關於 fearlikeafeedshowcase2021 ，我們在網路上蒐集到這些相關的討論、資訊與評價

關於4.30之三

當晚有啲朋友聽到，原來我對上一次開show已經係10年前時都感到好驚訝。對我嚟講，舞台係我嘅二次元屋企，我真係好home sick，但咁耐冇返去，感覺好陌生，亦都擔心呢個家已經慣咗冇我，唔再需要我。

呢10年過得好快又好慢，快嘅係個世界已經變晒，我响行業內學到嘅已經好多唔再適用。講幕前，而家嘅新人，由唱歌方法到音樂風格、由言行舉止到態度想法，都令我學到好多新知識，我好開心見到香港有呢個良好嘅變化，但我真係跟唔上。幕後嘅，業內business model變得更多，睇好多大唱片公司同旗下藝人都睇得出，適應甚為困難，好多都一動不如一靜。慢嘅，大概係自己嘅步伐，好似每每學識行一步，身邊嘅人同風景已經行前好多步。

成日有人問我一個問題：「如果二揀一，你想做幕前定幕後？」其實由2005年簽Newaystar開始，學音樂學製作，就只係因為公司一句：「你要做唱作，做唔到就冇得出道。」有睇過我現場嘅人都知，由心而發嘅笑容，平時响我面上係見唔到嘅。我唔敢講台上嘅自己會發光，更應該話，平時嘅我其實好灰暗。所以對我嚟講呢三年，自從高齡參加造星2開始一直冇推出過作品，轉為幕後而且搞自己music label，並唔係一個容易嘅決定。

相比同期嘅歌手，我起步點比較遲，因為始終經歷過前公司5 + 1嘅半雪藏合約年期，一分一秒都係時間。而且當年係自資出道，10年前行業內並唔多獨立歌手，冇正統唱片公司配套冇投資者嘅我生存比較吃力，初出道時有人留意已經好幸運好幸運。期間亦好感恩遇上過唔少真心幫助我嘅前輩同伙伴，要知道商業社會如香港，唔係話欣賞你就可以不顧一切去幫你，人在江湖身不由己，所以我一直一直希望總有一日可以報答呢啲人，可惜暫時嘅我，仍然未有能力同地位可以咁做，只能默默記住所有恩。

由一開始好想俾唱片公司見到，一路邊做邊捱，到近年眼見眾多成功嘅獨立歌手跑出，替香港樂壇開心之餘，心裡面難免總會有好似剛剛卡住响中轉站，但兩架車都上唔到嘅感覺，游唔出公海，搵唔到方法，呢樣應該係我最失敗嘅地方。如今年紀已經唔再可以俾我奢侈地發夢，但我仍然好鍾意唱歌，雖然有人話，我都係做製作好啲，安穩啲，亦冇必要再去求證自己被看見同被認同，因為個世界已經唔同晒，年輕人太叻，根本冇得碰。啱，再童顏都好，有啲嘢冇得呃，一代人嘅口味同想法係冇得呃，扮都冇用。

但我真係仍然好鍾意唱歌，冇得唱歌不如攞走我條命。我好記得簽Newaystar之前見過一次Paco，佢話我咁鍾意唱歌，閂埋門自己唱咪得囉，當時年少輕狂，諗唔明呢句說話點解。但呢10年我愈來愈清楚，就算人少，我都要對住觀眾唱，我鍾意人，我鍾意同人有互動有交流。所以先會咁唔要面死都唔走仲繼續唱，其實有時都會質疑自己點解要咁stubborn，冇計，獅子座唔衰得，要面，我寧願最後一無所有，都唔想擺低嗰日先後悔冇用盡一切方法爭取過，即使努力唔賣得、堅持唔賣得，起碼我冇放棄，起碼有個唔知咩人做咗呢行10幾年幾廿歲人都唔紅但仲不自量力响度掙扎求存。

我唔知道我仲有幾多年可以做呢件既瘋狂又愚蠢嘅事，但我覺得就好似而家嘅香港一樣，與其留戀過去同埋怨現狀，不如儘力做好眼前嘅事，行得一步得一步，做得幾多得幾多，後面嘅有能力嘅一定可以繼續行落去行得更好。

我係一個香港歌手，我係一個香港人。

#FEARLikeAFeedShowcase2021

關於4.30之二

完咗show，聽得最多係 1. 你哋係咪有投資者、2. 個show好有誠意好熱血好感動、3. 你哋要加油呀你值得擁有更多。冇㗎，我哋冇投資者，全公司得一個員工就係我，今次呢個show，全部人都爆seed去做，惡扭兩位負責所有concept、美術、場景；Yi Yan負責咗8成嘅video，大家响7個星期內砌咗呢個冇budget嘅show出嚟，我哋自知有好多地方可以更好，但我哋都真係冇保留地做咗一個好show，亦係我哋成立以來第一個正式嘅表演。

由於場地座位有限，亦受疫情影響只能開75%，有好多人話我知買唔到飛，我亦冇咁多quota可以邀請晒所有朋友嚟，唔好意思，唯有下次有機會，搵個大啲嘅場，籌備再好啲。好多謝到場或者買唔到飛嘅你，因為呢件事話我哋知，我哋都有啲叫座力。响台上望落去，對住一大片手燈同燈牌景色去表演，真係好爽。

官方相片同影片都陸續處理中，亦已經見到有粉絲upload咗當晚一部分嘅片，嚟唔到嘅你可以上去感受下當晚有幾歡，嚟咗想重溫嘅當然都歡迎CLS，我自己都有睇返晒一次啲片，每次全場大合唱、全場一齊起身、一齊眼濕濕，所有感受今日仍然意猶未盡。

見到好多藝人、主播、DJ、樂評朋友都對個show有不少正評，我開心到，就好似當晚响台上咁開懷大笑。冇錯，搞一次show真係短幾年命，由brainstorm、籌備，到入台嗰朝個人都好tense，我仲記得當日做完第一個tag run放晚飯break之前，Hugo同我對望一眼，然後佢話：終於感受到大家都放心咗好多。

就响開show前一個月，可能因為壓力太大又唔夠休息，我生蛇睇咗兩個星期醫生，食藥食到個人瘟瘟鄧鄧，不過放心，我show前已經好返晒。「對所有事情都太過認真，是我最失敗的部分」，大概呢兩句 #CommonLoser 嘅歌詞就概括咗我嘅性格。

好多人話全個show最有印象係我準備嘅短片，之後再接自彈自唱版本嘅擁抱，大家都眼濕濕，甚至有人同我講tag run、run through、dress rehearsal睇咗三次以為已經免疫，但on show時都係不由自主喊咗出嚟。而我就真係眼淺嘅人，dress rehearsal時個場係吉嘅都喊到唔係好唱到，on show就更加渣仔。而我好感恩呢條片咁多個階段中同我一齊經歷嘅人，都有出現响現場。

至於點解要有呢條片？今次係我相隔10年再次做一個自己嘅show，但就同片裡面講嘅一樣，咁多年來，咁多地方消失，咁多我愛同愛我嘅人離開，我唔想錯過機會去以呢個方法親身講一句多謝你選擇留低。「心跳不可能永恆，下一秒鐘你最愛的人，可能沒能力再等」， #擁抱 內嘅呢幾句歌詞，希望時刻可以提醒我，就算幾窮忙，都要停低感恩，去及時擁抱所愛。

#FEARLikeAFeedShowcase2021

休息沈澱咗好幾日，處理緊show後事之時，亦終於可以靜落嚟去講下關於個show嘅感想，因為實在太多嘢要講，所以今日主要係想先多謝一啲人同單位。

多謝 @travellerholly @gorantse @cherubng ，如果唔係你哋，當初唔會有搞呢個show嘅念頭，令到之前被禁止演出嘅公司藝人終於有機會上到呢個台。當中嘅struggle同過程唔多講，但好多謝你哋嘅正義同信任。

多謝我嘅舊老闆， @superstarloungehk
嘅May姐、Danny哥，仲有 @lockill_hk ，幫我買咗呢個show嘅一部分門票，成為我哋嘅贊助，減輕咗我好多負擔，感謝你哋嘅愛。

多謝 @daymakercreatives ，多謝 @alexkmchu ，一切在心中，同你哋合作好開心好放心。

@_godricleung ，你明就得，冇咗你仗義出手，真係唔知點算。

我嘅好細佬 @os.cho 今次第一次做SM同DSM，所有人都對我讚你，我只係回一句「優良血統，我梗係知佢得」，由你返嚟香港踏入舞台界，終於第一次一齊做嘢，作為家人作為工作人員，在公在私你都十分之重要，感謝你！當然仲有燈光嘅 @cal_harl ，你而家已經係劇界燈神，如果唔係中學同學駛人情牌，我何德何能請得起你出手，感謝你化腐朽為神奇，令到冇budget嘅show充滿活力同氣氛。

本來只係搵你幫手跟前台嘅事，但後來因為你見到我overload到不能，自己跳出嚟幫手，搞晒借衫、食飯、人手調動、接待press同artistes、車出車入、跟backdrop、心理輔導⋯⋯數之不盡，當然我知道放你响前台係大材小用，只係我冇budget去請你做更重要嘅崗位，你嘅請纓確實救咗我一命，感謝你， @mr_polite 。

前台嘅所有人，包括我嘅好妹妹 @carykayii ，除咗擔大旗緊守崗位全個show冇入場睇，仲要响呢段期間幫手處理好多搬屋嘅事，感恩有妳同行嘅呢十幾年。買咗飛都幫手嘅 @shannon_ning 、 @iris.leung.948 、 @angela.yung0901 、 @minilau_ ，妳哋由product packing到買飛分飛等等嘅一切安排同幫忙，減輕咗我好多煩惱，多謝大家嘅愛。

多謝所有 @cocoas_neverland 同 @wallstreethk ，多謝你哋體諒我嘅所有不足、安排不週，你哋嘅到來同所有應援支持都唔係理所當然。特別係當晚到來嘅初代同學會，感恩呢十年對我不離不棄，我見到你哋就好似見到屋企人一樣，格外開心。

感謝 @hk.coastline @william_kwok 臨急臨忙整咗幾件特別版嘅衫俾我哋跳舞，感謝你一路以來嘅幫忙，我好鍾意件衫。

所有人嘅頭妝都係妳一個人做晒，全晚最忙嘅人之一，由第一次公司影相，到NeverLu嘅MV，到今次嘅showcase，都係得妳幫手令我哋以最靚嘅一面示人，多謝妳 @poliating ，我會幫手督促各位護膚，放心。

@leander_lau ，我講咗好多次，我最欣賞呢個仔並非佢無人不知嘅才華，而係你嘅純真、專業同對演藝事業嘅熱情，所以今次只搵你一個嘉賓，因為我絕對信任你，而你亦冇令我擔心過，我衷心希望你前途無可限量，繼續發光。

感謝各個傳媒單位，特別係買飛嘅幾位，明明有comply飛都自己上網買，身體力行去撐場，好多謝你哋嘅愛錫，亦希望我哋個show冇太失禮。

多謝Y-Square台前幕後所有手足，多謝你哋嘅包容同體諒。多謝我嘅一班好朋友，真金白銀買飛入場，每一張門票每一件product都得來不易，感激不盡。

最後最後，感謝 @fearmusicltd @neverlu3 @sleepyvoice @dlcl @nighmare_gacha @yiyan 幾位藝人嘅信任、包容、體諒，一路走來並唔容易，呢大半個月辛苦大家協助籌備同傾力演出。我希望我哋以後可以做得更好，係時候要游出公海，唔可以只係再係响庇蔭下閉門造車、自圓其說。大家加油努力，並祝所有人安好。

#FEARLikeAFeedShowcase2021