【多謝支持!】
（台灣朋友，請原諒我用廣東話口語寫此文 :P）
第一次講一個同澳洲冇關嘅分享會，冇諗過宣傳時間極急下，都可以拉到咁多讀者朋友支持。以前講Working Holiday Sharing係就係試過一個Lecture Hall百幾人坐爆曬，但當時係幾個Party一齊用咗幾星期去宣傳，今次單單我同主辦單位用咁短時間，竟然有咁嘅效果、差唔多坐滿一個班房，我真係完全意料之外。
由「迷。忘於澳洲360天」一直追看至今嘅讀者，相信都知道我改名成「有故事的旅人」嘅過程。其實點解要咁做，一來正正係因為我去巴爾幹半島嘅旅程入面，有太多故事想分享、太多新奇得意嘅見識、識到更多個「有故事的旅人」，再掛「澳洲」去講，好似有少少怪；二來，當然，360天澳洲嘅生活，我冇可能講720天仲繼續講，所以，變成「有故事的旅人」嘅由來，都係同一年前嘅巴爾幹半島之旅有好大關係。
由細到大，自己都係一個好鐘意分享嘅人，分享完電影晞。觀影記事，我都好想分享埋旅遊，一個另一大興趣。獨樂樂不如眾樂樂，我唔介意寫咁大篇文介紹一個地方，但有人睇、令到人地有興趣，我已經好滿足。一直以嚟，我寫嘅嘢唔想再寫每一個人都寫嘅日本、南韓、台灣、泰國，更加唔想寫「旅行成癮者的十大病癥」、「一個人去旅行接受程度嘅十大等級」、「窮遊要注意嘅十大事項」呢一類阿豬阿狗都識寫，兼且呢類廢話寫完一定爆like嘅文章。我要寫，寫夠五十個「病癥」都得添、你覺得一個人搭飛機好孤獨，你又有冇試過一個住Resort、去海邊食honeymoon套餐？我試過，我真係試過，但我唔想，寫嚟除咗「呃like」外，有乜意思？
同其他旅遊Channel負責人傾過，我亦深知道寫咩巴爾幹半島、波蘭、內地景點，根本冇人睇，睇吓我早兩日寫羅馬尼亞特色菜篇文就知。多人睇我當然開心，但少人睇（唔好冇人睇），令到某D讀者提起興趣，我已經成功了。
我一直有個心願，好希望出呢堆地方嘅旅遊書－－有去過你自會明白，香港除咗無限本京阪神、台北、曼谷旅遊書外，你要搵冷門少少嘅地方，根本冇可能。曾經有個日本朋友問我做乜要睇Lonely Planet，你英文好好？你地冇一本旅遊書咩？我都唔想拎到成本百科辭典咁重，又厚又重，但sorry，香港除咗Lonely Planet或者小部份台灣書，真係冇。我好彩，當日搵極搵唔到，去誠x買，問櫃位先至搵到，佢仲要話係最後一本，冇曬喇。
點解，我地容不起一D遠少少嘅旅遊書？唔好講旅遊書，點解網頁、網誌都係要無限loop呢堆已經泛濫嘅地點？你可能話香港人冇假，但我知道身邊好多人都真係會有呢D時間去呢D地方；你可能會話，香港人冇錢，但如果尋晚有嚟聽我分享嘅朋友，都應該知道，錢，唔係一個大問題。有呢個念頭，證明你對呢堆地方唔熟識。
點解鄰近地方如台灣、南韓、日本（日本果本直頭可以堪比Lonely Planet），甚至內地，都可以有咁多元化旅遊地點嘅書，香港只係識教人去嚟去去都係果幾個地方？自己做過旅遊記者都知道班老細點諗，當然要計算成本、要賺錢，但其實諗深一層，到底係呢堆旅遊書主導咗香港人去邊，定係香港人真係咁冇錢咁冇時間？後者？我唔覺囉。
呢一年嚟，我有呢個念頭，一直同唔同機構去sell呢個idea，但係完全冇人會理你，甚至身為好多「旅遊出版」、自稱旅遊達人嘅機構，直頭連呢堆地方響邊都唔知... 呢個過程，我係有少少心灰意冷，某程度上，我都明點解香港冇人有興趣了。當一班「主導」嘅人都冇乜呢個sense時，再加上香港人真係咁忙，你仲叫我上網搵一堆隨時上網都搵唔到嘅資料？
好開心，機緣巧合之下，識到呢次talk嘅主辦單位，出唔成書，我都起碼有個機會，可以同大家分享一下呢個地方，一個，我真係好鐘意好鐘意嘅地方。冇人識、冇人知，太可惜了。大家嘅反應，係我冇諗過咁踴躍，甚至完咗都仲有讀者留低問問題、散會再inbox我，呢種熱烈程度，係我講十幾次澳洲Working Holiday talk都從未試過。其實，我有少少感動。對於一個對旅遊有熱誠嘅人嚟講，今次嘅滿足感，已勝一切。
唔好話想搞一D旅遊合作活動俾人不斷撥冷水，就連自己身邊朋友都冇乜人有興趣聽你嘅旅遊故事同推介：「喂，你叫我膽粗粗上架唔知去邊嘅巴士提心吊膽，我不如去布吉住幾晚resort好過啦，係咪先？」好多謝呢晚每一位支持我嘅朋友，令我知道呢個地方之所以咁「冷門」，就係因為根本冇乜人知道、冇乜人聽過，當挑起咗大家興趣，仍然會好有興趣知道詳情嘅。
時間可能太急，內容包含嘅嘢過於精華同濃縮，如果仲有機會有下次，我會作改善架喇。有唔少讀者問及關於飲食同交通嘅問題，我都明白只能輕輕帶過，時間所限、呢D細節位，我都唔想講得太深入，主要介紹返景點先。有興趣知道，不妨inbox我問啦，如果值得分享，我會另外詳文介紹的。
希望仲有下次，分享更多我好鐘意嘅地方，甚至再深入少少去講呢堆國家啦。
多謝支持！ =D
P.S. 有讀者inbox我話估唔到我真係男，我一直俾人感覺咁似女咩？
特別鳴謝：
Homeblogger
＝＝＝＝＝＝＝＝＝＝＝＝＝＝＝＝＝＝＝＝＝＝＝
全新網誌：travelerwithmovie.com
honeymoon由來 在 ホーリー祭（Holi festival）- ヒンドゥー教に由来する行事 的推薦與評價
Jun 29, 2020 - ヒンドゥー教とは、インドにもともとあった信仰と身分の高い僧侶のバラモンを中心とした宗教が結びついてできたインドの民族宗教です。 ... <看更多>