【龔成問答信箱】（Q13521-Q13540）
Q13521：
龔成你好呀，我係兩年前無意中喺Facebook 上睇到你嘅page
當時嘅我對理財唔太熟悉，經常跟人買賣股票一直都冇賺錢，後來第一次睇過你介紹股票的影片，我就嘗試跟着去觀察同了解，發現你講啲嘢好啱。
於是聽你嘅介紹我改變了理財習慣，從2017年尾，我户口只有一兩萬，短短兩年間户口儲蓄增長至20幾萬！
於是今年我研究過你好多本書，例如50優質潛力股 50穩健收息股，財務自由行同埋大富翁致富藍圖
發現你真心想幫大家，如何理財同埋人生規劃。而唔係好似其他啲股票大師咁淨係教人賺水位就走！
感謝你，之後的路我會一直支持你！
龔成老師：
多謝支持！
作為一個作者，以及理財導師，最想就是令大家有正面的理財觀。
香港人不是無錢的，但就是不懂理財，我曾收過網友的求助，表示佢現時月入$10萬，但每月仍是儲唔到錢，問我點算！
所以，讀書勁、人工高，不代表懂得理財，這是學校無教過我地的野，但對我地長遠卻好重要。
20年前，我最初接觸理財、投資，真的令我大開眼界，當時我明白自己的無知，當時好似發現新大陸一樣，於是我不停去圖書館，之後開始買書睇，我見證自己的財富，由5位數到6位，再到7位、8位數，這都是知識得到的成果。
我好多謝前人願意寫低重要的理財知識，願意分享，我先可以憑投資，將財富不將滾大。
我好明白知識的重要，我好多謝社會比我的，所以我都好希望，對社會有一點點貢獻，於是我不斷寫書、教班，就是我想在賺錢同時，回饋返比個社會。
可以幫到你實在太好！理財是長期戰，你要保持進步，加油！
------------------------------------------------
Q13522：
你好龔sir，我睇完你本財務自由行之後得到好大啟發由其係貸款果part。
依家我去左中銀到貸款小試牛刀，一次借左5萬分2年還，計埋手續費同利息總共$54366。
我打算投資(建行939)/(置富778)/(中國石油化工386)黎賺息差。
請問我應該3選1還是分散3隻呢？
仲有無其他更好既選擇呢？
同埋現價可入嗎？非常感謝
龔成老師：
借貸投資，是創富方法，但都有利有弊，你一定要明白這點。
首先要考慮你本身的風險情況，你負債會因此而增加。當然，負債不一定有問題，但你要考慮自己的年齡、情況、風險承受能力，去決定是否增加這負債。
現時低息環境，如果你的「實際年利率」不高，投資一些收息股，已能取得一定的息差回報。不過，股票的價格總有上落，你如何保證不會出現「賺息蝕價」的情況？
這正正是你要思考的問題。
由於現時收息股及其他類別的股票，暫時只處合理區，未到平宜區，你好難確保不會出現「賺息蝕價」的情況，因此，這刻做加按買股的值博率，只屬中等。
如果大市處平宜區，那你投資，蝕價的可能性就會較低，你這動作的值博率就會大增。
因此，現時借貸買股，不是不可，但值博率只屬中等。而由於這筆錢增加了你的負債，因此不能太進取，你只能投資平穩增值股及收息股類別，同時最好有部分留跌市後先入。
------------------------------------------------
Q13523：
老師，我30歲，有小朋友，如果我想供月供股票，
66@2000
2800@2000
778@2000
1928@2000
405@2000
52@2000
345@2000
1211@2000
如果要揀5個去做月供，應該點揀？或者有咩建議可以加入組合？我希望可以做到比平穩增值進取一點點。
龔成老師：
你30歲，有小朋友，可承受風險能力算是中等，建議集中投資平穩增值股，潛力股只能小注。
盈富（2800）佔比可以較大，另外可選：港鐵（0066）、金沙（1928）、越秀房產（0405）、小注比亞迪（1211）。
------------------------------------------------
Q13524：
老師，金界3918會不會比1928好呢？
龔成老師：
兩隻都有在我的書《50股》系列推過，兩隻都優質，但風險度就不同。
金界（3918）處新興市場，增長力會較強，但風險會略高，至於金沙（1928），較為穩健，收息很好，但增長力只是平穩。因此，兩隻都有投資價值，但就要睇翻你本身的投資目標，若投資金界，金額不能過多。
------------------------------------------------
Q13525：
阿Sir，有關煤氣、恆基「紅股10送1機制」，有啲婆仔數嘅嘢想請教下你：
月供、之前已經試過「10送1紅股」嘅股東，未必持有10倍數嘅股數，變相例如A先生持有999股，「10送1」之後變成1,098股，其實原先有9股實質上對於A先生係冇做到「10送1」，佔差唔多1%。
跟住咁多個散戶，A先生凸頭3股，B小姐又凸頭4股……Z先生凸頭5股，小數怕長計，呢啲股數加加埋埋都可以製造唔少「10送1」紅股噃。
之但係，喺會計上，「10送1」應該係會計師以煤氣/恆基嘅總發行股數做調整；以恒基為例，現時總發行股數係4,841,387,003股，做一次「10送1」會變成5,325,525,703股，只係凸頭3股冇做「10送1」，佔0.00001%都冇。
換言之，每次做「紅股10送1」調整，會唔會好多帳面上新製造出來嘅紅股係冇散戶股東認領？
咁呢啲紅股會點樣處置？係唔係恒基自己持有返呢啲「無主孤魂」？
如果係嘅話，咪變咗每次進行「紅股10送1」，將公司呢個大餅重新再切割分配嗰陣，總公司大股東其實「偷竊」緊好多散戶小股東嘅「餅碎」，暗地裏增大咗自己持有公司嘅比率？謝謝賜教。
龔成老師：
你這個問題好有趣，但老實講，我無研究過，所以都唔知佢點處理，因為我一向對D細數都無興趣的。
佢有可能在總股數上，唔會發行到你上述所計的數，即是10送1送唔到的，就唔會發行，因此，並不存在「無主孤魂」的問題。
------------------------------------------------
Q13526：
龔老師您好，本人有多年買股經驗，奈何輸多贏少，錯誤觀念也錯失無數機會，自問投身社會一直營營役役，眼看自己的MPF仍要為老來擔憂非常懊惱。
本人每月可儲蓄$5000，但工作並不安穩，若中年失業找工也難，希望每月能產出$10000至$15000作為生活費。年青時沒有理財 概念，現在極之後悔，亡羊補牢，望能補救。
現持有股票約$700000，每月月供$4000盈富，$700000做銀行定期，另有$700000現金，應如何改善現有組合和如何操作?還有什麼建議，希望老師指點，萬分感謝！
0002 中電 500股
0003 煤氣 13400股
0778 置富 5000股
0066 港鐵 4000股
2388 中銀 1000股
0012 恆基 2100股
1928 金沙 1600股
6823 電訊 2000股
2800 盈富 2700股
龔成老師：
如果你過往經常虧損，就要改變投資模式，以穩健的投資方法進行，最好是長線持有優質股，唔好比大市影響。
你上述所持有的，其實都是有質素的股票，基本上可以長期持有，只要你唔好「炒賣」就得。
至於你現時股票與銀行定期的比例，這是不差的分配，不用有改變。除非股市出現大跌市，你就可以動用3成現金去入貨。
至於現時的月供，無問題，長期進行就得。
我相信你已經調整過往錯誤的方法，這刻的方法已正確，中短期不會見到有效果，但慢慢長期就會有收成，因此，最重要是保持進行。
到你日後退休，再進行資產的配置，集中低風險收息類。
------------------------------------------------
Q13527：
老師你好，請問中國光大綠色環保有質素嗎 此公司盈利一直上升 股東回報權益亦處於不錯水平 也沒有太多負債 行業發展似乎也具潛力
現時價格已下跌了不少 市盈率不高 是否買入的時機？
龔成老師：
光大綠色（1257）本質不差的，是潛力股，不過股價就較為波動，投資注碼不能太大。
佢專注於生物質綜合利用、危廢處置、光伏發電及風電業務。而生物質能源及危廢處置，在中國都是較新興的行業，近年的增長快速，相信往後仍有一定的增長能力，行業前景正面。
由於當中有一定的入行門檻，在資金、規模、技術都要有一定的要求，因此對光大綠色有利。而這企業亦處於不斷投資的狀態，處於一個發展階段，相信長遠的潛力仍在。
由於這行業較新，同時有一定的風險，因此市場對這企業的估值亦不敢太進取。雖然總負債不算多，但近兩年的負債都有所增加，因此要考慮這點。
這企業適合長線或超長線投資，若果你投資，應耐心等更大的收成，而長遠發展的潛力仍在。
------------------------------------------------
Q13528：
老師你好，想問下，若是月供股票 例如盈富 金沙 銀娛 恆基等有質素的股票
大約平均的年回報率可以達到多少?
大跌市時買入股票的備用現今應該預留總財富的多少?
另外雖然各公司的基本面不難在不同網站找到 但對於其公司的前景和相關政策等的資料搜集 請問老師有沒有什麼較為系統的搜集資料方式 和 推薦的資料來源網站等?
最後想問老師會在下個暑期開股票班嗎? 因自己仍是學生 只到暑期才有時間上課，謝！
龔成老師：
如果你月供上述的股票，預期都是平穩增值股的類別，連股息的回報率大約預期8%-10%，這是長期平均計算。
你預現時留3-5成現金。
如果你想找企業的資料，只要上港交所的網站就有，你可以下載企業的年報，當中有大量有用的資訊。
我無特別搞暑期班的，因為對象都是在職人士，不過，過往都有不少非在職人士讀，最細過試過係12歲。
------------------------------------------------
Q13529：
可以講下700嗎？我上年開始月供，依家平均買入價係347，我見佢都仲係咁跌。從長遠發展黎講，應繼續月供嗎？定成哥你有其他月供對像介紹？
龔成老師：
騰訊（0700）正面的，佢現時最強的，就是擁有一個大數據，這就可以創造出好多延伸的業務，不斷強化收入，而其他公司亦可以同佢合作，令當中的價值釋放。
不過，佢估值亦唔平，就算現價都是，可說是處合理區中上部，這點令投資值博率減少。如果原本有貨，或長期月供都可以，可以長線持有，但就唔好預增長力好似過往咁強，同時，金額唔好太訓身。
月供來說，最好是供盈富（2800），這能夠令你的組合平衡，同時，你可考慮恆基（0012）、金沙（1928）、港交所（0388）去月供。
------------------------------------------------
Q13530：
老師﹕我看到這個消息「領展業績退，管理層仍加薪」
請問領展還是優質股嗎？
龔成老師：
領展（0823）在長遠計，仍是有質素的股票，我地在分析企業價值時，要考慮長期因素，同時一些核心因素。領展的原理的就持有物業收租，除非租金長期向下，否則，若果只是中短期向下，就不用太理會。
而本質上，領展的物業仍是有質素，加上長遠仍有商場有加租能力，因此質素仍正面。當然，中短期會因香港情況而弱，但長期不差，但不會預期如同過往多年般高增長。
------------------------------------------------
Q13531：
龔sir 想問288 萬洲國際值得揸嗎？
7.71 有6000 股
豬肉前排聽聞有非洲豬溫 會否影響價格？
龔成老師：
萬洲（0288）本質不差的，但就不是高增長類別。而我地分析時，唔好太著重中短期因素，例如短期的肉價格，以及供應等因素，都會對佢中短期有影響，但我地最緊要是分析企業的長期營運模式，發展，而這股正面的，可長線。
------------------------------------------------
Q13532：
南方能源如果真的帳目混亂，最近德勤審數辭埋職，是否要面對停牌的風險，到時還可以拿回本金嗎？
龔成老師：
南方能源（1573）其實半年前已因盤數有問題，令股價暴跌，只係近期又被人留意翻，不過唔代表佢已經無事。
如果最後要停牌，唔代表間公司無左，只是無得交易，企業仍然存在的，因此，最終股價多少，要視乎企業有無價值。
------------------------------------------------
Q13533：
龔成老師，請問你覺得民生銀行(1988）怎樣呢？
龔成老師：
民生銀行（1988）本質不差，都有投資價值，同時業務其實都幾穩定。雖然無4大國有銀行咁有規模，但都唔算差，不過，這股增長力不強，只是平穩型。
同時，佢有可能因為中國經濟弱，影響左下年度的盈利，從而影響左派息，要留意。
------------------------------------------------
Q13534：
本人因家庭問題，無法工作（長期）～現只有現金７０萬！每月生活＋月供（中）需要一萬元，我絕對不想停月供，因打算供好２０年後當作年老時備用！
想問現有的７０萬，假設３年都不能去工作，每個月生活＋月供（中）需要一萬元，即３年要用上３６萬生活＋月供費，現有的７０萬只可動用現金３４萬來投資～
以三年期計可選擇咩投資計劃？預期回報可有多少？期望三年後靠這３４萬投資費用能達到５０萬合理嗎？
龔成老師：
如果計算$34萬可作投資，由於你現時的情況，我不建議高風險，所以你只能投資「平穩增值股」，以3年來說，回報不算強，因為要更長期先可見到效果，但這都已經是最好的方法。
建議你可以考慮優質，平穩增值型的股票：盈富（2800）$2000、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。
你預到時有$43萬-$50萬，視乎情況。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q13535：
老師，我依家做嘢好煩，腦細又不停咬住我唔放、做嘢真係好煩、諗住聽日resign,係又擔心失業?!但係做落去亦都冇意思 (進退兩難)冇財務自由就係咁㗎啦！
人人都以為我份工好穩定！又唔知道我開支都好大有兩個老人家etc
人生就係為咗起身返工同埋放工
完全冇意思
龔成老師：
你找一天放假時候，一個人，去一個靜靜的效外，好好同自己傾計。
我過往都是打工仔，都有一段時間不斷問自己幾時走。但記住，你要想長期方向，你要問翻自己「5年後，10年後，正過著怎樣的生活」，你要計劃。
這刻打工不是問題，但重點是你要有計劃，明白這刻只是踏腳石。
利用一邊打工，一邊建立自己的事業，都是一個方法。我知道係難的，但唔好令將來後悔。
------------------------------------------------
Q13536：
平安好醫生 (01833.HK)是不是一隻高增長股票?前景如何？
龔成老師：
平安好醫生（1833），可以話係潛力股，但就屬於略高風險的類別。
業務上，佢地的確是高增長，同時業務有發展潛力，但睇翻佢地的財務數據，平安好醫生仍處燒銀紙狀態，所以在前景上，雖然有，但投資上，不建議太大注。
------------------------------------------------
Q13537：
呀sir我供緊港鐵、港交所、盈富、比亞迪、中生製藥各3000，呢個組合有冇問題？
龔成老師：
這幾隻都是有質素的股票，你可以長期進行月供，但潛力股，如比亞迪（1211）、中生製藥（1177），就不建議太大注。
如果你日後有資金，建議你加大盈富（2800）的金額。
------------------------------------------------
Q13538：
我是一名學生
現在持有788中國鐵塔6000股 均價1.73
最近股價一直向下
請問我應該止蝕離場嗎？
我另外有現金2萬元左右
應該如何投資較為理想？
龔成老師：
我地買股票，就是投資「企業」，你應該分析企業的業務發展，中短期股價唔需要太在意。
中國鐵塔（0788）其實有質素的，只是近期有少少炒概念，所以唔能夠太進取。
這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。
佢現時的收入正不斷增長，盈利都保持向上，但股本回報率不高，是這股較弱的地方。
不過，股價一向都有點貴，你預你的買入價在合理區頂，勉強可以，只要不太大注，長期持有無問題的，這股有得守。
------------------------------------------------
Q13539：
龔成老師你好，於件初跟財經評論買入817 @$4.9及 1030 @$7.00 請問是否適合長線投資？多謝解答
龔成老師：
中國金茂（0817）都算有一定的規模，本質不差的，不過，負債有少少高，這股可以持有的。
新城發展控股（1030），業務不差，生意有理想增長，盈利向上，但負債是最大的問題，高到有點恐怖。加上近年的不利事件，都對佢有影響。
利用負債，好景時會好好賺，股價會爆升，反之會好差。現價有少少貴，要留意此股價格會比較波動，加上極高負債問題，這類股就算買也最多小注好了。
------------------------------------------------
Q13540：
之前施政報告出咗好多業主即時加價，本身3百幾萬既想加幾十萬，升幅有一成，但又學老師話齋樓價長遠黎講一定會升，但又唔想現時貿貿然入市感覺比人屈咗幾十萬咁，請老師指教
定係應該碟埋心水， 買地產股例如恒基好過，有息收，仲有十送一，回報有十幾%， 仲好過買樓
老師，我記得你講過「首先，5成樓都有方法放租的，這方面不是問題，但抱歉不便在這裡講，課堂上以「朋友」身份講會較方便，另外，你可以計請教地產經紀，有些都會講的。」
請問: 以上講既5成樓放租方法，方便於這裏以朋友身份講嗎？
龔成老師：
政府之前放寬左按揭，一定會令購買力增加，這的確會令部分業主反價，但我認為唔好強行追行，合理價買。
樓市在中期，會因為香港的社會運動而下跌，你可以等一等，若社會運動持續，樓價都會向下。在社會運動完結後，就會慢慢睇翻長期經濟與供求，由於香港供應不足，因此仍會向上。
所以，我建議你平常心睇樓，買到就買，唔好追價，而樓市好有可能中線有調整，你可等等。
至於放租問題，始終唔方便在網上講，有機會見到面先講，其實，你問下地產經紀，部分都願意同你講。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
d問題好有趣 在 #d問題好有趣 - एक्सप्लोर करें | Facebook 的推薦與評價
Thank you Diocesan Boys' School Primary Division for inviting me to have a sharing with their students. #學生們問咗我好多問題 · #d問題好有趣 · #男拔萃小學. ... <看更多>