【龔成問答信箱】(Q22301-Q22320)
Q22301:
Hello 龔 Sir, 幾個月前開始接觸你,另外,我先生買咗幾本你嘅書,我睇咗你其中一本書,其實我二十多年對投資都有少少心得,只係較少接觸新經濟股….
Anyway, 依排個市跌,股票跌了 10%,咁多年股市上上落落我都無乜所謂….
其實我想講返重點,因為做全職媽咪,我十幾年無返工,但我睇了你嘅書後,決定跳出 comfort zone, 揾咗一份我很愛的 part-time, 返咗幾個月,
我真係覺得好有意義又表現幾好….但係,我今日竟然唔知醒,今日公司叫咗第二個人頂上一日,我真係喊足成日….衝動下買了 #700 發洩…
今日的故事講完,想同你分享,希望下星期我繼續有工返
龔成老師︰
如果你有上過我股票班,就會明白,我地的同學好小心投資的。課堂會派一份6頁紙的「企業評估表」,我會逼佢地填好6頁紙,先可以進行投資,所以佢地的投資都好穩健。
人生路上,我地難免會遇到一些令人氣餒的意外。最重要,係我地有無方法,令自己收拾好心情,重新上路。
發洩,其實係無問題,因為係一個情緒抒發,可以幫自己調整好心情。
每個人抒發的方法都不同,有人會做運動、有人會去唱K狂叫、有人會去沙灘對住個海沉思...。只要唔好傷害到自己和其他人,咁就無問題。
當你情緒,開始可以慢慢回復平靜,我地就要客觀分析,點去解決當前問題。(記住情緒未控制好,唔好做重大決定。)
其實遲到,我相信好多打工仔都試過,除非你本身係遲到常客,或者本身比人印象係唔盡責。否則一次半次,你誠心道歉,相信問題不大。
由於你缺席,公司要找人頂一日,都係正常,因為人地都要運作。
希望你可以明白,人生總會遇上不如意的事,重點係你面對的態度,而唔係件事本身。
其實,我好欣賞你走出comfort zone的勇氣。特別你係一個無做野1X年的全職媽媽,就更加難得,你要加油!!!
另外,你好衝動咁買左架騰訊(0700),現價算合理區中部。雖然近期中央政策,對相關大型企業,有不利影響。
但騰訊(0700)係有質素和規模的公司,相信會慢慢適應如何在這些新法規下營運,因此長線投資價值依然存在。
不過,你預佢中短期一定會較波動,但長線持有的話,就無問題。
------------------------------------------------
Q22302:
1) 龔sir你好,最近我學習了SOTP估值方法,我用此方法評估了最近金山軟件的估值,你可以給我一點意見嗎?
金山內在價值:
網遊+辦公軟件=70億人民幣
金山雲= 108億人民幣
淨現金= 140億人民幣
獵豹移動= 10人民幣
但參考aastock 496.93憶市值
我計漏咗啲咩?
網遊和辦公軟件以33%增長,金山雲以一倍增長。獵豹移動大約股價$2美金,大概18億人民幣,現金就參考披露易最近的2020年全年業績
如果計算之後就變成價值$28.46一股,這樣就高了30%
2) 另外,信達生物最近研發出pemigatinib藥物針對治療癌症,並已經在台灣日本美國批准使用,並對信達生物業績增長一倍以上,如果股價跟隨大市回落至$60,即是到250天線附近。有見及此,值得買入嗎?
不好意思一次過問你這麼多問題
有機會出現MACD背馳嗎?恕我班門弄斧
1801信達生物(六個月圖)
龔成老師︰
1) 雖然有參考價值,但你都要明白背後原理,由於唔知你具體每一部分怎樣計算,有可能你這個估值方法,只簡單將企業子公司市值加起(持股部份),再計入集團本身資產和負債,去做出一個市值作估算。
現時財經網站提供的市值,純粹係現價,再乘以發行股數。
而你這個方法,係要對不同分部,因應其特性和發展階段,用相應估值方法,去作出評估,所以唔一樣係正常。
其實,市值計算本身係好主觀,特別係一些估值方法,如果你唔係非常有經驗,只要數字有些微偏差,個結果可以差好遠。不同估值方法,會適合不同性質企業,唔可以亂用。
而且附屬公司、聯/合營公司計算比較複雜,如果直接閱讀財經網數據,係會有偏差。
所以係估值前,我地要按實際情況,對數字作出相應調整。這部份較難,我都係在自己的進階班,才會教授同學。
因此,我唔建議你單用市值,作為分析基礎。你可以用佢參考,但最重要都係了解企業本質,佢做什麼業務、行業發展狀況、財務數據、競爭情況等,去做核心會較穏當。
金山軟件(3888)主要從事遊戲研發及提供網絡遊戲、手機遊戲及休閒遊戲服務;提供雲存儲及雲計算服務;設計、研發及銷售推廣辦公軟件產品及服務。
業務有質素,長遠發展力不差,不過擔心股價較為大上大落,現價合理區,唔建議大注投資。這股前景正面的。
2) 你要記住,我地投資股票,就等同投資一間企業。你最重要係知道佢本質、行業等基本因素。
過去股價未必能反映其未來情況,因此唔好再睇圖的趨勢,這是好錯的投資方法!巴菲特已經講到明,技術分析沒有作用的。我地只會分析企業的質素,以及企業的價值。
我20年前,都會用移動平均線、RSI、圖表等分析方法,但當我輸完又輸時,我決定放棄這些技術分析,從此我就不斷贏錢。
信達生物(1801)係一家中國生物製藥公司,開發了集研究、發現、開發、製造及商業化於一體的生物醫藥平台。
睇翻佢資料,佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。
你所講的,是一個利好因素。
但由於仍處於燒銀紙的狀態,所以有危有機,潛力度是有的,但估值好難,現時市值都唔細,只能完全「估」佢將來的價值,不確定性好大。
只可以話,這刻投資值博率中等,你投資係可以,但唔建議大注。
------------------------------------------------
Q22303:
Hello 龔成你好,想請教下你關於現況應該點樣投資
我地二個人(30歲頭), 每月固定收入66000(已扣MPF),係外地有個物業價值600萬左右係按揭每月交17000左右
現在手頭上有大約150萬現金,30萬股票,20萬黃金 (結婚收到的)
現在需要搬屋, 正係度煩惱緊買定租好 (如果租大約13000-15000左右),銀行就話我地可以最盡係香港置業借到6百萬 (有說明外地物業同按揭情況)
不過我地就怕太risky/未係合宜嘅時間(定係等多1-2年再升人工先), 不過又好似好浪費現金,定係可以做一點其他投資? (唔係買物業)
希望你可以指點下我地. 不過如果你Post出黎我驚比人估到係我地, 好多朋友都有follow 你
萬分感謝!
龔成老師︰
香港物業,我唔知中短期會點走,但長線我預期都會維持上升。如果你2人係計劃,長線都會留係香港生活,我建議你要為自住屋,做定準備。
現時樓市雖然唔算平,但若果有配合到你長線生活所需,價格合理,足以你們長線"供得起"的物業,其實已經可以出手。
若果你都係想穏陣D,等人工高D先再算。現時資金,可以先投資在優質股,去進行增值。
你們可以選擇一些「平穩增值股」+「潛力股」作投資目標。若每月有一定儲蓄,建議進行月供股票,去提升增值能力。
以現時大市合理區狀況,你可以考慮用部份儲蓄,進行月供股票。你可以每月先用一半儲蓄,另一半就先儲起架策略。
如果你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約3-5成,視乎你投資經驗多寡和了解這些股票程度而定。
大市現處於合理水平,那150萬資金,你可以先用一半,以"分注"形式慢慢入貨。餘下一半和每月儲蓄,就等大跌市機會出現,才大力度掃貨,並長線投資。
而黃金是貴金屬,有「終極貨幣」之稱,是人類自古以來的貨幣,因此,有持有價值,而現時我地的現金,一定長期貶值,所以黃金長期會向上。
不過,黃金沒有現金流,持有無法創造出經濟價值,其主要作用是對沖黑天鵝事件。
所以,你可以投資黃金,但不用佔財富比例太多(<3%),而且持有的應該為實金。
當然,如果這些黃金若有紀念價值,你係可以自行衡量是否保留,不必跟足<3%的標準。
------------------------------------------------
Q22304:
Hello 龔成老師,上次聽左你意見開始抽部分資金去月供2318,現在組合配置更佳。另外有幾隻股票想問下你意見。
1. 3309
2. 1368
想了解你對呢2隻股票睇法
3. 1830
由2.x 見你講必瘦站但一直無入貨,見而加升到差不多10蚊
想問下合理區同便宜區位置係邊呢
謝謝你!
龔成老師︰
希瑪眼科(3309)有質素的,佢主要於香港及中國內地提供眼科服務,及銷售視力輔助產品及醫藥產品。
另外,睇翻佢,都尋找加大在中國擴展業務,係2019年透過收購眼科醫院於昆明及上海拓展服務網絡及在惠州設立一間新眼科醫院。
除了一線城市,佢亦係昆明及惠州等二線城市拓展服務網絡。
這股在業務上,的確有吸引力的,相信生意將會不斷擴大。不過過現時估值都唔平,現時估值略貴,基本上已反映了企業的增長力。長線投資不是不可,但就唔建議太大注。
特步國際(1368)不差的,生意與盈利都有增長,本身都算有品牌,不過盈利就較為波動,部分年份盈利出現下跌。但長遠仍是正面。
個別年份有生意上升但盈利下跌,反映成本增加,同時未能轉嫁消費者,又或者佢要用減價策略才能吸客,反映賺錢能力未必好強,質素有,但不能定義為最高之列。
整體都有長線投資價值,現價偏貴。等佢最少回2,3成,才好開始小注。
完美醫療(1830)長遠有發展,本身有一定的質素。而價唔平,$6/7算係合理區頂部。若你到平宜區,需要出現好大幅回調,才可以。
------------------------------------------------
Q22305:
講完投資,保險個part都想請教下老師
以3X歲女士有家庭,1個3歲小朋友為例,其實要投保(危疾)既保額大概係幾多先叫合理?(另有買醫療)
每個經紀講既都唔同,都唔知幾多先叫足夠
龔成老師︰
危疾,佢賠償係已一個指定金額計算,同醫療保不同。這筆賠償,無指定用途。
因此,危疾除了可用作抵銷部份醫療開支外(超出醫療保保障部份),最重要係填補你因長期不能工作,所失去的收入。
由於危疾係一些大病,一般治療至休養,可能講緊係2-3年。所以,你可以用你2年年薪,作為基礎標準。
再按你現時和預期將來家庭開支狀況、保單條款等,再進行調整,咁就可以。
------------------------------------------------
Q22306:
龔sir你好,我現在持有 主要是收息股。正為退休作準備,還有少量其它股 等合適時機沽出換馬
現在有點舉棋不定,因為以下4隻收息股都是我比較喜歡的 但只能4選2:
1098 路勁
3383 雅居樂集團
604 深圳控股
1883 中信國際
有勞龔sir幫幫眼 打擾了 謝謝!
龔成老師︰
中信國際電訊(1883)業務穩定,整體質素算是不差,作為收息股係可以。
深圳控股(0604)和雅居樂集團(3383)都適合做收息股,但佢地負債較高,風險會高少少。
而路勁(1098)都有質素,但派息較受盈利所影響,作為收息股,就未必咁合適。
這些股票,現價都在理想,已經可以分注入貨,並長線持有。
------------------------------------------------
Q22307:
想请问Geely Auto 您又怎么看呢?
Xiaomi 现在的价钱算贵吗?
龔成老師︰
吉利(0175)本身的質素不差,擁有一定的銷售網絡及品牌,不錯的市場策略及定位,而又能把握中國汽車市場增長的機遇。
長遠來講,佢的品牌與發展在中國仍理想,2018年,吉利透過旗下海外企業,動用超過$500億人民幣收購戴姆勒股份公司9.69%股份。由于戴姆勒股權結構分散,所以吉利已經成為了戴姆勒集團最大單一股東。
另外,佢早前杭州灣新工廠正式發布純電動新品牌新車「極氪(ZEEKR)001」,宣布吉利進軍高端電動車。
這些動作不單有利佢有中國發展,同時長遠,可能加快了海外發展速度。因此,這股長遠仍是正面的。
現時價位在合理區頂,至略貴。你預佢股價會波動,有貨可長線。如果現價入貨,小注都可以。
小米(1810)有潛力的,佢的產品性價比高,相信在全球好多個國家都會有市場,佢長遠只會進一步增長。
同時,佢建立的平台是佢長遠的增長動力,先賣手機,再利用手機的平台延伸銷售小米家電。長遠正面的。
這股可長線,現價略貴,回多1,2成,才開始小注會較好。
------------------------------------------------
Q22308:
龔成你好呀, 我一直有睇你既page同專欄, 好讚成你所講, 股票係應該要睇長遠, 加上近期短炒蝕過錢, 更加同意你的觀點。
因為都踏入中年, 加上疫情期間工作大受影響, 所以都好希望可以盡快學識投資,
近期自己心目中都mark定左兩隻, 希望可以請教一下你的意見 (唔知可唔可以咁樣PM你問, 如果唔得都唔緊要的。)
唔知可否請教以下幾隻股, 可長揸嗎?
- 中遠海控 (見佢升咁多一直冇買, 但前景幾好咁)
- 國泰航空 (一直在7蚊左右持有左好耐, 希望等到疫情完後)
- 醫思健康 (有新世界入股, 加上是醫美行業, 自己比較熟悉, 覺得前景不俗, 但之前又係升左好多, 一直未敢入)
多謝指教
龔成老師︰
我想你先明白一些投資概念,我地做財富增值,就係尋找優質企業,用一個合理,甚至平宜的價錢,去買入,並長線持有。讓其自然增值,以達至財富增值目的。
成件事,重點係「優質」之餘,買入價格都要係「合理」。
中遠海控(1919)主要從事提供集裝箱航運、集裝箱碼頭管理與經營服務。
整體的質素算是不過不失,雖然在行業有一定的規模與優勢,但行業整體的賺錢能力無過往咁強。
經濟好轉會對佢有利,因為始終是對經濟較敏感的行業,現時的股價已反映相關利好因素。股價大升後,其後之後較難有高增長,因為已反映了利好因素,反而預佢之後轉為平穩增長。
這股係有投資價值,但現價略貴,未係投資時機,要等佢回2、3成會合理翻d,我地才可以考慮。
而國泰(0293),坦白講質素只是一般。
其中一個風險,是油價,睇翻佢過往多年,油價對佢成本影響好大,令佢盈利十分波動,就算佢利用對沖,都唔係好成功,反而試過因對沖而蝕大錢。
另外,航空業對經濟週期較敏感,收入不穩,同時唔算係一個好賺錢的行業,因此這股的質素只是一般。
就算佢重組,得到新資金,只是比佢「捱過這一關」,並不是賺錢能力方面有改善。
若你持貨較多,建議等疫情過去,經濟好轉時,佢反彈就減持部份,去平衡風險。如果只係小注,你照長線持有都可以。
香港醫思醫療集團(2138)主要以DR REBORN品牌提供醫學美容服務。企業都有質素的。
(1)醫療服務:包括整形外科手術、微整形療程及由集團醫生操作的能量儀器療程及一般診症服務,以及牙科(ONE DENTAL及ONE DENTAL PLUS品牌)、中醫及眼科服務。
(2)準醫療服務:包括由已接受培訓的治療師操作的能量儀器療程,該等治療師已完成集團醫生主導的內部
強制性培訓。
(3)傳統美容服務:包括面部護理、按摩以及其他無創療程。
(4)護膚及美容產品:主要為集團的自家品牌寶特曼娜及瑞研雅。
業務發展不差,長遠有增長力,不過業務中短期會有少少波動。現價合理區頂至略貴。如果你資金較為充裕,現階段先入一小注,係可以。
否則等佢回多1成才入貨,值博率會較高。
------------------------------------------------
Q22309:
你好, 龔成老師。最近開始睇左你d 文章, 想試下投資股票, 本人沒有投資經驗, 最多只買過ibond, 我對小米, 騰訊, 港鐵, 領展等都有興趣, 但最近個價位好似唔係好夠平, 唔知入唔入市好,
除左上述股票外, 有沒有些係最近較平同值得入手的? 還是等待時機入手上述股票好呢?
本人33歲, 有價值港元$55萬的英鎊, 港元$20萬在銀行高息戶口(2.5 厘息), 如果投資股票的話, 我應該動用英鎊還是高息戶口中嘅港元呢?
動用英鎊的話, 現在係好價位嗎?(其實我一直都想等好價位時把英鎊轉返港元再放入高息戶口) 謝謝!
龔成老師︰
任何貨幣都可以無限發行,因此長遠只會貶值,唔係有一個財富增值的好方法。若你的英鎊無實際用途,建議你將英鎊換回港紙去投資。
如果你擔心匯價問題,你可以分注咁,慢慢換翻做港元就可以。
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你33歲,應以增值為主,建議你用「平穏增長股」 + 「潛力股」作組合,去創造一個增值平台。除了用你現有資金,我都建議你用每月空出來的儲蓄,去做月供股票,去加大你財富增值速度。
現在你每月先用5成儲蓄做月供。其餘先儲起,用一邊月供一邊儲蓄的策略。
月供方面,你可以選擇投資在平穏增長股︰指數基金、金沙(1928)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)
或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學(2382)、阿里(9988)、騰訊(0700)、GX中國電車基金(2845)、三星FANG ETF(2814)。
大市現處於合理水平,那75萬資金,你可以先用一半,以"分注"形式慢慢入貨。餘下一半和每月儲蓄,就等大跌市機會出現,才大力度掃貨,並長線投資。
現價計,平穏增長股都在合理區,可開始分注入市。
而潛力股,暫只有安碩恒生科技(3067)、GX中國電車基金(2845)、騰訊(0700)、阿里(9988)、中生製藥(1177)、福壽園(1448)勉強算在合理區中上至頂部,可分注入貨,其餘都略貴,想買就要等一等。
------------------------------------------------
Q22310:
龔sir, 好感恩幾年前有緣睇到你專頁,一向有買股票,都是輸多贏少,直至睇你分享先開始改變投資概念,1177,1211,285,到1810我都獲利不少,已賣出部份,
再加部份儲蓄,買到一個小單位收租,雖然不算很好的物業,但是真的好開心,剛看到你分享別人的喜悅,我也要向你説多謝,感恩你無私分享
龔成老師︰
唔洗客氣,我都係希望透過這個平台,去分享一些正確投資觀念。
希望可以幫到投資者(特別係一些初階投資者),知道一些較重要概念,從而令佢地更大機會,找住正確方向。
雖然,你現時已有一定成績。但緊記要保持學習,長線投資才會做得好。
而且,你所講的股票,都係有質素。如果你係較保守投資者,而獲利又較多,可以"升一倍,沽一半"。
但緊記大部份貨,應該保持持有。因為長線持有優質股,增值效果才會係最好。加油!
------------------------------------------------
Q22311:
你好呀, 我脫你有介紹ETF #2800 隻股, 我想問咩價位入好呀? 我本身流動資金唔多, 又還緊債, 但我又希望可以增加資金, 想睇下買邊一隻好?
本身知道ETF 股都係收息多, 好似比較啱我咁
龔成老師︰
首先,盈富(2800)是包括58間質素不錯上市公司股票的組合,這些股票有升有跌,但長期計,都有不錯的回報。
買入盈富主要有兩個回報(分別是股價升幅,加上股息回報),股息不多,大約只有3%,而股價升幅,其實有升有跌,每年都會波動,但長期平均計,都有5%-10%,當然,這是不一定的。
現價計,算係合理區,已經可以分注入貨。佢係平穏增長股,有一定增長力,但股息唔算多。
若你目標係收息,可以選擇X恒生高股息率(3110),是一個投資收息股的基金,追蹤恆生高股息率指數之表現。
可以視為收息股的組合中其中一員。這基金可投資的,現價合理,可分注。佢是投資香港大型,較穩陣,派息較高的上市公司。
這是不差的收息組合,但增長力不強。
至於投資邊個,你就睇翻你自己投資目標。一般情況,如果你係年青至中年,我會建議你投資盈富(2800),因為你應先做好財富增值部份。
若你年紀較大,接近退休之年,穏定現金流去支援生活,才是你投資重點,故X恒生高股息率(3110)會較合適。
你可以因應自己人生階段,去進行配置。
另外,你要審視翻自己現有貸款,若息口較高,我優先清還貸款,以免影響長線回報。
------------------------------------------------
Q22312:
想請教1302 6988 及 9666。
龔成老師︰
先健科技(1302)為心血管及周邊血管疾病及紊亂所用先進微創介入醫療器械的研發、製造及營銷商,主要提供先天性心臟缺損封堵器(包括HeartR、Cera及CeraFlex等三代系列)。
雖然近年生意都有增長,都有潛力,但始終規模細,不確定性較高,業務可能有潛力,但現時的市盈率處高水平,值博率較一般。
現價偏貴,要有好大幅回調,才好開始小注入貨。而且此股盈利都好波動,只宜小注投資。
樂享互動(6988)是中國的效果類自媒體營銷服務提供商,利用商業智能技術為行業客戶及自媒體發佈者提供服務。
睇翻近年的財務數據,佢增長力是有的,但上市前的數據參考價值較低。
相信佢長遠,業務都有增長力的,公司話佢自己能盈利高增長。但就唔平,小注持有可以。
金科智慧(9666)有質素。
佢係中國西南第一的綜合智慧物業服務商,如果按佢綜合實力計,集團自2016年至2020年連續五年被中指研究院評為中國物業服務百強企業十強之一,自2015年至2020年,連續六年西南地區排名第一。
收益主要來源於四條業務線:物業管理服務;非業主增值服務;社區增值服務;及智慧科技服務。
包括各類住宅及非住宅物業,包括但不限於中高端住宅、商業樓宇、產業園、政府公建、高校醫院等其他物業。
生意與盈利都增長理想,暫時睇佢都有投資價值,但負債高會係一個扣分地方。此股投資係可以,只要唔好太大注,咁就無問題。相信長遠有發展的。
------------------------------------------------
Q22313:
老師你好,本人和太太各36歲,上年剛剛買樓尚有430萬貸款供29年,月入大概10萬,每月有4萬流動資金作投資,再加現金90萬,
想在3年後儲夠3百萬買多一層樓收租,本人唔識投資,想問下有咩投資組合可以加快達成目標,謝謝
龔成老師︰
我假設投資上進取少少,令你可以做到有回報有12%(連股息再投資)。你每月投資$40000 + 90萬現金,3年後大約會增值至300萬。
但你要明白,3年只算得上係一個中短期時間。最終實際回報,可能會較為波動,風險會較高。
從資產配置角度,你現時已經有一個物業,如果你咁短時間,又在增持有一個新物業。
除左成個組合會好偏重物業之餘,太短期內買2個物業,都會受較高價格波動性風險。(一般2個物業,買入時間最好相隔一個週期,大約8年左右。)
我建議你按部就班,透過月供和買入優質股,去為自已資產作增值。到你累積到一定金額,足夠你買入第二個物業之餘,都可以留下若干優質股增值才出手,會較理想。
財富增值方面,以你36歲,可以選擇一些「平穩增值股」+「潛力股」作投資目標。
以現時大市合理區狀況,你可以考慮用部份儲蓄,進行月供股票。你可以每月先用一半儲蓄,另一半就先儲起架策略。
若你投資知識不高,可先較集中在平穩增長類股,至於潛力股,只宜小小注。到你提高投資知識後,才慢慢增加翻潛力股比例。
大市現處於合理水平,那90萬資金,你可以先用一半,以"分注"形式慢慢入貨。餘下一半和每月儲蓄,就等大跌市機會出現,才大力度掃貨,並長線投資。
------------------------------------------------
Q22314:
1) 我又如何得知此公司的每股盈利有冇加上物業重估呢?
2) 我想計比亞迪電子的合理股值,唔知我計得啱唔啱?
比亞迪電子現價$46.35
市盈率 水牛網沒有提供2021年市盈率所以我用9年
2020年 7.483 2016年 7.871
2012年 9.333 2013年 10.04
2018年 10.24 2014年 12.02
2017年 12.50 2019年 14.13
2015年 16.46
市盈率合理區域是 9.333 ~ 12.5
每股盈利 資料來自Aastocks
2016年 0.6112 2017年 1.3787
2018年 1.1044 2019年 0.7935
2020年 2.8725
5年平均值係1.35206,估計公司盈利還會持續增長,所以保守估計每年增長10%
1.35206 x 1.1 = 1.487266
股值合理區域是13.88 ~ 18.59
不知有沒有計錯,因為現價才$46.35相差太大。
3) 我最近留意緊國藥控股(1099)和中智藥業(3737)。我用阿sir你初階班比的企業評級表頭兩頁查過這兩間公司,機本上兩間公司都過關雖然唔係全部100分。
我睇兩間公司的官網都寫得自己點樣勁,但兩間公司的市盈率都低過10倍。流動資產-流動負債係正數。
初步睇價錢也在合理區之下。
想知道為何這兩間公司的市盈率會咁低?值唔值得投資?
謝謝!
龔成老師︰
1) 你可以睇年報中的損益表,就會知道佢有無物業重估成份。
2) 你現時這個計法,概念上係無錯。但做好初步估值之後,我地要再考量,到底這個估值,係唔係足以反映企業現時價值。
比亞迪電子(0285)近年賺錢能力有所提升,我地用過去5年平均數字,就可以能出現過於保守的情況。
因此,我地會以佢最新一年每股盈利作為指標,即係用HKD2.8725。
由於集團始終係代工企業(雖然有一定技術),市盈率唔會太進取,我地會用佢過去10年中間4年數字,大約為10-12倍。
之後,再加多10%緩衝區。合理價大約為︰HKD26-38。
3) 其實就算係相同行業,只要業務性質、潛力、風險等不同,個市盈率都可以差好遠。
國藥控股(1099) 質素都可以,但增長力已經不算好強。
睇翻佢資料,佢係中國最大及具實力的醫藥分銷和零售企業,集團在中國主要城市以直接經營和特許經營方式管理零售連鎖藥店網絡,向終端消費者銷售藥品及大健康產品。
此股有質素,但賺錢能力唔算高,而增長力唔算太強,是平穏增長型。佢有個比較大問題就係負債比較高,而度會扣左D分,整體而言此股有質素,可投資,現價合理的。
由於佢已經係平穏增長型企業,增值潛力不及中生(1177)這類潛力股高,故市場給予市盈率,都會較低。
而中智藥業(3737)則相反,由於企業規模和品牌不大。雖然佢近年盈利增長係唔錯,但市場會較擔心,佢這個優勢,能否長線維持。
因此,會給予中智藥業一個較保守的市盈率,以反映當中的潛在風險和不確定性。
此股現價合理,但由於存在一定確定性,故只宜小注。
------------------------------------------------
Q22315:
我個人睇法認為。新世界,長期一定會好番,因為佢再俾人爆大鑊就可以執笠,但問題係驚短期甚至中期都有機會發現更多問題,始終起樓唔係一時三刻,
而今次事件反映QC部門同埋管理層有啲得過且過,其他項目都有一定機會有類似問題,只係未俾人爆或者佢地禁住咗,令中期不確定性同埋風險增加
另外留意到美國嘅經濟數據,FRB話經濟雖然開始復甦,但基層勞工市場仍然麻麻地,而高通漲相信係暫時性,仍未係時候改變貨幣政策。
咁樣會唔會令成個市場失衡,為市場復甦帶黎壓力?
龔成老師︰
中短期,新世界(0017)股價難免會弱。
但我地睇翻佢過去咁多年,其實都無出現過重大問題。所以,我會偏向覺得,個營運和監工上風險,未到話十分高的狀況。
長線投資價值,依然存在,但你預佢短期會較波動。
疫情雖然未算清零,但大部份已發展國家,已經開始穏定。相信經濟會慢慢向好,但這個唔會係一時三刻就出現,可能要幾年時間。
而中短期,依然會有好多不確定因素。例如不少發展中國家疫情未受控,對不少消費市場,或者不少企業的產業鏈,都造成不同程度的影響。
但相信這都是中短期,我都分析最好都係集中翻,係企業本質。外圍經濟因素,各國貨幣政策,係有參考價值,但佔比重不應太多,重點都係放係企業本身較好。
------------------------------------------------
Q22316:
Sir,水桶2 有咩好選擇啊?日清和雅生活算嗎?還有甚麼好選擇的?我今年34歲每月可儲2萬,現在儲一萬現金和一萬每月買d 股票的
暫時如下:
1. 科指 ETF 3032 15000股 $8.37
2. 小米 1810 1000股 $27.48
3. 阿里 9988 300股 $235
4. 京東 9618 100股 $309.5
5. 平安好醫生 1833 100股 $87.8
6. 日清 1475 3000股 $6.87
7. 京東物流 2618 100股 $40.36
8. 雅生活 3319 250股 $36.7
9. 福壽園 1448 2000股 $7.5
10. 鐵塔 788 10000股 $1.545
現金:35萬
龔成老師︰
日清(1475)和雅生活(3319)都係唔錯的水桶2股票,你現有持股,都係適合你。
以你34歲,可以投資「平穏增長股」和「潛力股」。你每月5成儲蓄,即是用$10000做月供。其餘先儲起,用一邊月供一邊儲蓄的策略。
選股上,你可以投資在平穏增長股︰指數基金、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
潛力股可選安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)、三星FANG ETF(2814)。但佢地波動性和風險會較高,你要自己平衡。
如果你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約3-5成,視乎你投資經驗多寡和了解這些股票程度而定。
現時大市只是合理區,你現有35萬資金可以再投入多10-15萬,用"分注"形式,慢慢買貨。餘下資金和每月所儲倒的資金,就等大市出現一定程度的下跌,才大力度掃貨,然後長線投資。
------------------------------------------------
Q22317:
首次置業 按揭多好定係少好?
依家開始有個好習慣就係先儲蓄投資 再消費,一個月儲$5000 另外$5000攞嚟投資 係3-4年之後有$100萬 有冇問題?
龔成老師︰
其實多與少,跟你首置無關,我地主要係睇佢現行息率。現時貸款息率低,我地應該盡借,令我地可以空多更多資金,作其他投資增值。
你現時養成這個先儲蓄和投資,之後才消費,係一個非常好的習慣,你保持。
以你2X歲,可以選擇一些「平穩增值股」+「潛力股」作投資目標。
以現時大市合理區狀況,你可以考慮用部份儲蓄,進行月供股票。你可以每月先用一半儲蓄,另一半就先儲起架策略。
由於你投資知識不高,因此可較集中在平穩增長類股,至於潛力股,只宜小小注。此期間,你最好是努力提高投資知識,才慢慢增加翻潛力股比例。
餘下現金就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
假設投資回報有10%(連股息再投資),你每月投資$10000,4年後大約會增值至55萬。若你要達至100萬,就需要將金額升至$14000和供5年,才可以做到。
------------------------------------------------
Q22318:
師父1212 利福下至合理價低部5.95 , 值得加注?
近曰消費股如六福,周生生, 莎莎都上番不少,何解1212返而向下?
啟德項目應該有利佢發展對嗎?
另外完美醫療已升至over $8 , 稍貴, 應否放一半?
3069 ETF 你有什麼意見?
龔成老師︰
我地投資,唔好太在意中短期走勢。我地要睇翻個重點,就企業自己本身狀況。
利福國際(1212)主要從事經營生活時尚百貨店及其他零售業務,以及物業發展及物業投資業務。佢透過崇光在香港專門經營百貨店。
中短期一定弱,但長遠仍會正面,不過回勇就要時間。同埋要留意,佢負債較高,因此唔建議投資太大注,現價合理區中下部至底部。
啟德項目,對佢長線發展係有利。但股價唔會一時三刻反映出來,要需要時間。
完美醫療(1830)長遠有發展,本身有一定的質素。
睇翻之前的疫情,佢身處的行業受影響,但佢的現金流及財務數據都唔算差,這點可以想象到,當正常的經營環境,佢的生意一定唔錯。
加上佢的野心愈來愈大,本身有一定的技術,同時不斷將香港的業務模式複製到其他海外地區,我見佢加強了發展其他地方,因此發展不差。
這股有長線投資價值。
之前公佈業績理想,但業績後股價升左好多,雖然我在業績後調高左佢企業估值,加上管理層加大了企業發展的力度,前景正面,但現價點都都有少少貴。
如果本身有貨,就長線持有。若你持貨較多,現價沽少少獲利,都係可以。
華夏恒生生科(3069)主要係追蹤恒生香港上市生物科技指數之表現。
指數包含51隻成份股,當中有「藥品」、「⽣物技術」等公司。較為人熟識的,有藥明生物(2269)、京東健康(6618)、中生(1177)等等。
隨著人口老化和人均收入增加,對優質醫藥的需求只會有增無減。此股都有質素,可作長線投資。但你預佢會較波動,最好用月供模式儲貨,並長線持有會較好。
------------------------------------------------
Q22319:
龔老師你好,我今日34歲,未婚,冇乜經濟壓力,現時未有結婚及生育打算,月入二萬,月儲大約七千,現時擁有資產大約二十萬,其中八萬現金,十二萬股票。
經過你前三個月的教導,我購入多左水桶二的股票,現在股票組合比例大致平衡,現時持有的股票如下:
水桶1
1177 中生製藥 2000x$7.27 11.7%
3718 北控城市 8000x$0.99 6.4%
3067 安碩恒生 100x$16.06 1.3%
1448 福壽園 2000x$7.46 12.1%
3319 雅生活 250x$32.85 6.6%
2057 中通快遞 50x$230.4 9.3%
水桶2
823 領展 100x$74.55 6.0%
2800盈富 1000x$28.38 22.9%
2388 中銀香港 500x$25.1 10.1%
水桶3
778 置富 2000x$8.34 13.5%
快速增值:平穩發展:收息資產=47:39:13
1)請問現時股票組合比例平衡嗎?我打算長期持有無問題嗎?
2)現在我目標先儲現金,等儲到現金佔50%,才加水桶一股票合適嗎?
3)請問3718北控城市資源質素無問題嗎?現價($0.96)是合理價還是平?我$1.92同$1.28都入左一手,現價可以再分注入嗎?值博率大嗎?等可以再等下?
還有等$15買3067,或等$80買平安好醫生,或等$23買小米,哪個值博率大些?謝謝指導!
龔成老師︰
1) 現時配置係可以,你長線持有,係無問題。但留意中通快遞(2057)始終唔係上市太耐,要再過一些時間,才可以見真章,所以暫時唔好再加注。
2) 現時大市在合理區,現金應佔3-5成左右。目的係等大跌市出現時,我地可以有資金入市買平貨。
而目標唔係集中係水桶1,因為水桶1雖然增長潛力大,但風險都高。建議你視乎當時平貴,再去慢慢平均分配在水桶1和2,咁會較穏當。
3) 北控城市資源(3718)有質素的。
佢主要在中國從事環境衛生服務;危險廢物處理業務;以及廢棄電器及電子產品處理業務。
環境衛生服務方面,佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。
同時自2019年起開始,佢有係北京的若干商住區域提供物業管理服務。
過往財務數據不差,有一定的增長力,有長線投資價值。之前股價貴,現價落翻D,大約合理區中下部。現價加小小注,都可以。
至於平安好醫生(1833),無貨現價小注都可以,但由於佢不確定性都高,要控制注碼。
而安碩恒生(3067)和小米(1810)都有質素,但前者係一籃子科技股,較有分散風險能力。
3067現價中合理區上部,而小米就要回多1,2成,就算合理區頂,才可開始分注入市。以現價計,安碩恒生(3067)值博率會係3隻當中較高。
------------------------------------------------
Q22320:
龔成老師,我44,現在有以下股票,共35萬,另有15萬現金,月入2萬+佣金。
170萬按揭,供25年,每月供樓$7700,因為依家巳44歲,好希望可以10年內供完,請問我應該點做可以達到這個目標?
煤氣 18手
港鐵 3手,正在月供1000
中國鐵塔 5手
領展 1手,正在月供1000
盈富 2手,正在月供1000
阿里巴巴,上月開始月供1000
我有諗過每年年尾將花紅約2萬還按揭去減年期,希望可以加快完成供款,做法正確嗎?
龔成老師︰
以你44歲年紀,你持股和月供組合,都係合適的。你現時可以用這些增長股,去累積財富。
由於現時按息不高,我較建議資金先用作增值,而唔係去還款。這樣做,成個財富增值效率,才會較高。
現時大市只在合理區,每月儲蓄唔好盡用。最好留有部份,連同現時的15萬現金,一齊等大跌市出現時,可以用來掃貨。
我假設投資回報有10%(連股息再投資),你每月投資$4000 + 50萬資產(股票和現金),10年後大約會增值至200萬。
到時你可以因應情況,再決定先還款(若到時息率好高,係可以先還),還是保持增值。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
1038 aastock 在 龔成 Facebook 的精選貼文
【龔成問答信箱】(Q18101-Q18120)
Q18101:
阿sir您好,我依家睇緊notes,其中有一句我依家都仲係唔太明白,想向您請教一下:
“將流動資產減流動負債,若股價低於這價值,...”即係點計?點用?
謝謝阿sir幫忙解答
龔成老師:
假設流動資產$10億,流動負債$2億,當我地考慮企業的資產價值時,其中一個角度可考慮佢「流動性較強、變現能力較高的資產」。因此,將流動資產減去流動負債,就會得到$8億,反映這企業在流動性較強方面的資產價值有多少。
因為企業有好多資產,但不是每一項都值錢的,以這角度就可以計出一個較有代表性的數目。
下一步就是比較企業市值,如果現時的市值好低,例如$5億,低過$8億,反映佢在資產的層面,已處於平的水平。
當然,我地在分析時,應該同時考慮佢的業務價值。
------------------------------------------------
Q18102:
龔sir,想問你,好似無見你上一d電視或者網上電台分享投資心得?
因為我見到 aastock中午同收市都會有人黎講,但佢地好多時都用圖表分析咁講,比較少講股票的實際分析。
成日聽到就話,20天線升穿50或者100天線之後就會有升浪,20天線跌穿100天線就會跌浪之類,係咪無實際用途? 因為成日咁聽覺得好似有道理,所以先想學。
但之後先知技術分析無咩實際根據。
你會唔會有書教人分析平貴度? 定只係會系你上堂既時候教?
龔成老師:
我運用的是價值投資法,講長遠企業發展,買入後持有,而我這一套,雖然是最賺錢的方法(巴菲特正是用這一套),但卻在坊間不受傳媒歡迎。
原因好簡單,如果你仔細留意,佢地一般人贊助的,而贊助的大多是證券行或衍生工具發行商,佢地好希望人短炒,而增加生意,如果人人都用長線投資,佢地會好快倒閉。
另外,我順道在這裡有做小分享,我20年前,都是短炒者,技術分析者,用左幾年,輸足幾年,之後長線投資,就開始不斷賺錢。
我好後悔當時浪費左幾年去學這些分析技術,我當時不斷睇書、上堂學短炒,但最後都是輸,好後悔,只怪我當時無知。
之後做銀行同證券行,見大部分輸錢的客,就是短炒的一群!這是我10年見到的情況,這是行內的秘密,根本大家都知短炒者一定輸,但業界一定唔會講!
另外,如果你分析全球真正賺錢的投資者、經金經理,佢地都無人短炒,都是長線投資的,巴菲特更講明反對短炒,反對技術分析。
只要我地細心少少去想,都會明短短炒根本賺唔到錢。長線先至係王道。
你可以睇《股票勝經》《年報勝經》。
------------------------------------------------
Q18103:
老師,新經濟股依家已經偏貴 等回落先落注?但又驚好似apple tesla 咁 長升長有。謝謝
龔成老師:
如果企業有實質的價值增長,就會不斷升,所以你要小心判斷價值與價格的情況,如果價格大升,就算價值升,都貴。
如果價格升,但價值大升,就會平。
------------------------------------------------
Q18104:
想請問一下老師,如果要找尋潛力優質股,可以從財務報表哪幾個方面看出來?還是有其他方法
龔成老師:
財務報表是其中一個方法,我地選股時,會用好多方法去選股,因為無一個方法是完美的,不同方法如同不同角度去尋找出優質、潛力股。
所以我在課堂中,會教5種選股方法。
另外,我課堂研究在一些財務指標,研究過往10年升10倍的股票,發展有一個財務指標,明顯比一般企業高的。課堂會有講述。
------------------------------------------------
Q18105:
老師,我有幾份保險都係用美元做,如果保險公司容許,係咪應該轉返港元? 聽說美元在不久將來會轉弱
如果繼續用美元結算,到時我提取保單價值會減少嗎?謝謝
龔成老師:
因為港幣用「聯繫匯率」,所以當美元貶值,港幣都會一樣貶值,無意思的,你照原本的就得。你保單唔會因此而價值減少的。
------------------------------------------------
Q18106:
龔成老師你好. 小弟23歲, 希望3年能儲到100萬, 然後轉行. 所以想問老師一些投資貿策略.
小弟工程系畢業, 現於電力公司做見習工程師. 一向對工程沒大興趣, 原本只是見前途不錯, 就打算做工程做過世. 中學時一向都想讀物理治療, 但physio收分太高, dse retake了一次也考不到入去, 所以只能放棄.
但現在做工程愈來愈無興趣, 然而對讀物理治療的心結愈來愈大. 所以便希望先儲錢投資到100萬, 再回去讀物理治療.
這三年可以令我更認清方向, 知道自己是否一時衝動. 然而儲100萬是讓我回學校讀書時仍可以交家用給父母, 更可以之後繼續投資以確保收入. 我有一些計劃, 希望老師給一些意見.
1. 我現銀行儲蓄連投資大約$15000. 月入$22000, 現在有做part time補習, 每月多$4-5000, 扣了家用($5000)日常洗費($2-3000), 剩儲應該大約$18-19000左右. 請問靠儲蓄及投資, 有多大可能在3年來儲到100萬呢?
2. 雖然我本金不足, 只買了一手金沙($30) 及2手太古($18.7), 因我看好這兩隻前景, 而且現在只是短期問題, 長遠便會增值. 如果之後投資
我打算50%資金儲起來, 到日後某些優質股或潛力股平的時侯才入. 而另外50%資金, 我打算在小米, 金界控股, 金沙,太古,中生製藥, 比亞迪, 港鐵中選擇. 請問我這投資計劃能否助我3年內儲到100萬?
3. 在1及2的計劃中, 會否有任何不足?
4. 能否給一些建議小弟, 如何增加3年內儲到100萬的成功率, 或縮短儲到100萬的時間?
5. 因為我人生閱歷不足, 我的父母也有點擔心, 令我也有點懷疑自己. 請問老師如何看我的計劃? 會否想得太理想? 26歲才回學校讀書會否太任性? 心態上或計劃會否不夠成熟?
6. 請問老師認為我這個計劃中, 會遇到的困難會是什麼, 而且應該如何克服呢?
很抱歉地我的問題太長. 因我也很重視這個計劃, 希望可以問得清楚. 謝謝老師. 我報了老師的投資班, 很期待到時跟老師學習!
龔成老師:
1)由於3年累積$100萬時間不多,因此你要加大儲蓄力度先度,否則好難做到。同時最好是增加收入,你要找一些高時薪的兼職。
每月保持儲$20000,才有機會做到。
2)方向可以,我相信如果你有耐性,算到這些股有明顯下跌先入,在平的價位買到,然後等佢倍升,你的財富有更大的增長,但這就要你有耐性,以及懂得把握投資時機,以及有估值的能力。
3)第一,要增加收入,第二,要加強分析潛力股的能力,你要自行發掘一些潛力股,希望比市場早一步發掘。
4)由於3年時間唔多,所以有難度,你要盡力提高收入,以及增加投資知識令你可以投資到潛力股。
5)你這3年,努力儲蓄及投資,完成左$100萬的目標先,同時可以好好利用這3年時間去想清楚。如果可以的話,你在這3年可以試下轉工(但不用轉行),這樣你可以更清楚自己是否適合這行業。
6)堅持。
要保持每月儲$2萬,並不容易,你每逼自己每個月都做到,另外,一定要花時間去研究股票,提高知識。
股票班見!
------------------------------------------------
Q18107:
你好,想請教,40歲,只有20萬現金,每月可儲1萬蚊,未曾投資,冇概念,可能2年後離開香港。
明天開始,我是否先買你一本書了解? 推薦哪本書? 立即先開 月供股票戶口嗎? 推薦哪間經紀公司?
2年後,我應該可以 賺到幾多錢左右?
感謝指教
龔成老師:
如果你將會2年後離開香港,我建議你這刻唔好心急投資,先學好理財知識先,然後想清楚如何建立一個平衡的財富組合。
建議你睇《大富翁致富藍圖》《財務自由行》《股票勝經》。
投資股票的流動性高,是其中一項可考慮的工具,但不是唯一的工具,你要多了解不同的工具先。
同時,投資股票往往要長期先有回報,中短期只會因股市波動而上落,所以2年時間,回報率未必高。
只外,在想回報的同時,都要明白風險。
------------------------------------------------
Q18108:
龔sir,你好,之前問過你,你解答我嘅問題,唔好意思,我又再麻煩你
因為你之前話我如果煤氣股我佔組合15%,我就不要再加碼,但係我不知道怎樣計算為15%,因為我有月供股票加分注買入
我現在月供緊七隻股:
港鐵 $2000
長江基建 $2000
金沙 $2000
香港電訊 $2000
中電 $2000
港燈 $1000
盈富基金 $4000
另外分注買入現持有
港交所 200股
置富產業信托 2000股
恆基地產 2000股
煤氣 2000股
對唔住文字較多及我再想問我月供組合可以嗎?
多謝你之前不厭其煩地解答我的問題
龔成老師:
要計算組合的比例,你可以用這股現時你持有的股數X股價,每隻計算,個股及組合總數,就可以知單一股票是否太集中。
由於股價會波動,所以差少少不是問題,如果差太遠,就要作出調整。
你所月供的股票,無問題,都是有質素的,同時比例正確,你可以進行不用擔心。
但這刻,你都要同時留有一定的現金,唔好過份集中在股票。
其實你的組合無問題,唔需要太擔心,比D信心就得。
------------------------------------------------
Q18109:
成哥你好,本人今年35歲,手持自住物業月供大約1萬,還有20年。
本人每月扣除所有支出,可儲現金大約2萬,現有月供股票$3,000 盈富 (2800)。現想組合一個月供$15,000的組合。
現時有現金10萬,另外現有股票組合價值大嘅$110萬(包括月供的盈富)
現有股票組合
1. 0006 @2500 (10%)
2. 0012 @3000 (8%)
3. 0066 @2070 (7%)
4. 0435 @25000 (8%)
5. 0788 @10000 (6%)
6. 0823 @2000 (11%)
7. 0883 @5000 (4%)
8. 0945 @500 (5%)
9. 1686 @4000 (2%)
10. 1810 @4000 (5.5%)
11. 1928 @1200 (4%)
12. 2388 @5000 (10%)
13. 2638 @5000 (4%)
14. 2800 @2207 (5%)
15. 6823 @10000 (10.5%)
月供部份就想1.5萬- 0270 ($2000), 0285 ($2000), 0669 ($2000), 2318 ($2000), 2800($5000), 6098 ($2000) , 這組合可以嗎?還是各2千的5隻有另外的選擇?
現有股票,如果派息穩定應該每年大約有6萬(約5%股息), 現時想法是將每年收到的股息大約每年分3-4注入2800,是否可以?
如果一直持有以上15隻股票加上另外每月月供15000, 再用每年收到的股息再投資2800, 這樣10年後資產可由現時110萬可滾存到大約多少?
希望可以得到你意見,十分感激。
龔成老師:
雖然你的選股都是有質素,但部分增長力較低,只是收息股,以你35歲來說,並不是最適合。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
因此,香港電訊(6823)、電能(0006)、港燈(2638)未必最適合你。
至於月供股票分面,都是有質素及適合你的,可以進行。
要留意,你的持股隻數開始多,因此唔好再增加太多集數,否則管理上會較難。
如果你每年能保持10%的複息增加,每月投資$15000,加上原有的$110都以10%增長,10年後總財富會上到$500萬-$600萬。
另外要注意,你現時的現金數目不多,盡量要留。要等到大跌市先動用。
------------------------------------------------
Q18110:
9997,2328邊隻好老師請指教
龔成老師:
康基醫療(9997)係中國最大的國內微創外科手術器械及配件(MISIA)平台。
根據資料,按銷售收入計,2019年中國MISIA市場規模達到人民幣185億元,集團在國內廠商中排名第 一,在所有廠商(包括國際和國內廠商)中排名第四,所佔市場份額為2.7%。
根據資料,2019年銷量計,集團在中MISIA市場的多個細分領域,包括一次性套 管穿刺器、高分子結紮夾、第三類一次性電凝鉗以及重複性套管穿刺器和鉗中亦排名 第一。
初步睇,正面的,現價唔平,如投資,小注可以的。
至於舜宇光學科技(2382),有質素,有增長力,如果講業務的穩健度,佢會比9997強,不過潛力就9997較高,所以要睇你的風險承受能力。
------------------------------------------------
Q18111:
呀Sir,你好。想問下點樣計好個年回報率,因為我地用既係年回報率去計將來我地既財富總值,但因為我地係長線投資者
咁個回報率應該係計現價除買入價再Take返我地買左幾多年既Root黎計?
定就咁用年尾既價除年頭既價咁計?如果我想每年檢視一次自己既回報率,令自己可以確立到有一定回報率。
其次想問下,黎緊三年內應該會準備結婚,依家計緊3年後,大約28歲會有1m資產,但始終結婚都唔太想動用到
你會唔會覺得如果可以借稅貸用低息黎結婚好啲?因為人情都會收得返
龔成老師:
最簡單的方法,就是賣出/現價,除以買入價,但如果想每年計一次今年的回報,就是利用年尾你持股的市值,而該批股票年頭的市值去比較,然後再加上股息。
不過,我唔建議成日計回報,因為我地投資一定是長線的,你太集中短線計算,無意義,比亞迪(1211)早1、2年的思報都唔好,但今年就好好,如果我因為之前的差回報就賣出這股,我就會錯失了真正的回報。
因為我地投資,應該計算長期的回報,5年以上為基礎,這樣會較好。
雖然借貸之後能好快收翻,但始終會面對風險,我唔太建議,但你如果真的想做,我不反對的。
通常我只建議「借貸投資」,即是除了投資之用外,其實情況都避免借貸。另外,借貸始終有風險,如果有好明顯的投資機會才考慮用。
------------------------------------------------
Q18112:
我今年結左婚嘅,自己積蓄有3萬左右,同老公儲左大約80000,甘我應該點樣去分配投資?
另外想知道2800盈富基金
應該幾時買入
龔成老師:
由於資金唔算多,建議較多留現金,部分則可投資一些較穩健的股票。
盈富(2800)是最適合的選擇,因為盈富是一個組合,適合絕大部分人投資,風險不高,長期儲貨可助你財富平穩增值,記住要長線持有。現價合理,已經可以分注。
另外,你可同時考慮配上其他股票:銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
現時大市處合理區,可以一邊投資一邊留現金(即是你要留低一定的現金),而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18113:
老師你好,有BNO visa計畫後,我打算一年後去英國
黎緊想一個月草1萬左右,希望到時有12-15萬去,所以想問下,依一年將啲錢全部放係銀行存款
好似有啲浪費,所以打算6000放銀行,餘下嘅想月供股票,請問有無介紹?
我都明只係得一年左右,月供其實係作用唔大,但放唒係銀行又會覺得好浪費,有無其他建議?謝謝
龔成老師:
其實你持有現金會較好,月供股票要有較長時間,先可以見到回報,1年根本無乜作用,加上中短期的股價,往往只因資金流向,短期情緒等因素影響,而你唔會知道一年後的情況,因此,存有風險。
始終建議你持有現金好了。雖然回報低,但好過你虧損。
------------------------------------------------
Q18114:
龔sir又打攪到你,有啲物管既問題想請教下你
1. 碧桂園是內地最大地產商之一,每年銷售不少面積,因此能夠為碧桂園服務(6098)帶來不少新增在管面積,而第三方開發商潛力也高。
由於母公司是地產龍頭,規模大加上土地儲備多,因此6098的市盈率高是合理的?但現在70倍的市盈率似乎有點貴。
2. 雅居樂集團的銷售面積,我上網查過,只是約為碧桂園十分之一,因此每年能為雅生活(3319)新增的在管面積有限,而雅生活大多發展在第三方開發商,是否令3319估值相對較低?依靠第三方開發商風險會不會相對較高?
3. 奧園健康(3662)母公司中國奧園銷售面積近年高速增長,因此奧園健康在管面積也能快速增長。由於公司規模相對小,風險度略高,加上有其他非物業管理的業務(如大健康業務)也是令3662估值相對較低的原因?
4. 雅生活服務(3319), 碧桂園服務(6098)和奧園健康(3662)目前來看,哪一個較為值搏?感覺上物管股都不便宜。雅生活$35左右算不算是合理價?謝謝你!
龔成老師:
1)你的分析方向正確,佢擁有這些優勢,因此佢的估值的確能比同行為高,不過多少先算貴,這就無絕對的答案,當中亦會有主觀的成份。
我認為這股,已去到合理區的頂位。
2)你都可以這樣理解,但雅生活(3319)不止單靠母公司而同時會自行找生意,因此,這裡反映佢的潛力度。風險度會有少少,但整體仍是好穩健的。
3)這是其中一個原因。當我地分析時,要同時了翻佢自己本身的優勢及發展方向,前景等。
4)雅生活(3319)是較有投資值博率的一隻,$3X是合理價。
------------------------------------------------
Q18115:
龔老師,本人年50,現在才起步月供股票,希望能在退休後有約每月20000收息現金流,以下的股票能否為我做到呢?
003煤氣 1000
066港鐵 2000
2638 港燈 1000
823 領展 2000
1038 長建 2000
另外加
2800盈富 2000
1177 中生 1500
以上是否可以長線持有至退休呢?
龔成老師:
如果要每月有$2萬現金流,假設投資6%的收息股,即是要有$400萬的資金。
如果你每月投資$12000,15年時間,回報率10%,就能夠做到。
因此,你要做好兩樣野,第一,每月投資+儲蓄(準備投資)的金額,要有$12000,第二,你要爭取到10%的每年複息回報(連股息)。第三,你要堅持15年,滾存到近退休年齡時,就慢慢轉為收息股。
你可以集中投資平穩增長股,上述大致都是這類,但由於你年齡唔算年輕,因此唔能夠太進取,潛力股只能小注。
港燈(2638)轉盈富(2800)。中生製(1177)都可,但保持$1500好了,唔好加。
------------------------------------------------
Q18116:
龔老師,你好!本人今年30歲,澳門人,近幾個月開始學習投資股票市場,目前尚係一位初哥。
有了解到老師的專頁和書籍,一睇就愛上左!! 獲益良多。
目前本人積蓄約50萬,月薪4萬,扣除每月支出約每月可存2萬。本人目標係3年內結婚同買樓,初步計算過,差不多需要400萬。
所以想請教老師,我應該採取什麼方式的投資才能達到目標?
目前手持: 386 (中國石油化工股份) 12000股 3.62買入
788 (中國鐵塔) 14000股 1.4買入
1398 (工商銀行) 4000股 4.56買入
2342 (京信通信) 12000股 3.34買入
7299 1000股 7.775買入
7522 5000股 4.942買入
想問下這個投資組合有無問題? 有什麼不足? 如要達到目標要如何做? 月供2800 盈富能否有幫助? 謝謝老師!!
龔成老師:
坦白講,要在3年內滾存到$400萬,的確不易,你要好高回報先能夠做到,但如果強行追求太高回報,你所面對的風險又會好高,因此唔太建議。
較可行的方法:集中投資潛力股,同時你要大量研究股票,一定要比市場早一步找出潛力股,唔好等市場升左先入。不過,太集中在潛力股都有風險,你要自己衡量。
至於現時的股票。
中石化(0386)、工行(1398)只是收息股,不適合你。
京信通信(2342)都可持有,但股價略波動。
FL二南方黃金(7299)都可持有,但由於有槓杆,唔建議持有太多。
FI二華夏納一百(7522)是反向工具,好難玩的,唔建議。
比較穩健的方法,你可以投資「平穩增值股」+「潛力股」。
你可以考慮盈富(2800)再加上:銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18117:
你好啊!我依家有1百萬,我想問下你,邊隻收息股好,因為我想每個月有固定收入,同埋可以長期持有??
龔成老師:
投資收息股,可以作為財富分配的一部分,但不建議將全部資金都投資,因為一定要留有一定的現金作防守,以備不時之需,以及若大市下跌,可以買平貨之用。
你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)都可以。
如果你能承受到風險,有些更有超過8%、10%的高息股,但股價就略有風險,要自己衡量,佐丹奴國際(0709)、中石化(0386)、互太紡織(1382)等(記住,股價略波動,只能小注)。
但要留意,現時股價只是合理,未到平宜,因此買入時宜分注,同時不能用盡現金。
------------------------------------------------
Q18118:
老師,巴菲特轉增持黃金, 你點睇 ?咁樣有冇啲 有質素嘅黃金股份建議?
龔成老師:
黃金白銀這些貴金屬,我自己都有投資。方法好簡單,你不是睇升跌,而是「財富組合的配置」,現金永遠貶值,黃金白銀總有一定的價值,因此可以在組合中,佔比一部分,長線持有。
但由於無現金流,因此又唔值得持有太多。1%-3%已夠。
------------------------------------------------
Q18119:
龔成老師,請教下#1628 禹洲集團經常發行高息票據,但另一方面又提早購回即將到期票據,是什麼原因呢?這股票你又點睇?謝謝回答!
龔成老師:
這是一些資金上的運作,但我都唔知佢具體的目的,可能佢認為回購有著數,對公司有利,當刻就回購,而同時能以較低的利息去發行新的負債,就有可能這樣做。
當中涉及較多企業資金成本與有效運用的問題,要從外部分析並不容易。
------------------------------------------------
Q18120:
龔成老師, 本人32歲,一向對投資無興趣,但最近有感自己咁大個人仲係月光族,所以想學投資賺下錢,之後想移民。
之前亂聽人講買牛熊, 輸左4000蚊
又聽人講買左以下股票,全部都未番到本..我應該止蝕放晒佢定點?
6808 $11.14買1手
2333 $7.59買1手
9979 $3.41買1手
759 $0.92買1手
1128 $13.42買1手
我要由月光族變儲到錢移民係咪無希望?
我應該點增加自己既投資能力?
謝謝你解答
龔成老師:
牛熊這些衍生工具,好難賺錢,唔好再投資,我20年都有玩衍生工具,輸多贏少,所以唔玩。
至於股票,首先你要明白,我地繼續持有一隻股票與否,與你的買入價無關,因為這只是一個心理因素,最重要是企業的質素、前景。
買股票就是買入一間企業,原理就是買入企業等佢成長,因此,你根本不用理中短期因素,保持長線投資就得(如果是優質企業的話)。
高鑫零售(6808)、長城(2333)都有少少質素的,但未算好高。
綠城管理(9979)、永利(1128)有質素。
而CEC國際控股 (0759)就只是一般。
如果你想財富有明顯改善,要盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。
你可以做月供股票,或自行分注投資,集中在較有質素的股。
你可以考慮盈富加上銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。
如果你不懂股,就集中供盈富$5000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
1038 aastock 在 龔成 Facebook 的最佳解答
【龔成問答信箱】(Q14141-Q14160)
Q14141:
龔sir,睇左你個fb一段日子
我都開始左供股
之前睇其他Forum,例如XXX,跟買完個Forum後尾仲摺埋,又唔見左錢
所以想講聲多謝你
其實你幾多歲點解咁快有一千萬
好amazing
龔成老師:
唔評論其他人。我永遠只求做好自己。
我80後,3X歲,雖然$1000萬對同年人來說,好似較多,但就我認識的勁人中,我並不算特別強,比我更有錢,更快做到的年輕人,大有人在,所以我先要自己不斷學習、進步!
其實,每個人的差別,在一開始唔係好大,有好多野,其實你都可以做到,問題係你會唔會想信「自己能完成一D誇張」的目標。
我由細到大,都相信自己有變到有錢,一直深信,之後我就不將研究有錢人致富的方法,發現,並不是靠運,而是真的有方法,之後我就一步步去做!
可以幫你改變,令你有所行動,實在太好,但你要相信自己,可以完成一些更大的目標!保持進步,不斷學習,定目標,落實去做,你都可以,加油!
------------------------------------------------
Q14142:
龔老師你好,本人快48歲,因早年離婚的關係,最近賣了持有的唯一物業,與前妻各自套現$450萬。
本人月薪約6萬元,每月可儲蓄1萬左右。有一名孩子在外國讀書,學費每年大約30萬(需本人負責支付)。
現想請教老師,以怎樣的組合將資金作投資,才可盡量使用投資所得的回報來支付學費(起碼要再繳付7年的學費)?謝謝!
龔成老師︰
如果你想透過投資所得來減輕學費支出負擔,你可以利用賣樓所得的450萬建立一個收息股的組合,目標是5%、6%的股息率的收息股,例如港燈(2638)、香港電訊(6823)、工行(1398)、匯豐(0005)、置富(0778)、陽光(0435)都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、必瘦站(1830)、互太紡織(1382)等(記住,股價略波動,不能太過大注)。
以股息率5%計,你每年可以收取22.5萬股息,相信對你孩子在外國讀書的學費收支,已有一定程度的幫助。
但要注意翻由於現時大市只在合理區,你入貨時必需要分多注進行。
------------------------------------------------
Q14143:
我買哂你11 本書 睇左1百, 2 百萬富翁,同股票聖經。 start up緊 大富翁 , 睇哂會上你堂
龔成老師:
勁呀,多謝支持!我的書,部分就是我睇左過千本致富書的大集合,對你絕對有快速增加知識的作用。記得要睇晒,加油!
好,遲D見!
------------------------------------------------
Q14144:
老師你好,我今年 27歲,6月開始學習月供。而家月供
香港中華煤氣 2000
盈富基金 3500
想問問投資一隻香港本地潛力股。請問可以推介一隻嗎?
你這潛力股希望投資$1500
我收入只有 17000左右..
仲努力學習中,見到大快活係你推介之一,想知道仲有其他本地潛力股嗎?本地潛力股比較內地潛力股會較有優勢?感謝
龔成老師:
你現時月供的,都是有質素的股票,基本上可以進行長期的月供。以你的年齡,加多一隻潛力股是可以的,比亞迪(1211)、中生製藥(1177)都是可投資之選,只要金額不太大就無問題。
大快活(0052)都是有質素的股票,但就不是高增長類別,只是平穩增長型,可投資,現價合理。
但要留意,現時大市處合理區,可以一邊投資一邊留現金(即是不能用盡現金),而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q14145:
龔成老師:我在5.12元買左4000股中石化,這股一直都在跌,前景如何?請問可作收息股还是換其他收息股?
這段時間新經濟股升的好好,我想買少少,(美圑,啊里巴巴)边隻有前景?現價買入合适嗎?謝謝,非常感激
龔成老師:
中石化(0386),質素算是不差,但又未到好好,始終這只是商品企業,沒有一些太大的優勢。生意近5年只是上上落落,無乜增長力,這是受油價等因素影響,反映佢處於一個被動的狀態。
所以,你如果不是持有過多,這股可持有,但你就要預佢無乜增長力,而作為收息股投資,都可以,但由於優質度不算好強,同時唔好預佢增長力高。
至於另外兩隻新經濟股,你可以考慮阿里(9988),始終這企業已有實在的盈利,現金流強勁,加上仍有增長力,有投資價值。
現價處少少貴,你可先入一注,然後等跌多1成先再入,以分注模式進行。
------------------------------------------------
Q14146:
你好龔成,中移動成日跌,點算
我自己貴買,但亦叫媽咪$66蚊買入,因覺得已便宜
積弱一段長時間,除左提速降費,同手機上台增長飽和外,咩事令到佢跌跌不休...
另外,你對941 既估值係?你覺得佢值幾錢呢
謝謝你無私解答
龔成老師:
中國政府的行業政策,的確會令電訊商的收入減少,估值有少少減,但中國移動(0941)始終有質素,不用太擔心。
近年中移動受到多個不利因素影,你上述講是其中之一,而5G的投資龐大,影響了企業的現金流,令之後的派息受壓,從而令股價受壓。
不過從長期睇,佢又唔算太差,始終中國政府唔會要佢做蝕本生意,加上5G投資有收成,但要耐心等耐,這都反映企業長期唔會太差。不過,中短期相信要捱下價先。
現時估值合理,反映電訊業行業政策較弱的問題,但長遠5G力量,都會慢慢幫到佢(但不能期望太大)。
------------------------------------------------
Q14147:
龔成老師,想問下係香港買美股當收息可嗎?
龔成老師:
只要是有質素的企業,我地都可以投資。不過,我地投資前,一定要「充份了解」該企業先得,你要好好分析該企業,只要該美股是優質,穩定派息的類別,你就可以投資。
------------------------------------------------
Q14148:
龔成老師,你好。
我想問你其實係點樣計一隻股票嘅潛在價值(intrinsic value)? 即使一隻股係優質股,我都想係一個理想嘅價位買入。
可唔可以用類似AAStock嘅網頁去計出股票嘅intrinsic value? 多謝
龔成老師:
要計算企業的內在價值,並不容易,任何企業都有當中的價值,這個價值主要有「業務價值」與「資產價值」組成,就算是優質股,都有可能貴,所以掌握計算企業價值是重要的。
但唔會有一個財經網站,有提供到企業價值,因為計算過程比較複雜,就算是專業的分析員,不同分析員計出都可能有不同的答案。
財經網站只會提供一些簡單的財務數據,投資者可以利用這些數據作為參考。
但要計企業的價值,過程比較複雜,好難三言兩語就講到,就算在我的股票班,都要講5小時,裡面會講3種估值方法,有難有易,但同學都用到的。
簡單來說,要考慮企業的生意、盈利、現金流等財務數據,同時要比較行業,考慮這企業的經營情況,之後的環境又會如何。這都是計算的基礎。
但如果要深入計算,基本上要好仔細的研究企業,要分析好多財務數據用比率,先至有較完整的答案。
------------------------------------------------
Q14149:
龔sir 你好, 我有睇你本股票勝經. 我而家大學畢業做左1年野, 月入16k, 每月儲5000$, 而家有10萬現金想試買股票 :
1. 9988 and 388 值得買嗎? 咩價位買先係抵買/合理區?
2. 記得你起書講我地應長線投資優質股, 有冇話至少幾耐先叫長線?
3. 長線投資優質股唔應受中短期股價影響, 但有時股價真係keep住跌, 咁個止蝕位應該點樣定? Thank you
龔成老師:
如果你本有投資股票,現時只持有現金,可以將約一半的資金,投資股票之用。
1)兩隻都是有質素的股票,都有長線投資的價值,前者增長力較強,不過現價就有少少貴,但小注投資都頲,後者則在合理區頂,同時小注投資可以。
2)起碼3年,最好5年以上。
3)我地最重要是分析企業的業務,因為買股票就是買企業,如果股價下跌,只是由於企業中短期經營環境不好,又或市場資金及情緒等問題,就不用理會。持有就得。
但如果股價下跌的原因,是由於企業一些核心優勢改變,企業有長期的不利影響,就可能要作出止蝕的動作。
簡單來說,我地要分析企業的長期面,是否仍是優質股。
------------------------------------------------
Q14150:
老師你好
本人今年25歲 手上有 120萬左右可動用現金
創業4年 至今 生意上了軌道 月利潤大概在17萬至22 萬之間浮動
一個月儲蓄八至十萬
但並沒有投資經驗 因為創業期間不敢冒其他風險 現在打算 投資 物業或者股票 但兩者均沒有經驗
但個人比較傾向股票 但對 如何建構投資組合毫無頭緒 希望 老師能夠賜教
龔成老師:
如果生意已上軌道,就可以好好利用資金,只要計好預留的防守資金就得。
我這刻會建議你先投資股票,過幾年再投資物業,第一,這刻的股票市場投資回報率,比香港物業市場為高。
第二,股票的流動性較大,萬一你生意要資金,你套現都較方便。
長遠來說,你應該建立「生意」「股票」「物業」的組合,各方取一個平衡的比例,這會對你的財富最好,因此,股票、物業的知識,你都需要掌握,因為遲早有用。
以你的情況,可以投資平穩增值股,長線持有(緊記,這是假設你中短期都不需要這筆資金)。投資平穩增值股,例如盈富(2800)、金沙(1928)、長建(1038)、中銀(2388)、港鐵(0066)、恆基(0012)、港交所(0388)。現價處合理水平,分注投資就得。
你可以動用其中$50萬去投資,餘下等機會先用。
至於每月儲到的資金,你可以做月供股票,每月供$5萬。
另外,以你的情況,建議你多增加投資知識,因為你之後的本金會愈來愈大,投資回報1%的差額,已經可以是幾萬,因此,愈早得到知識,提高你的投資回報,是十分重要的。
------------------------------------------------
Q14151:
老師如果肺炎爆發會唔會好似03年咁出現股災?
龔成老師:
我相信好難去到當年的程度,第一,當年經濟好差,失業率高,加上負資產好多,這是一個大前題。
同時,要今次的情況去到好似當年,對香港的經濟及零售有好大打擊,先會有影響。
------------------------------------------------
Q14152:
龔老師:我想用10年時間,5000/月供儲蓄保險,供完後,第11年便可每年提取40000左右,可以提款至終老。
請給我些少意見,我現在41歲,預計54歲退休,你認為我每月用5000做這供保單?還是每月用這5000供盈富10年?
謝謝老師分析,祝工作順利,生活愉快。
龔成老師:
要視乎你的投資風險度,就一般的41歲年齡階段來分析,承受風險度為中等,仍是可投資一些較有增長力的項目。因此,投資盈富(2800),令財富以「先增值,後現金流」的模式進行,是適合的。
不過,如果你本身不喜歡風險,想確認,投資儲蓄保險,就可以有較確認的回報,以及現金流。
因為投資盈富或股票,理論上回報會較高,但實際上,到時的回報是無人知的,這是一種不確定的狀態。
------------------------------------------------
Q14153:
你好龔成,本人有一個財務自由的問題,很想得到你的寶貴意見。
本人和太太想四年後財務自由,希望之後每年都有6個月時間離港過旅居生活,以下是本人的財務狀況:
本人已婚,41 歲,不打算生小朋友,有一個還要供款29 年的自住物業,市值約400 萬。不計物業,總資產約370萬,有120 萬美國及歐州基金、10萬香港股票 (HSBC、Hang Seng、大快活)、60 萬保本保險 (到2023到期)、其餘為現金或定期,大約資產組合每年回報為 3.3%。扣除所有生活費,每月可儲蓄2萬5千元。
太太方面,大約有 20萬 (你平時介紹)的股票,她大部份薪金放在出租物業(350萬)的貸款上,扣除租務回報,每月有一萬元的儲蓄。
謝謝你的意見,祝投資獲利 :)
龔成老師:
你地可以用盡這4年的時間,去盡力儲錢,以及投資增值,你可以用「先增值,後現金流」的做法,這刻隻中去做好增值,到了4年後,如果你地打算離港過旅居生活,就可以善用物業,以及善用你地滾存的資產,以創造現金流為目的。
所以,先集中這刻,投資有平穩增值類的項目,就你上述的資產情況,基本上都是這個方向,你可以分析翻持有的美國及歐洲基金,是否有平穩增長的能力,至於現金,如果比較多的話,其實部分再投資穩健股票是可以的。
同時,你盡力在這4年加大儲蓄,令你地可以儲更多的本金,你可以將每月儲到的資金,去做月供股票,投資
平穩增值股,例如盈富(2800)、金沙(1928)、長建(1038)、中銀(2388)、港鐵(0066)、恆基(0012)、港交所(0388)。
4年後,可以重組持有的資金,以現金流為重點,例如收收息股、債券、年金、保本基金等,到時再處理。
------------------------------------------------
Q14154:
龔老師,想請教一下你對燃氣股睇法,我見1193 華潤燃氣十年圖升勢強勁,加上大陸一直在提高燃氣用量比例,這股20PE,值得投資嗎
再次多謝老師無私奉獻,給我們這些社會低層一點希望
龔成老師:
內地的燃氣行業,長遠發展正面,因為當中有國策的支持,中央希望增加燃氣佔總能源使用的比例,因此過往一直支持,同時往後仍是。
華潤燃氣(1193)有質素,有長線投資價值,現時在合理區中上部,你可以分注投資,仍未算貴。
------------------------------------------------
Q14155:
龔Sir你好!經朋友友介紹睇咗你個page幾個月,同時亦有借你嘅書睇,覺得好有用,同埋你教嘅方法好踏實。已經報左來緊股票班,但因為想及早開始月供股票,所以未上堂先請教以下問題:
本人27歲,同另一半計劃30歲前後結緍(已有居住地方),以下為現時理財情況:
月入:20-21K (正職18K, PT 2-3K), 過年後(2020)預計會加2-3K人工
每月可儲:8-9k
儲蓄:約160K
基金保&儲蓄保:約100K (每月供1K, 仲有5年後供完)
基金保(主要投資中國及印度的基金,亦有小量投資黃金&石油的基金):現時扣減admin fee後大概break even
儲蓄保(現時利息3.75%,保證最少派息3.5%):現時扣減admin fee後仍未回本
因為兩份保險的收費都係在10年的供款期內慢慢遞減至0%,現時已過收費最高的階段,預計之後回報會較為明顯。
供滿了的儲蓄保將不會再收任何費用,我計劃繼續由得佢滾存,作為自己整個理財的一部份;而基金保供滿後將繼續收費但減至0.x% (到時要再問番果邊),我仲未決定會唔會攞番出來做其他投資。
問題:
1. 其中2K需要供基金保&儲蓄保,現打算月供股票4K,剩下2-3K現金儲起,這個安排OK嗎?
2. 因為保險部份已比較穩陣,月供股票部份我想進取一D,打算供12、27、1177、1211各1K, 這個組合可以嗎?會唔會太散?或者風險太高?定係1177/1211二揀一,然後加大12/27的比例好D?
3. 其實本來想月供3140,但發覺冇得月供,可以點樣買好?同埋見換手率偏低,怕唔怕入左難放?
4. 另外有D想入少少六福/Sasa作中長線投資,等零售業復甦時能有一定回報,哪一隻比較好?現價可以入?定等過埋年睇下會唔會再跌D?
5. 同時想投資1448、522, 但唔知咁樣一手一手入可以點樣配合番自己成個理財計劃,e.g.應該幾時入手、應該佔自己理財幾多部份等
6. 5年後基金保供完後筆錢應該點處理?繼續放係度等佢升?定攞出來買股票好?
謝謝!
龔成老師:
1)簡單來說,我地理財,要攻守兼備,你做好了防守的部分(保險、基本現金),餘下的就要進攻,因此,當你認為防守部分已足夠後,就要集中力量進攻,而你這年齡正是進攻的好時機。
相信你上述所講的安排,可以的。
2)因為你已有其他比較低風險的類別資產,所以,就算你月供有一半是潛力股,都無問題。
你這4隻股都是有質素的,可以保持長期月供,4隻,每隻$1000,可以。
3)只要你長線投資,就不用理會成交較少的問題。如果你銀行果度無提供月供,你可以自行以一手手的模式投資,佢一手的入場費都只是$2000左右,你每隔3個月入一手都可以,這基金有長線投資的價值。
4)以優質的程度,六福(0590)會好少少。長遠的投資價值亦是較高。
5)這都是有質素的股票,可投資,但你最重要是計算,在長遠來說,這股會佔你的股票組合多少,只要不過多就無問題。
6)你到時要睇翻你防守類的組合,佔你財富比例有多少,如果佔比不多,就應該再投資一些防守類的項目。
所有野都是從整體的分配,以及你本身的風險承受能力、投資目標等,作為出發點。
------------------------------------------------
Q14156:
龔成老師你好
我32歲,月入扣去MPF後$31,100。
- 前排做手術, 借下10萬元貨款, 現在每月要還$3000, 還三年
- 每月扣去租金家用、必須開支及還款, 每月開支$24,000
- 除了正職外, 今個月開始之後每月會有$4000 外快收入
- 所以打算下個月開始每月盡儲10K
請問一下
- 我應該在儲到30K後開始月供股票嗎? 如是, 每月供多少才合理?
- 如果我把目標設定在40歲前有100萬資產, 是否不太現實? 如非, 如何可以做到?
- 你會建議我同步開始一些小生意嗎?
謝謝指教。
龔成老師:
當你有一定的基本現金後,就可以開始做月供股票,$30000是否足夠,因人而異的,如果你工作穩定,你儲到這數後,都可以開始做月供。
但由於你現金仍不算多,因此每月只用$5000做月供,令你仍可以每月儲到現金,增加翻現金數目。
等你去到$10萬現金,先再增加月供股票的金額。
至於你40歲$100萬的目標,如果你每個月能儲到$10000,一年就是$12萬,8年就是$96萬。再加上基本的投資滾存,到時應該能滾存到$120萬-$150萬。
我當然鼓勵你做小生意,因為這是一個很好的嘗試,只要做得成功,你會有好大的突破。
建議你一邊繼續做正職,一邊並行試下做小生意,除可以增加收入外,亦有機會幫你開展另一個事業。
------------------------------------------------
Q14157:
龔成老師 小弟有一事想請教 我應否將手頭上持有嘅股票放左先呢 因為恐怕中美貿易之後再反枱令後市大跌
龔成老師:
永遠唔好估事情的發展,而去作出中短期的投資調整,我地買股票就是買企業,企業長遠發展理想,就有長線投資價值。
同埋「估事情」的成功率,一般都好低,唔好咁樣做,你會變得經常轉來轉去,無意思。
------------------------------------------------
Q14158:
老師你好,本人28歲,月入3萬,月儲2萬,想投資股票,但無任何投資基礎,現時有咩投資建議?
龔成老師:
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先。做月供股票,每月$10000
。
你可以考慮盈富(2800)$6000。
另外再加2隻(每隻$2000):銀娛(0027)、恆基(0012)、中銀(2388)、港鐵(0066)、煤氣(0003)、粵海(0270)、領展(0823)、港交所(0388)等,你可以了解下這些股票,然後從中選股。
如果你不懂股,就集中供盈富$10000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q14159:
希慎(0014)'s eps 點樣計? 係財經網比數(2014/2015/2016/2017/2018)
(4.61/2.73/1.16/3.48/5.77) 錢碼上落好大. 我認為加入物業重估呢個數.點調整?
龔成老師:
由於希慎(0014)每年的盈利中,都有物業重估的調整,所以你要自己,在盈利數字,扣翻相關的數目。
例如佢2018年的年報,盈利數目為$60億,但當中有$35億,來自「投資物業之公平值變動」,即是因為物業重估,而產生的盈利,這部分要扣除。
所以,真正憑營運而得的盈利,數目為$25億,現時已發行股本大約為10億股,即是每股盈利有「$2.5」(大約)。
你要每一年用這方法調整先得,同時,當你用過往的市盈率作分析時,亦要調整過往的盈利及市盈率,先有用。
------------------------------------------------
Q14160:
你好 我月薪$26,000
現時做緊月供股票十隻 每隻$1,000
2,3,6,11,823,1113,1299,1928,2318,2388
供左一年多d
而家心目中又想轉 66 同 2800
但係之前供那些又未回到平均成本價 應如何是好?
另外手中仍有一些貨
5 買入價 $69
386 買入價 $4.92
806 買入價 $5.92
1800 買入價 $8.77
2007 買入價 $13
3311 買入價 $10
應否止蝕?
謝謝
龔成老師:
我地繼續持有一隻股票與否,最重點不是睇買入價、賺蝕,而是睇企業的質素、前景。
現時的月供的股票,都是有質素的,基本上可以持有,至於轉唔轉其他股,不是因為賺蝕,而是睇你點配置。其實,你現時供的數目有點多,每隻$1000,會令你供一段較長的時間,先能有一定的股數(但如果你長線投資,都無問題)。
港鐵(0066)你長供啦。
不過,建議你日後再有資金,可以加上盈富(2800)去供,然後部分股票有一定的數量後,可以停,集中翻落其他股。
至於你現時非月供的持股,其=基本上都是有質素,可持有。但你總持貨,有少少散,你慢慢集中翻D(不用好急去賣出,但長遠應集中翻翻少少,同時增加翻盈富。
----------------------------------------------
多謝各位提問,若然你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。
另外,由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。