關於 magista平底 ，我們在網路上蒐集到這些相關的討論、資訊與評價

【優質觸感：Puma Future 5.1 Netfit FG/AG 實測】
.
疫情叫做好返啲，阿靴亦開始返實測。其實今次講嘅波Boot阿靴一直非常期待，因為佢上代令阿靴非常驚喜，而今代拎上手時，摸落鞋面感覺有唔少改善，加上佢鮮艷嘅顏色同特別設計，令阿靴一直好想快啲測試到佢，可惜嘅係疫情突然嚴重，唔係嘅話就可以早啲同大家講講。事不宜遲，今次阿靴同大家講嘅係Puma Future 5.1 FG/AG。
.
Future 5.1 FG/AG 鞋面用上EvoKnit織布質料，質感會較上代薄及柔軟，鞋頭及兩側亦有輕輕嘅一層叫GripControl Pro嘅塗層，令鞋面變得嘅耐用，以及同時增強鞋面嘅整體球感。Future 5.1 FG/AG亦用上Netfit科技配以中襪筒設計，襪筒彈性適中，唔會話太緊或者太鬆。鞋釘上則用上電鍍反光釘底，設計的確非常特別，而呢對波boot更加係FG/AG，Puma期望可以俾到一對同時適合兩種場地嘅波Boot。
.
阿靴就著Future 5.1 FG/AG進行過多次練習，最滿意嘅係佢帶嚟嘅觸控球感，今次Evoknit鞋面比上代好，相信Puma將佢嘅織布科技調節到一個相當唔錯嘅水平。望返上代Future 4.1 FG/AG嘅實測，鞋面佢會較厚同硬，所以可以帶來更強大嘅踢球力量，相反响呢一代，Future 5.1 FG/AG鞋面較上代貼腳，鞋面塗層亦帶來相當平衡嘅質感，佢唔會非常啜，亦唔會太平滑，所以帶嚟非常理想控球質感，佢亦令阿靴諗起舊時Magista嘅觸控感覺，咁當然Magista會再薄啲咁。
.
阿靴亦滿意Future 5.1 FG/AG帶來嘅長短傳質感。長傳上，因為波Boot嘅質料唔算厚亦唔會太薄，力量感雖然唔會好似Future 4.1咁強大，但係阿靴認為已經相當充裕；至於球感上，Future 5.1 FG/AG會相對上代優勝，因為鞋面觸感較強，可以較為輕鬆斬去目的地。短傳上，Future 5.1 FG/AG亦受惠於佢優質嘅觸感，整體發揮相當唔錯，短傳質感會傾向爽朗，同時亦相當食力。
.
射門上發揮屬於中上，阿靴非常喜歡Future 5.1 FG/AG嘅腳面射門，因為Future 5.1 FG/AG有一定重量，加上鞋面觸感強，會較容易做出較飄嘅射門，同樣地，佢力量感絕對難以同上代比較，但係已經非常充足同理想。至於腳內檔射門上，波Boot鞋面唔算啜身，帶嚟摩擦力就屬於適中，射門弧度唔會非常明顯，不過質感會傾向急勁。
.
盤球係Future 5.1 FG/AG較弱嘅地方，不過前提係佢其他方面嘅發揮都相當優質。於盤球上，鑑於Future 5.1 FG/AG唔係一對輕盈嘅波Boot，鞋型亦唔會如期他速度型波Boot般修腳，所以帶嚟嘅速度感同靈活感唔算強。不過好嘅方面係，佢設計用料帶來相當舒適嘅踢波體驗，鞋頭位置嘅空間亦算充裕。
.
最後一點，Future 5.1 FG/AG同以往一樣，佢係一對可調節鞋帶位置嘅波Boot，大家可以根據自己嘅腳型而有所調節。至於尺碼上，阿靴認為佢無偏大亦無偏細，平時著開US8波Boot嘅阿靴著返US8就會啱啱好。鞋釘上，阿靴認為除咗真草場外，中至高質嘅仿草亦會合適。
.
至於最近啱啱對出嘅Future 6.1 FG/AG，望返個設計用料大致係一樣，所以數值同樣值得參考。
.
Future 5.1 FG/AG 實測報告
盤球：●●●◐
控球：●●●●◐
短傳：●●●●◐
長傳：●●●●◐
射門：●●●●
舒適：●●●●
保護：●●●●
.
感謝PumaHK提供嘅波Boot。
.
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas Top Sala Lux: https://youtu.be/R7Win_I5PQw
【波Boot實測】白飯魚: https://youtu.be/-dbvs0_YgiY
【波Boot比較】五對驚喜平底波Boot: https://youtu.be/H552mIuJYJc

【傳統與科技結合：Tiempo Legend 8 Elite AG 實測】
.
今年度Tiempo由第七代升級至第八代，上次就同大家講過頂級平底版本，講完平底就當然要講下釘Boot，阿靴今日就同大家實測頂級版Tiempo：Tiempo Legend 8 Elite，而釘嘅種類就用上仿草專用嘅AG釘。Tiempo第八代同七代最明顯唔同就係佢鞋面嘅紋理，由一條條嘅橫紋迎變成一格格菱形紋理，新嘅外表，新嘅科技，作為一剔傳奇嘅袋鼠皮波Boot，究竟Tiempo Legend 8 Elite嘅發揮又係如何？今日阿靴就同各位深入探討下。
.
Tiempo Legend 8 Elite用上嘅係優質袋鼠皮，摸落去質感較薄但仍然保持柔軟，第八代同樣捨棄傳統車線設計，袋鼠皮會一塊過於鞋面，鞋面用上菱形紋理，令阿靴諗起第一代Magista嘅設計，鞋面亦用上一剔常見嘅ACC塗層，期望讓大家於唔同天氣，波Boot也有一致嘅發揮。
.
Tiempo Legend 8 Elite沒有第七代嘅Flywire Cables，取而代之嘅係Phantom Vision Elite同樣用上嘅Quadfit科技，功能係令波Boot包腳嘅同時，亦唔會令波Boot容易變形。至於鞋舌，佢同上代一樣，用上Flyknit質料。至於鞋釘上，Tiempo Legend８Elite AG用上嘅係阿靴非常喜歡嘅12粒圓釘，可以話非常適合現時經常踢仿草嘅狀況！
.
响整個實測過程上，阿靴最喜歡係Tiempo Legend 8 Elite嘅控球觸感，菱形紋理可以加強到控球球感，配以優質袋鼠皮，帶來傳統嘅高質控球體驗。無論較急勁長傳，或者普通嘅短傳，只要捉緊時間輕輕一控，可以較輕鬆將波控落期望嘅位置。
.
舒適度亦係Tiempo Legend 8其中一個非常理想嘅狀況， 不過前提係要啱腳形。Tiempo 8 頂級平底就較合適闊腳波友，但係响頂級版釘Boot嘅狀態上，佢嘅鞋型係較為修腳，雖然袋鼠皮Boot隨時間微調，但係今代鞋籠Quadfit科技亦令波Boot包得較貼，同時減低到波Boot變形嘅狀態，阿靴認為中腳形嘅波友會較為合適。至於闊腳嘅波友，啊靴就會建議Premier 2.0，Copa19.1或Morelia等類別嘅波Boot。
.
講翻舒適度，一如既往，袋鼠皮俾到大家舒適嘅感覺，而阿靴只喜歡包得貼嘅袋鼠皮波Boot，Tiempo Legend 8 Elite就正正符合到自己期望。Tiempo Legend 8 Elite除咗舒適，帶嚟嘅包腳感亦較強，雖然用料屬於袋鼠皮，但較強嘅包腳感亦令波Boot嘅靈活度相對其他袋鼠皮Boot更為優勝，難得地，Tiempo Legend 8 Elite帶來嘅速度感也不錯，但當然未能同較輕巧嘅Flyknit波Boot相提並論。
.
短傳發揮屬於中上，袋鼠皮質料配以菱形紋理令傳送更具球感，短傳質感較柔軟。至於長傳上，發揮同樣屬於中上，袋鼠皮帶來傳統嘅球感，但力量感不算強大。阿靴亦喜歡以Tiempo Legend 8 Elite作腳內檔有西長傳，球感好之餘亦令長傳變得較準繩。
.
射門係感到驚喜嘅部份，以往來說，部分袋鼠皮波Boot會因為皮革較厚及太柔軟，令射門發揮不太理想。但阿靴認為Tiempo Legend 8 Elite嘅袋鼠皮調節到較薄嘅狀況，加上設計非常貼腳的關係，Tiempo Legend 8 Elite嘅腳面射門發揮相當理想，可以較容易射到唔旋轉嘅漂波。至於腳內檔燙射上，阿靴認為菱形紋理配上袋鼠皮帶來嘅摩擦力相當理想，可以作出較具弧度嘅射門。
.
至於鞋釘上，如果有得選擇，阿靴認為踢仿草都係著AG釘最好，以Tiempo Legend 8 Elite為例，AG選擇釘會較短身，而且形狀呈圓形，合適嘅長度令釘可以插穩於仿草地上，圓形嘅釘亦可以減低轉向時關節承受嘅壓力。
.
Tiempo Legend 8 Elite整體發揮相當唔錯，不過當中亦有一啲負面嘅傳聞。話說之前有人影到車路士中場佐真奴嘅Tiempo Legend 8 Elite鞋面相當平滑，係無菱形嘅紋理。有啲報道就講到佢個對鞋係經特別設計，不過另外亦有波友講到其實今代塊袋鼠皮嘅紋理係3D壓製，較密及高強度嘅著用令菱形紋理消失，至於實際狀況係如何，就要著多一段時間先知道。
.
至於尺碼上，Tiempo Legend 8 Elite係一個較包腳嘅波Boot，初時著上腳感覺會有少少偏細嘅狀況，不過阿靴著袋鼠皮Boot係鍾意貼身嘅感覺，所以著翻正常Size都問題不大，唔會有一種太侷促嘅感覺。
.
再次感謝HKGBALLBOOT嘅波Boot提供！
.
Tiempo Legend 8 Elite AG實測報告:
盤球：●●●◐
控球：●●●●●
短傳：●●●●
長傳：●●●●
射門：●●●●
舒適：●●●●◐
保護：●●●●
----------------------------------------------------
【屎波裝備多Instagram】Follow: instagram.com/hkfootballreview
【波Boot實測】Predator 19+ IN: https://youtu.be/G5tJpVIQHa8
【波Boot實測】白飯魚: https://youtu.be/-dbvs0_YgiY
【靴分享】六個射門要訣！: https://youtu.be/LaVsmSvFoFQ

【隱藏式鞋帶平底波Boot：React Phantom Vision Pro IC實測】
.
Phantom Vision 嘅出現，目的係頂替Magista，成為Nike旗下新嘅傳控型類別波Boot。於觀察上，Phantom Vision人氣的確無Magista咁強，始終外貌上Magista的確係無得輸，再加上Phantom Vision Elite鞋型相對Magista Obra/Opus窄，影響到穿著嘅舒適度，有部份職業球員都由Magista轉了去其他系列。
.
响咁嘅狀況下，Phantom Vision 推出後的確唔多人提及，但係响Phantom Vision嘅平底層面上感覺又會係點？今日啊靴就會同大家深入講講喱對React Phantom Vision Pro IC，屬於Phantom Vision平底嘅頂級版波Boot。
.
啊靴實測對新Boot前，就聽過某波友話佢幾刮腳，所以著之前都抱住個無咩期望嘅心態去試，畢竟波Boot係有襪筒設計，刮腳嘅機會都的確會相對大。但係著上咗React Phantom Vision Pro一段時間，帶嚟嘅表現的確係幾令啊靴感到驚喜。
.
React Phantom Vision Pro Boot如其名，緩震用上Nike嘅React底，佢係第一對用上React跑鞋科技嘅波Boot。鞋面用上柔軟嘅網狀合成皮質料，亦用上NikeSKIN科技，鞋面會有一個個三角型嘅突紋，加強波Boot整體球感。波Boot腳內檔亦會有一個大三角形位置，整個範圍會有較大嘅三角型突紋，設計相信係輔助腳內檔傳控嘅作用。波Boot亦用上Ghost Lace System嘅隱藏式鞋帶設計，鞋帶可以於波Boot外層隱藏，令到鞋面觸球面積變得更大。至於襪筒位置，佢由普通嘅彈性布料製成，感覺唔會太緊又唔會太鬆。
.
於整個實測過程上，啊靴最喜歡係React Phantom Vision Pro帶來嘅舒適度。啊靴一直就响Nike著開US8，去舖頭試嘅時候就發覺佢有點偏細，所以最尾揀咗US8.5。响預大半碼嘅狀態下，波Boot無任何刮腳嘅狀況，而且佢鞋型屬於中至闊腳，加上佢React嘅跑鞋緩震科技，舒適度的確非常之優越。啊靴就更加認為，React緩震發揮相對Lunarlon有過之而無不及，絕對有機會取替Lunarlon嘅位置。
.
React Phantom Vision Pro發揮上亦會唔錯，啊靴會幾滿意佢帶嚟嘅射門。受惠於佢柔軟嘅合成皮，加上佢嘅隱藏式鞋底設計，腳面射門非常之理想，可以較大機會射到較飄嘅曲墜球。至於鞋面嘅NikeSKIN科技，令鞋兩側帶來充裕嘅摩擦力，腳內檔Chok射亦非常理想，可以更輕鬆射到較急勁嘅內彎球。
.
隱藏式鞋帶加上NikeSKIN也令長傳發揮屬於中上，科技令球感提升，可以較輕鬆作長傳，不過React緩震鞋底會較厚，部分波友需要時間適應。至於短傳上，發揮屬於中等水平。控球層面上，啊靴認為發揮屬於非常理想，畢竟隱藏式鞋帶以及NikeSKIN科技提升到唔少波Boot嘅整體球感，球感嘅增強，亦有助更精準嘅控球。
.
每對Boot亦會有佢唔好嘅地方，鞋面嘅凹凸紋理的確提升不少觸球球感，但太強嘅摩擦力也令盤扭流暢度略嫌欠奉，初期的盤扭會有點不順暢。但相信隨時間適應，流暢度會逐步提升。
.
至於鞋口位置嘅襪筒，坦白講，啊靴就麻麻地，始終自己更加喜歡無襪筒嘅靈活度，不過好嘅事情係，Nike開始將啲Boot轉返去無襪筒，就算係以前嘅高筒，而家都會轉為較低嘅中筒。
.
React Phantom Vision Pro IC 實測報告：
盤球：●●●
控球：●●●●◐
短傳：●●●
長傳：●●●●
射門：●●●●◐
靈活：●●●
避震：●●●●●
Size上啊靴會買大半碼，鞋型上就屬於中至闊腳。
.
——————————————————————-
【屎波裝備多Instagram】Follow: instagram.com/hkfootballreview
【波Boot實測】白飯魚: https://youtu.be/-dbvs0_YgiY
【波Boot比較實測】20年前Predator重現: https://youtu.be/WpuXHSnErl8
【靴分享】六個射門要訣！: https://youtu.be/LaVsmSvFoFQ