舊文，去年7月寫的。
———————————
重看《PTU》——
著得件制服就係自己人，唔理對方好人定壞人
「罪犯未必係壞人嚟嘅，犯罪亦都好多客觀嘅原因，都好多值得同情嘅地方；同樣，警察都唔一定個個好人嚟。」發展局局長黃偉綸在書展分享東野圭吾小說時咁講。
罪犯是否必然壞人？嗱，即係咁，我唔敢話唔係，畢竟被叫得做「罪犯」的就是犯了罪，而在塵世間的一般認知下，犯了罪的，就是壞人，懶理閣下背負甚麼偉大理由不得不犯罪。
咁警察又是否一定個個好人？這涉及到「好」的定義。
曾經有一段長時間，香港電影對警察描寫相對簡單。
例如連主題曲都被用作《警訊》片頭曲的《警察故事》。主角陳家駒，無論開工定休班，只要遇上罪案發生（不論嚴重還是輕微），都必定單人匹馬奮不顧身誓要拉晒啲壞人為止——即使在打擊罪案期間隨時引致不必要的嚴重交通車禍，又或人命傷亡……所以，對於需要（坐在冷氣房）寫Report的上司來說，陳家駒的「好」總是伴隨著一大堆麻煩，麻煩到上司本人。不過，每當陳家駒（在撞了無數板後）破咗一單大案，上司又會毫不介意站出來邀功。講到尾，當差只是一份工。
只視乎當差者用甚麼心態去打這份工。
杜琪峯的《PTU》，借一個晚上，展示了幾類當差的人。
1.肥沙，偵緝警長，駐守尖沙咀警區反黑第二隊。某一個夜，佢休班，單拖去九龍城打邊爐，入舖頭前遇上不識好歹以為自己好把炮的泊車仔，肥沙立即展示他作為警察的無上權威，命令泊車仔當街當巷做五十下掌上壓。入舖後，咁啱撞見社團大佬「禿頭」個仔「馬尾」同班𡃁，肥沙二話不說，好架勢地坐在「馬尾」那一枱，慌張的樓面立即為「馬尾」換枱——樓面固然不想得罪黑白兩道，但此時此刻又深明哪一方更加不能得罪。又或者咁講：此時此刻站在警察一方，才是政治正確，才是好市民的應有表現。
2.陳Sir，肥沙阿頭。電影沒有交代他過去有甚麼戰績，我們只知道佢嗰晚好想打牌，並立即Call肥沙。可惜就在肥沙前往打牌期間，中伏，更遺失了佩槍。而因為差不多同一時間「馬尾」被發現捅了一刀致死，明明好想打牌的陳Sir不得不趕到現場。
3.Madam張，駐守九龍總部重案組，著了一套Suit的她帶同兩名身穿西裝的伙記，到場接手調查呢單「九龍城打邊爐殺人事件」。此舉令好想打牌的陳Sir相當不滿，惟有叫下屬們乜都唔好理，交帶好證物就收隊，陪自己打牌。
4.展哥，警長，警察機動部隊B連第二小隊，座右銘：「著得呢件衫就係自己人。」那一夜，如常帶隊巡邏，當得知肥沙遺失了佩槍，在擺明冇So的情況下，懶理（自己及成Team人）前途，答應肥沙暫時不向總部報告，並承諾幫手找回失槍。
因為著得呢件衫就係自己人——唔理對方究竟好人定壞人。
《PTU》不是傳統警匪片格局，而只是借一把失槍以及一連串衍生的偶發事件，描述幾類差人的處事；而當一切完結後（搵番失槍、兩個社團大佬死咗，更順手剿滅一幫準備著草的悍匪），成晚被Madam張咬住唔放的肥沙，竟然出於好意地，建議乜都冇做過而只管匿在車廂裡淆底的對方：開番兩槍，一來份Report好寫啲，二來仲有獎。
成晚表現最正直不阿的Madam張，真的開了兩槍。呢兩槍，正式令她融入這個大家庭。至於眼前呢班究竟好人定壞人？不重要，因為她已成為「自己人」。
#浪漫月巴睇舊戲
#杜琪峯
#PTU
