Keicy 有幸能參加香港電台第二台「太陽計劃2015」嘅記者會，同埋好開心可以上《Made in Hong Kong》節目仲可以同主持李志剛、Angela、超B哥哥玩！
Keicy 為咗多謝香港電台嘅邀請，親手整咗款太陽飾物，送畀嘉賓，一人一個㗎！Super Girls 幾位姐姐同馮允謙哥哥收到都好開心！嘻嘻！
呢款太陽飾物，其實早幾日已經開始準備㗎喇，材料包括紙碟、皺紙、顏色紙、較剪、白膠漿。
首先係剪碎唔同顏色嘅皺紙。
跟住剪一條條代表太陽光線嘅顏色紙，太約一吋闊，十五吋長，將兩端用白膠漿黐實。
之後就係將紙碟正面搽滿白膠漿，黐上皺紙。
然後將黐實咗嘅顏色紙，均勻咁黏上紙碟度。
最後喺紙碟背面黐上一條長顏色紙做手把位，所以只係黐頭尾兩邊。
咁就做好咗呢份「太陽禮物」喇！係咪好 colorful 呢？Keicy 話佢好中意彩色呀！更加鍾意太陽，因為見到太陽即係代表好天氣，帶畀大家溫暖同開心！所以想借呢款太陽飾物，祝願大家順利參加「太陽計畫2015」嘅各項活動，享受暑假！
而 Keicy 自己喺嚟緊嘅暑假想唱歌、學畫畫同跳舞，其實小朋友喺暑假真係好應該參加唔同類型嘅健康活動，而「太陽計劃」一直鼓勵同學們勇敢追尋夢想、認識自我、積極面對人生，多年嚟舉辦無數暑期活動，畀年輕人盡展活力，為夏日添上色彩，所以如果各位家長未諗到仔女放暑假做咩好，不妨參加「太陽計劃2015」嘅活動吖！
#太陽計劃2015 #太陽計劃 #SuperGirl
#jay馮允謙 #何重恩 #MadeinHongKong #李志剛 #Angela #超B
香港電台 香港電台太陽計劃 馮允謙 Jay Fung 洪崎峻超B Alex Lee 李志剛李
