【到底《#無聲絕境II》可以有幾好睇】
#到底可以有幾好睇系列
#好耐冇見
1. 一套應該冇聲嘅戲，如果奧斯卡仲有最佳音效剪接，單係開場已經贏曬，喺觀眾諗住無聲下，善用盡仲有聲嘅世界係點，幾個主角之間「有聲」同「無聲」之間剪接，再加埋有大場面，精彩到不得了，睇ATMOS都應唔差
2. 少少題外話，開場有聲嘅珍貴，令我諗返起第一集大家仲可以睇戲食爆谷飲汽水嘅日子，當日靜到一粒爆谷聲都冇（第一集優先場一人派一包旺旺，你敢唔敢食😂），好似好耐之前嘅事，原來有啲回憶真係好珍貴美好
3. 同上集有少少分別係，今次點樣喺無聲嘅世界製造有聲，而呢啲場面係更可以帶動到緊張，因為你唔知佢哋咁樣做有咩事發生，一樣會緊張到屏息
4. 你預告見到嘅嘢只係開場約半個鐘嘅事，之後發生咩事都估佢唔到，最深刻中段一場四個角色唔同視點，同時經歷唔同危機，點樣製造緊張功架、點樣剪接去營造氣氛，技術上可以堪做教材
5. 成件事睇到佢好識控制觀眾清緒，知道你上次驚咩、知道你會點樣自己嚇自己，而佢又可以將同一方式創出新意，再無限擴大，原來製造緊張都可以有唔同層次，原來可以用「緊張」呢種觀感去講故事，原來單純「入房」幾步路都可以搞到一步一驚心
6. 或者預告同故事可能有少少誤導（well... maybe... 第三集會再講？）反而因為佢有少少誤導，令你睇睇下發現原來唔係果味嘢，而你又唔知佢可以點搞落去，將緊張感再度提升，直至最高潮一刻超霸氣完場，夠膽咁樣完場，除咗霸氣唔知講咩好
7. 技術無懈可擊，不過略嫌故事簡單咗少少，又或者上一集驚為天人，今集個世界觀冇想像中延伸得咁好，再加埋你睇過《蒙上你的眼》「唔俾睇嘢」後，硬係覺得可以再玩多啲，對比又好似差咁少少。始終作為續集電影，觀能刺激一定會比上集更強，角色之間嘅關係都冇上集咁深刻
8. 平行時空嘅第三集2023年上映，長期積弱派拉蒙有隻金蛋當然要用到盡，而今次相信係為鋪個平行時空嘅連貫作品，變咗好多嘢冇解釋清楚，明顯為鋪第三四集而設（如果第三集係平行時空，一定會有第四集），完整性就冇上集咁強
9. 當然，為咗製造緊張，班角色一定間中要做戇鳩嘢，其中一位角色嘅行為的確係製造到緊張，但自己攞嚟衰
10. 絕境當前有人性美善會令你感動，但太「善」，搞到惹著班死神就自求多福，冇劇透，睇完你會明我講乜🤣
有一類戲如《F9狂野時速》大堆頭大製作大特技一定要入戲院睇，但呢類「無聲勝有聲」嘅震撼力、戲院裡面一粒聲都冇嘅「自然聲」，你喺屋企點都唔會感受得到，而《無聲絕境II》同樣都製造到呢種超凡戲院體驗。個人覺得冇需要IMAX但值得睇ATMOS/ DTS:X。
《無聲絕境》、《無聲絕境II》I觀後感可看留言連結。
Paramount Pictures
‼️電影網店全新貨品已上架，低至$5起，快啲嚟搶購啦：https://bit.ly/3qLPkpk
【Patreon加強版】尊享優惠、更多深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei
【IG請follow】www.instagram.com/travelerwithmovie
【MeWe請Follow】mewe.com/p/travelerwithmovie
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
