有醫科的同學一起追擊偽科學實在太好了
今時今日的騙子都很會做marketing，
動輒把醫學實證和某某教授掛在嘴邊，
但當你細心求證後會發現，
原來他們的qualification或研究，
要不就假的，要不就flawed的。
如果沒有科學或醫學背景的話很容易就會中伏，
令公共衛生教學變得異常重要！
大家齊來向偽科學的騙子說不🙅🏻♂️
呢排見到有同科同學 (文科生習醫的奇幻旅程) 對偽科學直線、曲線、反手抽擊得好開心。Dr Who 見呢排有點兒屁股痕 (你痕完未啫你)，我都想講下近排見到嘅一個現象。
好多大學生都會搵工做，保險特別多。而同學入左去之後，就會好似入左邪教一樣，三日唔埋兩日發文講老闆點好、份工如何有意義、日日返工就係要唸點樣幫人，學子華男神話齋，呢啲嘢唔係撞邪係唔會講得出嘅。我見到之後，知道自己唔適合做保險，原因好簡單，怕肉麻。
原來，同樣現象唔止係保險界出現。
健康成品大行其道，有一間美國公司康 X 萊堪稱代表。身邊有人係其中一員，每日發嘅相片影片，就係見到屋企點樣放左三千種營養粉，朝朝八點化身酒保係到搖奶昔。如果大時大節，仲會表演點樣煮菜都要加多兩殼粉，情況就好似若干年前某飲食節目嘅主持人堅持乜都要加雞汁，繼而會開始興奮一樣。
呢類嘅公司都好鐘意將「科學實證」、「臨床研究」掛係嘴邊。今日，我地就黎睇下啲「證」有幾「實」。
====================
去到佢地嘅網站就見到有個「我們的科學」嘅分頁，入到去都不外乎話自己投資幾多人力物力，碌落去就見到佢寫：
「我們現正與全球主要大學進行臨床實驗，以確定各種產品功效。我們已完成三個營養蛋白素的臨床實驗：一個在美國加州大學洛杉磯分校, 一個在德國Ulm大學和韓國首爾國立大學醫院。研究顯示，每天飲用 1 杯營養蛋白素奶昔可以有效管理體重。」
禁入「臨床實驗」，佢將我飛左去美國網頁嘅影片區域，入面得一大堆「成功個案」、「運動教學」之類嘅片，最「科學」嘅就只有一條解釋「咩叫胺基酸」嘅片段。我決定左佢係運桔之後，我就禁走左。再禁入個別大學嘅名稱，佢將我帶到一個網頁。網頁上面有一條死左睇唔到嘅片，同埋研究人士嘅名。有名就得啦！德文我唔識睇，我地睇下美國嘅研究！我地有請谷歌大神！
谷歌大神將我帶左去一個叫做「Herbalxxe Nutrition Institute」嘅網頁。入去研究嘅一欄，佢地只係顯示左一款叫「Formula 1」產品，即係「最新研究」係佢、「最熱門研究」都係佢。
（Dr Who：咁係咪即係所有其他產品都無研究呢？）
（Dr Who：咁係咪即係最冷門研究都係佢呢？）
（謎之聲：你可唔可以繼續講故事？）
（Dr Who：係係係…我地繼續）
再入去，佢顯示左十篇登係唔同期刊嘅論文，於是我再請谷歌大神，搵左最舊係 2008 年嘅一篇研究出黎，叫做《A Controlled Trial of Protein Erichment of Meal Replacements for Weight Reduction with Retention of Lean Body Mass》，簡單黎講即係高蛋白餐單對減肥嘅研究。 (Lean Body Mass，中文叫「淨體重」，即係體重減左脂肪重量所得出嘅數字。)
佢地搵左 100 位三十歲以上而 BMI 係 27 至 40 之間嘅男女，將佢地分做「高蛋白量 (High Protein，HP)」同埋「正常蛋白量 (Standard Protein，SP)」兩組。兩組都會係一年之內食特定餐單，唯一分別就係 HP 做會食多一倍嘅蛋白量。係開始前後，所有人都會做一次身體檢查去量度進度。
一年好快過去，我地睇一下結果。
體重：兩組都有下降，但兩組之間無明顯分別。
腰圍：兩組都有下降，但兩組之間無明顯分別。
脂重：兩組都有下降，HP 組明顯比 SP 組跌得多左。
膽固醇/低密度膽固醇：只有 HP 組有下降，但兩組之間無明顯分別。
高密度膽固醇/三脂甘油/血糖：兩組都無下降，兩組之間無明顯分別。
即係話最籠統講一句，研究顯示，原來跟住餐單食嘢食一年，係會瘦左同輕左架！
雖然研究話無，但食多啲蛋白質，膽固醇嘅數字仲有可能會好啲啲添喎！
好偉大嘅發現呀！
（Dr Who：我聽日就開始研究一年之內日日食家鄉雞係咪會肥，有無人參加？）
心水清嘅同學就可能會發現，咁個研究關 Herbalxxe 咩事？
睇清楚啲，原來研究用黎量度蛋白質份量嘅材料，就係 Herbalxxe 嘅蛋白營養粉。即係話所有參加者都係食住呢隻粉，只不過係食多定食少。再大概睇埋另外九篇研究，原來全部都係使用呢隻蛋白粉去研究蛋白餐單對減肥嘅影響。
睇到呢到，Dr Who 都覺得光陰寶貴，係時候停手。
====================
身為消費者，我用粉與否最想知嘅問題有兩個。
1）粉係咪有用？
2）坊間咁多粉，點解要用你個隻？
要解決呢兩個問題，研究重心理應係樽粉上面。例如搵 100 人食蛋白餐單，50 人食普通嘢食 (其實研究所用嘅份量，每日只不過係食大概九兩雞胸肉）、50 人食粉粉餐單，如果「粉粉組」係一年後比「普通組」有明顯分別，咁我地先可以講一句「粉粉比均衡飲食更有效控制體重」。同樣道理，搵多 100 人黎，50 人食「Herbalxxe 粉」、50 人食「某某蛋白粉」，食完之後「Herbalxxe 組」表現好啲，咁我加埋就可以話「大家要食粉，要揀，仲一定係 Herbalxxe」。
佢地嘅研究設計，比較嘅係「食多粉」同「食少粉」，其實根本無答過「我做乜要食粉」。
我明白，同食藥一樣，食粉可以計份量、較易控制，但如果有人咁決心要控制餐單，搵營養師學一日食幾多塊雞胸、食幾多隻蛋、幾多碗飯，又有咩分別？可能我份人比較為食，如果我為左改善膽固醇指數而餐餐食粉，我會覺得人生好慘。
====================
再講多兩句。
通常呢類產品都會加項標注，話要配合均衡飲食同運動，呢句其實好有用。當然，食完無得包瘦就一定架啦，唔會有產品可以係你日日食麥記嘅情況依然確保你減到肥；另一邊廂，我身邊有係康 X 萊嘅朋友，佢地三五成群咁樣每星期都去行山跑步。
其實，咁樣緊跟餐單、勤做運動嘅生活，你係點樣都會瘦、點樣都會健康。如果要證明你嘅產品真係咁有用，我地要再搵 100 個生活作息相同、餐單相同、運動量都相當嘅人，一半食粉一半唔食，一年之後「粉粉組」如果比另一半人明顯健康左，咁就係強力嘅證據。
Dr Who 唔反對運動、唔反對健康飲食，但幾千幾百蚊咁買粉食，我又真係睇唔到必要性。
我食多舊雞唔好？
