【《魔髮精靈：唱遊大世界》正式成為戲院革命之火？】
改寫歷史嘅嘢永遠估你唔到，繼AMC喺「#Universal魔髮精靈之亂（俾個Hashtag佢，我覺得呢單嘢可以玩到 #新異變人係人生最期待電影沒有之一 咁）」宣佈罷映所有Universal片後，另一大美國院線Cineworld（Regal）都宣佈罷映Universal，但就留返一線，只罷映Universal跳過90日空窗期上VOD嘅戲。
單嘢導火線都係Universal聲稱喺戲院重開之日，將會以戲院同VOD兩種格式同步公映《魔髮精靈：唱遊大世界》，但同時又聲稱套戲單靠「US$19.99全家睇」價錢，已經有過億收入，戲院再播仲有冇人睇？喺VOD模式上，Universal可以賺到點播80%嘅錢，而喺戲院播映就只有50%，佢咁樣播一播，隨時賺得多過戲院，明剃戲院眼眉。
與此同時，歐洲嘅戲院業聯盟International Union of Cinemas亦都評論Universal做法，認為《魔髮精靈：唱遊大世界》嘅成功，唔應該成為參考例子，去改變電影同戲院嘅發行常規，只不過係因應目前疫情情況，大家留喺屋企睇戲。事關2019年全球票房達到史無前例嘅巔峰，證明觀眾仍然係會入戲院睇戲。
目前暫時係得《魔髮精靈：唱遊大世界》玩到VOD同「戲院」同步公映，其他如迪記嘅《阿特米斯奇幻歷險》、華納嘅《狗狗震！》都宣佈直接上VOD，又上VOD又上戲院，無視90日空窗期，確係食緊兩家茶飯，對戲院嚟講又真係唔公平，只不過我依然花生到《F9狂野時速》、《侏羅紀世界》第三集呢類戲院票房必收大片，戲院係咪真係罷映😏
無論如何，《魔髮精靈：唱遊大世界》將會成為戲院同串流革命嘅燎原之火。
又，《魔髮精靈：唱遊大世界》將會香港戲院重開之日上映，一套咁有歷史意義嘅戲，應該會成為我「戲院重光」後第一套入場睇嘅戲。
期待呢場「Universal魔髮精靈之亂」發展。
最新Update延期時間表可看留言連結。
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
