香港迪士尼喺2016年底公佈樂園擴建重整計劃, 經過咗差唔多五年嘅時間, 整個計劃完成咗一半. 但喺公佈計劃之後, 園方亦有為樂園部分位置進行翻新改建.
唔計喺公佈計劃之前已推出嘅Star Wars 同Duffy Shop 等等嘅改裝, 睇睇過去呢五年樂園出現過咩新項目.
Main Street
1) 小鎮沖印店縮小店面範圍加入Marty’s General Store, 其實並唔知呢間商店嘅定位同對面Emporium 嘅分別, 雖然知道改呢個名係為咗向Disney Legend Marty Sklar 致敬, 但1910年代嘅小鎮大街出現建於1934年嘅商店係奇怪.
2) 同樣出現時間錯亂嘅仲有Since 1912 小鎮雪糕店, 雖然小鎮大街嘅故事為迎合呢間新雪糕店而由1910年向前行咗兩年, 但其實Since 1912 都係奇怪, 正如你行街見到有間舖頭掛住個招牌寫Since 2021. 唔係唔得嘅, 但會笑囉.
3) 大街餅店一分為二改建成一半餅店一半咖啡店. 同樣都係美心主理.
4) 另一個由美心主理, Plaza Inn 內部重新粉飾. 當中嘅十二生肖裝飾係值得欣賞.
Adventureland
1) 加利布尼市集, 但依家受疫情影響或營運考慮已經幾乎長期關閉.
2) Moana: A Homecoming Celebration. 有佢嘅加入係令到逗留喺探險世界嘅時間延長, 基本上係唔錯嘅演出, 只不過戶外熱啫, 會唱兩句或播兩句歌應該會更完美.
Fantasyland
1) Castle of Magical Dreams, Disney 史上首次改建城堡, 香港迪士尼全新樂園地標, 考慮到配合不同天氣狀況嘅設計, 雖然Fans 們評價兩極, 但普遍都係讚. 冇Walk through 上唔到城堡仍然係一個不完美嘅體驗.
2) Bibbidi Bobbidi Boutique, 個人覺得係呢五年間最出色嘅改裝工程. 基於對象有年齡同性別限制, 唔係太多人能夠入到去. 假若呢間Shop 有個恆常Tour 嘅話, 應該都會好受Fans 歡迎.
3) 尋夢奇緣. 一個被硬推上城堡舞台嘅streetmosphere show. 由創作時期已種下嘅失敗, 喺全年最炎熱嘅天氣下推出, 令呢個演出未能造成話題, 感到惋惜同尷尬嘅係園方將宣傳重點由個演出本身轉移到販賣演員同幕後團隊嘅人生奮鬥故事, 亦可見呢個演出冇嘢可sell.
Tomorrowland
1) Iron Man Experience. 以Star Tours 為基礎, 全球首個Disney 創作嘅Marvel 遊樂設施.
2) Nano Battle. 等候區所營造嘅緊張氣氛一上到車就急速下降, 幾乎靜止嘅世界造唔到大戰嘅效果. 令人更掛住巴斯光年.
仲有灰熊山嘅翻新, 回復到新嘅一樣. 好靚.
