［讀大學仲係好投資］之前寫過，香港讀Master，嘥錢嘥時間 （http://bit.ly/2XGuslE ），篇文都幾受歡迎。
但入面我講到，大學仍然係要讀嘅。我當然係講錢，至於咩追求知識嘅獨立思考呀不在討論之列，事實上我幾肯定你拎啲錢同學費去睇書會好啲
或者如舊文講：你睇我啲文肯定獲益多過你讀啲濕鳩Taught Master。仲唔使錢添。仲可以在公司睇添。
總之，我讀書叻撚過好多人，香港得一間大學我都仲入到，但我確信對絕大部分人嚟講，大學就係沙紙，入場券，最低資格，職業介紹所，好投資。堅持講咩學曉獨立思考 團隊精神（一齊做project 學榮耀自己拎或者做free rider 嘅，不妨個個假想實驗：你唔好拎張沙紙，唔畀你提個學位，制唔制？你咪拎你啲獨立思考見工。
獨立思考下話？素人父母疫苗撚湯禎兆林綸詩兩公婆都大學生，一流大學唔係野雞買學位廢拉科。NBA個 Uncle Drew Kyrie Irving名校 Duke 添，不過話地球係平嘅。順勢療法水晶能量撚周兆祥係博士添
現實係果啲咩「大學本意」同「支那本義」「納粹敬禮本意」一樣咁離地。半世紀前講都仲得，而家阿豬阿狗都大學啦，邊使咁多人學術研究。而另一方面大把知識唔使讀大學都拎到。對唔送薄餅嘅絕大多數人嚟講，大學學主要（甚至唯一用途）就係沙紙，入場券，最低資格，職業介紹所，好投資。
咁有人反駁話而家又有最低工資，大學生一街都係，讀大學都冇意思，出到嚟人工唔見得高過藍領或服務業。呢排更加講開譚仔阿姐人工高過普通大學生
其實好簡單，又係供求，況且，邊個話你知大學生一定巴閉過譚仔阿姐？但掉轉講，譚仔阿姐再做都係阿姐，大學生十年加幾倍唔係出奇。
咁其實我唔係數據流，正係因為讀精算出身更加憎呢啲嘢。但咁啱有文有圖用，就講下
（明報原文 http://bit.ly/2XC61pB 趙永佳、黃健偉：4張圖看懂青年就業與教育不平等）
兩位作者啲文我唔特別鍾意，但呢篇寫得幾好。首先呢，佢地之前做過研究，香港學生嘅PISA評估成績，同屋企環境，關係唔係太大。
但呢篇就講之後，講人工，講入大學機會。個分嘢係呢度先見到 （其實我覺得出嚟做嘢之後果幾年分得仲大）
佢地今次係計在職青年，青年係指20-29歲。首先，一街大學生，好似未係好真。有大學學位嘅青年，四成（包晒後來逢三進一副學士再上或者外國讀嘅）。冇嘅，六成。
而其實好明顯見到，讀大學嗰堆，人工係高過冇大學嘅。你計埋讀大學嘅時間科乾咗三年（而家四年？）人工，都係抵嘅。
況且，香港大學學費，其實唔貴。又鬧？香港嘅大學學費，由我讀開始都好似冇加過。我在Warwick個Master？廿年加價四倍。
在日本同朋友嘅朋友食飯，佢呢個月大學畢業，要還學債。問佢還幾錢，答曰兩百美金。咁唔係太多，負擔到丫
但佢總共還幾多就精彩咯：答曰— 五百萬日元！ Five Million Yen！
我再三問清楚佢，寫埋出嚟，睇下佢有冇搞錯我有冇聽錯。五百萬？五十萬下話。但佢話真係五百萬。即係三十五萬港紙！
再問，佢話其實因為有埋利息（雖則我唔明做乜日元明明零息咁滯都咁貴息？可能佢借財仔，我冇問）。唔計利息，就三百五十萬。但都廿五萬！
但問返其他朋友，話差不多了，四年嘛，咪一年六七萬咯，貴過香港好多咯
又，都唔記得而家係四年，又爭好遠。即係孭多幾萬蚊債，又少一年收入，一來一回真係畀多十皮嘢—但其實有乜幫助呢，可？
無論如何，讀大學都係值得玩嘅投資，但我相信呢個優勢只會繼續消失。到有一日讀大學都唔化算嘅，再update 大家
下篇文可能講下MBA
taught master意思 在 讀master中文2023-在Facebook/IG/Youtube上的焦點新聞和 ... 的推薦與評價
碩士學位可以稱為master's degree，而完成碩士學位的人則可以稱為master，指正在就讀碩士的學生，可以說master's ... Graduate School、 Graduate degree 中文意思. ... <看更多>