【 年尾流流睇乜嘢之 駱振偉 Thor Lok 推介 】
聖誕流流睇啲乜之《做演藝嘅！》：http://bit.ly/2EPikYA
過去一年，到底做了多少藝人訪問？詳談的、閒談的……已數不清！然而因為工作實在太忙太癲了，很多錄音根本無暇整理，隨時要待上兩三個月甚至半年，才可以趁放假時將之變成文字。像今次這篇短訪駱振偉，是2018年1月為了配合ViuTV節目《飛不甩家毛》，結果來到2018年12月才有機會刊登 ── 看看他的鬈曲髮型就知道「歷史悠久」了 ── 「舊文」能夠重見天日，完全基於兩個原因：他說的內容有重點；適逢聖誕新年，絕對是「清劇」的「黃金檔期」，而今次「科科」推介的，不是自己有份演出的港劇，而是美劇《異類》（Atypical）。
我記得訪問時，問他最近有沒有看哪些電視節目，他說自己家中，基本上都是長開新聞台。我追問，劇集呢，有沒有？「前排睇咗一套，要『嚴重推介』，《Atypical》，你有冇睇呀？」我說我知道有這套劇，「科科」聽罷，即時興奮得拍了枱一下：「好好睇！」有幾好睇呀，我着他解釋：「睇到喊㗎我！」難道「科科」你是……「我冇，係因為以前同我同屋主呢，佢有少少，類似咁樣嘅自閉症，喺香港嘅，咁我同佢住咗5、6年，但佢冇咁嚴重嘅，唔係去到（劇集）嗰個程度，但佢有好多……簡單嚟講，係會有啲Introvert（性格內向），好唔識表達自己，但係好聰明，講嘢好直，咁會好得罪到人，一個咁樣嘅人，我同佢相處5、6年，所以我睇呢套嘢嘅時候，就更加多感受，然後我覺得Netflix拍呢個題材拍得好好，選角好勁，演戲Wise太好喇。」
「科科」說的，是指《Atypical》的男主角Keir Gilchrist，他在劇中飾演自少患有自閉症的18歲少年Sam Gardner，一直在母親Elsa （Jennifer Jason Leigh飾）過份保護下成長，父親Dough （Michael Rapaport 飾）不太懂跟兒子溝通，而妹妹Casey（Brigette Lundy-Paine飾）則一直擔當守護者角色。在Sam決心踏上尋找愛情及如何學習獨立之路的旅程上（他第一季，第一集已跟輔導員說自己想找女朋友！），家人不經意也同時獲得許多新的體會及思考「何為正常」。結果原本只是一位少年單純的成長爭扎故事，卻漸漸地由這個家庭開始，產生微妙卻窩心的變化。
我身邊沒有自閉症（Autism Spectrum Disorder）的朋友，但透過觀看《Atypical》（以及之前看電影《黃金花》）之後，的確對於這種患者及其家人面對的難處和困境有更深認識，編劇團隊花了不少篇幅向觀眾說明，到底自閉症患者會有哪些行為和思想特質：行為重覆、患有社會障礙、對事物的專注度極高（如男主角Sam非常熱愛研究企鵝）、待在又吵又陌生的環境會覺得辛苦，會無法思考，亦有些「個別」例子，未必每個患者皆有，在外人眼中或會覺得很古怪，比如Sam不喜歡椅背緊貼身體的感覺、會用一個頻率用橡筋轉動鉛筆（他自稱為「自我刺激行為」My Self-Stimulatory Behaviour）、有時候對於一些特定辭彙（如Twat ─ 賤婦）會不停在腦中重覆出現，又或者：「當我還小的時候，每次覺得沮喪或緊張，我會打或者撞我的頭，或者大叫，現在就會圍着睡床走。」
看了兩集，赫然發現，我對這個病一無所知，「科科」亦這樣說，覺得對於朋友日常生活面對的問題，他有更深了解。「有呀，我咪即刻叫佢睇，佢睇完之後咪話：『嗯～呢個係我嚟嘅！』」繼而是反思。「即係好多時候，你睇一樣嘢，點解你會覺得Connected呢？係因為你覺得你生命中有經歷過呢樣嘢嘛嘛，或者帶畀你Fantasy，即係佢將你帶咗去另一個空間，去體驗嗰樣嘢，咁我睇《Atypical》嘅時候，我親身體會到我朋友嗰個痛苦！」我追問，是怎樣的痛苦呢？他續說：「咪即係一個好Introvert嘅人，喺呢個社會入面生存嘅痛苦，因為大部份人可能講嘢好……偏向圓滑啲啦，尤其係中國人社會，因為外國人社會係比較Individualism，即係好獨立，你同我講嘢好唔同都得㗎。」駱振偉直接用《Atypical》一劇作例，他說自己覺得好睇，若然其他人覺得很難睇：「so what？It’s okay！」
我聽駱振偉這樣說，當堂笑了一下，因為我很明白，香港地，很多人都只求「拗贏人哋」，而不是「各自表述」，「即係如果我講：『好難睇囉！』你就會Take it serious，『吓？你覺得難睇，唔係吓嘛？你白痴㗎？你明唔明呀！」我意思係，嗰個Discussion好短架，但外國唔係咁，你可以講點解你覺得好，我可以講畀你聽，點解我覺得好睇，而大家係完全唔存在需要有共識，講完就算。」
「科科」的意思是，「唔啱Channel」就是「唔啱Channel」，沒有必要完全認同對方，「點解一定要搵番啱Channel嘅人去講嘢呢？我唔明嘅，即係啱Channel，使乜講啫？一樣㗎啦，我都知你諗乜啦吓嘛，最多可能你欣賞嘅嘢有少少唔同，但都係同一個方向，咁咪好悶囉，但係點解唔可以你鍾意呢個方向，我唔鍾意喺呢度，咁可能會得出嚟喺呢度，即係『A＋B＝C』啫，Really Simple Equation，但喺香港好難做到囉。」難怪「科科」跟丹麥女友Katrine那麼投契吧，他大笑認同：「因為佢係外國人嘛，所以有好多嘢，我同佢諗法都好唔同，但係我哋相處到，因為我都唔會理佢點諗，哈哈哈！」《Atypical》足兩季，現已全數在Netflix上架。
《Atypical》第二季預告：http://bit.ly/2Q5mFcb
（28122018）
＃游大東 ＃游大東影視筆記 ＃美劇 有台channel D 歐美劇評節目 - American Sun 美劇癮 歐美娛樂 網台評論節目 美劇狂人 TV Drama Queen 快樂的 ViuTV Thor Lok Netflix Atypical ＃異類 ＃電視框外 ＃游大東電視框外
