［德國股市估值低殘］但殘得有理由，因為創科大落後
1. 經濟學人原文（https://econ.st/3feR8m4）。原文副題好妙：Germany’s leading stock market index risks becoming a corporate museum
2. 好似之前都想寫類似嘅嘢，但冇寫，結果又彈返出嚟。所以太陽底下冇乜新事。
3. 之前FT亦有篇文講（https://on.ft.com/2WdrpS4），1997年，教主回歸蘋果。當時蘋果市值30億美金，係西門子嘅十份一，而當年西門子係全歐洲最大嘅工業股（而家都仲係）。事隔廿年多啲，蘋果市值係10000億美金，唔止大過西門子N倍—其實係大過晒德國DAX指數三十隻成份股夾埋。見到分野未？德國錯過咗乜？
4. 講返，德國股市指數，DAX，三十間最大嘅公司，好多大家都識，男仔會識得更多，冇法，德國（至少以前）強項在科技，工程，汽車。你見巴黎或米蘭股市就會有啲潮牌。DAX嘅成份股，好多都老字號：Adidas，Allianz安聯，Bayer拜耳藥廠，BASF，寶馬，Daimler，德意志銀行，德國交易所，漢莎航空，德國郵政DHL，德國電訊，Merck藥廠（原來同美國分咗家！），慕尼黑再保，軟件公司SAP，西門子，福士汽車。
5. 真係間間大嘢，間間馳名，同埋 — 好似冇乜邊間有好嘢？你數下上面呢堆公司，邊間唔係近年大大鑊？
6. 一葉知秋（三十塊葉添），DAX指數嘅情況，亦都反映到呢個歐元區龍頭，全世界第四大經濟體系面對嘅困境
7. 3月，全球股災，DAX指數跌到低過1倍帳面值（＊）。之前只係試過兩次，就係2009同2011年，金融海嘯同歐元區危機。
8. 當然，當時全球股市都跌啦下。但，你見到德國股市，近年都係明顯跑輸其他。跑輸美股冇得講，但連英國法國都跑輸，就比較值得關注—特別係，德國經濟其實不比英國法國差。
9. 正如頭先講，DAX入面呢堆公司，好多都多災多難。福士第一季利潤跌八成幾，而家0.6倍book。德國漢莎有機會申請破產保護，或者要政府救，0.4倍book．德意志銀行更加係衰咗好多年，而家0.2倍book．Adidas 近來股價同業績亦跑輸Nike，至於西門子更係積弱多年
10. 成個DAX，就得兩隻tech 股（舊tech 撚，特別係車撚工程撚，堅持西門子福士都係tech，隨你，正如你話田雞係野味都得，不過冇人理你咁解。你鍾意話通用汽車都係tech股波音都係都得的，其實煮米線都好高技術含量）。
11. 一隻SAP，做得相當唔錯，德國之光，好似係唯一。另一隻tech股，叫做Wirecard，近年成日見報，當然係衰嘢。造假數，醜聞。但其實未爆煲或乜，你2007-2017買，任何位都贏錢。
12. 正面啲嘅，睇下MDAX，代表DAX三十大，之後嘅六十間公司。呢個指數就表現不錯。入面就多啲Tech股，包括Teamviewer（德國公司呀，居然呢度都寫過）（https://bit.ly/3dad6Vn），Zalando（聽過個名，online fashion），Delivery Hero（外賣仔），以及其他HelloFre，Nemetschek ，Scout24，Freenet等等（唔識）。仲有生物科技股Evotec， Morphosys 同 Qiagen.
13. 其實就係新舊交替嘅過程，但嚟得慢。Qiagen或者Delivery Hero應該好快會入DAX，好可能係踢走漢莎航空。另一方面，柏林其實而家係歐洲創科之都（之一），聽聞主要係因為租平，大學生質素高（all due respect，唔通去意大利咩，開檔整pizza？），政府支援又好，我都有朋友過咗去。
14. 原文冇講，但我講下，香港都面對緊呢個過桯。首先like it or not ，香港股市最大嘅公司都係大陸公司，絶大多數行業都係（除咗地產，所以你睇到乜嘢係香港核心工業）。但恒指入面，正如上面講，都係銀行保險地產呢啲「舊經濟」嘢多。所謂咩BATMX，百度冇在香港上市（聽聞遲下二次上市），阿里巴巴上咗但入唔到恒指，因為同股不同權（聽聞就快會畀佢入，到時又可以噴一輪口水）（＊＊），美團小米情況差不多。就只得一隻騰訊係恒指成份股。好多人亦認為成堆舊濟股係拖低指數，亦令個指數冇代表性。
15. 德國嘅問題，係嗰堆tech 股未夠大，慢慢壯大緊。但香港呢堆就明顯夠晒大，因為同股不同權卡住咁解。
16. 最後講遠少少，唔少人認為，扯，花無百日紅，而家就tech 股風光啫，但任何嘢都有個價，點知係咪一路增長？的確冇人知。但之後啲文可以講，而家你以為甚麼FAAMNG 甚至BATMX 佔指數佔股市市值好多？其實唔算。你睇下以前啲石油股，或者十幾廿年前啲金融股？
（＊）忠實讀者都知，寫過幾次，恒指都有呢個情況，都一度 below book value。但，恒指入面好多係銀行股，特別係匯控同中資銀行，差不多佔25%，而呢堆東西，都係below book value嘅。有云話投資者「唔信大陸銀行的book」，我認為唔係，反正全世界好多銀行都係below book的。想講個分別係，銀行股為主嘅指數，below book不出奇，但DAX並非以銀行為主，就神奇啲。
（＊＊）慎防有人唔知，再講一次我立場。由始到終我都反對同股不同權，全世界都係。理由好簡單，唔想畀短視股東廢柴散戶外行基金經理管嘅，咪撚上市咯，私人公司任撚得你點玩都得。冇錢？問銀行借咯。想上市做public company，就唔該睇下咩叫public company。但，首先我立場不代表我公司，如果我以公司身份就當然應該贊成，商機嘛，而反正我同我公司立場亦都冇人care。事實上全世界交易所都搶生意，啲科企小朋友夠惡，邊度肯就佢改例咪去邊度。所以你冇得堅持的。你間舖唔摸得？人地隔離得喎，咁咪人人去隔離。
evotec stock 在 Evotec SE - YouTube 的推薦與評價
Evotec is a global, integrated drug discovery and development partner driven by deep biology, artificial intelligence and machine learning, rich know-how, ... ... <看更多>