#1994你做緊啲乜
舊文 is so exciting
繼續一年返去探自己一次
今次返去係1994
當年港姐冠軍係人民港姐譚小環
當年金曲金獎係那有一天不想你
當年理工獲升格為理工大學
以上事件都與本故事無乜關係…
----------------------------
回到最𤓓的一天 之 美國94
----------------------------
喂，點呀你？
咦，你終於返來啦，搞錯呀，上年同我傾完兩句就閃咗，搞到我好似撞鬼咁。
你係撞鬼喎。
吓！
講下笑啫兄弟，其實係唔方便留晌同一個年代太耐，費時比人話我大懷舊。
咁今年都係94咋喎...
咦美國世界盃呀，係咪打緊呀？
咪就係囉，家陣個個掛住睇tvb同atv，我哋個體育台形同虛設呀慘。
係呀，我當年都晚晚追atv許冠文陪你等世界盃㗎。
痴線，你咪即係講緊我！不過live時我又鐘意睇tvb志偉瞓覺發開口夢講波喎...
瞓覺啫，下年2014都仲有得睇啦，冇乜特別。係喎，記住錄起老馬對希臘，遺作呀！
下，佢死咗啦？英年早逝呀慘...
唔好癲啦你，不過係佢last一場國家隊啫。
阿根廷咁早出局！慘呀！
唔係呀，不過阿根廷一早出局有幾奇，你慢慢就慣嘞。
慣？熱血呢啲嘢會慣嘅咩？你愈大愈泠血呀個人...
好煩呀你，講下你自己啦，我返來係想關心你㗎。
我呀，最近成日去運動場，因為每日唔係拍中學田徑賽，就係影小學石地足球賽，我哋就拍到悶，不過比我哋拍個啲小朋友都不知幾興奮，又破紀錄又剩。佢哋啲呀爸呀媽，仲追住我哋話想過返盒錄影帶比佢哋喎，幾寃氣呀。
咁想睇咪開返個台囉叫佢哋。
弊在個個話屋企未裝到有線呢，話啲線未鋪得到，家陣有錢都未必有得睇cable呀。
咁又係，遲幾年就唔駛錄，上網睇就得啦。
上乜話？
網呀，燒嘢食個啲鐵絲網呀，你唔明㗎啦。
喂呀講乜呀，前幾日我哋個台遇到小小危機，好咗最後冇事咋。
講啦，咁巴閉。
即是咁，因為隔離兩個台都有波講，所以平時幫我哋客串嘅講波佬突然全部唔得閒，於是有晚場小學足球賽就面對可能冇人評述嘅危機啦。呢個時候，台長正哥就問幕後邊個想試下講波，當個個當佢講笑時，我隻左手不自覺舉起咗，就係咁，我就膽粗粗講咗人生第一場波嘞。
話恭喜晒喎，咁覺得自己講成點呀？
人少少唔怕話你知，真係一劈屎咁呀！
我梗知啦，你死好命咋，如果唔係個個掛住睇隔離台世界盃的話，實投訴到你暈啦。
我都係咁話呀真係。
嗱趁人少少冇乜人睇，比心機練好啲啦。
係係係，呀咁你有冇咩講波貼士呀？
冇，最多送你6粒字，正所謂唔扮嘢，做自己...
超，以為你咩咁巴閉，抄人哋廣告啲口號做乜呀？
抄人？我不嬲以為自己原創㗎喎。
超，Giordano牛仔褲廣告㗎，有冇著過呀？
好似有，Giordano，以前好潮…
(to be continued)
1994你做緊啲乜 在 Keyman - #1994你做緊啲乜舊文is so exciting 繼續一年返去 ... 的推薦與評價
1994你做緊啲乜 舊文is so exciting 繼續一年返去探自己一次今次返去係1994 當年港姐冠軍係人民港姐譚小環當年金曲金獎係那有一天不想你當年理工獲升格 ... ... <看更多>