我等你等到永遠（上）
結婚後，我同老公一齊清點結婚禮物。
最顯眼嘅，係一個啡色嘅梳化，好大好軟，一坐落去，幾乎可以成個人都陷晒落去。
我問：「嘩，呢個梳化分分鐘成萬蚊，邊個送㗎？」
「阿康送㗎。」老公答，語氣有幾分奇怪嘅落寞。
哦，原來係阿康，阿康係老公讀大學嘅hallmate，畢業後，佢哋就出咗嚟合租。
佢哋一齊住咗七年，直到老公結婚先搬出嚟，兄弟情深，會送貴啲嘅結婚禮物都唔出奇。
「第時佢結婚，我哋都要送貴啲嘅禮物。」我話：「咁張梳化就擺廳啦，我哋唔駛再買梳化。」
老公大叫：「唔得！」
我呆一呆。
「哦，我唔鍾意呢隻色。」老公迴避我嘅眼神：「我睇吓有冇朋友想換梳化，或者你拎番娘家。」
我點頭，冇反駁，但心中已經有一萬個問號。
唔鍾意啡色？我望吓新房內啡色嘅飯桌、啡色嘅書櫃……
老公同阿康之間，一定有啲問題，或者係之前佢哋爭過女，爭到兄弟反目？
我咩都唔知道，我甚至唔敢問老公。
其實我哋冇咁熟，我哋係親戚介紹去相睇而認識嘅。
我見佢成熟穩重，屋企條件又唔錯，好快就結咗婚。
去到呢個年紀，唔通仲講咩要靚仔、有感覺咩，都係想搵個人一齊生活，唔太討厭就得。
女人天生嘅好奇心，令我好想知道老公同阿康發生咗咩矛盾。
趁老公返咗工，我偷偷check老公嘅Email。
估唔到，我搵到更令我震驚嘅嘢。
結婚前一晚，佢send過一個Email：「我愛你，但我要結婚了，不要恨我。」
Email冇上款亦冇下款，但收件人嘅電郵地址係lovejohn4ever，而我老公嘅英文名就係John。
件事好明顯，老公心裡愛嘅係前女友，只係因為種種原因，佢哋冇結到婚。
我倒抽一口涼氣，無數狗血婚姻故事湧上心頭。
比如結婚一段時間後，作為「真愛」嘅前女友再次出現，佢哋乾柴烈火，情不自禁。
我唔可以容忍呢件事，我想慢慢打聽前女友嘅身份，知己知彼，百戰百勝。
但奇怪嘅係，老公嘅每一個朋友，都話佢冇拍過拖。
甚至我向老爺奶奶打聽，佢哋都話，老公一直都掛住做嘢，冇去識女仔。
甚至連同我結婚，都係因為老爺病咗，拖住病體逼佢結婚，佢先去相睇。
有一日，我偷睇老公手機，發現佢前排收到一個信息：「我等你到三十五歲，如果到那時你還不來，我就找別人了。」
呢個，一定係佢嘅前女友。
我記低呢個電話號碼，偷偷打過去，聽電話嘅係一個男人，問我搵邊位，我又唔知點答，嚇到即刻收線。
呢次之後，我冇再搵到新嘅線索，似乎佢哋兩個冇再聯絡，我唯有將呢件事埋藏喺心底。
結婚兩年後嘅某一日，老公坐喺電腦前，呆若木雞。
我點樣叫佢、搖佢，佢都唔出聲，對眼紅晒。
「究竟咩事啊？你唔好嚇我，我哋一齊面對！」我不斷問老公。
老公終於肯開口：「阿康，死咗。」
阿康……我諗咗幾秒，先記起佢係以前同老公合租嘅好兄弟。
我想攬實老公，畀少少安慰佢。
但老公一手推開我，講咗一句話：「係我害死佢嘅。」
「你講乜嘢？」我唔敢相信我嘅耳朵。
「我愛佢……」老公語無倫次：「唔係，係佢愛我，我唔夠愛佢。」
我如遭雷擊。
喺老公顛三倒四嘅敘述下，我先明白事情嘅始末。
阿康並唔係一個合租嘅朋友，而係佢係大學時識嘅男朋友。
因為性別嘅原因，大家唔敢開始拍拖，佢哋試探、退縮、不捨、糾纏，最後終於一齊咗，畢業後搬咗出嚟同居，咁就一齊咗七年。
下集：https://bit.ly/35EjGSP
將專頁設定為「搶先看」/ "See first"，最新故仔馬上睇！
長生不死之後：https://goo.gl/EMHtc4
突然間，有個靚女追我：http://bit.do/e54zQ
#短故 #短篇 #小說 #陳美濤 #廣東話 #粵語 #tomatochan #我等你等到永遠
send錯email比人英文 在 【職場小薯英語- 補鑊Email 2 】... - Wall Street English 的推薦與評價
職場小薯英語- 補鑊Email 2 】 上星期同大家講出錯嘅時候❌，點Send 一封有誠意 ... 令人覺得你嘅悔意之餘 ♂️，仲會令人覺得比起道歉更有效、更實際 ❗ I will make. ... <看更多>