Search
2018 順風順水 直到尖沙咀
【賭波男人嫁得過】成為暢銷書？
🔥🔥🔥🔥🔥🔥🔥🔥🔥🔥🔥🔥🔥🔥🔥
⚽講都唔信！【賭波男人嫁得過】竟然有機會登上各大書局嘅暢銷書榜？
😝但事實又真係發生咗，一本以數學同心理學叫人戒賭嘅紙本書，竟然有人賣？仲好多人賣？你話唔係奇蹟又係乜？
😜蒙大家欣賞，我東波同賭SIR已開始構思第二本書，至於內容係乜，我哋自己都唔知住……
❤我同賭SIR將會響書展現身，繼續催谷【賭波男人嫁得過】！希望佢再上一層樓！愈戰愈勇！
#賭波男人嫁得過
#2018書展必買奇書
#各大書局有
#東波
#賭Sir
#數學戒賭
兩年前，2016年7月，創辦【#杜氏數學】YouTube頻道，我畀自己兩年時間，瞓身搞好佢，唔掂就死死氣搵工返。
.
今日係2018年5月24日，話咁快淨返2個月，發展比想像中順利。資金上，YouTube廣告、#SKX Online速效課程、生意股票等投資，都為我帶嚟意想不到嘅被動收入，支撐自己同屋企人嘅生活。（香港地，生活艱難，我唔係富二代，始終都要考慮現實環境。）
.
兩年大限將至，既然收入穩定，我決定任性多一次－－呢個世界有咩任性得過喺文化沙漠寫書？
.
《#賭波男人嫁得過》係一本教人正面地、健康地、可持續性地，將賭波當成興趣咁經營嘅書，導人向善。
.
曾幾何時我都好中意賭，幼稚園已經同表哥表姐打麻雀，唔舒服住院都要同老豆鋤Dee，小學周末唔使返學一定係睇跑馬，賭波未合法化我已經刨波經，六合彩啲機率我未升中學已經喺公共圖書館學識曬，我最後係點樣靠數學抽返個身出嚟，以致依家絲毫賭癮都冇呢？喺《賭波男人嫁得過》嘅唯物主義部份，我會教你用數學分析賭博問題，其實識賭就唔會沉迷賭博。
.
同另一位作者，中大哲學系大師兄東波，完成曬成本書之後，畀阿媽見到個封面，同我傾咗兩句閒偈，佢提醒咗我：中一嘅時候，我篇《我的志願》係做【作家】。
.
自從中七畢業升咗去中大Risk Management，起初幻想自己做投資銀行，西裝骨骨咁返工、甩皮甩骨咁收工，讀咗一排發現完全無興趣，誤打誤撞走咗去教數學，反而覺得好有興趣，最後無厘頭仲撈到去YouTube，跟住又點估到竟然重新走近中一嘅我的志願？走去寫書！
.
唔止寫書，嚟緊我仲會重返校園，喺一個招牌跌落街都擲死十個八個碩士博士、沙紙無鬼用、學歷澎脹嘅今日香港，我戇居到拎十萬蚊返中大讀數學碩士，又係滿足自己細個考完會考高考數學拎曬A之後嘅幻想。
.
人生，到咗咁上吓，就係咁，唔知做乜，但又做咗好多嘢。
.
唔知你覺唔覺？始終都係做返細個已經中意做嘅嘢開心啲。咁係唔係退步呢？反璞歸真會好聽啲。
.
至於一個出版過奇書嘅數學碩士下一步會點？我都唔知，盡力做好當下嘅事，命運自有安排。
.
#賭波嘅男人嫁得過
#2018書展必買奇書
#5月30日出版
#各大書局有售
#賭Sir
#數學戒賭
