《Hashtag時代吶喊》陳心遙
《信報》2017年3月22日《視線所及》專欄
有一位我認識多年嘅好朋友,一直做兒童同青少年嘅劇場工作。佢好耐好耐之前已經鍾意用同青少年互動嘅形式去創作舞台作品。今次佢又滙集咗一班年輕嘅朋友,由零開始去搞呢個名叫《#hashtag——時代吶喊》嘅劇目。
「Hashtag」一個後生仔唔會唔明白嘅符號;《吶喊》就係大文豪魯迅喺民初時候嘅短篇小說集。當我朋友提出用魯迅作品名去命名嘅時候,擔任編劇嘅後生仔本來都有猶疑,因為覺得時下大部分年輕人都唔會特別鍾意魯迅,呢兩個字只會令人回憶起上中文堂讀範文嘅痛苦。但隨住編劇同一眾演員嘅創作成形,佢哋不約而同都覺得,用《吶喊》嚟做名,實在太有共鳴喇。
舉個例子,《吶喊》入面有一短篇叫《白光》,講一個讀書人一生人受盡科舉考試嘅折磨,最終精神失常,被莫名嘅白光引導而最終喺河中浸死。正好同而家學童嘅輕生問題遙相呼應。
之後隨住我朋友同班後生仔嘅互動愈嚟愈多,漸漸佢哋對香港同自己未來嘅前途都普遍覺得黯淡。佢哋細細個就知,興趣唔可以當飯食,只可以當業餘嗜好,揀科最緊要考慮所謂「前途」,但係「揀啱咗科」又代表有前途嗎?又好似唔係。據我朋友所謂,佢哋會話:「讀醫護都幾好吖」、「父母嘅控制我已經習慣晒」、「唔會自殺因為冇膽」等等,講嘅時候表情輕鬆,但係心情嘅灰就表露無遺。
有一個啱啱考完演藝失敗嘅女仔表示:自己都搵唔到原因點解冇被揀中,同埋唔知應唔應該繼續落去??我朋友話:仲有好多呢類有「夢想」嘅學生。以前嘅日子,我哋會將焦點放喺自己夠唔夠「努力」呢一點上,但係而家青少年都覺得:自己嘅身份從來係一個「被選擇者」。而呢個「被選擇者」嘅身份認同係從小開始培養嘅。爭幼稚園、爭小學、考大學,用一早被大人私自定落嚟嘅標準同埋規則分高低,特別係冇錢冇背景嘅普通家庭嘅子女,更加覺得一出世已經係Loser,以前什麼「知識改變命運」、「努力就有將來」呢啲傳統智慧已經失效。而家青少年痛苦嘅地方係資訊太豐富,令佢哋太早睇清楚現實……
我朋友愈講愈灰心,因為嚴重缺乏財政同人手支持,今次都可能係最後一次搞呢啲完全青少年主導創作嘅實驗劇場,如果大家想真切聽聽新一代嘅心聲,可以去入場支持。演出嘅日子係3月31日同4月1、2日,場地係喺北區大會堂。詳細資料可以去搜尋器同社交網站搵:「Hashtag時代吶喊」。
#hashtag時代吶喊 #時代吶喊 #魯迅 #被選擇者 #知識改變命運 #胡寶秀 #信報 #陳心遙
同時也有10000部Youtube影片,追蹤數超過2,910的網紅コバにゃんチャンネル,也在其Youtube影片中提到,...