.
【3月號 關於生活專欄】
.
當大家WFH一年半載，不停叫外賣返屋企然後Zoom住開會，卻發現越來越冇時間，其中一個原因當然係放工時間完全含糊，夜晚九點都可以理解為OT時間，老闆叫到冇得唔應機（已經減咗薪冇bonus但都仲要保住份工）。好了，到私人時間，其實更忙，聽落好似唔係好合理，但正常人都會更新或追FB IG，長期留意新聞及港美股市（逆市下另類免稅收入），再八卦點再跟連登高登（起碼知道自己區域樓宇沒機會被封鎖），同時間應付WhatsApp Telegram 朋友更是基本動作。
.
網上遊戲已經不是我杯茶，否則更加唔駛瞓，但見身邊朋友打三國、麻雀、射波⋯⋯每日至少兩小時，令我懷疑人類過多兩三代應該會盲，又或者可以長線投資眼科醫療股。最近由於FB因為封殺帳號扼殺言論自由，大家又一齊搬屋到MeWe ，又因為WhatsApp 開始要帳戶接受不平等條約，有侵犯私隱之嫌，然後大家像非洲動物大遷徙一樣，全部過檔Signal。我已經屬於反應慢中坑網民，即睇定方安裝，無謂將自己變成手電八爪魚，俗稱新屎坑免疫，但都下載定後備程式，無謂等被DQ一刻時渣都冇。
.
最近，又有一個Clubhouse的新屎坑，係即時語音討論區，一聽已經耍手擰頭，因為太多地盤要照顧。但同時間身為創作人，需要緊貼市況，俗稱女廁有活動我都想了解下，最後，我真係入咗女廁偷聽，聽聽下又幾吸引，越夜越多八卦嘢，編劇都編唔到嘅情景，結果每晚臨天光至瞓。
.
屎坑，總會變舊，屁股，只有一個，時間，每日只限廿四，天蠍座太理智，難喪智，但同時間又會沉迷，好鬼矛盾，總之有緣於各大平台見到就見。 二千幾年前莊子《庖丁解牛》其實一早講咗：吾生也有涯，而知也無涯 。以有涯隨無涯，殆已。已而爲知者，殆而已矣！
.
——〈生死兩忙〉
梁栢堅
.
三月號《藝文青》已上架，可在7-11便利店、OK便利店以及各大書報攤購買。
.
#梁栢堅 #專欄 #關於生活 #藝文青3月號 #藝文青 #asartisticasyou
signal封鎖後 在 小鹿網路加速vpn - Signal遭中共封殺要VPN「翻牆」才能使用 ... 的推薦與評價
而Signal被封後目前仍可在中國蘋果App Store上下載，但在安卓Android的商店已經無法使用。 愈來愈多社群被封鎖了，但有VPN的我們不用怕! | Facebook ... ... <看更多>