畢竟我們眼中的世界是世界，他們眼中的世界是我們啊！
🛫學習帶媽媽去旅行之杜拜遊
細個成日諗大個有能力就要帶媽媽去旅行，雖然媽媽不至於少出國，但真正自己出錢當媽媽的專屬領隊都係第一次，整個過程難度和比自己登上阿爾卑斯山有過之而無不及，但最後回望卻是快樂的、是滿足的。
早一陣子趁自己有能力，帶了媽媽遊杜拜。事前已經有所準備，行程不可爆肝不可太chur，食飯口味可能要遷就，要揀過諗過，但原來去到都係會有好多突發野。
例如時差，杜拜慢香港4個鐘，意味杜拜晚飯時間，媽媽已經係時候上床早抖，第一日我地join左tour去沙漠加食當地燒烤晚餐，去緊時坐吉普車果種顛簸法已有點吃不消，中途有幾個沙漠drop off 點俾你影相，但天氣熱到沙子都係辣腳，影兩下媽媽已頂唔順要上車抖，去到食飯時間更係眼訓到爆，胃口都冇埋；到第二朝，媽媽杜拜時間倒塔咁凌晨5點就起左身，因為香港時間已經9點（平時飲開早茶），真係早到酒店早餐都未有得食；
到食野方面，知道佢一定唔鐘意食西野，但都冇理由餐餐中餐，夜晚去左食cheesecake factory，由於兩個人都係眼闊肚窄，最後都係食唔晒不特止，第二朝食早餐果陣傾開計，媽說：呢度食餐麥當勞都咁貴！我心諗你又知？我地都冇食麥當勞🌚
她說：琴晚食cheesecake factory果d burger同麥當勞有咩分別？
寶寶心裡哭但寶寶不說。😂
雖然整個旅程落黎有好多突發同覺得自己安排得未如理想，但總括還是快樂更多。只能說，世上的媽媽還是偉大的，晚上已經很睏，還是堅持把飯吃完；早上很早起，肚子餓著也不願把你吵醒；已經累了還是願意陪你逛；認真嘗試著兒女們極力推薦的不太對口味的食物等等。其實佢地要既只係盡量多點同我地相處既時間啊，做甚麼、去哪裡有甚麼關係呢？
畢竟我們眼中的世界是世界，他們眼中的世界是我們啊！
經過這一次後，就覺得帶父母旅行就像照顧小朋友，他們有苦自己知，為了你高興把疲憊通通吞下，所以就更要像小朋友一樣站在他們的角度看他們的需要，他們不用凌晨爆肝飛機趕行程遊景點、也不需要瘋狂購物逛足十小時，從佢地角度出發試下感受佢地既世界，感受慢活，或者會有更特別的體驗。
下次決定再挑戰時，如去歐洲等時差大既地方，大概要安排頭3-4日廢hea休活時間，時差對佢地黎講，真係打不倒的敵人，只能慢慢適應了！
----------
Our ig :
www.instagram.com/erieri.c
www.instagram.com/ronronchan
