［合久必分，分久必合］1998年NTT拆DOCOMO出嚟上市時，係全球史上最大IPO。而家在政府發功下又收返自己用。同場加映，1999年DOCOMO已經有流動上網。唔少人當時連電話都未有
TLDR：新首相如何提升民望？就係減電話費。點減？就係叫公司私有化。點解私有化先減到電話費？因為母公司夠大份食得起。400億美金，錢從何來？叫銀行借，唔通會唔借？點解唔發新股？因為不能攤薄日本政府。獨立小股東投票？唔知喎，日文點講？
1. 都話日本市場今年好多搞作。菅義偉一上場就有，唔知係咪巧合。介紹返，全日本最大嘅私有化：日本電訊電話NTT（9432），私有化子公司NTT DOCOMO（9437），差不多要用400億美金。去過日本都知，DOCOMO就係流動電話網絡。
2. 而家母公司渣住66%，出價3900 yen一股，溢價40%。而由於已經渣住66%，所以私有化必然搞掂。問題兩個。第一，喂，唔使獨立股東舉手？似乎係唔使的，日本嘅嘢……第二，點解只係升到3213，唔係3900？固然有機會估過唔到（可能世界大戰呢？），或者有交易費呀，時間值等等，但冇理由爭咁遠。我估應該係漲停咗？
3. 留意，其實1998年，NTT先將DOCOMO分拆出嚟上市，當時係世上最大嘅IPO—亦係日本最後嘅威水。
4. 同菅義偉有乜關係？原來佢立志要降低日本嘅電話費，如果用大量數據嘅，東京電話費係巴黎三倍喎，不能接受云云。但，居然係用私有化一間公司？完全唔明，即係私有化咗唔使理小股東利益，減價都冇所謂。「但NTT啲其他股東呢？」。仲要可以政府咁樣去推？日本嘅嘢……
5. 似乎係話，NTT夠晒大，食得起。講到明減價，講到明2023年之前盈利都會跌。加上，400億美金，邊度變出嚟？當然係要借（銀行當然很配合，呢啲唔使睇半澤直樣都舖），所以NTT股價當然跌。但其實未出呢單嘢前，NTT同DOCOMO市值應該差不多大。不見得NTT食嘅能力大好多？
6. 菅義偉為乜？當然係為民望為選票，民主國家嘛。但佢亦唔係第一日講，佢在安倍年代已經成日提出要減電話費，推咗樂天入場，亦都減低咗轉台嘅收費。到而家坐正，就更加粗暴了
7. 反正，日本政府渣住34% NTT嘅股權—而係有法律規定（哈），日本政府至少要渣33%—所以，NTT呢400億美金，並唔可以靠發新股—因為會攤薄政府股權。What about 供股？唔知喎，但政府可能唔想畀錢供股，或根本唔容許。所以呢400億，只能夠係銀行借—但冇所謂啦，銀行當然借。NTT喎，何況成單嘢根本係日本政府推的
8. 消費者，理應開心。不過邊有免費午餐？首先離地啲嘅，之前先講過安倍任內想令日本股市更加foreigner friendly，想整走以前啲陋習（或曰「有日本特色的股市資本主義」）。咁呢壇嘢當然係開倒車
9. 另外，真係冇免費午餐。質咗DOCOMO減價，NTT食，總會其他地方益返佢。只係你睇唔睇到咁解啫。至於其他NTT股東，就更加係WFC啦
10. Anyway，都話個私有化過硬（我都係好想知，唔係要獨立小股東投票？）。咁DOCOMO就會消失。DOCOM其實係日本第四／五大市值公司，將會在東京股市消失。如果Softbank又冇埋（話私有化嘛，但我估唔會），都真係大打擊，五大公司冇咗兩間。剩返細過Tesla嘅 Toyota，罪大滔天嘅索尼，同埋畀日本政府掐住個春袋迫減價嘅新NTT。
11. 同場加映，原來DOCOMO，廿年前已經有流動上網（嘩！）。（https://bityl.co/3j79）
12. 我當然唔知，因為我2015年先第一次去日本。但講返，當年去過嘅可以介紹下，話個I-Mode，可以坐車時收email同睇站站。留意係1999年，而2007年先有第一部iPhone．呢舊東西最初取得巨大嘅成功，DOCOMO自己嘅制式，好多外國公司都想用。話香港3仔台都引入過，我就全無印象（留意2000-2001年我在英國），但台灣似乎唔少人用過（https://bityl.co/3j7W）
13. 最後，都大約估到，同日本很多東西一樣，自己制式，最後就唔夠人地玩了。應該係唔多手機支援，然後技術又不停變。結果在日本以外流行唔到，最後被淘汰。
14. 可見，就唔係你發明先就可以征服世界嘅，亦唔係有技術有創意就大晒。
———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張一個月已500人訂！仲有兩篇免費試睇：https://bit.ly/31QmYj7
——————————————————————————
［收費短片第九擊］美股科技股是否泡沫爆破？價值投資之選
課程資訊：https://homebloggerhk.com/course_detail/?code=CC009
內容:
*美股急跌點算好
*科技股係咪泡沫爆煲？
*有乜價值投資之選？
本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145
另外想買返第八擊（美國總統大選股票部署）都仲可以：https://bityl.co/3NPn
