一直都講，其實我唔介意有人約我去睇D古靈精怪戲，因為我自己一個一定唔會揀呢D戲睇，同其他人睇變相拓闊咗我嘅見識同眼界。
好次今次咁，原先一見張飛個名寫住《I Love You I Love You》，以為係愛情文藝片，去之前真係非常擔心唔夠訓嘅我會響戲院訓著，所以出咗街都特登番屋企補眠兩分鐘先再去。去到藝術中心現場拎起本小冊子睇先知道原來係法國電影大師Alain Resnais嘅「科幻大作」。跟住再睇呢個〈The Taste of Cult〉放映系列，有我睇過嘅《Starship Troopers》、《Dr. Strangelove》、《Blade Runner》（今次播嘅係Final Cut版）；又有我想睇嘅《天降財神》（David Bowie型爆）、Chris Marker嘅《Level 5》、Roger Vadim嘅《太空英雌》，作為SCI-FI撚梗係非常興奮兼期待，呢套原名《Je t'aime, je t'aime》究竟會有咩新衝擊。
不過正式開場之後，又發覺其實套戲嘅科幻成份好少，不過係「掛科幻頭賣愛情肉」：《Je t'aime, je t'aime》個故事大概係講，有班科學家發明咗部機器可以將人同動物送番去過去一分鐘，於是就搵咗之前自殺不遂嘅男主角做試驗品；點知實驗一開始就失控，男主角變成不停穿插於過去不同時期嘅回憶之中，回顧番佢一段愛情嘅經歷……
點解我話呢套戲係「掛科幻頭賣愛情肉」呢？因為以穿越時空作為主題嘅科幻橋，都必定觸及一個元素：改變未來／過去，無論成功與否。可惜呢套《Je t'aime, je t'aime》所謂穿越，其實只係男主角重新再經歷一次過去，而無辦法改變任何嘢：簡單黎講，就算電影入面無果舊時空機同科學家，而將劇情設定成男主角跳躍於不同時期嘅回憶，基本上係全無分別！所以入面所謂嘅科幻元素，不過係嘩眾取寵嘅Gimmick而已。
既然唔係好關科幻事，咁《Je t'aime, je t'aime》有咩值得留意？其實套戲真正嘅主題，係在於透過時空交錯嘅回憶，短時間重現番一套戀情點樣由相識、熱戀、平淡、冷卻等等嘅階段。點解同樣係愛一個女人，唔同時期嘅態度可以相差咁遠？呢種因為時間而逐漸改變嘅痕跡，導演透過高密度嘅剪接拼湊一起，個感覺就變得好震憾。其實最近我翻睇某D FB/Whatsapp Massage，響好短時間內回顧一D過往關係非常親密嘅朋友，點樣最終變成陌路人甚至反目成仇，呢樣真係有好深體會。
既然套戲強調回憶拼湊，咁當然第二樣嘢值得留意嘅就係剪接。WIKI話Alain Resnais唔承認自己係新浪潮成員，不過以我睇幾套呢個時期法國電影嘅經驗，都係場景轉換位係好特別，同一般荷里活電影好唔同。當然一去到「回到過去」果部份，除咗最初果種反覆感有D震撼，基本上都係剪到七國咁亂。因為佢個回憶設定只得短時間，所以好多位都係太零碎（短則十幾秒，長則分零兩分鐘），對於吸收劇情實在有D難度，結果我都忍唔住中咗幾次眼訓。但話說回頭，我又幾鍾意佢個結局：原先佢自殺失敗而自願進行實驗，去到實驗最後一刻佢真係去番自殺果幕再回到現在，終於重新肯定一次，其實佢仲係好愛女主角……呢個位睇到我有少少感動。
綜歸黎講，《Je t'aime, je t'aime》對於男女關係嘅轉變寫得好到，加上Claude Rich同Olga Georges-Picot演得唔錯；但查番網上竟然無乜中文影評，唔知算唔算被埋沒咗嘅佳作。
starship wiki 在 Starship SpaceX Wiki - Facebook 的推薦與評價
Starship SpaceX Wiki. 119 likes. The official Facebook Page of the Starship Spacex Wiki. https://starship-spacex.fandom.com This wik. ... <看更多>