［事與夢遺］實在路上我也倦～～～現實願望永似隔得很遠 （識唱一齊唱）（＊）。但唔緊要，重賞之下必有周亞夫！
1. 經濟原文：恒大中午收跌近17% 折讓15%配股籌43億元 集資規模大縮水（https://bityl.co/3w7N）
2. TLDR：原本集100億，變咗集得40億，仲要市況唔差。都幾失敗。但，好過冇，死唔去嘅，都話死還死，七孔流血環七孔流血，千萬不能混為一談。你估間間公司都集到40億？反應唔好咪減價，同賣樓一樣，同賣身一樣，至怕減價都冇人買啫—你估個個肯賣都有人買？
3. 實情，之前在Patreon 個號外寫過，恒大邊會有事？但當然，唔爆煲唔等於你要買（https://bityl.co/3w7o）。留意返呢啲係甶番外篇，係二四六一週三味外再加的。「即係強積金自願供款咁，唔係事必要的」「亦即係保單啲非保證紅利，但至少我嗰啲係派到嘅」。想睇成篇就自己訂啦下（https://bit.ly/31QmYj7）。當然唔只係睇返一篇，係睇晒晒以前嘅嘢
4. 講返，可以前後比較下，恒大嘅理想，同埋現實。留意返個「理想」只係昨日（星期二）嘅事，理想過理想酒店。結果就東北風吹走我夢，讓一半隨風。
5. 的的咁多要知嘅背景資料，未發生呢堆嘢之前，星期一，恒大總股數係131億股，之前收市價係$19.34。市值就2530億。PlayGroup都有教呢啲。記得抄低呢段，陣間要用呢碗嘢（以前話埃汾教書似教煮餸）
6. 好啦，話說昨日八號風球，冇開市。但恒大照樣配股。八號風球都可以配股？當然可以啦。水深火熱，你八號風球去睇戲都睇，人地配股就唔得？亦冇話要開市先可以配股，Technically 絶大多數配股都係收市時段先做。我懷疑長期停牌都可以配股集資的，之後先上返板。恒大嘅畸屎？應該今日已經上埋板，所以你見好大成交。
7. 好啦，我地睇睇。原本，恒大嘅理想計劃，即係昨日up嘅嘢（https://bityl.co/3w6E）。留意呢堆嘢唔會有公告，但傳媒會知晒，因為有term sheet，次次都流出，都唔係咩大秘密。
8. 最初嘅做法，係想發4.9億股新股（梗係新股啦，舊股的話只係左手交右手，冇錢入到公司）。作價$16.5- 17.2，同之前收市價比11.1-14.7%折讓，總集資81-84億（好易計）。明冇？
10. 亦都講埋，其實大約等於3.7%攤薄—因為原本131億股嘛（頭先叫你唔好倒咗碗嘢架啦！），實情唔多，但都要11-15%折讓—證明個價股水平唔多吸引，至少接貨嗰啲人要求咁大折讓—而之前恒大係炒咗上去嘅。但人地接貨嘅自然亦會計數。你炒上50蚊又要我45蚊接然後話10%折讓好抵咩
11. 昨日仲有講，「如果反應理想」，可以加碼去到 6.1億股，就隻到101-105億。超過100億，意思意思，利是利是
12. 結果呢？今日就派彩了。鍾意可以睇官方配售文件（https://bityl.co/3w6D）（到真係成咗就要出公告了）
13. 結果係點？可以睇報導（https://bityl.co/3w6M），或者睇我解。呢個「如果反應理想」當然冇出現。好似奀星開演唱會咁，「如果反應理想」就加場，咁，「如果反應唔理想」，就要縮皮送飛啦。幸好配股唔係演唱會飛，你可以減場嘅。配少啲咯。
14. 結果？印得2.6億股嘅公仔紙，係原本一半。亦只係佔股本嘅2.0%（叫撚咗你唔好倒咗碗嘢架啦！）仲有，最後定價$16.5，下限。總集資額得43億，原本嘅一半左右，更唔好同「如果反應理想」
15. 不過都啦喎，又唔使咁非黑即白。40億都好過冇，你估拎公仔紙集40億咁易？你試下去拎40億返嚟丫。
16. 咩人接貨？應該唔係咩大劉甚麼。而係，大基金呀，外國嘢添，Vanguard，Norges Bank，Legal & General，個個都有頭有面。
17. 又一個教訓，唔好黑非即白。你話垃圾公司爆煲，但人地大基金一樣買 —不過人地買嗰少少。2億股，N咁多條友分，仲要折讓夠大，呢啲就margin of safety啦。你話20蚊去買20億股就唔制啫，$16.5買返 幾千萬股，OK。講到尾都係自己計數。
18. 再好嘅公司去到某個位都係搵笨，好垃圾嘅公司去到某個位抵買。好撚奇怪的，啲人自己買股票就要問你幾時買得（我幾時都係話聽朝9:30買得），咩位買得，10.02都要等到10蚊先買。但到judge間公司時，就唔理股價升咗幾倍定跌咗九成，只會識講間公司掂，同唔掂—見唔見到個茅盾？（見到巴金添）
19. 好啦，免費文都整1500字畀你，仁至義盡。想睇返上次4000字寫恒大，訂Patreon（https://bit.ly/31QmYj7）。真喎，一街乜乜KOL都話爆煲，本人話驚都未驚過！「驚乜？我又冇買」 。記住，而家即訂，就睇返晒以前啲文的。
（＊）遲早我Patreon搞個每日一歌嘅環節，唔好笑，Bloomberg John Authers 份newsletter都係咁玩咋 （https://bityl.co/3w81）。真係韋拿踢法似我
------------------------------------------------
Ivan Patreon 狼耳街華人，一星期至少三篇港美市場評點，其他免費好文推介，每日一圖，仲有FB Page post summary．一個月一舊水唔使，開張兩個月已 600人訂，仲有兩篇免費試睇：https://bit.ly/31QmYj7
------------------------------------------------
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010
內容:
*軟件股IPO狂潮
*買平台股好過
*人民幣強勢買咩好?
本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145
