#在日落前交換日記
0322 《賣仔勿摸頭》
儲物狂 oscar：
賣仔勿摸頭，我好小心唔摸佢地個頭，只係用水彩筆掃掃塵，活動下啲關節位，確保pvc膠冇老化就入盒。基地位置有限，咁耐先嚟到哩一日，已經算勁。終於都要賣走少少少少玩具啦，最近物識緊啲玩具寄賣店，希望就算係中轉站都擺得佢地靚靚仔仔，問題就出現啦。
1. 一般一呎乘一呎嘅格仔櫃什至擺唔入一盒MG模型，即係要去盒，咁我之前keep盒就好無謂，算數，模型唔賣。
2. 格仔櫃附近有好多店主，由於大部分都係賣自己珍藏，既係博物館，又係select shop，放喺冇品味者隔離有助對比但近墨者黑，放喺marketing王者隔離亦毫無特色，同市面上一般貨品冇分別，揀鄰居非常難揀，重點係，同香港住屋問題一樣，單位唔多，根本冇得你揀，更何況鄰居？
3. 格仔櫃月租$300-500，你賣一隻二手玩具超人figure一般先一二百，即係咁，你養唔掂個仔，會唔會叫個仔自己賣身，去孤兒院交租吖？仲要唔係租嚟俾自己喎，租間房去出賣自己其他兄弟喎！抱歉啦，我就真係做唔出。
我知道賣仔勿摸頭嘅道理，但係為人父母，好難唔去想像個仔嘅未來，亦真係會希望他朝有日個仔飛黃騰達可以嚟同我相認返，如果唔得，都希望自己做牛做馬有日可以幫衰仔贖身，但平衡過以上咁多因素之後，我決定珍惜當下相處嘅時間，努力儲錢買間playroom比佢地，冇錯，我嘅溺愛就好比daddy kingdom嘅daddy一樣，non sense的。
可憐天下父母心 檸
