［今日寫呢啲］美股好貴，有幾貴？之後會點？可以點算？
呢篇就堅咯，週末專題，篇篇正嘢。好多讀者認為呢類文一篇都值回成年嘅Patreon訂閱費
首先，同你講返美股有幾貴。相對，絶對，乜對都貴。咁我地梗係唔會低層次到話因為升咗好多就話貴。睇埋盈利，睇埋債息，睇埋相對於其他市場，睇埋相對於自己，都係相當貴 — 咁你唔信嘅，都冇計。
但當然，貴嘅嘢可以變得更貴。係丫，只係值搏率嘅問題。話「估值唔重要」嘅，同「少少錢我唔care」差不多，多數係口不對心。佢意思只係話「估值可以再上」。如果「估值唔重要」，咁不如你用10倍價值買晒我啲股票，我就可以退休架啦。你做乜唔買？「估值唔重要」喎。「貴嘅可以更貴」喎。你話，CLS啦，100蚊買到嘅嘢點解要用1000蚊買 —咪就係咯，咁你話估值重唔重要？
文中有講，高估值嗰時飛入去，當然唔一定輸錢，「貴嘅可以更貴」。正如低估值買都唔一定贏錢。但，講risk and return．入面有數計畀你睇，高估值時飛入去，之後多數回報都低，波幅就大，嚇餐飽仲要冇肉食。唔止，仲要有好大嘅drawdown—而家標普指數高位回調5%回報就叫救命嘅，我都唔知你之後點捱。
咁，既然美股估值貴，而估值貴時飛入去，往往贏面又低。咁可以點做？「唔好買」？咁買乜？定期存款定債券？照計都保證輸死。「等回調」。都啱，但等到幾時？跌落嚟又係咪敢買？你點知唔會再跌？
咁你睇段落標題都講埋，大方向，都係分散分散再散。美股好貴？「咪唔好買咁多美股」（但唔好完全唔買，「貴嘅可以更貴」）。哦OK，你話港股廢拉柴（但好多人連港股都跑唔贏，真係trainspotting，唔知嗰啲人叫乜），A股搵笨實。咁仲有好多其他市場的。
我知，美股過去十幾年都跑贏嘛，我清楚過你啦。但之前十幾年跑輸晒你又唔講？我唔知而家係咪轉角位啦，但，對上嗰次轉角位，正係科網爆煲—正係估值美股最貴嗰時。「估值唔重要」呀可？
咁另外，堅持仲買美股嘅（當然都應該買返多少），亦可以唔使買晒啲發夢股（死晒啦），甚至唔使全部增長股。你見我買愛馬士 LVMH 一樣日日新高，OK係歐洲公司。咁之前Black Rock 甚至JP Morgan都係日日新高。
係喎，我知，過去N年都係增長股跑贏嘛，正如過去N年都係美股跑贏。美股係咪轉角唔知，但增長股就已經轉咗角，跑輸比價值股啦。「明明之前年年都係增長股跑贏」
最後嗰啲，資置配置，老生常談，亦費事講咁多，自己訂Patreon睇吧。睇完覺得唔值嘅？咪月尾停咗佢（回水？當然冇得回水，睇完全相仲想回水？過去大半年啲文你都可以睇晒喎。換著啲女，個個月刪相的，我已經好均真）
最最最後，仲有一樣最簡單嘅方法：認命，接受現實。聽落好消極，但我覺得呢段先係神髓。幾咁多人投資輸錢，都係因為自大。目標不切實際。經常諗埋啲「我有100萬本，我唔貪心，希望每個月賺3萬」嘅笑話。即係唔好話你嗰36厘回報勁過股神（其實唔止36厘）。我當你每個月想賺1萬，都係不切實際。
個世界唔係咁運作的，冇得你去「打算」幾多回報。你自己去搞Patreon去搞生意，都仲可以「目標」幾多（本人就已經1600人，目標年底去到2000，「唔貪心」）。但對住市場，大家都只係Price taker。我常用嘅比喻係出海打魚，邊有得保證，一個風打埋你，你唔死返到嚟已經賺晒（2020年3月咪係咁）。又似打獵，邊得嚟「我唔貪心，今日扑夠3隻熊就收工」，萬一冇熊呢？萬一係啲熊扑你呢？（＊）
（＊）順帶一提，股票都仲係positive sum game，可以人人贏錢。期指之類就真係zero sum game（計埋交易費用就negative sum），你上山又想扑3隻熊，隻熊出山又想扑3個你。我就唔知點樣可以共存。
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
cls意思2020 在 BIOS monthly - 【#港台很熟嗎】台灣人不懂CLS 的推薦與評價
港台很熟嗎】台灣人不懂CLS，原來在廣東話中是這個意思⋯⋯ 香港「高登討論區」曾於2003 ... June 27, 2020 · ... 想搞懂CLS，先搞懂小李老母飛刀⋯⋯ ｜ BIOS monthly. ... <看更多>