［101文］股價理論上冇上限，但有冇諗過交易所報價有上限？打爆咗點算？而家就真係有人做到啦。
TLDR：千年蟲翻版呀喂！畢菲特隻嘢股價打爆機，部份newsfeed要暫停報價，等system upgrade．搞幾耐？唔使急，幫緊你幫緊你，等多一兩個星期啦。好有「總掣喺元朗」嘅feel
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
1. 拿，電腦嘅嘢我真係唔識的，所以技術細節交返畀識嘅人。但呢篇應該夠晒益智，又講金融又講數學又講電腦。
2. 但，大約你都諗到，系統總有上限。咁記住，一隻股票最多只能跌100%，但可以升100萬倍，upside無限（所以沽空嘅好易死）。理論上sky is the limit，真係會有公司可以打爆上限的。
3. 係邊個？之唔係又係佢，股神畢菲特，同佢旗下嘅巴郡（Berkshire Hathaway），亦都介紹返，巴郡B就三舊水美金一股有找，有排未打爆。所以今次主角係巴郡嘅A股，現價425,000美金一股。
4. 咁個導火線，當然係巴郡股價近期好強。其實強咗足足大半年。眾人覺得股神冇料到呀廢老呀契媽先係王道呀（而家已成為KFC），但你咪理，巴郡股價近期一樣屢創新高，畢菲特一樣突破1000億美金身家（＊）
5. 而巴郡A股，亦一路唔肯拆股（＊＊）。咁用股神嘅lingo，滾雪球，滾到42萬蚊，就撞牆啦
6. 因乜？因為，Nasdaq報價系統，有上限，而佢老哥隻嘢好快會打中。而家唔知點算。咪做system upgrade，但都要等多陣。可能之前真係冇預廢老咁有後勁。
7. 岔開少少，你心諗，Nasdaq關巴郡乜事？唔係得科技股？首先呢，唔關事，星巴克同百事都在Nasdaq．二來，嚴格嚟講Nasdaq唔係一個交易所（紐約交易所NYSE就有E，Nasdaq冇E），係一個交易兼報價系統。所以雖然巴郡在NYSE上，但都關Nasdaq事，因為好多data feed都係佢地做
8. 講咗咁多，Nasdaq上限係幾多？咪話巴郡42萬一股，好快頂爆，咁你估下，50萬？冇，其實係42萬9。To be exact，係$429,496.7295。
9. 嚟啦喎，咁怪雞嘅數字，梗係有啲特別原因。識電腦嘅實估到，唔識但數學好嘅（即係我）一樣知道。2嘅32次方再減1，就係4,294,967,295。咁點解唔係呢個43億嘅數係上限？因為股價有小數點，Nasdaq留返4個小數點，所以就係$429,496.7295。
10. （技術嘢：點解係32？冇錯因為32 bit．不過留意返，股價係唔會有負數的，所以唔使預負數嘅位。讀過電腦應知如果負數又要留多一堆位）（Technically 佢地叫 four-byte unsigned integer）
11. 結論？而家有啲data source真係停咗實時報價，有啲交易商直頭而家唔畀你買巴郡A股，驚自己系統支援唔到會大炒。等下啦，聽講話5月17號搞掂。
12. 另外，股價第二高嘅公司，NVR，股價亦不過係5100蚊（留意唔代表間公司第二大，呢度啲讀者應冇咁低能），打後大家都知咩Amazon Google 兩三千蚊美美金一股。講到尾就真係全人類服侍畢菲特一個
13. 仲有個問題，你心諗，明明話巴郡在紐交所NYSE上市喎，咁NYSE又有冇呢個問題？係冇的！可能一早upgrade咗
14. 最後一個問題：香港呢？哈哈哈，首先你諗下，香港股價最高（留意，唔係市值最大，亦唔一定係一手入場費最貴）嘅，係邊隻股票？幾乎反射動作你會諗騰訊（700），但答案唔係。而騰訊有冇見過1000蚊？我唔肯定，但我記得冇，因為次次去到咁上下就會拆。
15. 咁香港有冇金牛股？答案係，有的。邊隻？例如我寫過嘅，黃金ETF 2840，咪千幾蚊。另外仲有幾隻的，不一一細講
16. 於是乎，你最期待嘅問題：港交所系統，股價上限係幾多呢？畀你估下？
17. 我都唔完全肯定，有錯可以更正，但就我理解同埋睇港交所價位表，上限應該係9995。感覺，好似流咗啲喎。咁如果騰訊當初冇拆細，而家一早爆咗標啦，又點收科？
（＊）呢一刻呢個Club有8個人，留意2019年我寫過文，當時得2個人。咁你話疫情大洗牌下，咩人係贏家？話過你知啦，每次災難都係洗牌，財富再分配，有錢人更有錢。Welcome to shareholder capitalism
（＊＊）近年全球仇老，有個講法話畢菲特就係閂埋門唔畀啲新一代到等佢地冇得上流。呢個講法都夠低能。首先，新一代會買巴郡？第二，明明而家有fractional shares（留意，唔係碎股）買，你唔去投票唔去奧馬哈食牛扒聽廢老講道就得。第三，其實有B股可以買，唯一分別就係投票權少好多，但新一代會care？況且，依然可以去食牛扒的。
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
