 港鐵。希望先增加本金,對現金需求不大。如果月供以上股票各3000會否恰當? 或應作其他安排?
非常感謝老師抽空解答疑難。
龔成老師:
基金有好種的,當中一定有好有壞,所以要小心選擇,近年有所謂的月月派息基金,但我收到有些網友同我反映,都出現了賺息蝕價的情況,因此,投資前一定要小心分析。
你報了課程,因此建議你這刻不要心急動用$45萬,等你上完堂會有更具體的配置模式,暫時先進行月供盈富(2800)$5000,其他不要動用住。
你唔需要急於1、2個月,投資是一個長期的運作模式,要求我地有策略地進行。
股票班見!
------------------------------------------------
Q12196:
龔成你好,本人現時26歲,月入約26000元,現時有10萬元左右的分期卡數要找,大約兩年後會還清。
在還清卡數後我每個月可以儲到20000用作投資,希望40歲前可以達到財務自由狀態。問題如下:
1) 我應該先一口氣還清卡數再投資,定係由佢每個月每個月敢還好。
2) 想請問 12 同 3 如果只選一隻 邊隻會增長會更好
3) 如果我只係想集中火力係一兩隻優質增長股有無問題?因為我覺得太過分散會影響到長期持有帶來的複利效果(如10送1紅股),你點睇?
謝謝你回答我的問題
龔成老師:
1)卡數一般的利息都好高,你盡快找卡數對你有利。
其實我地會比較你利息與回報,即是說,同一筆錢,應該減少利息支出,還是作投資創造回報,由於利息高,回報好難追到,因此,你還錢較好。
2)雖然煤氣(0003)的增長力略好,但我會建議你選恆基(0012),首先現時煤氣不平,從值博率恆基會較高,另外,恆基是綜合企業,當中已有煤氣,因此風險分散方面會較好。
3)太集中會有集中風險,該股有很好的增長,當然理想,但如果不如預期,你整個財富組合就會有好大影響。因此,建議你投資盈富(2800)、恆基,以及多1、2隻股,建立一個平衡的組合。
------------------------------------------------
Q12197:
你好龔成老師,我係你既讀者,我已經睇哂你寫既書本。
容許講下我背景,我今年26歲,一年前曾經向銀行借貸10萬去買車,直到朋友介紹你本財務自由行後,我決心重拾出發,已經賣車同要嚴謹控制支出。
我每月固定支出如下:
貸款$4306.7 (欠8期)
存儲 $2500 (和女朋友的聯名戶口)
學生$622
雜費
寬頻$98
電話費$188
共$7714.7
我女朋友今年26歲,人工大約$17000,我和她都有共同理念(財務自由),我們今年1月開了聯名戶口同時並進行月供,每人存$2500/月,即合共$5000,我和女朋友商討得出如下:
-$3500 月供2318中國平安(我認為是優質股)
-1錢黃金(黃金係抗通脹的工具)
-其餘大約$200-300現金會存起
請問老師這個組合可以嗎?
另外她自己月供組合,請問月供組合可行嗎?
700騰訊 $2000
823領展 $2000
我將會7月尾辭職,8月會轉投的士行業,我經常唸當我轉工後,每日收入唔穩定,我唔知如何去分配每日的薪金。因為如果係日薪就做唔到一般打工既收入-儲蓄=支出,請問老師可以比意見我嗎?
另外自己現時只有4手939
預期每月存$6000
分別各$2000分配係1093,1928,700上,請問龔成老師這個組合好嗎,因為我唔想供2800原因係我想揀選個別股票跑贏指數
龔成老師:
平安(2318)是有質素的股,但最好同時月供盈富(2800),比較好的做法,是盈富$2000,平安$1500。
至於黃金,可以投資的,因為黃金是「終極貨幣」,因此有持有價值,不過,黃金沒有現金流,亦不能創造實際的經濟,因此,我地唔會將黃金佔財富組合的比例太多,一般在1%-3%已夠,5%是上限。
現金儲蓄部分,最好有$1000。
至於你女友的月供組合,無問題,但最好留部分現金。
至於你轉行,收入需然唔穩定,但我地都是以長期平穩計,因此唔需要太擔心。你選擇分配的3隻股,都有質素,可以進行,但希望你同時留部分現金。
------------------------------------------------
Q12198:
Hello, 龔成你好。我想寫呢個信息黎多謝你。
我一直係一個好徹底既月光族,大學畢業工作將近8 年一直零儲蓄(已還清學貸)。
2017 年底初次接觸你既page,得到好大鼓勵及啟發。
2018 年1 月決心開立月供股票,原來強迫儲蓄真係有用!
因為不是固定月薪,未能每月儲一定金額,但至今1年半過去,自我做個review, 竟然平均每月儲到10000。
雖然落後很多,但見到自己由一所無有,到依家有一定儲蓄,感覺踏實許多。
而且做事做人亦清晰,有條理左;清楚知道自己目標係邊,可以點樣拆開一步步做到。
小小既改變,一天一點累積,係會見到成果的!
好多謝你!用生命影響生命
龔成老師:
好,見到你有實質的財富增長,咁就好!
其實有好多野,我地都是做到的,但人就是「認為自己做唔到」,於是無去做,但其實,真正去做時,其實自己有本事做到的。
你已經行左好好的一步,之後就要做堅持,保持這個儲蓄狀況,同時,要埋要提升自己的投資知識,令財富合理地增值,加油!
------------------------------------------------
Q12199:
有關於80737,想用作收息,可以嗎?但是,佢派息好混亂,我睇唔明。請指教。
龔成老師:
灣區發展-R(80737)因為大股東轉左手,之後又改左名,同時將結算日期更改,所以你見佢的派息會唔同左,其實只是前與後的問題。
佢最近的派息約為人民幣0.1,你可以當佢半年派這個數,但由於結算日改,所以你睇財經網站D數較亂,其實好多野都變過。
------------------------------------------------
Q12200:
老師,我想請教一下 我呢個個案可以點發揮最大效益:
29 歲,單身,同家人住。月入29500 扣mpf 實袋28000。玩牛熊輸過好多錢。現只有現金$50000,股票組合$120000。
每月供股$8000
領展、煤氣、富力、中國移動、港鐵、維他奶。
上年樓市高位買左間居屋460 萬。當時家人用自住樓加按俾我做首期 240 萬,我人工做按揭220 萬。
現居屋放租收$10500。家人同自己按揭都是我自己負責,自住樓還$16000 放租樓還$8500。即是每月放落供樓金額$16000+$8500-$10500 = 約$14500-15500 (管理費差餉)
月入$28000- 供樓$15500 -供股$8000 只剩下很少。
另外已完成一項五年期儲蓄保險。五年已供完$15500 美金,根據資料,39 歲可拎29000 美金,59 歲可拎115000 美金。可以點安排最好?
目標:想加速增值自己資產,想五年後有100 萬現金/股票。
有諗過罰息期過後轉按,到估價較高的銀行然後加按40-50 萬資金出黎投資,例如放到高息股票套息,或在內地買樓俾首期再等升值。
好亂,希望龔sir 睇得明
龔成老師:
暫時唔建議你再加按套現,你試試寫自己的個人資產負債表,(《財務自由行》有教),你會見到自己的總負債,已到達過高水平,開始危險,雖然你年輕可以承受多點風險,但我地都要注高財富平衡的重要性。
月供所選的股票都不差,基本上你可以保持月供,長期進行就得。
盡力儲多少少現金是出路,唔建議你太少現金,因為現金的作用是等投資機會,有本金才可以創造更多財富,同時,建議你想方法增加收入,考慮做小生意都得。
至於儲蓄保險,回報率算是不過不失。其實好睇你本身的投資能力,如果你過往投資股票,每年平均都有10%以上的回報,那不如自己投資股票。但如果你回報只是一般,不斷繼續做這儲蓄保險。
----------------------------------------------
多謝各位提問,若然你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。
另外,由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。