《數碼暴龍》
N年前PS1 有隻經典既遊戲 - 數碼暴龍世界
佢係一種育成遊戲
由幼年期慢慢養大到完全體
當中為左進化成自己想要既數碼暴龍
訓練方面係有特定既要求, 例如力量/智慧/敏捷要達到某一個數字以上
而訓練過程期間, 數碼暴龍既體力/心情都會改變
同樣會影響進化路線, 仲會影響埋佢既壽命長短
全隻GAME其實好好玩😍自由度好大
不過為左要得到想要既數碼暴龍
當時有好多攻略, 訓練方式都有點公式化
轉一轉話題,
最近認識到一個家庭
父母都係專業人士, 有一個讀緊幼稚園既小朋友
有日上到佢地屋企
咦? 點解望落好似少左d野?
望多兩望, 發現原來佢地屋企係無電視機📺
雖然我都唔係成日睇電視, 但屋企無電視機對我黎講都幾神奇😳
而原本應該放電視機既位置變左一個書櫃
裡面放滿哂練習簿, 中國名著, 字典等等, 另外貼滿補習時間表
哦, 原來佢地係傳說中既怪獸家長
交談之中, 發現原來小朋友既婆婆都覺得好慘
因為無電視, 小朋友完全唔知出面既世界發生緊咩事
唯有趁自己照顧既時候偷偷地比佢睇下卡通
最諷刺既係
對父母將全屋裝修,傢私全用木製
原因係減少甲醛, 對小朋友健康好
嗯? 生理健康就咁緊張, 咁心理健康呢?
當然係香港呢個競爭力大既社會
要一早裝備自己係無可厚非, 我都好理解
但如果連一個正常人既少少娛樂都無
真係對小朋友好咩?
我一直諗
其實佢地生小朋友既心態係咩?
如果將養小朋友當成一個育成遊戲
期待佢長大進化成你想要既人才
咁同玩數碼暴龍有咩分別？
