【燒衣與非常貿易戰】
一，都未到盂蘭節，就已經燒 Nike 波鞋，又燒 H&M招牌。成件事嘅來龍去脈，由一個叫 Better Cotton Initiative 開始。
二，話說2021年1 月13日，即係 Trump 卸任之前幾日，頒令禁止由新疆入口嘅棉花同蕃茄製品；即係話，任何有進口美國嘅產品，成份裡面都唔可以有新疆出產嘅棉花同蕃茄。
三，至於呢個禁令，就係源於去年底通過嘅 Uyghur Forced Labor Prevention Act。
四，美國嘅海關又點知啲消費品嘅原材料來自邊度？其實，所有嘢都係一系列嘅 documentation。無錯，呢啲繁文縟節，成本好高。所以，從好嘅角度睇，認證機構如 Better Cotton Initiative（BCI），目的就係嘗試將件事簡化。
五，中美阿拉斯加開完會（拖）之後就爆單咁嘢，你話有冇關呢？另外，中美阿拉斯加會面前，都有人放過風聲話希望傾貿易，大家又記唔記得？
六，過去十幾個小時，我見多咗唔少大陸網民分析，話 BCI 收咗 美國國際開發總署（USAID）錢，所以抵制新疆棉；又咁巧合嘅？
七，其實 BCI 嘅 website， 大大個 USAID logo，一早打晒開口牌，仲可以有乜嘢開心大發現呢又？當你好鍾意用錢收買人，就以為個個都可以用錢收買。
八，話說回頭，咁 BCI 係乜嘢呢？NGO？商會？計我會話，BCI 係一盤生意；正如上面所講，認證嘅生意。你可以話我 cynical；但以本少爺過去廿幾年嘅工作經驗，見識過唔少為組織；由無到有，由構思到成形，由壓力團體到變身成商界嘅守護者，我都見過。通常佢哋嘅成員，包括政、商、學。當然，唔係個個都做得起；但好似 BCI 最終成為「良心棉花」嘅代表，都算係好成功嘅例子。
九，BCI 起家，源於 2005 年 WWF 嘅一次會議，當時嘅議題係：「種植棉花對環境破壞好大。」究竟當時 WWF 點解會有個咁嘅會？你話呢？
十，我記得當年話，種棉花用好多水；生產一件 T-Shirt 用 2700 公升嘅水。咁具體嘅比較，一睇就知出自高手手筆。亦從呢個論述，轉身射個三分波，話啲 fast fashion retailers 係地球先生嘅敵人。大概同一期，勞工組織又話呢啲成衣生製商係血汗工廠，工人一日都賺唔到一蚊美金。
十一，就係咁，經過四年嘅交易，各大小成衣巨企，都紛紛加入 BCI。另外，fast fashion 佢哋又搞舊衫回收，又幫第三世界嘅婦女同細路。忽然間，世界又回復平靜。當然，過程都創造咗唔少就業。
【題外話】千禧前後嘅另一個政治工業嘅 agenda ，就係玩具業。其實我都唔知點解係針對玩具業；當時初出茅廬嘅我，就從旁見識過一、兩單 issue，亦從個陣開始，研究呢啲國際消費市場嘅政治行為。不過，當時無人諗到，十年內出現一個幾乎摧毀玩具業嘅大殺傷力武器：iPad。就係咁，玩具業又回復平靜。
十二，對於好多社會棟樑關心嘅議題，例如基因改造，BCI 都係相對溫和：
BCI has adopted a position of being ‘technology neutral’ with respect to GM cotton, and will neither encourage farmers to grow it, nor seek to restrict their access to it.
十三，咁 BCI 嘅宗旨係乜？佢嘅講法係：
Supporting farmers is at the heart of our work and is the reason for BCI’s existence.
十四，不過，有一個 point 就幾 unequivocal：
BCI does not operate in countries where forced labour is orchestrated by the government.
十五，所以，自從美國嘅禁令生效，而各大時裝企業又係用緊 BCI 認證嘅時候，佢好自然都要表個態。有理由相信，北京真係以為換咗 Trump 可能有得傾，所以呢件事到今個星期先至爆發。剛才話好多過去一日好多網上嘅研究都指向 BCI，你懂的。
十六，據聞安踏，好似已經話會退出 BCI。其他跨國大牌子，會唔會都跟著咁做呢？
十七，從國際貿易嘅角度，中國雖然係棉花生產大國，但印度、美國、巴基斯坦等加埋，其實都唔嘢少。再講，棉花就唔係好賺錢嘅，去到下游先至係真正賺錢。畢竟，中國唔係成衣大國；所以你都可以話呢次係一種非官方嘅貿易反制措施。
十八，假如視呢次民間自發嘅抵制，係非常規嘅貿易戰，其實對中國嘅代價唔算高。至於對歐美各大牌子，就好難講。好似我 FB 嘅貼圖咁講，大中華對 NKE 真係都幾緊要；但反正都未去到官方封殺，所以股價都只係輕微調整咁話喇。
十九，不過，大陸可以上晒微博，又用火燒又呢樣又個樣，點都有官方默許。歌手演員跪態度，其實都係向各大成衣牌子傳遞訊息。
二十，講開又講，好粗略咁睇，大陸對來佬中低價成衣服裝嘅需求，其實無想大家像中咁大；當中，又以日本嘅牌子比較好賣。H&M、Inditex 等歐洲牌子，亦唔係好依賴大陸市場。有理由相信，服裝成衣嘅市場，始終都比較受文化嘅影響；大陸消費者普遍都係比較鍾意日本成衣服裝嘅設計同裁剪。
廿一，鞋同其他 accessories（例如手袋喇），情況又有啲唔同。鞋飾之類，炫耀性消費嘅意味更濃。你會見人炒鞋炒手袋，舊衫舊裙就只可能貶值。
廿二，雖然「成衣」同「時裝」 有時都會撈亂咁講，但其實我都知兩者係有分別嘅。成衣嘅功能，蔽體保暖囉；基本嘢囉。時裝呢？時裝理論上係 make a statement；你著乜嘢衫，就話畀人知你係乜嘢人。所以，同一件衫，有人係時裝，有人係成衣。
廿三，時裝嘅 statement，會隨時代轉變。從前，著西裝套裝，就等於白領，坐冷氣房。今時今日，裝晒成套戰衣，通常都係大學剛剛畢業嘅新鮮人。
廿五，Fashion brands 比任何人都在意個世界點睇自己；佢哋唔怕 controversies，最怕反而係冇話題。近年 NKE 好似平權先鋒咁；但呢個策略成唔成功呢？唔識講。好似 LULU，feminine 啲咁買 yoga pants，小姐太太們好似都幾 buy，有佢嘅 niche。一係就 UAA 咁，再 sporty 啲，又賣得貴啲。NKE，乜都係又乜都唔係，咁囉。
廿六，各大 sports apparel ，你估真係畀人著去做運動？係著畀人睇呀！家陣嘅才俊，一定要講 work life balance ；唔著條 yoga pants，又點話畀人知，自己去緊做瑜珈？「係呀。哦，你去開 Pure 㗎嗰啲 drop-in class 㗎？我就跟開 PT 嘅，都唔錯喇；唔啱又介紹你試吓吖？佢唔係個個新嘅 client 都肯收㗎。」
廿七，Fashion 嘅嘢，我真係識條鐵。係唔係要著上身先至可以 make a statement？最新嘅研究（利世民，2021）發現，燒，都係 make a statement 嘅方法；尤其係當你可以將條片放上微博、抖音。
如果你覺得我嘅寫作值得支持，可以考慮加入我嘅 Patreon
https://www.patreon.com/posts/49217421
pure yoga任上 在 PURE 空中/瑜珈/舞蹈工作室 - Facebook 的推薦與評價
PURE 空中/瑜珈/舞蹈工作室, Kaohsiung, Taiwan. ... pure studio 新增課程｜瑜伽輪yoga wheel 週五17:00-18:00 ... 17:30回pure上課程舞碼 18:30攝錄 ... <看更多>