《HR真係可有可無?》
睇完呢篇文章,第一個感覺係覺得筆者可能有俾HR蝦過嘅童年陰影,先會咁痛恨HR。相信做HR嘅大家俾人講到咁一文不值,難免都啲心有不甘。我勸大家唔駛動氣,有睇過佢呢個page都知道筆者筆鋒都比較銳利,其實筆者有咁嘅睇法,只因世人對HR嘅工作認知不多,誤解亦太深。以往啲高層consultant都會用比較高高在上嘅角度出現係大家眼前,令大家有種錯覺覺得HR係遙不可及,從而難以理解呢個行業嘅人做緊啲乜。呢個亦都係 HR小薯蓉 專頁出現嘅原因,希望呢個小小嘅專頁可以俾大眾了解多啲HR呢個行業。
其實唔難明白點解HR會給予大眾咁負面嘅印象,因為HR好多時都係做緊一個「醜人」嘅角色。正所謂醜人唔易做,HR必須喺一間公司嘅發展及資源上面做一個平衡嘅角色。試想下一間企業每個部門都話要請人,跟住每個部門都話自己好重要,你唔俾我請成個部門就會一夜之間停止運作。事實係每間公司資源都係有限,為了配合公司真正發展需要,HR係呢個時候難免要做「醜人」去分配資源,最終滿足到20%嘅人,其餘80%就會覺得HR係大奸角,而得益嗰20%都唔會知道自己係得益者,一樣照舊覺得HR係大奸角。負責做interview嘅前線HR薯仔,壓價一樣都係做緊醜人角色,你估壓價好好玩咩?有得唔做我都唔做啦。但依從公司定下嘅發展策略,係我們專業工作嘅一部分,你要憎我都冇計。相信真正嘅HR唔會因為成功壓到價而覺得係一種成就。
HR可有可無?先試諗下冇咗HR會點?篩人見工俾返admin做,計糧計假俾admin做,先不論admin識唔識做或者肯唔肯做,咁即係話每個部門都有一個做緊HR function嘅admin,結果佢地各有各做,各自各去同日理萬機嘅皇上皇大大老細講要請人。喺各有各做、資源分散、人力資源資料亦冇人去統合嘅情況下,公司點樣去有效分配佢有限嘅資源?當公司需要制定發展策略,亦難以去預計足夠人力資源去配合公司發展。好了,而家冇咗HR,皇上皇話資源不足,叫department head去做醜人,壓價、炒人都關佢事,佢仲有幾多時間去處理公司核心業務?咁對一間企業係咪真係有好處?
HR嘅工作係咪只有篩人咁簡單?HR嘅function除了recruitment之外仲有compensation and benefits, training and development, performance management等等。成個專業係講緊如何成為企業主管嘅合作伙伴,去有效利用人力資源去管理整間企業。專業程度博大精深,成個Master都有得讀,係咪真係咁唔專業?我諗要搵返professor出嚟解釋下。文中仲有好多對HR嘅誤解,例如唔了解公司業務、負責請programmer唔識IT、點解要填form等等我依家唔多講住,今日寫唔到咁多,遲啲再慢慢探討。
唔知大家又點睇?
#HR小薯蓉
Search