【重逢的感動】
2021年3月28日(日)，今天係我第21次入RCAP探望二筒甜筒！
闊別兩個星期，我一直擔心，二筒甜筒唔知仲認唔認得我？我懷住忐忑嘅心情走近佢哋個倉，去到倉門外同佢哋四目交投，二筒頃刻雀躍嘅反應，令我頓感驚喜莫名！
當時Fiona洗緊倉，所有狗狗喺走廊位置散步；先係二筒發現我，甜筒接住望過嚟，我同佢哋隔住個鐵絲網對望，兩個隨即咧嘴而笑，二筒直情企埋起身，非常緊張！
我開門入去，二筒即刻飛撲埋嚟企起身歡迎我！我嗰刻真係感動到想喊出嚟！即刻攬住佢唔放！
見今日太陽咁好，我拖咗二筒甜筒出去幫佢哋沖涼！佢哋兩個都好乖，我沖到佢哋香噴噴，之後俾佢哋兩個拖住我，一齊散步曬太陽！
甜筒耳傷好返哂喇！二筒都好咗好多，好多謝Fiona幫佢哋護理！雖然甜筒耳仔變咗燕子尾，但佢嘅樣依然咁儍氣，笑容依然咁可愛！聽Fiona講，佢哋兩個上星期六一直企喺鐵絲網門前眼望望，似係等緊我，我聽完更加感動，好彩今日我終於鼓起勇氣再入嚟同佢哋見面，如果唔係我就變咗負心的肥！
其實，唔單止二筒甜筒，BoBo、白雲&沙皮大耳都好冧我！BoBo第一個見到我，即刻挨埋嚟我身邊，錫咗我一啖後，個頭伏喺大髀，擘大個口笑住流口水，流到我條褲濕哂！
白雲就仲熱情！佢身型比較大，力氣相對大，不停主動走埋嚟我身邊揩我！我踎低同二筒甜筒自拍，白雲就不停用個頭揩我，成個身用力挨埋嚟；又喺我腳中間穿嚟穿去同我火車捐山窿，攪到我差啲失平衡坐落地下！
傍晚6：00，俾埋二筒四寶3月&4月嘅助養費($800)Sa姐後，係時候同佢哋講再見喇！
今日唯一最遺憾嘅係，喺我等車期間，急不及待睇相，竟然一個唔覺意，錯手delete咗全日同二筒影得最靚嗰張自拍相！！嗰刻，我個鼻即刻好酸，差啲喊出嚟！我曾努力嘗試救返，可惜最後都復原唔到！
多謝細妹今日抽空陪我入去；多謝佢同阿魚幫我影相；多謝Catherine鼓勵我堅持；多謝百多位俾Like支持我嘅朋友；我唔知幾時開始？變得比以前更加感觸同感性，成日都有想喊嘅衝動，眼淚好易流落嚟.....
最後，好多謝二筒&甜筒帶俾我窩心嘅回憶！今日，我錫咗二筒個嘴一啖，同佢&甜筒唱《你知道我在等你嗎？》
「莫名我就喜歡你，深深的愛上你，沒有理由沒有原因.....莫名我就喜歡你，深深的愛上你，從見到你的那一天起.....」(二筒聽到我唱到成首歌最尾嗰兩句，頂唔順轉身走咗！剩返甜筒甜絲絲咁望住我！)
我，唔知我同二筒甜筒嘅緣份可以持續幾耐？聽聞佢哋半歲左右被救回中心，當時大約係2008年！但我，衷心希望喺佢哋今生餘下嘅日子，能夠有阿肥呢個人出現，俾佢哋更多愛同溫暖！
肥媽，好多謝妳！
二筒甜筒～復活節見！
