【偽術評論】日漫改篇電影=伏味濃
呢幾年好多日本動漫改篇做電影，每次我基本上都係精神上動住L入場睇，然後垂頭喪氣咁行返出嚟。我就好似一個無藥可救嘅兵仔，次次中招，次次重燃希望，近期我追足咁多年又捧足咁多年嘅《進擊的巨人》又話改篇做電影，我懷住將會戴綠帽嘅老公Check老婆電話嘅狐疑眼神，去睇佢條預告片，剎那間我知道今次將會再次中伏……其實日漫改篇電影次次都咁Hurt我，笨唔係冇原因，以下係我嘅研究成果：
成本分配及特效－－首先日本電影嘅成本肯L定冇荷里活咁堅(《變形金剛4》製作費有1億6千5百萬美元(即12億港元)，日本電影《機動警察》全7章都只係預計用20億日圓(即1億2千五百萬港元)) 於是戲入面啲特效十之有九都勁似打機啲CG畫面，硬係一睇就知係假嘢。假都唔緊要，有時套戲仲會偷工減料，加長文戲嚟掩飾不足，好似我最鍾意嘅《惡魔人》，佢嘅真人版電影實在太過份，為咗掩飾，成套戲竟然得幾分鐘係有特效，其他全部係超無聊文戲，明明套嘢係應該超多特效場面先係嘅。
缺乏類型導演－－荷里活大L把拍慣特效場面嘅導演例如《變形金剛》嘅米高卑，好多人話啲劇情膠，咁係一件事，但係人哋嘅特效確係世界級，反之，日本就好少呢啲導演，好多時拍慣文戲忽然要大搞特效，咁唔怪得佢哋掌握唔到嘅。
片長問題 + 觀眾期望－－電影得兩個鐘，漫畫好多都有二十幾三十期甚至更多，要歸納成個故事入去兩粒鐘度，係非常難嘅一件事，尤其當眾多狂熱粉絲對漫畫內容都非常熟悉，就更加難認同導演/編劇對電影內容嘅取捨，再加上改篇電影有時會改咗啲原著角色，須知我哋漫畫迷係好愛啲原著角色架，你一改，我哋就好似睇緊第二套嘢咁。內容取捨方面，早幾年有套《二十世紀少年》三部曲，就係我強烈地認為捉錯用神之作。套戲淨係顧住推進劇情，冇講到成個故事想表達嘅搖滾精神，大佬，啲劇情我知晒啦，我係想閣下搞好個氣氛嚟等我投入故事自High呀。
總之！改篇電影拍得唔好，粉絲係極有可能因愛成恨，今次套《進擊的巨人》，好多原著人物都改走，加埋連個預告都咁少特效，似係專攻文戲……我家陣仲猶疑緊，呢次我仲會唔會送羊入虎口。
P.S.近年日本漫畫改篇電影可以稱為合格嘅，大概就係《寄生獸》，話佢完美都唔係架啦，不過叫做不過不失啦！
圖片來源：玩具達人
