#他和她給我最溫暖的寒冬 #分享就是力量
我去得最多旅行既國家係台灣。即使成個台灣都已經去過哂 (外島唔計)，叫我再去都唔會厭。每次去台灣，我都話係 “返屋企”。係有原因的。
2013 年 1 月，我生日既月份，打算自己隨便搵一個地方獨自過生日。(好毒的行為) 揀左台北，破自己既紀錄地出發前三日內搞掂機票住宿。一個人去旅行有多爽！
我有 post 相片去 Facebook 同網站既習慣。乜相都 post，唯獨是無我個樣既相出現。有一個台灣女仔成日都 like 我既相，自然地 add 左佢，仲要幾好傾。
呢次超急既旅程就係差行程唔得閒諗。正當以為係隨便行下西門町，九份呢 D 遊客 style 熱點之際，諗起呢位台妹，隨意地比個 message 問佢：”台北有什麼地方好逛呢？”
佢隔左一陣覆我，內容嚇左我一跳。我收到一篇好詳盡細心安排既行程，絕非上網 copy & paste，係百份百為我獨家設計既，因為連我住宿既位置都諗好，同埋介紹既係為左我可以影好多靚相既路線。呢一刻其實已經窩心滿瀉。
第二晚，佢話佢同男朋友 (而家成為左老公) 會去台中朋友屋企玩一個週末，問我有無興趣一齊去。到果一刻為止，其實我地仲未見過面。
“當然好！”，佢地仲要揸埋車黎到我住宿門口接我，oh my god！台灣人點解可以咁熱情！同時，我亦係第一次去台中。去到一落車就係一大班台中既朋友開定火鍋等我地，再凍既冬天都比你地融化啦。
食飽後仲有節目。台中既屋主 (我地叫佢做 “二哥”) 招呼我地去佢屋企玩同埋過夜，上到去成班人一齊飲酒唱 K ，竟然唱左成晚都無人黎投訴。最感動得令我有點難為情既係，唱完要訓覺之際，佢地比左一間房我自己一個訓，而我既台北情侶朋友就做沙發客，天呀！
第二日二哥帶我地暢遊台中有靚相影既地方。(鹿港，東海大學等等) 無錯，呢班朋友全部都好鐘意影相，所以大家唔駛講都知道對方鐘意 D 乜。夜晚返到二哥屋企，我地輪流放返呢幾日影過既相去部電視一齊欣賞，大家不停咁呼叫 “這張讚！”，”很美！”，係從未體驗過既開心歡愉。
最後一日離開前，再黎多個 “第一次”。二哥果日一早出去幫人影結婚 big day 相，起身之後淨返我地三個。突然二哥打返黎話婚禮入面有三個人黎唔到，問我地去唔去食一餐，免費的。咁樣我就第一次出席左一對完全唔認識既台灣新人既婚宴。原來台灣流行下午擺酒，而且食物好好食，頭盤有魚生刺身船。(香港可以參考下)
由原本諗住註定一人既天寒地冷生日之旅，突然變成一班人齊慶賀兼暖上心頭，就係佢地令我愛上台灣。希望有一日可以招呼返佢地黎我屋企玩返次，我已經準備埋暖爐同酒精，黎一次這個冬天不太冷！
p.s.
- 上年開始，呢一對台北男女已經成為紅人 (美味拍手 Yummy Yummy Photography)，內心份外興奮。真係紅架，我同新識台灣朋友講起 “美味拍手”，佢地都話知道係邊個，仲話我好勁，識既朋友都唔簡單。
- 佢地結婚前黎香港搵我影 pre-wedding 相，真係超級好玩，影到好似一輯電影劇照咁。(呢個 post 附送既有 d 王家衞 feel 果張相係其中一張 pre-wedding 相，我影架，唔係響 Google download 架 [有人以為我攞人地 d 相......]) 見佢地好鐘意輯相，心裡面好安慰。
- 台灣溫暖既故事其實仲有，不過呢單係第一單，有興趣聽先再講啦。
- 仲有呢部 Delonghi 暖風機，用果陣超級靜，又唔會吹乾風吹到個人都燥埋，成班人一齊響受成個溫暖範圍就啱哂。Click 呢條 link 去豐澤買會有 75 折優惠 -> http://bit.ly/2j241FC (免運費)
