《網絡暗黑兵法：誰是方丈》
我過去分享策略，多數係講緊品牌之間嘅競爭，呢啲商業嘢對普羅大眾嚟講，聽落幾有趣，但好似唔多實用。
今次同大家分享一個暗黑兵法，適合大眾使用，而且專用於污蔑敵方人格，對心智未成熟嘅年輕人尤其有效。
係講解做法之前，大家首先要知道，我所謂兵法，其實都係屬於「博奕論」 - 博奕即係捉棋，顧名思義，「博奕論」就係用嚟分析敵我決策嘅科學。
講到博奕對決，大家會諗到賭博丶足球丶電競等等，而結果亦只有兩種：一係你輸我贏，一係我輸你贏。
以上情況叫做零和博奕，亦係最常見嘅博奕。
但係現實人生並唔係遊戲咁簡單，就好似股市咁樣，有可能大家都會贏，但係我贏多過你；亦有可能大家都輸，不過你輸少過我。
呢種情況就叫做變和博奕，而今日要講嘅暗黑兵法，就係務求大家都輸，但係自己輸少啲，亦即係俗語所講：輸少當贏。
你有冇試過玩LOL同台灣人嘈？
當AD屌鳩JG唔幫下路，JG又屌返AD雷，你覺得個上路會幫邊個？
上路會話：「別爭了，你們都是87」
切記，網民嘅天性係中立，唔關佢事嘅爭執，對網民嚟講就只係一碟花生。
所以喺網上同人開拖，無論你幾有道理，去到最後，雙方都只會顯得幼稚，結果雙方都只會輸公關。例如熱狗同青政，就係惡性競爭嘅最好例子。
終於，嚟到本篇重點，點樣先可以輸少啲？假如我係嗰個AD，我會咁做：
AD：「87」
JG：「我操你媽，不會玩別搶AD」
AD：「87」
JG：「你不會中文哦？一直8787」
AD：「87」
JG：「屁孩要好好上學了，別來雷人」
雖然大家都顯得好幼稚，但係因為我保持冷靜，用簡單回覆引出對方千字文，令其他人覺得JG比我勞氣，所以結果係我贏。
概括嚟講，網絡開拖，事必要保持冷靜，用字精簡，以諷刺取代人身攻擊，而且愈幽默愈好。
只要成功激嬲對方，將對方變成方丈，你就已經贏咗一半，因為網絡無人鍾意小氣嘅方丈。
至於剩返嗰半，就要靠掌握節奏，而節奏，又係另一個題目。
