外圍的核心內圍《第四回》
半間公司嘅人一齊飛去馬來西亞，山哥係豪爽到派埋零用錢，已經唔記得嗰嚿錢有幾多，總之夠你玩幾日又飲又食又買手信，不過有條古惑仔就特別騎呢，佢話要慳住用，諗住將嚿錢拎返去換港紙，喂你古惑仔嚟架，可唔可以有型啲呀？
我仲記得山哥幫我哋Book咗雙子塔隔離嘅酒店，唔肯定係咪總統套房，淨係記得一行十幾人分咗3間房，而每間房入面都再有幾間大房，360度落地玻璃，可以望住雙子塔浸浴，淨係視覺都極盡奢華，但其中一日就疑似有同事撞鬼，話說有個肥屍大隻嘅古惑仔喺套廁開大，突然好大聲講嘢唔知鬧邊個：
「zip zip zip，zip乜L嘢呀？」
斷估佢唔係晨早流流take嘢啩，不過呢下咆哮都幾有氣勢，終於feel到呢班人係古惑仔，點知隔咗冇耐佢就衝出嚟：「個廁所有怪聲，我落大堂屙屎先。」
「等等先，有怪聲你就落大堂屙屎，咁我留喺度點呀？」
「一路屙屎一路有人喺耳邊zip我。」
「不如趁而家日光日白一齊入去睇下啦，今晚都要瞓架。」
之後我哋行入套廁聽下，好快又聽到zip zip聲，係呀，就係廁所頂嗰部空氣清新機仔，每隔一陣就會zip zip咁噴啲香氣出嚟嗰部呀，你紋晒身驚部空氣清新機，過隔離雙子塔跳落去啦！
嗰幾日嘅節目就係行下街食下肉骨茶，終於等到戲肉上演，山哥帶我哋去總部參觀，呢個秘密基地喺馬來西亞市中心一幢商業大廈，我諗等同香港嘅ifc，點估到不法嘅生意竟然喺核心地帶運作。
上到去其中一層，基地就係一個無間隔嘅大office，大約千幾呎，除咗有好多人做緊嘢，同埋有好多部電腦之外，同一般office最唔同就係有好多部電視，似咩呢？咪就係似保安室囉！不過佢哋啲電視唔係睇電梯同後樓梯，而係用嚟睇波，部部機都睇緊唔同嘅直播，大家耳熟能詳嘅比賽當然有啦，連一啲好冷門嘅比賽都有，合理吖，外圍梗係乜都有得賭啦。
呢班人喺度做「走地」，花少少時間解釋咩叫「走地」先。投注一場足球比賽唔一定要開波前買，唔似六合彩，足球比賽係可以一路踢一路買，咁如果個波就嚟入先走去買咪好著數？呢班人就係要睇住場波做嘢，例如個攻勢好危險、開緊罰球、角球，或者球證判咗12碼，呢班人就要喺個系統撳「暫停」制，等啲賭徒唔可以喺呢一刻落注，佢哋行內叫「危險球」，如果入咗波就轉盤，唔入就繼續開返畀人賭。
咪以為純粹撳個制好容易，都需要技術同埋經驗架，我見有條友好騰雞，個波過咗半場已經撳「暫停」制，咁都好過就嚟入波都唔撳，聽講有人掛住睇波唔記得撳，累公司輸錢而畀老細問候。
雖然呢度係馬來西亞，但喺度做嘢嘅人都識講廣東話，佢哋大部分係當地華僑，不過清一色得男人。
入廟拜神，入屋叫人，我哋上到基地之後互相介紹，周圍打招呼：「昆哥、Tiger哥、成哥、強哥...」而呢班人見到我哋跟山哥上嚟，又以為我哋喺香港係得力頭馬，叫返我哋：「瞳哥、Jason哥、樂哥、文哥...」真係唔好意思同佢講我只係資料輸入員。
總之呢度人人都係阿哥，哥嚟哥去我都唔記得邊個打邊個，唯有揀人嚟記同埋靠啲特徵去認啦，嘍囉就唔嘥啲ram去記喇，要記就記啲大粒佬，其中一個主管真係好鍾意撩鼻屎，由我上嚟之後未停止過，連山哥問佢嘢嗰陣，呢條友都係撩住鼻屎答，仿佛一出世就係撩住鼻屎連臍帶咁出嚟，真係好L有性格，所以我個人叫佢做鼻屎哥。
其實我本身係真球迷，由細睇波睇到大，好憎人同我講咩假波，因為只有輸錢嘅人先歸咎球員打假波，賴呢樣賴嗰樣，不過我呢個天真忠實球迷嘅諗法好快就不攻自破，因為基地嘅電話響起，鼻屎哥聽完之後同山哥講咗啲嘢，令我對一支歐洲嘅國家隊徹底失望，亦對足球呢樣嘢大大改觀。
PS：呢個故事可能唔吸Like，但我會寫埋落去，因為係真人真事。喺基地呢晚我仲知道好多關於假波嘅嘢，感覺就好似一個由細識到大嘅朋友，原來一直以嚟都呃緊我。
《第一回》
https://www.facebook.com/officedaily/posts/522113084902184
《第二回》
https://www.facebook.com/officedaily/posts/523911894722303
《第三回》
https://www.facebook.com/officedaily/posts/524287718018054
