［唔揸飛機，咪揸鑊鏟］都係隨機應變要冷靜啫，飛機師炒股，你估掂唔掂？
TLDR：邪惡華爾街真人實驗，搵班飛機師嚟，教炒股票。其他素人做對照實驗，最後邊組贏？
FT原文：Pilots swap the cockpit for trading screens（https://bityl.co/40Uw）
1. 作為一個麻撚煩嘅學霸（係喎，又要講），細個時聽到話性格緊過能力，當然唔多高興。不過越大就越信呢樣嘢。同樣地，唔少人認為金融工作（＊），特別係炒賣，係唔使乜hard knowledge嘅。畢竟唔少人心目中，唔係升就跌，同賭百家樂睇路捉莊閒冇乜分別（所以賭百家樂咪輸仆街，何生可以咁多女人，金沙銀河可以做恒指成份股咯）
2. 的確，炒股票，似乎唔係咩學術研究。大可以盲拳打死老師傅（你睇丁蟹？）。咁當然點落盤點睇價之類都要知，但呢類硬知識好快學到。勁人往往做唔同工種都勁，亦因為咁你見鬼佬啲I Bank員工好多都唔係讀商學院出身。至於咩「香港HR短視埋沒我才華」之類就另行討論
3. 掉轉，有唔少其他行業人員嘅特質，可能可以幫到金融工作。例如軍人。王雅麗寫過嘅例子：有軍人退役後去見工，指自己「過去兩年，每一分鐘都有可能是最後一分鐘。你說我能抵受壓力嗎？」—的確，如果trading 要求嘅係（＊＊＊）要受得住壓力，咁軍人肯定受得住。同樣地，我估醫生都可以係好嘅trader，反正醫生本身好多係學霸。你睇The Big Short，Michael Burry（Christian Bale）未做對沖基金之前，根本就係醫生。真正MD，唔係周兆祥之類。
4. 咁，不如試下飛機師？揸飛機同揸鑊鏟，應該都差不多啦。真喎，煩惱似春風秋雨，季節又似人生（識唱一齊唱！）。揸飛機要諗定點應對突發情況，氣流暴風，揸鑊鏟一樣，忽然南海打仗又點，忽然侵侵死咁又點。原理差不多。
5. 另外，揸飛機要睇天氣睇地形睇呢樣睇嗰樣，揸鑊鏟一樣。計下入幾多油，有事飛去邊度緊急降落，定下咩位止蝕，原理好似差不多。
6. 不過，個難度係，飛機師雖則巴閉，但一般嚟講你行入去大行叫人畀你做Trader，都係冇咁易嘅。醫生Michael Burry點入行做基金經理架呢？好簡單，佢係自己搞個對沖基金嘅！（有錢到一個點）
7. 幸好，今次疫情就帶嚟機會啦。邪惡嘅華爾街（其實係倫敦），就有人諗，喂，不如搵幾件機師嚟玩下。畀啲基本訓練佢地，然後落場炒。最重要係，搵個control group（留意，都係外行人，但唔係機師，咁先公平）。睇下係咪真係揸飛機掂揸鑊鏟都掂—反正啲機師都冇工開架啦！
8. 是真的，有人真係做呢個實驗。訓練完班機師，畀錢佢地炒。贏嘅機師分六成，輸嘅唔使上身。嘩。當然金額有限，實驗啫。同埋啲交易都要阿頭批。咁由於啲機師真係冇工開，甚至畀人炒埋，就有人願意試下。分錢事少，有機會真係轉行事大。
9. 班機師話，好玩，幾開心，想諗下轉行。真係呀，揸飛機同揸鑊鏟，真係差不多，都係要受壓力啦，迅速做決定啦，消化一大堆資料啦。真係差不多。
10. Except it isn’t
11. 結果就係，班機師，夾埋係輸錢嘅—而大市係升的。嚴重跑輸。更不堪嘅係，Control Group嘅人，就75%都有錢賺。大家都係金融外行，但非機師，炒股票勁過飛機師
12. 點解呢點解呢？實驗搞手試下搵答案。原因其實好簡單，因為「揸飛機真係唔同揸鑊鏟」。
13. 好簡單，投資都有所謂Losers’ game 嘅比喻，讀CFA一定知（你唔知咪因為你冇讀）。Losers’ game唔係玩嘅都係北京Loser，而係話，主動靠技術得分，定係等對手出錯。職業球手打網球就係Winners’ game，outclass對手。大家業餘打網球就係Losers’ game，啲友係自己打出界，跣低，發球雙錯誤，送分畀人地。以最好策略係保守啲，等對手犯錯。
14. 飛機師呢？如果你係萊特兄弟年代，就係Winners’ game，神乎奇技，開戰鬥機咁。但現代民航機？當然係Losers’ game，穩陣，冇人叫你要轉體三週半，最緊要平安，唔好死人，唔好炒咗架機
15. 所以，民航機機師一定係保守的。但拎去炒股票，就未必係好事。特別留意，個安排係贏咗機師拎六成，輸咗唔使上身（原文寫protection from any losses，我係咁理解）—咁更加應該take risk
16. 但見到機師性格使然，係唔會咁冒進的。見到佢地普遍持貨嘅時間，係長過普通人嘅，亦唔多肯斬纜。機師慢慢先發現，揸飛機出事就死人，但揸鑊鏟出事輸錢啫，唔使死人，「仲好多時唔係自己錢」
17. 實驗主持人都仲係樂觀嘅，覺得再教育下應該大有可為。但同時亦都發現，似乎機師唔應該就咁炒股票，「可能炒啲技術含量高啲嘅衍生產品好啲」—此話不假，埃汾其實都有讀Derivative （唔係你Degree 買本John Hull嗰啲，至少都自己寫個程式去解partial differential equation），入面啲東西，甚麼PDE呀 Heat Equation 呀Time Mesh呀，其實係工程嘢，同飛機師啲流體力學有啲共通。
18. 又，篇文冇講，但埃汾提議。民航機機師咁保守，應該搵開戰鬥機嘅空軍嚟炒嘛，應該幾有趣（其實其他行一早試過搵軍人，聽講不錯的說，問題係好多軍人就真係唔係點肯讀書）
（＊）實情金融工作有好撚多種，你做會計當然要hard knowledge，做分析員都要。做Quant做Derivative 肯定要，但Trader可能真係唔多使。
（＊＊）實情點先可以成為一個好trader，都仲未有定論。但有趣地，似乎普遍女性表現係好過男性嘅，因為男性啲睪丸酮過剩，ego大過春袋，衰衝動。所以有基金專請老嘢（已冇晒火），女人，甚至要食藥。另文再講
———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張兩個月已600人訂！仲有兩篇免費試睇：https://bit.ly/31QmYj7
——————————————————————————
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010
內容:
*軟件股IPO狂潮
*買平台股好過
*人民幣強勢買咩好?
本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145
big time幣安 在 【Big Time】詳解｜光用「裝備」賺錢！專注娛樂度的Play-to ... 的推薦與評價
... <看更多>