關於 take two股票 ，我們在網路上蒐集到這些相關的討論、資訊與評價

［嘩啲大陸佬財富蒸發晒慘慘豬］擔心恒大嘅，不如顧掂自己先？

TLDR：驚？驚都冇驚過。台上一分鐘台下十年功啦。你著咗泳褲未？

＝＝＝＝＝＝＝＝＝＝＝＝＝＝
已經2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！

＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。

1. BTW，你見阿富汗都打完，林作都打完，個「勞蘇基金」都未搞。係有原因嘅。有人以為唔夠客，都真係未免太睇少我，錢係有的。甚至反而係唔少人問我幾時起壇，仲急過我。但你又諗下，換著我早兩個月搞，一搞你啲錢就輸咗一截，你唔媽死我？咁就冇癮啦。我就唔time market，但啲錢係你架嘛！定你覺得換著我搞就可以逆市賺錢反手造淡？（不過，有可能我輸嘅錢少過你輸嘅，都重要的）。

2. 唔係話乜，但呢方面嘅良心我還是有。拎住你啲錢喎，壓力點同？真刀真槍落場去砌嘛，唔係日日講A股爆煲喎（結果遠遠跑贏恒指，嘻嘻）。講真我仲緊張過自己啲錢，因為我有定力，但你冇嘛。

3. ASML 跌4% 都有人嚟PM我啦。我畀大家一個魚蝦蟹式嘅統計問題：我渣住四五十隻股票，然後有2000個 Patreon讀者。設若任何一日嗰四五十隻有任何一隻跌4%，就有1%嘅讀者（即係20個）PM我，咁你估下我一日會收到幾多message？

4. 我Patreon週末篇財務自由文生不逢時，但冇所謂。升市個個都股神啦，有啲衰格啲嘅嫌我啲嘢升得慢添，Google（拿今次唔講ASML廢事你又話嚟講嚟講去得一隻）升幾倍都升得慢添，有乜好講？

5. 但實情就係跌市先要保心安嘛。有啲PM問我點好，但原來唔係Patreon讀者嘅，就唯有有禮貌地話知佢啦。平時就一舊水都嫌貴唔上堂，而家就Don Corleone Give me justice　點算好。平時教教咗你點算好咯。

6. Patreon啲讀者都嫌我煩，但今年我已經不停講「唔會永遠都咁順景」。正係跌市先見真章嘛。你見昨年二月美股都全部股神，一個肺炎打落嚟咪全部死晒。今年一樣，二月時推Facebook 都畀主持人話太保守，個個抄契媽功課，一樣好快就死晒。

7. 唔係我早知會大跌或乜，只係mean reversion，固然連掟七次雙數後下次單數嘅機會唔會大咗。但你今晚連掟七次雙數，好大機會聽晚冇今晚咁叻。我以為呢個係常識。

8. 本人並非幸災樂禍，我買港股都輸錢。問題係講咗N次，邊個叫你只買港股？邊個叫你30000點買20000點沽？

9. 嘻，買A股都唔使輸咁多呀

10. 搞笑在，個個都知大陸啲政策難以預測唔知想點，偏偏又個個中南海密探上身。咁，密探有冇教你上星期沽空長實？係呀，個個知大陸佬搵笨實呀，咁你又買晒港股？

11. 實則好簡單，都係嗰幾味。我唔係只買港股，唔係只係高位買，咁有乜好驚？當然港股部份都會輸錢，但其他（暫時）都夠冚

12. 何況，都寫咗好多次啦，你唔使妄想咩高位沽晒反手造淡（做到嘅恭喜你）。根本唔使諗埋啲咁嘅嘢，就算你做到你都唔敢玩得大，到頭嚟幾皮嘢執兩三倍又出嚟認叻。

13. 你贏嗰時畀人地贏得多啲，唔好買得少少，唔好10%走去take profit．輸嗰時輸少過人，唔好低位打靶，唔好買晒啲垃圾。咁樣玩幾個周期，就已經拉開晒啦。

14. 雷曼時刻？冇驚過。但亦唔代表唔會跌，唔跌亦唔代表你唔會輸錢。今年環球股市十個有八個都升（包括上證指數！哈哈哈），但都大把人輸錢啦。

15. 本人就絶不販賣恐懼，如果你長期輸錢或者跑輸大市嘅，你可以諗下，到底原因係乜。係你借錢？買得唔多？定係永遠先高位買入去？定係只係買港股？既然數字上話畀你知股市長勝，咁你輸錢嘅，總係有啲原因嘅。

16. 例如舊年3月我買美股，但你鬧我仆街死財演咁咯。

17. 大陸佬愛講，市場不缺錢只缺信心。我就不缺信心，只缺錢。

18. 驚都冇驚過呀。

19. 記住，跌市先見真章嘛，今晚Patreon寫，雖然都冇乜特別好寫。

＝＝＝＝＝＝＝＝＝＝＝＝＝＝
已經2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！

＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。

［今日寫呢啲］實情原本唔係好想寫，但要對得住讀者嘛。你估返工咩。

係喎，中間遮咗一段添，天機嘅嘢。

＝＝＝＝＝＝＝＝＝＝＝＝＝＝
已經2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！

＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。

先講美股，已經連跌兩個星期，但講緊3%都冇。有個讀者見ASML跌4%又嚟PM我，我都唔知佢想點。唯有都係贈佢一句：升幾倍然後跌4%又驚又要止蝕嘅，都係返屋企磨墨啦。莫講話5% 10%，30%我都冇驚過。

因為講到尾，好簡單，股票一般係升嘅。已經講完。咁你覺得自己可以隻嘢10蚊跌到9蚊買然後11蚊 take profit 8蚊止蝕嘅，就自己去試下啦。

但對我嚟講，股票嘅嘢，最緊要都唔止係揀啱股，最緊要係買得大。同埋時間。否則你去賭波好過。講過無數次啦，大大棍，然後贏佢幾倍，咁我就算其他幾隻輸錢都夠冚有突。

你要寫嘅，美股大把利淡理由添。實情你話我廢話都好，但，日日都有人沽架啦（舊年3月我咁講又畀人鬧仆街死財演了），每單交易都有人買有人賣，咁即係有人睇好有人睇淡，永遠都兩邊有理由，否則點會有人賣畀你？你要講嘅，由債息到通脹到盈利到債務上限到估值到孖展乜都有得講。但股市唔係南宮夫人信箱，股票長升唔使有任何理由。

港股嘅，我知，中秋節嘛，雷曼爆煲。我做緊分析員中秋節要返工添。咁你梗係講恒大。

我就都唔知有乜好講，但恒大正路下星期就會還唔到利息，aka違約。之但係，一早講晒，銀行都預備好晒，仲有戲唱？雖然，講明打你塊面都仲係痛嘅。

我見唔少人都講，雷曼當時債務只係XXX億，恒大而家幾多億。咁呢度已經犯幾個錯誤。首先，你可以睇下十幾年嚟印咗幾多錢，銀行嘅股本膨脹咗幾多。第二，資產格價跌一般害唔死人，正如聽日美股跌五成我都唔使跳樓，幾時係槓杆害死人。金融海嘯前嘅銀行，一蚊股本頂五六十蚊資產。啲資產跌2%已經成間wide out，你可以望下而家槓杆低咗幾多。唔明係乜？就Patreon先解你知。

但最重要係，真係冇可比性。雷曼最大嘅危險，係因為佢係一間銀行，會影響成個金融體系。所以個問題並唔係其他人蝕幾多錢，而係咩人蝕錢。你可以望下恒大爭銀行嘅錢，以工行農行嗰啲規模，食得起有餘。我在Patreon有寫。咁你另外啲咩ETF呀 其他人輸錢，就貴客自理了

當然你見我在Facebook Page係唔會詳細寫的。因為，what for？因為啲人鍾意聽爆煲嘛（話時話港紙爆煲未？ Kyle Bass發咗達未？）。佢地由年初一到年三十晚都係講爆煲？但冇所謂的，又唔會買，永遠冇得輸，錯幾多次都得。我就真金白銀玩，唔使出嚟辯論比賽，犯不著出嚟講「唔會爆煲」啦，萬一我錯呢？又畀你鬧十世話仆街死財演呃人話唔會爆煲。我有乜著數？咁但我又不能違背良心咁日日寫話 雷曼重臨喎，所以咪只在Patreon話你知詳細係點

話時話，今年上證指數有得升添，堆內銀跑贏大市添。你可以望下2008年係咪咁。

呢個亦係Good Read入面人地寫嘅嘢。你覺得我仆街死財演老點你嘅，咪睇下其他人點講，當然唔係你啲中環都未返過嘅網友啦。

第一篇就係講恒大唔係雷曼時刻，理由一同我樓上講嘅一樣，基金渣之嘛，同你啲網友一樣，輸仆街關人撚事。第二，佢相信政府點都會協調下。第三，恒大始終持有啲資產，唔係雷曼嗰啲垃圾。西洋香腸寫的，唔係小粉紅。Patreon就有全文

第二篇，有機會我都細寫，但啲咩「理財教育」真係得啖笑。香港地照計個個都覺得理財好重要，但咩係「理財教育」？咩人教你？梗係金融機構。你唔幫我買保險你就退唔到休架啦。咁你話係咪多餘？而且，其實咩係financial literacy？學咗係咪炒得叻啲？即係我唔貪心諗住一年三成回報就夠嗰啲？相當好嘅文

每日一圖嘅，同你睇下標普指數成份股，見到壽命越嚟越短。當然係因為啲新公司disrupt得越嚟越快（又，知唔知點解？因為錢太多，金本位呀死亡呀）。咁但，有乜投資上嘅啟示？文入面講

第二圖嘅，仲正，畀你睇下咁耐以嚟蘋果每次出產品後嘅股價走勢。你發現，差不多每次啲產品都係冇創意的。但股價就升咗幾十倍。

＝＝＝＝＝＝＝＝＝＝＝＝＝＝
已經2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！

＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。

［記得四哥發哥都已見過面。後來榮升主角太突然］（＊）Dear, write some god damn thing

TLDR：下個月開始，《信報財經月刊》有我。記得買。

1. 我有無數咁多古怪嘅寫作習慣。其中一個唔少人知，就係我篇文寫乜都未知，幾時會有都未知，但一早會有個題。例如我篇《楊枝甘露的誕生》，聽講係愛情小說，寫咗廿幾年只係得個題。《第一次的親密接觸》嘅作者痞子蔡都有呢個習慣，小說一定有咗個題先，然後先寫。

2. 我更進一步，十幾廿年前已經會有個題，等件事發生。好似門捷列夫個元素週期表咁（Periodic table，啲化學畀返晒老師未？）。同你估嘅唔同，當年佢整個表嗰時，唔係列晒1—100出嚟，當時唔少元素根本未被發現。但佢一早留定位，知道會有一個咁特性嘅元素，一直都在，只等你發現。後來果然後人就發現到嗰啲元素，性質同佢預期嘅差不多一樣，成件事實在型到不得了（＊＊）

3. 當然我唔係門捷列夫，我不能確定呢一日會發生。可能十年，三十年，甚至死嗰日都唔會有。因為涉及太多嘢。但總之，呢篇文個題，係我好多年前已經諗的，just in case．而家就可以解封了。

4. 忘掉那一天，記不起是那年，但應該係好早期，我甚至未做金融。有一年，我在書展，見到有個唔靚仔嘅瘦皮猴，推銷緊佢本新書，好似唔太多人理佢。佢話可以幫我簽名

5. 嗰個，就係龔耀輝。

6. 後來嘅事，係我開始打銀行工，開始睇《信報》。一來公司有，二來Reuters部機上面有。

7. You are what you read，最早期我可能受陶傑張小嫻影響，後來我就受游清源影響。金融方面，當然就係睇《信報》時，蔡東豪同龔耀輝。

8. 等我懷念下當年，circa 2004 -2006，我在美國銀行大廈返工（蕉行嘛）（＊＊＊），閒唔時就係睇下《信報》，就係睇佢幾位老哥。當時我成日午餐就在和記大廈（已拆）間星巴克，記得嗰時個姐姐認得我，我漏低咗嘢幫我keep住，仲手寫住我個名（星巴克姐姐知你個名有幾奇？我又唔會用假名）。硬係覺得嗰時嘅人心好啲，星巴克啲女都靚啲。定只係嗰時後生，入世未深？

9. 無論如何，嗰時我就心諗。嘩，幾時有一日到我會寫《信報》？

10. 至少在2000年時，我已經發夢在報紙在專欄作家。當時厚著面皮厚著包皮咁電郵某人請教，仲畀佢第日在專欄串我。但，佢講得冇錯嘅係，write some god damn thing（唔係原文）．呢個亦係我而家叫啲小朋友做嘅嘢。

11. 時間飛到去大約十年前，《信報》搞咗個「動筆動思考」嘅東西。作家培瞓，或者當搵新血咁。當時我在耆英已撈得不錯，但寫作嘅事業，等於零。

12. 而去到呢個位，我實在so gay都要講。我大學年代識嘅嗰位網友，已經實現咗自己嘅夢想（算係？），在有線講咗波好多年。佢點入行架呢？正係參加咗有線嘅比賽。我仲要係睇住嗰場比賽，甚至記得佢係講曼聯對車路士。舊年同佢食飯講起，佢當然完全唔記得呢件事。

13. 不能話受佢影響，因為當時佢已經講咗好多年。但總之，「動筆動思考」壇嘢，我就覺得自己都係要write some god damn thing，寫咗篇文去。三十歲那日不要臉，參加了挑戰

14. 有圖有真相，我都唔知我仲keep住呢個email

15. 結果？我有個朋友入圍（唔係寫金融的），本人當然名落孫山。明顯寫得未夠好，或者緣份未到。

16. 又或者，係未夠努力。

17. 當年某評審睇咗我篇文，問我有冇啲正經啲嘅（陰功，我以為嗰篇已經好正經！）。正常真係好飢饑嘅人，應該會寫多篇。但我好似只係回佢：冇喎，這是我的風格。（唔肯定有冇第二句）

18. 咁，who cares你咩風格？邊位？

19. 況且，Let’s be frank，機會成本。我由中學開始已經鍾意寫嘢，但畢竟你鍾意唱歌同你去紅館開演唱會係兩回事，你鍾意踢波同你去咗奧脫福踢一隊又係兩回事。

20. 正如上面講，當時我在耆英都撈得不錯。當然都熱愛寫作，但我都熱愛空姐（誰不愛），但我總不會日日走去約空姐，對不？唔使返工咩。咁我摶上位升職加人工緊要，定寫文緊要？

21. 你可以話即係我未夠熱愛，或者寫得未夠好，總之whatever，就又過咗十幾年。媽的，人生有幾多個十幾年？

22. 但生命嘅嘢真係唔係一條直線，卒之2021年，《信報財經月刊》，搵我寫嘢！

23. 我唔記得係「四哥」定「發哥」講（懶FC了），當年《信報》搵佢寫文，佢嘅反應係「𦧲飯應」（原文照錄）。亦係我早兩星期嘅心情。

24. 講多無謂，write some god damn thing．稿已交，講日本股票。10月頭會出版，到時記得買。最開心係佢地可以畀我寫三千字。

25. 當然啦，如今我四十看從前，枝筆已鬆軟。「四哥」「發哥」都冇再在《信報》寫文。但唔緊要，依然仲有好多好嘅作者。唔係講我啦。你也可以是孔少林，我們都是原復生。

26. 彩蛋：當年，2006，唔知「四哥」定「發哥」在《信報》，貼中意大利拎冠軍，鳩威咗一排。今年，2021年，本人一樣貼中意大利拎冠軍！固然都係七分好彩，但，至少寫波，我就應該勝過「四哥」「發哥」了。

27. 彩蛋二：居然畀我搵得返當年掟去嗰兩篇稿，不如遲下貼上嚟？而家睇返，「都唔係真係咁差啫」，「咪同我而家啲文差不多」。證明我過去十幾年都冇乜進步過，但可能啲讀者品味越嚟越低，造就我都有人睇。又或者「四哥」「發哥」等等收晒山，池中無魚蝦自大，廖化作先鋒咁。

（＊）都係鍾意高登改版多啲。「記得飯島　松島　都已見過面 後來榮升主角太突然」。原諒我騎劫咗一個應該相當文藝中產嘅post，但，唔通中產文青唔睇AV？早兩年我去到松島（牛舌！）打卡亦都係貼呢句歌詞。不過in case anyone care，我係既唔睇飯島，亦唔睇松島嘅。甚至三上悠亞 波多野結衣我都係唔睇的。懶係唔跟主流嘛，由呢啲嘢都睇得出。但又不過，你見我買股票又係買返 Facebook Microsoft 等等，主流到唔主流，所以唔好輕易將 「平時嘅口味」同投資嘅性格撈埋嚟講。正如跑馬拉松嘅人，未必買股票有恒心。運動員在場上可以受壓，可以超高心理質素，但唔等於唔會有心理問題，唔會亂買嘢傾家蕩產。世界唔係咁簡單

（＊＊）好多書有講，例如呢本（https://bityl.co/8eCm）

（＊＊＊）無獨有偶，嗰時我去耆英證券見工，都係嗰度！仲要係樓上！「所以唔使請假見工」。最正係我take咗佢地offer嗰日，放工就撞到後來嘅鬼頭上司同我一齊迫電梯。

＝＝＝＝＝＝＝＝＝＝＝＝＝＝
已烴2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！

＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。