有日一位先生嚟到診所。
佢問我：「姑娘，呢度幫唔幫人放血呀？」
我：「我哋冇小手術做嘅，有需要可以轉介你去專科，你要唔要登記俾醫生睇睇先？」
佢：「睇吓都得？」
我：「醫生可以幫你睇睇咩情況先嘅，咁如果醫生做唔到嘅就會轉介你去專科，咁都要收返診金」
佢：「唔係呀，我問係咪睇吓都知咩料」
知你咩料嘅去搵193。
我：「而家我就答你唔到，都要俾醫生睇咗先，有需要都可能要檢查嘅，喺我呢度就淨係可以幫你登記，所以都係要你入房同醫生講咗先」
佢：「咁樣咁樣呀，我其實係想知我啲血係咩色啫」
人嚟，血～～滴～～子！
我：「哦？係呀？知嚟做咩嘅呢？你嘅意思會唔會係想知自己咩血型或者驗血之類呀？」
佢：「唔係血型呀，係咩色呀」
我：「我哋人嘅血都係紅色㗎喎，唔會有其他顏色啦喎…」
佢：「我女朋友講佢啲血係深啡色，咩係瘀血啲血行得唔好，啲血會一舊舊一patpat咁，行得好嘅會係鮮紅啲喎，咁佢唔係紅色唔通唔係人咩姑娘？」
嗯…你聽到嘅血唔知係咪我諗緊嘅血呢～
我真係一啲都唔趕客：「不如咁啦，如果有需要嘅不如真係登記入房問吓醫生，有需要都可以做埋抽血檢查吓嘛，你有冇做過body check呀？」
佢：「你同我放啲血出嚟睇吓咩色咪知我正唔正常囉唔係咩？唔駛做咩檢查㗎。我都冇聽過我女朋友做過啲咩檢查，佢都係話佢就咁睇咋嘛」
你女朋友就咁睇嘅意思係咪低頭就見到嗰啲呀？
我真係好想收你入房：「一係咁，我哋有個好簡單嘅，就係拮手指驗血糖，咁就可以睇埋你滴血係咩色又可以check埋血糖，一舉兩得」
佢：「你明唔明我想做咩呀？」
明呀，你想知自己啲血會唔會好似女朋友啲月經血咁嘛。
我：「明呀，你想知自己啲血係咩色嘛，所以我咪話最好又最快嘅方法就係拮手指驗血糖囉，要唧一滴血出嚟先可以知㗎嘛」
佢：「嘖！」
佢轉身離開診所，拮手指唔啱呀？咁都係出返血～～滴～～子啦！
