“Sunderland ’til I die” (Season 1) — 至死不渝
Medium: link.medium.com/gPA41CT8G5
//
Netflix 嘅紀錄片 (我更加覺得係紀實連續劇，英文字 “Docuseries” 大概都係咁解) 相當之多元化而且製作認真，作為一個體育迷，賴叔喺 “Drive to Survive” 之後，搵到以英格蘭球會新特蘭為主角嘅 docuseries “Sunderland ’til I die” (以下簡稱 “STID” ，我好懶) 為觀看。
STID 目前拍咗兩季，第一季有八集，第二季有六集，分別紀錄咗 2017–18 及 2018–19 兩個球季嘅故事。如果對英格蘭球壇唔太熟悉嘅朋友，我建議就咁直踩 14 集，唔好手多多走去摷最新嘅新聞嚟睇。原理，就同入戲院之前唔好睇劇透影評差唔多。一旦知道現狀， STID 眾多畫面及懸疑鏡頭就失去咗意義架喇。
至於本身跟貼球壇消息嘅朋友，我覺得 STID 觀賞價值係一般般嘅，畢竟入面講嘅嘢唔算特別深入，喺每集 30 分鐘嘅空間入面，能夠交代嘅事情亦都有限。如果你係東北部球會紐卡素或米杜士堡嘅球迷，鍾意喺宿敵嘅傷口上灑鹽，咁呢套 docuseries 對你哋嚟講又有另一番風味。
- - -
喺劇透之前，或者都簡單交代下我對新特蘭嘅認識 (即係冇經過 Google / Wiki / research 之下就咁講) 。呢支綽號「黑貓」嘅球會，係著名嘅「升降機」，過去廿幾年以來，反覆來回頂級嘅英超同次級嘅英冠都好幾次。 1990 年代末佢哋有高矮雙煞 Niall Quinn 同 Kevin Philips 孖寶在陣，守門員係丹麥國腳蘇連遜，以中小型球會嚟講都總算曾經光輝過。
新特蘭嘅主場 “Stadium of Light” 中文直譯「光明球場」，容量達 49,000 人，喺英格蘭球壇嚟講絕對唔失禮，另一支老牌球會愛華頓嘅主場葛迪遜公園 (Goodison Park) 爆棚都唔到四萬人，同樣來自東北嘅紐卡素主場聖占士公園 (St. James’ Park) 容量亦都係 52,000 左右。可想而知，新特蘭呢間球會嘅規模，或者比上不足，但比下，絕對有餘。
不過 STID 第一季嘅背景，就係講緊新特蘭剛剛喺英超降班，行政總裁 Martin Bain 著手重建球會，爭取盡快重返英超行列。背後嘅壓力，主要都係一個字：錢。英超 (English Premier League) 作為歐洲四大聯賽之一，商業價值龐大，電視轉播權嘅收益相當可觀。降班之後，雖然有所謂嘅 “parachute payment” (合共 9,100 萬英鎊，喺球會降班後三年分批發放) 補助，確保球會財政上「軟著陸」，但係開源節流嘅功夫都係必不可少。
喺一般嘅情況之下，公司縮皮，裁員就係最容易嘅方法。但係足球球會嘅世界有少少唔同。由於球員一般都係用有年期嘅合約同球會簽約，除非有條款訂明，否則球會降班之後都冇得夾硬將球員嘅工資下調。相反，球員如果有其他球會青睞，大可以要求轉會他投。喺僱傭關係嘅天秤上，降班後嘅新特蘭明顯地處於弱勢。
接掌球隊帥印嘅教練 Simon Grayson 手頭上就係有一大班唔多願意陪新特蘭降落次級聯賽但係又人工豐厚嘅球員。點樣鼓動佢哋同舟共濟？點樣配合會方削減開支嘅要求，而限米煮限飯？呢啲問題，喺班主 Ellis Short 入主近十年之後決定拒絕再泵水施救嘅情況下，變得更加嚴重。 (值得一提， Ellis Short 曾經係私募基金 Lone Star 嘅副主席)
- - -
球會風雨飄搖，最受傷嘅，其實係球迷。
新特蘭位處英格蘭東北部，昔日係造船業嘅重鎮，但隨住英國經濟轉營，區內經濟好景不再，居民嘅收入自然係好極有限公司。作為市內唯一一支職業球隊，新特蘭成為咗眾人嘅精神寄託。由星期日返教會嘅信眾，到凍肉店嘅員工，無不對球會成敗榮辱牽腸掛肚。
STID 一直追訪幾個新特蘭老牌球迷，個個都買咗十幾廿年 (或更長時間) 嘅季票。睇住佢哋由英冠球季開鑼滿有信心，到球會成績疲弱不振而時有挫敗、氣餒但對「黑貓」始終不離不棄，喺香港嘅各位觀眾可會諗返，香港人有啲咩嘢球隊可以撐？或者都係香港足球代表隊同埋一眾為港爭光嘅運動員啩⋯⋯
除咗球迷， STID 亦花唔少時間追訪球會嘅工作人員。喺體育行業，球員同教練固然係焦點。但係球會營運嘅部份，其實都有好多員工喺幕後幫手，例如話掌管廚房嘅 Joyce 、負責門票、管理嘅團隊等等。對於佢哋嚟講，能夠盡可能幫助球員以最好嘅狀態迎戰每場比賽，能夠為球會賣出最多嘅門票，已經係盡咗佢哋嘅本份。至於球隊嘅成績、升班降班，佢哋只能夠甘苦與共 — — 如果球會冇因為節省成本而裁員嘅話。
- - -
某程度上，我覺得 “STID” 搵新特蘭作為 Docuseries 嘅主題算係神來之筆。因為「黑貓」喺 2017–18 球季嘅進展，絕對講得上係 dramatic 。由第一集睇到第八集，大家會清楚見到眾人嘅精神面貌如何變化，當初嘅信誓旦旦或信心滿滿，到最後如何變成肉隨砧板上，不得不逆來順受。
新特蘭嘅興衰背後，固然有不幸嘅地方，但更多嘅係球會承受昔日自己大花筒、藥石亂投嘅惡果。但凡球員並非同心同德，而係各懷鬼胎，打算大難臨頭各自飛，喺狗咬狗、腳踢腳嘅英冠聯賽，球隊實在難以生存。即使球隊換上有來頭、有魅力嘅教練 Chris Coleman 都好，球隊唔能夠保住勝果，後防又漏晒水咁，就只可以換來一班至死不渝嘅忠心球迷嘅一泡眼淚。
Credit: https://flic.kr/p/cUdU45 by Ronnie Macdonald
- - -
想睇更多賴叔時政見聞、金融掃盲及職場文章，請訂閱 Patreon:
https://www.patreon.com/shuklai
#hk #hongkong #patreon #blogger
