［喂呀！］王浩信概念股呀喂！
告個急先：本人已被炒，未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。一星期至少出返六篇文，今年頭五日我已出咗十篇。
1. 原本有諗過寫，但我一日想寫嘅topic冇一百都幾十個，時間有限。
2. 不過今日有朋友問我，買唔買息奴好，話股價升咗好多。我就知又係呢個故事
3. 應該都唔少人知，但慎防有人未知。隻「息奴」係冇上市嘅！圖呢隻？同名啫。
4. 成個故事係，Whatsapp更新terms，咁啲人唔鍾意呀驚呀，咁話齊齊轉場。話用Telegram都唔好（我有用，但相當憎），用「息奴」。好。咁用戶大增。當然不代表好多錢賺，但股票炒預期啫。股價炒起，好合理。
5. 又，呢種圖，行家叫做Hockey Stick．明啦
6. Except one thing：「息奴」間公司冇上市！
7. 其實，但凡有乜古怪點子，我第一件事就望下啲公司有冇上市，或者會唔會係上市公司入面嘅東西。咁一般你Google一下睇下Wikipedia已經知。
8. 呢間上市嘅Signal，係另一間完全冇關嘅公司，亦都唔涉及喬唔喬丹嘅問題。所以表錯情，亦畀你見到美股而家幾咁雞犬雞升，同之前咩「大灣區聚變力量」（1189）有炒得差不多。或者之前A股炒侵侵概念「川大致勝」。錢多人傻
9. 順手講下係，美股用字母做上市代號，世間少見。固然有佢原因，但亦導致好多時點錯相。
10. 近年經典嘅兩個例子：第一係Zoom，早排熱炒，對不？但Zoom嘅卜市編號唔係Zoom，係ZM。咁原本都冇事，但更煩係另外有間公司嘅上市編號係ZOOM，間嘢叫Zoom Technology，咁就死得人多了。
11. 當然更經典嘅係可口可樂，係嗰間可口可樂。上市編號？美股老鬼會知，但新手可能估唔到：唔係COKE，唔係COLA，甚至唔係CO，而係KO。
12. 原本冇乜嘢，但又有間公司係用COKE做編號（否則可口可樂一早自己拎）。更大鑊係呢間公司又同可樂有啲關係，間公司叫Coca-Cola Consolidated。唔係做濃縮可樂三罐煮埋一罐飲，而係做Bottling。仲要真係幫可口可樂做Bottling。仲要間公司都唔細，係標普500成份股
13. 咁呢，就出事了。羅賓漢啲suggested trade，真係試過搞錯
14. 香港？正路就唔會嘅，因為講冧把唔係講公司名。反而係做銀行時，聽聞有人拆錢拆去ICBC（工行）結果去咗台灣嘅ICBC（嗰時中國國際，而家兆豐）。你話，喂，個Swift Code唔同喎。梗係唔同。但，屙趴喱蜃嘅跟單做嘢之嘛，你個刁拿在房入面揀錯，唔通打嚟質疑你？唔會的。當然啦，呢啲嘢偶然會發生，又唔使太擔心，人地唔會拎撚咗你啲錢唔還嘅。雖然涉及兩岸就煩啲。
15. 咁但Urban Legend話有人買ICBC Asia 買咗 ICBC A-Share，就應該都係唔會嘅。用埃仙冧把嘛。
16. 所以大家見到點解嗰啲 Swift Code呀，ISIN 冧把呀之類咁緊要。你有時同一隻股票都幾個 class，你鬼佬經香港買建行理論上買A股都得，就真係小心啲好，呼曲啦，唔好懶型講名。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
你嘅2020年點？我嘅2020年就幾好。Ivan Patreon，港美市場評點，專題號外，每日一圖，好文推介。每星期6篇，月費100唔使，5個月已1200人訂！（https://bityl.co/4Y0h）。月頭訂至抵，年費仲有85折，仲係睇13個月添。
