【喺夢入面同個女仔出軌⋯】Ch.2
上次講到我夢見一個女仔，當我醒咗竟然收到佢嘅WhatsApp⋯⋯
（前一集：https://bit.ly/31xG7X3)
「你仲會唔會返嚟搵我？」
收到佢嘅Message之後，我望住個對話框發呆⋯⋯第一時間諗係咪女朋友測試我？但冇可能，因為佢唔會控制到我夢境見到邊個⋯⋯
我腦海又浮現頭先夢入面嘅畫面，個女仔捉住我叫我唔好走嘅一刻，依然好真實，諗番起佢傷心喊嘅樣，竟然令現實中嘅我有少少心痛。
我唔太敢覆個Message，但當我諗住已讀不回，關咗個對話嘅時候，佢又再一次出現番喺待機畫面。
「你仲會唔會返嚟搵我 : ) ?」
而今次，多咗一個微笑嘅表情符號，彷似一個女仔明知男友要分手，但都心存希望，想用最後一分善意去挽回。
另一邊廂，女朋友煮好嘢食，喺廚房大嗌出嚟：｢你做乜仲唔出嚟呀，仲喺床度做乜？快啲出嚟食嘢啦！」
我一定唔可以畀女朋友睇到我手機。
如果我將事實同佢講，你估佢信唔信？佢一定會懷疑我出面有其仔女仔，然後發晒脾氣。
但無論我點樣封存，點樣刪除，甚至熄埋機，個Message都會彈返出嚟，好似一定要我覆咁。
「會。」
為咗快啲解決件事，我覆咗一個應該會令「對方」滿意嘅答案。
至少，呢刻唔會畀女朋友發現先。
「好唔好味？」女朋友煮咗拿手嘅卡邦尼意粉，好期待我讚賞佢。
「好⋯⋯好味！」但我個心，仍然諗緊個女仔，諗緊個Message。
『叮！』
平日我長期教靜音嘅電話，竟然響起。
女朋友同我一樣咁驚訝，但好彩我手快拎起咗部機。
「好，我等你 🙂 」
我又收到佢嘅Message，又係嗰個善意嘅微笑。
我冇覆佢，只係即刻將個電話放落褲袋。
但女朋友嘅第六靈感好似察覺到有古怪，問我：｢邊個搵你？做咩咁神秘要收埋個電話？畀我睇下！」
我擋住佢隻手，好緊張咁話：「啲兄弟Group嘅無聊Message咋，唔好疑心咁重啦！」
佢唔相信：「咁你畀我睇啦，平時你都唔怕㗎，既然係兄弟，怕咩畀我睇！」
我好惡咁講咗句：｢痴線！妳係咪傻撚咗呀，無啦啦喺度懷疑我！我如果係偷食，就唔會喺度食意粉啦！」
女朋友見我咁大反應都嚇一嚇，我以為佢會發番我脾氣，但竟然話：｢講下笑啫，使乜咁嬲，唔睇咪唔睇囉。」
成餐飯，我哋各有各食，冇再出一句聲。
我偷偷望一望電話，趁住女朋友唔為意，覆咗一句：「嗯。」
但到底，我點先可以再返去見到佢？係咪一瞓就會返返去個夢入面？
食完意粉，我扮好嬲咁入番房，上番床瞓覺，嘗試迫自己入夢，但瞓極都瞓唔著。
我竟然拎咗部手機出嚟，開番個Message，問個女仔：｢妳做緊乜？」
我一Send完，女朋友就入咗嚟，瞓咗喺我隔離，呢一刻我真係有小小暪住女友同另一個女仔偷情嘅感覺，會唔會眼前另一個先係夢，另一邊先係現實？定抑或⋯⋯
「嬲完未呀，一起身就嬲。」女朋友轉身攬住我，打斷我思緒。
「無嬲，食飽有少少眼瞓啫。」我答。
「又眼瞓！？你啱啱先起身！叫咗你唔好捱夜睇波啦！」佢。
聽女朋友講咗一陣佢返工嘅有趣嘢，好舒服咁涼住冷氣，不經不覺我真係瞓著咗。
當我再張開眼，喺我隔離攬住我嘅唔係女朋友。
而係個女仔。
「好嘢！又再見返你喇！應承我，今次唔好咁快走。」
我⋯⋯又返到去夢入面。
（待續，幫忙like&share）
如果想繼續睇故事，留言：「睇」，等我知道有人追緊。
100個「睇」就出下一篇。
喜歡故事，支持我寫作
可以去我網上書店買本書：https://sapeiar.boutir.com/
幫助莎比亞儲老婆本同買貓罐頭
謝謝~
讚好及追蹤 莎比亞
Follow IG: sapeiar
