［領展70蚊，小小啟示］天花亂墜一大堆。牙醫好有錢，非常有錢。因為過澳門賭場賺到嘅100萬，同你幫人洗牙賺到嘅完全不能比較。同樣地，領展就係洗牙（而牙醫都要幫襯領展，雖然王國龍都要睇牙醫）
係喎，好耐冇呢度出長文，唔好意思。忙呀。忙乜？前四後六啦。「埃汾變咗性？」「咁男人都可以有產假嘅」。但，唔係啦。冇睇黃子華咩。放假前後就係咁架啦。但肯定你訂我Patreon就日日仲有文睇，四個月我一篇都冇甩過。唔夠時間就一定寫咗嗰邊先了（https://bityl.co/4Y0h）
同系列仲有「中概股冇事，小小啟示．迪士尼歷史新高，小小啟示．銀行年尾減按揭息，小小啟示．」， Patreon已寫（https://bityl.co/4Y0h）。迪士尼有機會在呢邊再寫長啲。另外仲有篇「匯豐強勢，小小啟示」，應該晏啲出
TLDR：今年咁嘅情況，做收租佬嘅領展都唔使減租唔使減派息，應該真係核戰或外星人侵略先減租減派息了
TLDR 2：領展先4厘息，咁其他畀8厘息你嗰啲係乜？你入去鴨店隻隻都3000，忽然有隻1000，你估係你獨具慧眼見到筍嘢，定係有伏？你話呢？不妨諗下你幾多點去到。或者睇下你自己嘅往績。
1. 本身實在係冇乜特別，因為呢隻Patreon寫過幾次，公開場合都成日講。講嗰時好似60蚊左右，而家70蚊，「個幾月先17%」「唔啱你啲股神網友個個幾日就執幾成」。不過相信呢度嘅讀者知道個分別，一來咁炒返嚟嘅錢好易會輸返，二來我斷估啲幾日執幾成嘅股票，你唔敢訓身家，但領展你會敢。So simple，所以講到尾係睇結果。你嘅身家就係你嘅得分。
2. 而呢兩日升乜？我都唔知，好似話估零售復蘇。但，下，而家先知？另外，好似話有大行唱好，呢個仲無聊。大行報告未必冇用，特別係唱淡時有用，但對領展，關乜事？
3. 領展係一隻相對地易啲睇嘅股票，拎嚟學習亦都好好。商場好唔好生意，車位咩情況，人人睇到。而當時力推，原因亦好簡單—因為見到佢地根本冇減租。因為啲場夠低檔（雖然都唔平，但香港人好富貴），夠民生。唔似太古或九倉啲高檔場咁，高檔場一來貴租，下跌空間好大，二來直接分租戶嘅收入，好景時咪執到笑，但唔好景時咪跌得好勁。相反領展啲場，除非你玩到門口都唔畀出，否則你都係要落去買嘢甚至食嘢。
4. 然後你可以再諗下，喂，今年真係百年一遇，黑天鵝了吧。但都唔使減租。咁其實應該真係要打仗呀，或者外星人侵略香港領展先會減租。
5. 咁有乜閹僻畸唇？緊要咯。即係，佢嘅股息，係可靠嘅！今年四五月寫匯控嗰時，我已經講過好多次，你望住過去個派息，即係股票機見到嗰個，係冇意思的。講咗好多次，「股票係炒將來」，唔記得嘅罰抄一千次。
6. 你睇嘅，應該係預期股息。「但將來點知？」。係唔知，但有個譜，而且呢種唔知有幾唔知，正係關鍵。先講有個譜，你會見大行分析員估，固然都唔少估錢，但估派息呢啲有個譜，總好過你盲中中亂咁嚟。
7. 問題係，邊度搵到？咁好似個別股票機（經濟通？）會有的，自己研究下。但更加好嘅，就梗係睇返大行報告。報告不易找（唔好問我拎），但傳媒都會報。當然仲有，Bloomberg嘅 Refinitiv呀之類嘅東西都有，正常人屋企唔會裝，「但公司會有」「所以點解要做金融」「或者搵個做金融嘅男／女朋友 或好朋友」。
8. 關鍵就嚟啦，同樣係睇下年嘅息，領展嘅visibility，係高好多嘅，所以亦都高質好多。你望另外隻嘢，好似有6厘息，但盈利可能大上大落，或者喜怒無常忽然唔派嘅，咁我不如買隻派5厘，但往績好，生意又有保證嘅。
9. 正係因為咁，所以你見啲公用股咁值錢。你見咩中電之類，4厘息多啲。中移動941就近7厘息。咁但，買中電嗰個傻仔？退而求其次，即係買美債嗰啲傻仔？去到呢啲咁多人睇嘅東西，千萬唔該收起你嘅ego，你唔知邊個係傻仔，多數你就係。中移動7厘息下話，咁當然比匯控啲息穩啲，但，人民幣會唔會貶值先？另外，業務有冇倒退風險先？會唔會忽然有乜乜政策先？全部都係風險。唔係風險唔好，唔係有風險就唔買，但搞清楚個世界點運作。至怕你買7厘嘅嘢，以為風險同3厘一樣
10. 領展作為一隻派息紀錄極好（再講一次，過往紀錄唔代表將來，但我同勒邦占士打one on one你都係應該買佢贏，甚至打乒乓波都係），咁嘅情況下都唔使減派息減租嘅收租股，「貴」得有道理。根本唔會有8厘息畀你。掉轉頭，會見到8厘息嘅股票，就梗係有啲問題。你唔明嘅，係你唔知伏在邊啫。否則都係嗰句，買美債嗰啲傻仔？有得穩穩陣陣8厘息，好多人都唔使撈了。
11. 再粗俗啲嘅比喻，我當你去鴨店（唏，平等嘛），隻隻都係3000蚊（跳舞都得掛？），唯獨有一隻1000蚊，仲要望落白白凈凈冇性病嘅，咁你自己估下係咪筍嘢了。提醒：你唔係最早到嗰個，點解之前啲熟客唔揀呢，可？同樣地，有隻其貌不揚手腳短腳但5000蚊嘅，咁你咪又估下係有過人之處咯。但都係嗰句，humble啲，相信市場。特別係照下鏡，如果你都之前成日中伏嘅（冇乜值得慚愧，人人都會），咁就話畀你知，你唔好太高估自己「獨具慧眼」嘅能力啦。去到呢啲位，你明白真係投資反映性格，好多人表面上唔arrogant，內心自大到不得了，真係以為自己好撚醒，哈哈，開個股票機，呀，呢隻嘢十九幾厘息啲大行都唔買喎，正白痴，等我買返幾廿萬先。你咪睇下邊個先係傻仔。未夠道行嘅，都係跟住前面架車咪知邊度影快相。
12. 呢個道理，在好多嘢入面都睇到。今日較早前同朋友講開，佢做工程嘅，有啲同學轉做金融，pretty good，但更好嘅可能係在政府做—穩定唔會畀人炒呢個好重要。個個月穩袋十皮嘢，好過你金融才俊三更貧五更富，今年幾球嘢下年冇工開。
13. 昨日Patreon亦有寫過IMF一個越究，富者越富，而有錢人嘅投資回報，仲高過窮人（https://bityl.co/4Y0h）—但留意，係risk adjusted return．你要明白，唔少人嘅「高回報」，背後承受咗好多高風險，所以adjust 返根本唔係嗰回事。形象化啲嘅，我每年15%回報，好過你連續5年去澳門（而家冇得去）100%回報啦。係呀，你舊錢1變32，但，你買得幾多？畀你1萬變32萬好未？退到休未？
14. 況且，跟你呢個策略嘅，好多輸死冇命賠。亦即係 Nassim Nicholas Taleb寫嘅，your dentist is rich, very rich，Alternative Path，Possible world嘅問題（https://bityl.co/4hN8）。有人拎100萬買波中100倍波膽，唔等於你應該去做。
15. $10 million earned playing Russian Roulette does not have the same value as $10 million earned through the diligent and artful practice of dentistry. One's dependence on randomness is greater.
16. 仲有，其實有讀者係政治相關人物（讀者其實咩人都有，聽講有人撈偏的），早排都有問過下我嘢。咁佢風險承受能力低，有叫佢買下美股下港股，仲有買埋領展。當時我都唔記得佢身份，「佢好似平時日日鬧的」。但呢啲我唔知啦，你亦可以睇成為if you can’t beat them, join them。反正我係唔會爆讀者私隱的。就算你表面係環保鬥士實則日日買石油股都冇所謂。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
月頭訂最抵，Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已800人訂！（https://bityl.co/4Y0h）
diligent意思 在 台灣創新法律協會- ⭕️關於DD盡職調查. 盡職調查(due ... 的推薦與評價
關於DD盡職調查. 盡職調查(due diligence)是什麼？ 包含什麼內容呢？ http://www.wiseteam.tw/3045225773-2623427402213202024123460/due-diligence ... ... <看更多>